https://www.facebook.com/296223643563399/

Shri Chakanayana, Bhubaneswar (2026)

30/04/2025

🙏🌷ଶ୍ରୀମନ୍ଦିରେ ଅକ୍ଷୟ ତୃତୀୟା ନୀତି🌷🙏

ଲୀଳା ମନୁଷ୍ଯ କଳେବର
ଦେବ ମାନବେ ଅଗୋଚର।।🙏

ଭକ୍ତକବି ଅତିବଡ଼ି ଶ୍ରୀ ଜଗନ୍ନାଥ ଦାସଙ୍କ ବିରଚିତ ଓଡ଼ିଆ ଭାଗବତର ଏହି ପଦଟି ଆମ ଲୀଳାମୟ କଳାଠାକୁରଙ୍କ ଦୈନନ୍ଦିନ ମାନବୀୟ ଲୀଳାକୁ ପ୍ରତିପାଦିତ କରେ। ଲୋକମୁଖ ରେ ବହୁଳ ଭାବରେ ପ୍ରଚଳିତ ଥିବା ଉକ୍ତି ଟି ର ସାର୍ଥକତା ପ୍ରତିପାଦିତ କରିବାକୁ ଯାଇ ଲୀଳାମୟ ମହାପ୍ରଭୁ ଶ୍ରୀ ଜଗନ୍ନାଥ ଗ୍ରୀଷ୍ମ କାଳ ରେ ପ୍ରଚଣ୍ଡ ଉତ୍ତାପ ରେ ଅତିଷ୍ଠ ହୋଇ ବୈଶାଖ ଶୁକ୍ଳ ତୃତୀୟା ବା ଅକ୍ଷୟ ତୃତୀୟା ଠାରୁ ଶୀତଳତା ର ଲୀଳା ଚନ୍ଦନ ଲାଗି ତଥା ପବିତ୍ର ନରେନ୍ଦ୍ର ସରୋବରରେ ଚନ୍ଦନ ଚାପଯାତ୍ରାର ଶୁଭାରମ୍ଭ କରିଥାନ୍ତି। ବିଷ୍ଣୁ ପୁରାଣ ଅନୁଯାୟୀ, ବୈଶାଖ ମାସ ରେ ଶ୍ରୀ ହରିବିଷ୍ଣୁଙ୍କୁ ଶ୍ରୀମଧୁସୂଦନ ନାମରେ ପୂଜା କରାଯାଇଥାଏ। ଏହି ମାସ ରେ ଶ୍ରୀ ଅଙ୍ଗ ରେ ଚନ୍ଦନଲାଗି କଳାଠାକୁରଙ୍କୁ ଅତି ପ୍ରିୟ ଲାଗିଥାଏ।

ବଡ଼ଦେଉଳ ରେ ଚୈତ୍ର ପୂର୍ଣ୍ଣିମା ଠାରୁ ହିଁ ଚନ୍ଦନ ଯାତ୍ରା ର ପ୍ରସ୍ତୁତି ପର୍ବ ଆରମ୍ଭ ହୋଇଯାଇଥାଏ। ଶ୍ରୀ କ୍ଷେତ୍ରର ବିଭିନ୍ନ ମଠ ଓ ଶ୍ରୀ ମନ୍ଦିର ପ୍ରଶାସନ ଯୋଗାଇ ଦେଇଥିବା ବିଭିନ୍ନ ସାମଗ୍ରୀ - ଚନ୍ଦନ କାଠ , କର୍ପୁର , କେଶର , ଜାଇଫଳ ଓ ଚୁଆ ଇତ୍ୟାଦି ସୁଗନ୍ଧିତ ଦ୍ରବ୍ୟ ର ଲେପ ମିଶ୍ରଣ ଚନ୍ଦନ ଘରେ ଘଟୁଆରୀ ସେବକମାନଙ୍କ ଦ୍ୱାରା ପ୍ରସ୍ତୁତ କରାଯାଇଥାଏ। ଏହି ଚନ୍ଦନ ବୈଶାଖ ଶୁକ୍ଳ ଦ୍ଵିତୀୟା ଦିନ ସନ୍ଧ୍ୟା ସୁଦ୍ଧା ପ୍ରସ୍ତୁତ ହୋଇସାରିଥାଏ। ଦ୍ଵିତୀୟା ଦିନ ସନ୍ଧ୍ୟାଧୂପ ନୀତି ସମ୍ପନ୍ନ ହେବାପରେ ଭୋଗମଣ୍ଡପ ଘର ଧୋ ପଖାଳ ହୋଇ ଚନ୍ଦନ ରଖାଯାଇ ପୂଜାପଣ୍ଡା ଙ୍କ ଦ୍ଵାରା ଅଧିବାସିତ ହୋଇଥାଏ। ଏହାପରେ ଦୈନିକ ରୀତି ରେ ଚନ୍ଦନଲାଗି, ବଡ଼ସିଂହାର ଓ ପହୁଡ଼ ଆଦି ଯଥା ରୀତି ସମ୍ପାଦିତ ହୋଇଥାଏ । ସୂଚନାଯୋଗ୍ୟ ଯେ, ଯେପରି ଜଣେ ସାଧାରଣ ମନୁଷ୍ୟ ର ମନରେ କୌଣସି କାର୍ଯ୍ୟ ଆଦି ର ପୂର୍ବ ରାତ୍ର ରେ ମନରେ ଉତ୍ସାହ ବା ଚଞ୍ଚଳତା କାରଣରୁ ସଠିକ ଭାବେ ନିଦ ହୁଏ ନାହିଁ , ପ୍ରାତଃ କାଳ ର ଅପେକ୍ଷା ଥାଏ। ଠିକ ସେହିପରି ମହାପ୍ରଭୁ ଙ୍କର କୌଣସି ଦିନ ଅଧିବାସ ହୋଇଥିଲେ , ଅନୁଷ୍ଠିତ ହେବାକୁ ଥିବା ଉତ୍ସବ ନିମିତ୍ତ ମହାପ୍ରଭୁ ଙ୍କୁ ସଠିକ ଭାବେ ନିଦ ହୁଏନାହିଁ। ଏହିକାରଣରୁ ଅଧିବାସ ହୋଇଥିବା ଦିନ ପହୁଡ଼ ସମୟରେ ଶୟନ ଠାକୁର ଭିତରକୁ କିମ୍ବା ଡମ୍ବରୁ ଉପରକୁ ବିଜେ ହୁଅନ୍ତି ନାହିଁ।

ଅକ୍ଷୟ ତୃତୀୟା ଦିନ ଦ୍ୱାରଫିଟା ଠୁ ଆରମ୍ଭ କରି ଆଳତି , ଅବକାଶ , ବଲ୍ଲଭ ଓ ସକାଳ ଧୂପ ପର୍ଯ୍ୟନ୍ତ ସମ୍ପନ୍ନ ହୋଇସାରିବା ପରେ ଭିତରେ ମଇଲମ ହୋଇ ଯାତ୍ରାଙ୍ଗି ମହାସ୍ନାନ ଅନୁଷ୍ଠିତ ହୋଇଥାଏ।ଏହାପରେ ବିନା ଉତ୍ତରୀୟ(ଶିର କପଡା) ଓ ପହରଣା ରେ ନୂଆଲୁଗା ଲାଗି ହୋଇଥାଏ ଏବଂ ଛ ମୂର୍ତ୍ତି ଅଳଙ୍କାର ଲାଗି ହୋଇ ଭିତରେ ପାଣି ପଡିଥାଏ।ଏହି ପର୍ଯ୍ୟନ୍ତ ନୀତି ସରିବା ପରେ ଭୋଗମଣ୍ଡପ ଘର ମୁଦ ଫିଟି ପୂଜାପଣ୍ଡା ,ପତିମହାପାତ୍ର , ମୁଦିରସ୍ତ ଓ ତିନିଜଣ ପାଳିଆ ପୁଷ୍ପାଳକ ମାନଙ୍କ ଦ୍ୱାରା ଚନ୍ଦନ ବେଢା ହୋଇଥାଏ। ଏହାପରେ ଚନ୍ଦନ ପିଙ୍ଗଣ ମାନ ଭିତର ସିଂହାସନ ଉପରେ ରଖାଯାଏ। ଏହିପରି ଅବସ୍ଥା ରେ ଏକ ଖାଇକୋରା ଭୋଗ ସମ୍ପନ୍ନ ହୋଇଥାଏ। ଏହାପରେ ପଣ୍ଡା ପତି ମୁଦିରଥ, ତିନିଜଣ ପାଳିଆ ପୁଷ୍ପାଳକ ଓ ତିନିଜଣ ମେକାପ ସିଂହାସନ ଉପରକୁ ଉଠିଥାନ୍ତି। ମେକାପ ମନେ ଶ୍ରୀଅଙ୍ଗ ସ୍ପର୍ଶ ନ କରି ପଣ୍ଡା ପତି ମୁଦିରଥ ଓ ତିନିଜଣ ପାଳିଆ ପୁଷ୍ପାଳକ ମାନଙ୍କ ହାତକୁ ଚନ୍ଦନ ବଢ଼ାଇ ଥାନ୍ତି ଓ ମହାପ୍ରଭୁ ଙ୍କ ସମ୍ପୂର୍ଣ୍ଣ ଶ୍ରୀଅଙ୍ଗ ଓ ପେଟ ର ଅର୍ଦ୍ଧେକ ଭାଗ ଏହି ସୁଗନ୍ଧିତ ଦ୍ରବ୍ୟ ମିଶ୍ରିତ ଚନ୍ଦନରେ ସୁଶୋଭିତ ହୋଇଥାଏ। ଚନ୍ଦନଲାଗି ନୀତି ପରେ ଚନ୍ଦନଲାଗି ସମୟରେ ଲାଗୁଥିବା ପୁଷ୍ପ ନିର୍ମିତ ଚୁଳ, ଅଳକା , ଶ୍ରୀମସ୍ତକ ରୁ ଶ୍ରୀପୟର ପର୍ଯ୍ୟନ୍ତ ଲମ୍ବିଥିବା ଚଉସରି ମାଳ ଓ ଅନ୍ୟାନ୍ୟ ଦୈନନ୍ଦିନ ବ୍ୟବହୃତ ପୁଷ୍ପ ଅଳଂକାର ମାନଙ୍କ ଦ୍ୱାରା ଓ ପରିଶେଷ ରେ କର୍ପୁରଲାଗି ହୋଇ ବେଶ ବଢିଥାଏ। ଏହାପରେ ମଧ୍ୟାହ୍ନଧୂପ ଅନୁଷ୍ଠିତ ହୁଏ। ମଧ୍ୟାହ୍ନଧୂପ ବଢିବା ପରେ ପଣ୍ଡା ପତି ମୁଦିରଥ ମାନଙ୍କ ଦ୍ୱାରା ଦ୍ଵାଦଶ ଯାତ୍ରା ବନ୍ଦାପନା ହୋଇଥାଏ। ଏହାପରେ ପାଣି ପଡି ଯାତ ଭୋଗ ନିମନ୍ତେ ପୂଜା ଠା ହୋଇ ଭୋଗ ଡାକି ଯାଇଥାଏ।ତତ୍ପରେ ଶ୍ରୀମଦନମୋହନ ଓ ରାମକୃଷ୍ଣ ଭିତର ସିଂହାସନରେ ଯଥାକ୍ରମେ ମହାପ୍ରଭୁଙ୍କ ବାଡେ ଓ ବଡବାଡେ ବିଜେ କରିଥାନ୍ତି।ଏହାପରେ ଯାତଭୋଗ ପଞ୍ଚୋପଚାର ବିଧିରେ ସମ୍ପନ୍ନ ହୋଇଥାଏ।ଭୋଗ ସରିବା ପରେ ଆଜ୍ଞାମାଳ ପ୍ରଦାନ କରାଯାଏ। ବଡବାଡ଼ ରୁ ରାମକୃଷ୍ଣ ଙ୍କ ମଧ୍ୟରୁ ରାମ ଙ୍କୁ ଓ ମହାପ୍ରଭୁଙ୍କ ବାଡ଼ ରୁ ଶ୍ରୀ ମଦନମୋହନାଦି ଙ୍କୁ ଆଜ୍ଞାମାଳ ପ୍ରଦାନ କରାଯାଇଥାଏ।ଏହାପରେ ଦିଅଁ ମୁକ୍ତିମଣ୍ଡପ ନିକଟରେ ଥିବା ବିମାନ ଓ ପାଲିଙ୍କି ରେ ବିଜେ କରନ୍ତି। ବିମାନରେ ଦିଅଁ ରୁନ୍ଧା ହେବା ପରେ ମାଳଫୁଲ ଲାଗି ହୋଇ ବେଶ ହୋଇଥାନ୍ତି।ଏହାପରେ ଘଣ୍ଟ,ଶୁକ୍ଳ ଓ କୃଷ୍ନ ଛତା,ତ୍ରାଶ, ଓଲାର,କାହାଳୀ ଓ ବୈଜୟନ୍ତ୍ରୀ ପଟୁଆର ରେ ବିମାନ ଓ ପାଲିଙ୍କି ବିମାନବଡୁ ମାନଙ୍କ ସ୍କନ୍ଧଆରୋହଣ କରି ପଟୁଆର ନରେନ୍ଦ୍ର ସରୋବର ଅଭିମୁଖେ ଯାତ୍ରା କରିଥାନ୍ତି।ଏହି ମାର୍ଗ ରେ ଶ୍ରୀମନ୍ଦିର ଭିତରେ , ବାହାରେ, ନରେନ୍ଦ୍ର ସରୋବର ପର୍ଯ୍ୟନ୍ତ ବିଭିନ୍ନ ବ୍ୟକ୍ତି ବିଶେଷ, ଅନେକ ମଠ, ଶ୍ରୀ ନହର ଆଦି ରେ ପନ୍ତି ର ବ୍ୟବସ୍ଥା ରହିଥାଏ।ସିଂହଦ୍ୱାର ନିକଟରେ ପଞ୍ଚ ମହାଦେଵ ଏହି ପଟୁଆର ରେ ସାମିଲ ହୁଅନ୍ତି ।

ଭକ୍ତ ମାନଙ୍କ ଗହଣରେ ଦଶାବତାର , ମଙ୍ଗଳଗୀତ, ମଣି ବିମାନେ ଗୋବିନ୍ଦ........... , ଦେଖଗୋ ଆଗୋ ସଖି ଦେଖଗୋ...…. ଆଦି ସଂଗୀତ ଓ କୀର୍ତ୍ତନ , ହରିବୋଲ ହୁଳହୁଳି ରେ ପ୍ରକମ୍ପିତ ହୋଇ ପଟୁଆର କୁ ଅତ୍ୟନ୍ତ ଭାବ ପୂର୍ଣ୍ଣ ଓ ବଡ଼ଦାଣ୍ଡ କୁ ଆନନ୍ଦ ଉଲ୍ଲାସରେ ପରିପୂର୍ଣ୍ଣ କରିଥାଏ।ଉକ୍ତ ଦିନ ଚନ୍ଦନଯାତ୍ରା ର ପ୍ରଥମ ଦିବସ ହୋଇଥିବା ଯୋଗୁଁ ପଟୁଆର ରେ ଅନେକ କୀର୍ତ୍ତନୀୟା ଦଳ , ନାଗା, ମେଢ ତଥା ବିଭିନ୍ନ ଖେଳ ପ୍ରଦର୍ଶନ ଓ ଅନେକ ଶୋଭନୀୟ ଦୃଶ୍ୟ ସାମିଲ ହୋଇଥାଏ।ଏହିଦିନ ରଥ ନିର୍ମାଣ କାର୍ଯ୍ୟ ଅନୁକୁଳ ଥିବାରୁ ଏହି ପଟୁଆର ସାଙ୍ଗରେ ତିନିଜଣ ପାଳିଆ ପୂଜାପଣ୍ଡା ମାନଙ୍କ ଦ୍ୱାରା ତିନିବାଡରୁ ତିନିଖଣ୍ଡ ଆଜ୍ଞାମାଳ ନିର୍ମାଣ ଅନୁକୂଳ ନିମିତ୍ତ ଆସିଥାଏ। ପଟୁଆର ରଥଖଳା ପାଖରେ ପହଞ୍ଚିବା ପରେ ଯେଉଁ ସ୍ଥାନ ରେ ଅନୁକୁଳ କରାଯାଏ (ଶ୍ରୀମନ୍ଦିର କାର୍ଯ୍ୟାଳୟ ସମ୍ମୁଖରେ) ସେହି ସ୍ଥାନ କୁ ବିମାନ ର ମୁଖ ହୋଇଥାଏ ।ମହାପ୍ରଭୁଙ୍କ ଚଳନ୍ତି ପ୍ରତିମା ମାଧ୍ୟମରେ ପ୍ରଭୁ ନିଜେ ଉପସ୍ଥିତ ହୋଇ ଅନୁକୁଳ କାର୍ଯ୍ୟ ସମ୍ପାଦନ କରାଇଥାନ୍ତି। ଓ ପରେ ପଟୁଆର ନରେନ୍ଦ୍ର ଅଭିମୁଖେ ଯାତ୍ରା କରେ। ଚନ୍ଦନ ଚକଡ଼ା ଠାରେ ପହଂଚିବା ପରେ ପଥ ଶ୍ରମ କାରଣରୁ ମହାପ୍ରଭୁ ଙ୍କୁ କାଳେ ତୃଷ୍ଣା ହେଉଥିବ କି, ଏହି ଭାବ ନେଇ ଭିତରଚ୍ଛ ମହାପାତ୍ର ଙ୍କ ଦ୍ଵାରା ଘସା ଜଳ ଅର୍ପଣ ବା ଜଳଲାଗି ସମ୍ପନ୍ନ ହୋଇଥାଏ। ଏହାପରେ ମଦନମୋହନ , ଭୂଦେବୀ ଓ ଶ୍ରୀଦେବୀ ଶୁକ୍ଳ(ନନ୍ଦା) ଚାପ ରେ ଓ ରାମକୃଷ୍ଣ , ପଞ୍ଚ ମହାଦେବ ରକ୍ତ ବର୍ଣ୍ଣ (ଭଦ୍ରା)ଚାପ ରେ ବିଜେ କରନ୍ତି।ଶୁକ୍ଳ ବର୍ଣ୍ଣ ଚାପଟି ସାନ ଓ ରକ୍ତ ବର୍ଣ୍ଣ ଚାପ ଟି ବଡ଼ ଚାପ ଅଟେ। ଏଥିମଧ୍ଯରୁ ଶୁକ୍ଳ ଚାପ ରେ ଗୋଟିଏ ସିଂହାସନ ଥାଏ ଓ ଏହିଥିରେ ମଦନମୋହନ ଓ ଭୂଦେବୀ ଶ୍ରୀଦେବୀ ବିଜେ କରନ୍ତି। ବଡ଼ ଚାପ ରେ ଆଗ ପଛ ହୋଇ ଦୁଇଟି ସିଂହାସନ ମଧ୍ୟରୁ ଅଗ ଟିରେ ଶ୍ରୀରାମକୃଷ୍ଣ ଓ ପଛଟିରେ ପଞ୍ଚ ମହାଦେବ ବିଜେ କରିଥାନ୍ତି।ଦୁଇଟି ଡଙ୍ଗା ଉପରେ ଗୋଟିଏ ପୀଠ କରି ସମ୍ମୁଖ ଭାଗରେ ଉନ୍ମୁକ୍ତ ପକ୍ଷ ଯୁକ୍ତ ହଂସ ସଂଯୋଗ କରି ଗୋଟିଏ ଗୋଟିଏ ଗୋଟିଏ ଚାପ ନିର୍ମାଣ କରାଯାଇଥାଏ।ବଡ଼ ଚାପ ଟି ପ୍ରଥମ ଓ ପରେ ସାନ ଚାପ ଟି ବିଜେ କରିଥାଏ ।ଏହା ପୂର୍ବରୁ ଏକ ଡଙ୍ଗା ରେ ବୈଜୟନ୍ତ୍ରୀ ଯାଇଥାଏ।ଏହା ଚାପ ଆରମ୍ଭ ରୁ ଶେଷ ପର୍ଯ୍ୟନ୍ତ ଆଗେ ଆଗେ ଚାଲିଥାଏ।ଦିଅଁ ଚାପ ରେ ବିଜେ ହେବାପରେ ଚାପ ମଧ୍ୟରେ ଘଣ୍ଟ ,ଛତା , କାହାଳୀ, ଚାମର ଆଦି ଦ୍ୱାରା ସୋଭିତ ହୋଇ ସେବାପ୍ରିୟ ସେବା ମାନ ଗ୍ରହଣ କରି ଆନନ୍ଦ ଉଲ୍ଲାସର ସହ ନାବକେଳି କରନ୍ତି। ଚାପ ଚାଲୁଥିବା ସମୟରେ ହଡ଼ପନାଏକ ବିଡ଼ିଆ ମଣୋହି କରୁଥାନ୍ତି।ଦିନଚାପ ଶେଷ ହେବାପରେ ଦିଅଁ ଚାପରେ ମଇଲମ ହୋଇ ଭିତର ଚକଡ଼ା କୁ ବିଜେ କରନ୍ତି।ଏହାକୁ ଦିନଚାପ କୁହାଯାଏ।ଏହାପରେ ଶ୍ରୀରାମକୃଷ୍ଣ , ପଞ୍ଚ ମହାଦେବ ଓ ମଦନମୋହନ ଆଦି ପୃଥକ ପୃଥକ ଗୃହ କୁ ବିଜେ କରନ୍ତି।ମଧ୍ୟ ଭାଗରେ ଥିବା ବଡ଼ ଗୃହଟିରେ ଶ୍ରୀମଦନମୋହନ ଭୂଦେବୀ ଶ୍ରୀଦେବୀ ବିଜେ କରନ୍ତି। ଗୃହ ର ବାମ ପାର୍ଶ୍ୱ ରେ ଥିବା ଏକ କ୍ଷୁଦ୍ର ଗୃହ କୁ ଶ୍ରୀରାମକୃଷ୍ଣ ବିଜେ କରନ୍ତି ଏବଂ ଦକ୍ଷିଣ ପଟେ ଥିବା ଅନ୍ୟ ଏକ ଗୃହ କୁ ପଞ୍ଚ ମହାଦେବ ବିଜେ କରନ୍ତି।ପୃଥକ ପୃଥକ ଗୃହ ରେ ବିଜେ କରିବା ପରେ ଲୁଗା ମଇଲମ ହୋଇ କ୍ଷୁଦ୍ର ବସ୍ତ୍ର ପରିଧାନ ପୂର୍ବକ ଦିଅଁ ମାନେ ଚନ୍ଦନ କର୍ପୁର ଜାଇଫଳ ଆଦି ଶୀତଳ ପଦାର୍ଥ ମିଶ୍ରିତ ସୁଗନ୍ଧିତ ପୁଷ୍ପ ଯୁକ୍ତ ଜଳ କୁଣ୍ଡ ମଧ୍ୟରେ ଜଳକ୍ରୀଡ଼ା ନିମିତ୍ତ ବିଜେ କରିଥାନ୍ତି।କିଛି ସମୟ କୁଣ୍ଡ ରେ ଅବସ୍ଥାନ କରିବାପରେ ଶ୍ରୀରାମକୃଷ୍ଣ ମଦନମୋହନାଦି ଥିବା ଗୃହ କୁ ବିଜେ କରନ୍ତି। ଏହାପରେ ସେହି ଗୃହ ରେ ଥିବା ସମସ୍ତ ବିଗ୍ରହ ଜଳ ରୁ ଉଠି ବସ୍ତ୍ର ପରିଧାନ କରି ଶୀତଳଭୋଗ ଅର୍ପିତ ହୋଇଥାନ୍ତି।ଏହାପରେ ବାହାର ମଣ୍ଡପକୁ ମଦନମୋହନାଦି ବିଜେ ହୋଇ ସେଠାରେ ବେଶ ହୋଇଥାନ୍ତି। ପଞ୍ଚମହାଦେଵ ଜଳରୁ ଉଠି ସେହି ଗୃହ ମଧ୍ୟରେ ବେଶ ହୋଇଥାନ୍ତି। ସେଠାରେ ବେଶ ବଢିବା ଶୁଦ୍ଧା ସେହିଠାରେ ଥିବା ରୋଷ ଘରେ ମହାସୁଆର ଙ୍କ ଦ୍ଵାରା ମାଣ୍ଡୁଅ ତଥା ଅନ୍ୟାନ୍ୟ ଭୋଗ ପ୍ରସ୍ତୁତ କରାଯାଇଥାଏ।ବେଶ ବଢିବା ପରେ ଦିଅଁ ଭିତରକୁ ବିଜେ କରନ୍ତି। ଭିତରେ ପୂଜାପଣ୍ଡା ପଞ୍ଚୋପଚାର ବିଧିରେ ଭୋଗ ସାରିଥାନ୍ତି ।ପଞ୍ଚମହାଦେଵ ଙ୍କ ନିକଟରେ ସେମାନଙ୍କ ପାଳିଆ ମାନଙ୍କ ଦ୍ୱାରା ସର୍ପାମଣୋହି ରେ ଭୋଗ ହୋଇଥାଏ। ଭିତରେ ଭୋଗ ସରିବାପରେ ମଦନମୋହନାଦି ବାହାର ମଣ୍ଡପକୁ ବିଜେ କରନ୍ତି। ସେଠାରେ ହଡପନାଏକ ବିଡ଼ିଆ ମଣୋହି କରିଥାନ୍ତି । ଏ ଉତ୍ତାରୁ ଦିଅଁ ରାତିଚାପ କୁ ବିଜେ କରନ୍ତି।ରାତିଚାପ ପୂର୍ବବତ୍ ହୋଇଥାଏ । କେବଳ ରାତିଚାପରେ ଚନ୍ଦ୍ରଉଦିଆ ଆଦି ଆଲୋକମୟ ବାଣ ମାନ ଫୁଟାଯାଏ। ବେଳେ ବେଳେ ଚାପ ସମୟରେ ଚାପ ବାହାରେ କୁଳ ରେ ପାହାଚ ଉପରେ ଅନେକ ଆତଶବାଜି ମଧ୍ୟ ଫୁଟିଥାଏ।ଏହାପରେ ରାତିଚାପ ସାରି ଦିଅଁ ଜେଯାହା ବିମାନ ତଥା ପାଲିଙ୍କି କୁ ବିଜେ କରନ୍ତି ଓ କେବଳ ଘଣ୍ଟ ଛତା ପଟୁଆର ରେ ଶ୍ରୀମନ୍ଦିର କୁ ପ୍ରତ୍ୟାବର୍ତ୍ତନ କରନ୍ତି ।ପଞ୍ଚମହାଦେଵ ମଧ୍ୟ ନିଜ ନିଜ ମନ୍ଦିର କୁ ପ୍ରତ୍ୟାବର୍ତ୍ତନ କରନ୍ତି।ବିମାନ ପୂଜାପଣ୍ଡା ନିଯୋଗ ସମ୍ମୁଖରେ ରଖାଯାଏ। ଭୂଦେବୀ ଶ୍ରୀଦେବୀ କୌଣସି ନୀତି ନହେଉଥିବା ସମୟରେ ଭିତରୁ ବିଜେ କରନ୍ତି ଓ ମଦନମୋହନ ,ରାମକୃଷ୍ଣ ଦକ୍ଷିଣ ଘର କୁ ବିଜେ ହୋଇ ସେଠାରେ ମଇଲମ ହୋଇଥାନ୍ତି ଓ ଅନ୍ୟାନ୍ୟ ନୀତି ବଢିଥାଏ।ଏପଟେ ଭିତରେ ଦିଅଁ ଚାପ କୁ ବିଜେ କରିବା ପରେ ପାଣିପଡି ମଇଲମ ହୋଇ ସନ୍ଧ୍ୟାଆଳତି ବେଶ ହୋଇଥାନ୍ତି। ଏହି ବେଶ ରେ ମହାପ୍ରଭୁ ଚନ୍ଦନଲାଗି ଚାଲିଥିବା ପର୍ଯ୍ୟନ୍ତ ଶୁକ୍ଳ ସୂତା ଲୁଗା ପରିଧାନ କରନ୍ତି । ବେଶ ବଢି ସନ୍ଧ୍ୟା ଆଳତୀ ଓ ସନ୍ଧ୍ୟାଧୂପ ସରିବା ପରେ ଜୟବିଜୟ ଦ୍ୱାର ବନ୍ଦ କରାଯାଇ ସମଗ୍ର ଶ୍ରୀମନ୍ଦିର କୁ ଅନ୍ଧାର କରାଯାଇଥାଏ। ଏହାପରେ ପାଳିଆ ପୁଷ୍ପାଳକ ମଇଲମ କୁ ଯାଇଥାନ୍ତି। ମଇଲମ ହୋଇ ଦିଅଁ ଏକ ବିଶେଷ ଲୁଗା ପରିଧାନ କରନ୍ତି ଯାହାର ନାମ ମାଧାବଳି। ଏହି ଲୁଗା ପରିଧାନ ପରେ ଭିତରୁ ଅଖଣ୍ଡ ଦୀପ ଲିଭିଥାଏ ଓ ସମ୍ପୂର୍ଣ୍ଣ ଅନ୍ଧକାର ମଧ୍ୟରେ ମହାପ୍ରଭୁ ଙ୍କର ଆଲଟ ଲାଗି (ପଙ୍ଖା) ସେବା ସମାପିତ ହୋଇଥାଏ।ଆଲଟ ଲାଗି ସରିବାପରେ ତିନିବାଡ ର ପାଳିଆ ପୂଜାପଣ୍ଡା ଦିଅଁ ବିନା ମାଳ ଫୁଲ ଓ ଏକବସ୍ତ୍ର ପରିଧାନ କରିଥିବା ସମୟରେ , ବିନା ଘଣ୍ଟି ରେ ପଣାଭୋଗ କରିଥାନ୍ତି।ପଣା ଭୋଗ ସରିବା ପରେ ଦ୍ୱାର ଫିଟି ପୁନଶ୍ଚ ଶ୍ରୀମନ୍ଦିର ଅଲୋକମୟ ହୋଇଥାଏ। ଏହାପରେ ଚନ୍ଦନଲାଗି ହୋଇଥାଏ। ପ୍ରକାଶ ଥାଉ କି ଅକ୍ଷୟ ତୃତୀୟା ଠାରୁ ଚନ୍ଦନଲାଗି ନୀତି ସରିବା ଦିନ ଯାଏ ଦିଅଁ ଅତ୍ୟନ୍ତ ଉତ୍ତାପ ହେତୁ ପାଟବସ୍ତ୍ର ପରିଧାନ କରନ୍ତି ନାହିଁ।କେବଳ ପତନୀ ଓ ସୂତା ଶୁକ୍ଳଲୁଗା ପରିଧାନ କରନ୍ତି। କେବଳ ସକାଳଧୂପ ବେଶ ରେ ଖଣ୍ଡିଏ ଖଣ୍ଡିଏ ପାଟ କେବଳ ଶିରକପଡା(ଉତ୍ତରୀୟ) ହେଉଥିଲେ ହେଁ ପତନୀ ପରିଧାନ କରିଥାନ୍ତି।ଏପରିକି ବଡ଼ସିଂହାର ସମୟରେ ପରିଧାନ କରୁଥିବା ଗୀତଗୋବିନ୍ଦ ଲିଖିତ ଖଣ୍ଡୁଆ ଓ ଶ୍ରୀଭୁଜ ଓ ଅଧର ରେ ଲାଗିହେଉଥିବା ଫୁଟା ନାମକ ବସ୍ତ୍ର ପରିଧାନ କରନ୍ତି ନାହିଁ।ବଡ଼ସିଂହାର ବେଶ ରେ ପତନୀ ପରିଧାନ କରନ୍ତି ଓ ପହରଣା ଲାଗିହୁଏ।ଶିରକପଡା ବୋଇରାଣୀ ହୋଇଥାଏ।ବଡ଼ସିଂହାର ବେଶ ବଢିବା ପରେ ଅନ୍ୟାନ୍ୟ ନୀତି ହୋଇ ପହୁଡ଼ ହୋଇଥାଏ ।

ରସିକିଆ ଠାକୁରଙ୍କ ରସଭରା ନୀତିକାନ୍ତି।
ମହାପ୍ରଭୁଙ୍କର ଜୟ ହେଉ। 🙏

ଜୟ ଜଗନ୍ନାଥ🙏

🌸🌸🌸🌸🌸🌸🙏🌸🌸🌸🌸🌸🌸🌸

(ସଂଗୃହୀତ ଏବଂ ସଂଶୋଧିତ)

#ଅକ୍ଷୟତୃତୀୟା

Shri Chakanayana

30/04/2025

ଜୟ ଶ୍ରୀପର୍ଶୁରାମ 🙏
ଜୟ ଜଗନ୍ନାଥ🙏

#ଅକ୍ଷୟତୃତୀୟା
Shri Chakanayana

30/04/2025

କଳାଠାକୁରଙ୍କ ଅତିପ୍ରିୟ ଗୀତଗୋବିନ୍ଦର କାଳଜୟୀ ସ୍ରଷ୍ଟା ଭକ୍ତକବି ଶ୍ରୀଜୟଦେବ ଗୋସ୍ୱାମୀ ଅବିଭକ୍ତ ପୁରୀ ଜିଲ୍ଲାର ଅଠାନ୍ତର ବାଲିପାଟଣା ବ୍ଲକ ଠାରୁ କିଛି ଦୂରରେ ଅବସ୍ଥିତ ପ୍ରାକୃତିକ ସୌନ୍ଦର୍ଯ୍ୟରେ ସୁଶୋଭିତ କେନ୍ଦୁବିଲ୍ଲ୍ୱ (କେନ୍ଦୁଲି) ଗ୍ରାମରେ ଆଜି ର ପବିତ୍ର ଅକ୍ଷୟତୃତୀୟା ତିଥିରେ ଜନ୍ମ ଲାଭ କରିଥିଲେ। ଭକ୍ତିଭାବ ସମ୍ପନ୍ନ ମାତାପିତାଙ୍କ ସ୍ନେହ ଓ ମାର୍ଗଦର୍ଶନ ରେ ପାଳିତ ଜୟଦେବ ପିଲାଦିନରୁ ହିଁ ଜଗନ୍ନାଥ ଭକ୍ତ ଥିଲେ। ଘରର ଆରାଧ୍ୟ ଶ୍ରୀ ରାଧାବିନୋଦବିହାରୀଙ୍କ ଶ୍ରୀବିଗ୍ରହ ପାଖେ ପ୍ରତିଦିନ ପିତାଙ୍କ ସହିତ ବସି ସ୍ତୁତି, ଜଣାଣ ଭଜନ ଆଦି ଗାନ କରୁଥିଲେ। କାଳାନ୍ତରେ ମାତାପିତାଙ୍କ ଶରୀରାନ୍ତେ ଶ୍ରୀ ପୁରୁଷୋତ୍ତମ କ୍ଷେତ୍ର ରେ ଆସି ଅବସ୍ଥାନ କଲେ। ଲୀଳାମୟ ମହାପ୍ରଭୁଙ୍କ ସ୍ୱପ୍ନାଦେଶ ଅନୁଯାୟୀ ଦାକ୍ଷିଣାତ୍ୟର ଜଣେ ବ୍ରାହ୍ମଣ ଦମ୍ପତ୍ତିଙ୍କର ଏକମାତ୍ର କନ୍ଯା ପଦ୍ମାବତୀଙ୍କ ସହିତ ତାଙ୍କର ବିବାହ ହୋଇଥିଲା। ପଦ୍ମାବତୀ ମଧ୍ଯ ପିଲାଦିନରୁ ଅତ୍ଯନ୍ତ ଭକ୍ତିମତୀ ଏବଂ ଶାସ୍ତ୍ରୀୟନୃତ୍ୟ କଳାରେ ପାରଙ୍ଗତା ଥିଲେ। ଧର୍ମପତ୍ନୀଙ୍କ ପ୍ରେରଣା ତଥା ସ୍ୱୟଂ ଶ୍ରୀ ଜଗନ୍ନାଥଙ୍କ ମାର୍ଗଦର୍ଶନରେ ଶ୍ରୀ ରାଧାକୃଷ୍ଣଙ୍କ ବିଶୁଦ୍ଧ ପ୍ରେମଭକ୍ତି କୁ ନେଇ ଶ୍ରୀ ଜୟଦେବ ରଚନା କରିଥିଲେ ଶ୍ରୀ ଗୀତଗୋବିନ୍ଦ ମହାକାବ୍ୟ। କଥିତ ଅଛି ଯେ, ଏକଦା ଗୀତଗୋବିନ୍ଦ ର ଏକ ସର୍ଗରେ ଏକ ପଦର ଶେଷ ବାକ୍ଯ ଟିଏ କ'ଣ ଲେଖିଲେ ପରିପୂର୍ଣ୍ଣ ହେବ ତାହା ଜୟଦେବ ଜାଣିପାରୁନଥିଲେ। ଏପଟେ ସ୍ନାନ ପୂଜା ଆଦି ପାଇଁ ବେଳ ଗଡି ଯାଉଥିବାରୁ ପଦ୍ମାବତୀ ତାଙ୍କୁ ସବୁ କାର୍ଯ୍ୟ ସମାପନ ପରେ ଭୋଜନ କରିସାରି ଭଲରେ ମନେ ପକାଇ ଲେଖିବ ବୋଲି ପରାମର୍ଶ ଦେଲେ। ଜୟଦେବ ମଧ୍ଯ ତାଙ୍କ କଥାନୁସାରେ ସ୍ନାନ ପାଇଁ ବାହାରି ଗଲେ। ଅଳ୍ପ କିଛି ସମୟ ପରେ ପୁନଶ୍ଚ ଜୟଦେବ ଘରଦୁଆରେ ପଦ୍ମାବତୀଙ୍କୁ ଡାକିଲେ ଏବଂ ତାଙ୍କ ପୋଥି ଓ ଲେଖନୀ ଆଣିବାକୁ କହିଲେ। ପଦ୍ମାବତୀ ମଧ୍ଯ ଆଶ୍ଚର୍ଯ୍ୟ ହେଲେ ଏତେ ଶୀଘ୍ର କେମିତି ଜୟଦେବ ସ୍ନାନ ସାରି ଆସିଗଲେ। ତେବେ ଜୟଦେବ ଲେଖା ସାରି ଠାକୁର ପୂଜା ଏବଂ ମଧ୍ଯାହ୍ନ ଭୋଜନ କରିସାରି ବିଶ୍ରାମ ନେବା ପାଇଁ ଚାଲିଗଲେ। ଜୟଦେବଙ୍କ ଭୋଜନାନ୍ତେ ପଦ୍ମାବତୀ ମଧ୍ଯ ଭୋଜନ କରିବାକୁ ବସିଲେ। ଠିକ୍ ଏହି ସମୟରେ ପୁନଶ୍ଚ ଦ୍ବାର ସମ୍ମୁଖ ରେ ନିଜ ପତି ଜୟଦେବଙ୍କୁ ଓଦା ବସ୍ତ୍ର ରେ ସ୍ନାନ ସାରି ଆସିଥିବା ଦେଖି ପଦ୍ମାବତୀ ଅତ୍ଯନ୍ତ ଆଶ୍ଚର୍ଯ୍ୟ ଓ ଭୟଭୀତ ହୋଇଗଲେ। ଏହା କିପରି ସମ୍ଭବ? ଜୟଦେବ ମଧ୍ଯ ଆଶ୍ଚର୍ଯ୍ୟ ହେଲେ କି ପଦ୍ମାବତୀ ଆଜି ପ୍ରଥମେ ଭୋଜନ କିପରି କରିନେଲେ? ତେବେ ପଦ୍ମାବତୀ ଜୟଦେବଙ୍କ ବିଶ୍ରାମକକ୍ଷ କୁ ଯାଇ ଦେଖନ୍ତି କି ସେ ସ୍ଥାନ ମହମହ ଚନ୍ଦନ କର୍ପୂର ବାସ୍ନା ରେ ପୂରି ଉଠୁଅଛି। ତତ୍ପଶ୍ଚାତ ସେ ଜୟଦେବଙ୍କୁ ସମସ୍ତ କଥା ଜଣାଇଲେ। ଜୟଦେବ ପ୍ରଥମେ ପଦ୍ମାବତୀ ପାଦତଳେ ପଡ଼ି ତାଙ୍କୁ ପ୍ରଣାମ କରିଚାଲିଲେ ଏବଂ ପଦ୍ମାବତୀଙ୍କ ବାରଣ ସତ୍ତ୍ବେ ତାଙ୍କ ଭୋଜନ ଥାଳିରୁ ଉଚ୍ଛିଷ୍ଟ ପାଇଲେ। ପଦ୍ମାବତୀ କିଛି ମଧ୍ଯ ବୁଝିପାରୁ ନଥାନ୍ତି। ଜୟଦେବ ସମସ୍ତ କଥା ତାଙ୍କୁ ବୁଝାଇଲେ କି ସ୍ୱୟଂ ମହାପ୍ରଭୁ ଶ୍ରୀ ଜଗନ୍ନାଥ ତାଙ୍କ ରୂପ ନେଇ ଆସି ସେ ଅଧୁରା ପଦକୁ ପୂର୍ଣ୍ଣ କରିବା ସହିତ ପଦ୍ମାବତୀଙ୍କ ହାତରନ୍ଧା ସେବନ କରିଛନ୍ତି।

ଏତେବଡ଼ ଭକ୍ତବତ୍ସଳ ମହାପ୍ରଭୁଙ୍କ ଏତେବଡ଼ ଭକ୍ତ ପରିବାରଙ୍କ ଚରଣକମଳରେ ଆମ ସମସ୍ତଙ୍କର ଭକ୍ତିପୂତ ପ୍ରଣାମ। 🙏🪷

ଜୟ ଜଗନ୍ନାଥ🙏

#ଅକ୍ଷୟତୃତୀୟା

Shri Chakanayana

©Shri Chakanayana

30/04/2025

🌞 ଅକ୍ଷୟ ତୃତୀୟା 🌞

ବୈଶାଖ ମାସ ଶୁକ୍ଳ ପକ୍ଷ ତୃତୀୟା ତିଥି ପବିତ୍ର ଅକ୍ଷୟ ତୃତୀୟା ବା ଅକ୍ଷି ତୃତୀୟା ଭାବେ ସୁବିଦିତ। ନୂତନ କାର୍ଯ୍ୟ ଅୟମାରମ୍ଭ ନିମନ୍ତେ ଏହି ଦିନଟି ହେଉଛି ପୂରା ବର୍ଷ ମଧ୍ୟରେ ସବୁଠାରୁ ଶୁଭ ତିଥି । ବିଶ୍ବାସ ରହିଛି, ଏହି ଦିନ କୌଣସି କାର୍ଯ୍ୟ ଆରମ୍ଭ କଲେ ତାହା କ୍ଷୟ ନହୋଇ ଅକ୍ଷୁର୍ଣ୍ଣ ରହିଥାଏ । ତେଣୁକରି ଏହିଦିନ ଅକ୍ଷିମୁଠି ଅନୁକୁଳ, ଗୃହନିର୍ମାଣ, ନିର୍ବନ୍ଧ, ବିବାହ, ଉପନୟନ ପ୍ରଭୃତି ବିଭିନ୍ନ ଶୁଭକାର୍ଯ୍ୟମାନ ଅନୁଷ୍ଠିତ ହୋଇଥାଏ ।

ଓଡ଼ିଆର ବାର ମାସରେ ତେର ପର୍ବ। ଶ୍ରୀପୁରୁଷୋତ୍ତମ କ୍ଷେତ୍ର ରେ ଆମ ମହାପ୍ରଭୁ ଶ୍ରୀଜଗନ୍ନାଥଙ୍କ ଚନ୍ଦନ ଯାତ୍ରା ମଧ୍ଯ ଏହି ପବିତ୍ର ଅକ୍ଷୟ ତୃତୀୟାଠାରୁ ଆରମ୍ଭ ହେଉଥିବା ବେଳେ ପ୍ରସିଦ୍ଧ ଶ୍ରୀ ଗୁଣ୍ଡିଚା ଯାତ୍ରା ପାଇଁ ରଥ ତିଆରି କାମ ମଧ୍ୟ ଆରମ୍ଭ ହୋଇଥାଏ । ଅକ୍ଷୟ ତୃତୀୟା ତିଥିରେ ଅକ୍ଷି ପୂଜା ହେବା ପରେ ବିଶ୍ଵକର୍ମା ଓ ତାଙ୍କର ସହଯୋଗୀଗଣ ରଥନିର୍ମାଣରେ ପ୍ରବୃତ୍ତ ହୋଇଥାନ୍ତି । ଏହି ଦିନରେ ସଧବା ସ୍ତ୍ରୀମାନେ ଷଠିବୁଢ଼ୀ ପୂଜା କରନ୍ତି । କେନ୍ଦ୍ରାପଡ଼ା ଅଧିପତି ଶ୍ରୀବଳଦେବଜୀଉ ମନ୍ଦିରରେ କୃଷିର ଆରାଧ୍ୟ ଦେବ ହଳାୟୁଧ ବଳରାମ ଓ ରେବତୀଙ୍କ ବିବାହୋତ୍ସବ ଅନୁଷ୍ଠିତ ହୁଏ । ମା ଅନ୍ନପୂର୍ଣ୍ଣାଙ୍କ ଜୟନ୍ତୀ, ଶ୍ରୀ ହରିବିଷ୍ଣୁଙ୍କ ଷଷ୍ଠ ଅବତାର ଭଗବାନ ପର୍ଶୁରାମଙ୍କ ଜୟନ୍ତୀ ତଥା ଆମ କଳାଠାକୁରଙ୍କ ଅତିପ୍ରିୟ ଗୀତଗୋବିନ୍ଦର କାଳଜୟୀ ସ୍ରଷ୍ଟା ଭକ୍ତକବି ଶ୍ରୀଜୟଦେବ ଗୋସ୍ୱାମୀଙ୍କ ଜୟନ୍ତୀ ମଧ୍ଯ ପାଳିତ ହୋଇଥାଏ।

ପୌରାଣିକ ଦୃଷ୍ଟିକୋଣରୁ ମଧ୍ଯ ଏ ଦିବସର ବିଶେଷ ମହତ୍ତ୍ୱ ରହିଅଛି। ଏହି ଦିନକୁ ସତ୍ୟ ଯୁଗର ପ୍ରାରବ୍ଧ ଦିବସ ରୂପେ ଗ୍ରହଣ କରାଯାଇଛି । ଅକ୍ଷୟ ତୃତୀୟାରେ ମହର୍ଷି ବେଦବ୍ୟାସଙ୍କ ଅନୁରୋଧରେ ଅଗ୍ରପୂଜ୍ୟ ଭଗବାନ ଶ୍ରୀଗଣପତି ମହାଭାରତ ମହାକାବ୍ୟ ଲେଖିବା ଆରମ୍ଭ କରିଥିଲେ । ପୌରାଣିକ କାଳରେ ଅକ୍ଷୟତୃତୀୟାରୁ ତ୍ରେତୟା ଯୁଗ ଆରମ୍ଭ ହେଉଥିବା ବେଳେ ରଘୁକୁଳ ଭୂଷଣ ଭଗବାନ ଶ୍ରୀ ରାମଚନ୍ଦ୍ରଙ୍କ ପୂର୍ବଜ ମହାରାଜ ଭଗିରଥଙ୍କ କଠିନ ତପସ୍ୟା ରେ ସନ୍ତୁଷ୍ଟ ହୋଇ ପତିତପାବନୀ ମା' ଗଙ୍ଗା ପିତାମହ ବ୍ରହ୍ମାଙ୍କ କମଣ୍ଡଳୁ ରୁ ବାହରି ଦେବାଧିଦେବ ମହାଦେବଙ୍କ ଜଟା ମାଧ୍ୟମରେ ଧରାପୃଷ୍ଠରେ ଅବତରିତ ହୋଇଥିଲେ ଏବଂ ମହାରାଜ ସଗରଙ୍କ ଷାଠିଏ ହଜାର ପୁତ୍ରଙ୍କୁ ମୁକ୍ତି ପ୍ରଦାନ କରିଥିଲେ। ଏହିତିଥିରେ ଭଗବାନ ଶ୍ରୀକୃଷ୍ଣ ତାଙ୍କର ବାଲ୍ୟ ବନ୍ଧୁ ସୁଦାମାଙ୍କୁ ଭେଟି ତାଙ୍କ ଦାରିଦ୍ର୍ୟର ଅନ୍ତ ଘଟାଇଥିଲେ । ଏଣୁ ଏହି ତିଥିକୁ ସମୃଦ୍ଧି ଓ ସୌଭାଗ୍ୟର ତିଥି ବୋଲି ବିଶ୍ୱାସ କରାଯାଏ । ଶାସ୍ତ୍ର ମତାନୁସାରେ ଏହିଦିନ ସୁବର୍ଣ୍ଣ ଦାନର ବିଶେଷ ମହତ୍ତ୍ବ ରହିଛି।

🌷🌷🌷🌷🌷🌷🙏🌷🌷🌷🌷🌷🌷🌷

(ସଂଗୃହୀତ ଏବଂ ସଂଶୋଧିତ)

ଜୟ ଜଗନ୍ନାଥ🙏

#ଅକ୍ଷୟତୃତୀୟା

Shri Chakanayana

©Shri Chakanayana

14/04/2025

ପବିତ୍ର ଉତ୍କଳୀୟ ନବବର୍ଷ ପଣାସଂକ୍ରାନ୍ତି ତଥା ହନୁମାନ ଜନ୍ମୋତ୍ସଵ ର ଅନେକ ଶୁଭେଚ୍ଛା ଏବଂ ଅଭିନନ୍ଦନ🙏 💐

ଜୟ ବୀର ହନୁମାନ 🙏🌺
ଜୟ ଜଗନ୍ନାଥ🙏 🌷
Shri Chakanayana

06/04/2025

ॐ ଶ୍ରୀ ରାମଂ ଲକ୍ଷ୍ମଣଂ ପୂର୍ବଜଂ ରଘୁବରଂ ସୀତାପତିଂ ସୁନ୍ଦରଂ
କାକୁସ୍ଥଂ କରୁଣାମୟଂ ଗୁଣନିଧିଂ ବିପ୍ରପ୍ରିୟଂ ଧାର୍ମିକଂ
ରାଜେନ୍ଦ୍ରଂ ସତ୍ଯସନ୍ଧଂ ଦଶରଥ ତନୟଃ ଶ୍ୟାମଳଂ ଶାନ୍ତମୂର୍ତ୍ତିଂ
ବନ୍ଦେ ଲୋକାଭିରାମଂ ରଘୁକୁଳ ତିଳକଂ ରାଘବଂ ରାବଣାରି।।

ଶ୍ରୀ ରାମାୟ ରାମଚନ୍ଦ୍ରାୟ ରାମଭଦ୍ରାୟ ବେଧସେ
ରଘୁନାଥାୟ ନାଥାୟ ସୀତାୟାଃ ପତୟେ ନମଃ।। 🙏🌺

ପବିତ୍ର ଶ୍ରୀରାମ ନବମୀ ର ଅନେକ ଶୁଭେଚ୍ଛା ଏବଂ ଅଭିନନ୍ଦନ🙏🌷

ଜୟ ଶ୍ରୀରାମ 🙏🌺
ଜୟ ଜଗନ୍ନାଥ🙏🌹

05/04/2025

ॐ ଧ୍ୟାୟେତ୍ ନିତ୍ୟଂ ମହେଶଂ ରଜତଗିରିନିଭୋ ଚାରୁଚ଼ନ୍ଦ୍ରାଂ ବତଂଶଂ
ରତ୍ନାକଳ୍ପୋ ଜ୍ୱଳାଙ୍ଗ ପରଶୁମୃଗବରା ଭୀତିହସ୍ତଂ ପ୍ରସନ୍ନଂ
ପଦ୍ମାସୀନଂ ସମସ୍ତାତ୍ ସ୍ତୁତି ମମରଗଣୈଃ ବ୍ୟାଘ୍ରକୃତିଂ ବସାନଂ
ବିଶ୍ୱାଦ୍ୟଂ ବିଶ୍ୱବନ୍ଦ୍ୟଂ ନିଖିଳ ଭୟହରଃ ପଞ୍ଚବକ୍ତ୍ରଂ ତ୍ରିନେତ୍ରଂ||🙏🌺

ଇତି ଶ୍ରୀ ପାର୍ବତୀପତେ! ହର ହର ମହାଦେବ 🙏🌼

ପବିତ୍ର ଅଶୋକାଷ୍ଟମୀ ତଥା ମହାପ୍ରଭୁ ଶ୍ରୀ ଲିଙ୍ଗରାଜଙ୍କ ରୁକୁଣାରଥଯାତ୍ରା ର ଅନେକ ଶୁଭେଚ୍ଛା ଏବଂ ଅଭିନନ୍ଦନ🙏

ଜୟ ଶ୍ରୀ ଲିଙ୍ଗରାଜ ମହାପ୍ରଭୁ🙏🌺

ଜୟ ଜଗନ୍ନାଥ🙏 🌺

01/04/2025

ପବିତ୍ର ଉତ୍କଳ ଦିବସର ହାର୍ଦ୍ଦିକ ଶୁଭକାମନା🙏 🌸
ବନ୍ଦେ ଉତ୍କଳ ଜନନୀ 🙏🌺
ଜୟ ଜଗନ୍ନାଥ🙏 🌷
Shri Chakanayana

08/03/2025

କୃଷ୍ଣାୟ ବାସୁଦେବାୟ ଦେବକୀନନ୍ଦନାୟ ଚ଼
ନନ୍ଦଗୋପ କୁମାରାୟ ଗୋବିନ୍ଦାୟ ନମୋନମଃ।।🙏🪷

ଶ୍ରୀ ପତିତପାବନ ମହାପ୍ରଭୁଙ୍କ ପ୍ରାତଃ ଦିବ୍ୟ ମଙ୍ଗଳ ଆଳତୀ ସମ୍ପନ୍ନ ହୋଇଅଛି।।

ଜୟ ଜଗନ୍ନାଥ🙏

Shri Chakanayana

07/03/2025

**ଧର୍ମାଚରଣ**
ଦିନେ ଜଣେ ବୋହୁ ଘର ସଫା କରୁଥିଲା , ପାନ ଖାଉଥିବାରୁ ପାନ ପିକ ଭୁଲ ବଶତଃ ଘରର ଯଜ୍ଞବେଦୀରେ ଥୁକିଦେଲେ ! କିନ୍ତୁ ସେ ଦେଖି ଆଶ୍ଚର୍ଯ୍ୟ ହୋଉଗଲେ ଯେ ତାଙ୍କ ଥମକି ଥିବା ସ୍ଥାନ ସ୍ୱର୍ଣ୍ଣରେ ପରିଣତ ହୋଇଯାଇଛି!

ଏବେ ସେ ପ୍ରତିଦିନ ଜାଣିଶୁଣି ଯଜ୍ଞବେଦୀରେ ଥୁକିବାକୁ ଲାଗିଲେ, ଏବଂ ଦିନ ଗଡିବା କ୍ରମେ ତାଙ୍କ ପାଖରେ ବହୁତ ସ୍ୱର୍ଣ୍ଣ ସଞ୍ଚୟ ହେବା ଲାଗିଲା।

ଏହି ଘଟଣା ଗାଁର ଅନ୍ୟ ମହିଳାମାନଙ୍କ ମଧ୍ୟରେ ଖୁବ ଶୀଘ୍ର ପ୍ରଚାର ହୋଇଗଲା। ଅନ୍ୟ ଘରର ମହିଳାମାନେ ମଧ୍ୟ ତାଙ୍କ ଘରର ଯଜ୍ଞବେଦୀରେ ଥୁକିବା ଆରମ୍ଭ କଲେ ଏବଂ ସ୍ୱର୍ଣ୍ଣ ସଂଗ୍ରହ କରିବାକୁ ଲାଗିଲେ।

କିଛି ଦିନ ପରେ ସମଗ୍ର ଗାଁରେ ଏହି ପଦ୍ଧତି ସାଧାରଣରେ ଚଳନ ହୋଇଗଲା।
କିନ୍ତୁ ଗାଁରେ ଜଣେ ମହିଳା ଥିଲେ, ଯିଏ ଏହା କରିବାକୁ ପ୍ରସ୍ତୁତ ହୋଇନଥିଲେ...

ଅନ୍ଯ ସ୍ତ୍ରୀ ଲୋକମାନେ ତାଙ୍କୁ ବହୁତ ବାର ଉତ୍ସାହିତ କଲେ, ବୁଝାଇଲେ –
"ତୁମେ କାହିଁକି ଏହା କରୁନାହଁ?"

ସେ ମହିଳା କହିଲେ –
"ମୁଁ ମୋର ପତି ଙ୍କ ଅନୁମତି ବିନା ଏପରି କିଛି କରିବି ନାହିଁ। ଏବଂ ମୋତେ ଜଣା ଯେ , ସେ କେବେ ବି ଏହି କାର୍ଯ୍ୟର ଅନୁମତି ଦେବେ ନାହିଁ।"

କିନ୍ତୁ ଅନ୍ୟ ମହିଳାମାନେ ତାଙ୍କ ଉପରେ ଅଧିକ ଚାପ ପକାଇଲେ। ଅନେକ ଭାବରେ ବୁଝାଇଲେ।

ଅବଶେଷରେ, ସେ ଦିନେ ରାତିରେ ତାଙ୍କ ପତିଙ୍କୁ ଏହି ବିଷୟରେ କହିଲେ।

ତାଙ୍କ ପତି କହିଲେ –
"ଖବରଦାର! ଏପରି କାର୍ଯ୍ୟ କେବେ ବି କରିବ ନାହିଁ! ଯଜ୍ଞବେଦୀ ଯଜ୍ଞ କରିବା ପାଇଁ ଉଦ୍ଦିଷ୍ଟ, ଥୁକିବା ପାଇଁ ନୁହେଁ!"

ପତିଙ୍କ କ୍ରୋଧ ଦେଖି ସେ ଚୁପ୍‌ ହୋଇଗଲେ ସତ କିନ୍ତୁ ତାଙ୍କ ମନରେ ତୀବ୍ର ଅନ୍ତର୍ଦ୍ୱନ୍ଦ ଚାଲିଲା।
ଅନ୍ୟ ମହିଳାମାନେ ତାଙ୍କୁ ସେମାନଙ୍କ ନୂତନ ସ୍ୱର୍ଣ୍ଣ ଅଳଙ୍କାର ଦେଖାଇ ଉପହାସ କଲେ। ଏହି ଦେଖି ସେ ଆତ୍ମଗ୍ଲାନିରେ ପଡ଼ିଲେ।

ସେ ଚିନ୍ତା କଲେ –
*"ହୋଇପାରେ ମୋ ଦୁଃଖ , ମୋ ପୂର୍ବଜନ୍ମର ପାପ... ମୋର ପତିଙ୍କ ତୀବ୍ର ନିଷେଧ କାରଣରୁ, ମୁଁ ସ୍ୱର୍ଣ୍ଣ ପାଇପାରିଲି ନାହିଁ।"*
ଏପରି ଧର୍ମ ନିୟମ ପାଳନ କରି କ'ଣ ଲାଭ ଯଦି ମୋ ମନ କଷ୍ଟ ପାଏ!
ସମୟକ୍ରମେ ସେ ଅସୁସ୍ଥ ହୋଇପଡ଼ିଲେ। ପତି ଏହା ଜାଣିପାରିଲେ। ତେଣୁ ସେ ନିଷ୍ପତ୍ତି ନେଲେ ଯେ ସେମାନେ ଏହି ଗାଁ ଛାଡି ଚାଲିଯିବେ।

ଦିନେ ସେମାନେ ନିଶ୍ଚୟ କଲେ ଯେ ସକାଳୁ ସକାଳୁ ସେମାନେ ଗାଁ ଛାଡିବେ। ଗଡ଼ିରେ ସମସ୍ତ ସାମଗ୍ରୀ ରଖି ଗାଁ ଛାଡିଦେଲେ।

କିନ୍ତୁ ଗାଁର ସୀମା ଛାଡିଲାପରେ, ଗାଁରେ ଏକ ଭୟଙ୍କର ବିସ୍ଫୋଟ ହେଲା, ଗାଁ ରେ ନିଆଁ ଲାଗି ସମଗ୍ର ଗାଁ ଅଗ୍ନି ଜ୍ୱାଳାରେ ଜଳିଗଲା।

ପତି-ପତ୍ନୀ ଆଶ୍ଚର୍ଯ୍ୟ ହୋଇ ଏହା ଦେଖୁଥିଲେ। ସେ ମହିଳା ଅନୁଭବ କଲେ – ଗତ କିଛି ଦିନ ଧରି ଗାଁ ବଞ୍ଚି ରହିଥିଲା କେବଳ ଏହି କାରଣରୁ ଯେ, ଧର୍ମାଚରଣ କରୁଥିବା ଏହି ପରିବାର ଗାଁରେ ଥିଲା!

ଏହି କଥା ର ତାତ୍ପର୍ଯ୍ଯ ହେଉଛି ଯେ ଆତ୍ମଧର୍ମ ପାଳନ କରନ୍ତୁ, ଲୋଭରୁ ବଞ୍ଚନ୍ତୁ... ନଜାଣେ କେତେ ଲୋକ ଆପଣଙ୍କ ଧର୍ମ ଆଶ୍ରୟରେ ଜୀବନ ନିର୍ବାହ କରୁଛନ୍ତି।।

🌺🌺🌺🌺🌺🌺🌺🙏🌺🌺🌺🌺🌺🌺

(ସଂଗୃହୀତ)
ଜୟ ଜଗନ୍ନାଥ🙏 🌺

Shri Chakanayana

30/04/2025

30/04/2025

30/04/2025

30/04/2025

14/04/2025

06/04/2025

05/04/2025

01/04/2025

08/03/2025

07/03/2025

Address

Website

Alerts

Shortcuts

Share

Category