23/05/2023
TULAI HI GAO THU SEIPHAT HAM?
Ei tribal mite lah-a hin thilha natohna jatchom chom leh hoisetah tah ho aphat aphat'in ahung umtou peh-in ahi. Tuni geiyin lhadam lhahna kin mang jing nalaiya jong aumin ahi. Penthahna hunglut jou jengin jong Pathen thua lut tahbehna hi alhasam lheh jeng nalaiyin ahi. Hichejeh hin chapang huimut lonle thei bep Christian leh houbung atamin ahi. Igam sungu leh inam sunguva hin Pathen thua pilhing atampon ahi. Chusangin chapang tobang atamin, chapang thanopna hoa thanoma Pathen houva atamin ahi. Corinth houbung mite chu pilhing lou kipilhinsah ahiuvin, chapang bangin aging thei adeiyun, colourful hoa athau anomin ahi. Paul'in apilhin lounau chu aboipin, phona leh suhdihna ana neiyin ahi. Eimi ten Christianity k*m jakhat iman jou jengun jong chapang houbung itam lheh jeng nalaiyun ahi. Centenary jou jengin jong "blind leading the blind" atam nalaiye. Taodampu tahsan loi, gao thusei ho tahsan loi, thilhaho lamlhah dan phong ho pou tahsan loi, Jesu mina mi adamsah mana Pathen thilpeh chang kahi tia seiho tahsan loi, hitihin jatchom choma lheplhah-a um atamin ahi. Eimite ilhepbai danu hi akidange. Pathen thua ichapan behseh jeh-u ahipene.
1. Pathen'in akihoupi mi chu Athua akihoupiji ahi.
Pathen'in ahoupi miho chu Athu (Bible) a bou ahoupiji ahin, hiche nelpeh-a Pathen'in ahenga thu aseidana kingaito ho chu Athu doubol ho ahiuve. Pathen Thu hi newspaper ahipoi, khutlam vetnabu jong ahipoi, horoscope jong ahipoi, aching athem lamkaiya kinei hon jong gaothu seiya jing nikhoa ding mai maiya peng peng ho thusei pou na natohnau kingapnan neihih-un.
2. Pathen'in evangelist thilpeh apeh mi chu gospel seiphong dinga anganse ahi (II Tim 4:5).
Evangelist kitiho chu Pathen'in kipana thupha lhangsam dinga lhagao thilpeh apeh ho chu ahiuve. Hiche kipana thupha chu michonse ho khela Jesu athia, akivuiya, chule athokit chu ahi. Gaothu, thilhaho chaloh dan seidot dot ho chu Pathen thilpeh hiloubeh ahi. Pathen'a hilou chu Satan'a ahi. Hicheho chu tahsan loubeh ding ahi. Pathen'in ama evangelist ho koi koi ahiu akihet nan ahi.
3. Satan'in Pathen Thu toh amathu achohalji ahi.
Satan'in Pathen Thutah 99% amanjia, chule ama milhep lhahna thujou 1% toh achohal jia mi asang aja ol ola phat luttah-a athaji ahi. Jucha thana dinga kisem juchalou tobang ahi.
4. Tulaiya hi atah leh alhem umkhom jinga ahi (Matt 13:30).
Themgao lhem, Solchah lhem, chule evangelist lhem kitiho hi aphat aphat'a leiset kichai masang chan geiya um jing ding ahi. Changtah leh changlhem kehkhom dinga louneipun athupeh banga kehkhom jing lhona ahin, hichu lungdon ding ahipoi.
5. Pakai min pana thil kidang bol jouse Pakaiya kon ahideh poi (Matt 7:21-23).
Pakai, Pakai, tiho leh Pakai mina thil kidang bol mitamtah aum vanga amaho chu nikhatle Jesun 'Nangho chonset bol ho imatih chanin kahekha pouve, keiya konin potdoh-un' atiding ho ahibouvui.
6. Chihna themna ikhantou dungjuiyun Satan'in jong smart tah-in na atong tai (II Cor 2:11).
Igam sungun Parchi leh Numawi ahung vahlut lhonin houbung hilou Maicham tin amun munin ahung tungdoh lhonin, amanglhon pou aseile lhonin mi tampi apui vahvei lhonin, tun amangjel lhontan ahi. Chomlhun in ma, Christa tahsana Pathen houding tilouvin Manmasi chate thu pou asei sei kit'in lheplhah-in tampi aum kit'un ahi. Chule tutun Nu Chinkholam'in Pathen'a kon evangelist kahi tin gao thu seiyin, adamlou ho Jesun adamsah ahi tin, kineosahna panin, thutah phabep aseiyin, Pathen lamlhahna juilouvin, eimiten ihahsat laitah-uva inakolun angainom nom thu hole, dei-um damna ho apodoh doh-in Satan lamjoiya alhalen, lamkai tampi leh mipi tampi alhemlha gamin ahi. Hitobanga kimangcha hohi amang hoi hoi jiuvin ahinla mabana jong Satan'in michom chom manchah ding ahin neijing peh ding ahi. Hijeh-a chu chihna leh themna chu Christa hetna-a kon ahiloule atah leh alhem hekhen theilouva lheplhah-a mi umjia ahi.
7. Akhonna tengle ipi nabol diu hitam! (Jer 5:31).
Hou lamkai ten mipi ngainom nom thuho aseiyuva, gamsung leh namsung lamkai ten jong Pathen thu don louva, amaho deidol dola kong atoluva, hitia hi iche icheuva ahile akhonna tengle akhohcheh-a ikita binguva, ichipdeh dingu ahi. Tuahin Pathen'in ama michonpha 50, 45, 40, 30, 20, 10 jalin eihing hoi nalaiyun, kisempha thei ihina laiyuve. S***m leh Gomorrah ibah jep louvu hinante Pathen lungset jala! Ahinla Pathen chu nelpeh louding ahi, ajeh chu mihemin atutu a-atding ahi. Pathen henga kileu hitin Ama chu lhagao leh thutah-in houleu hen, aman gal eisatpeh dingu, leiset hinkho chomcha-a ding hinama jongle aman igam delu jong bailam tah-a eipeh theiyu ahi. Jouthu ho ingaiyuva, thilphalou ho iboluva (kania kiveina), sum ngailutna idimuva, kihotbol tona ineiyuva ahile Kadesh-Barnea gama kivelkol bep ihi dingu ahi. Pathen thutah ijuiyu levang chomkah louva ama lunglhaina ikimuloi dingu ahi.
Hijehchun, Pathen thutah-in inchen khochen semtau hite. Chule tahsa thu leh leiset thu mai maiya phatchomna dingin Pathen hou louvin, ama choiatna ding jengin lhagao leh thutah-in hou doh ding gojo tau hite. Pathen natoh dan hilou kilheplhahna gao thusei hole, midamsah kitiho, Israel hiding tupna kitiho jouse hi tulaiya dinga kipallhuhna lentah ahitan, pailhah ding chule juilou ding ho chu ahitai.
~ Dr. Lalminthang Lhouvum
