07/06/2025
Hazrat Shaikh Baha-ud-deen Ansaari Qaadri rahmatullāhi alaihi :
♦♦♦♦♦♦♦♦♦♦♦♦♦♦♦♦♦♦♦♦♦♦
Alqaab :
‾‾‾‾‾‾‾‾
Noor-ul-Aarifeen, Minhaaj-ul-Aabideen, Qudwat-us-Saalikeen.
*******************
Aap ki wilaadat Jind (Haryana) me hui.
Aap ke waalid ka naam Hazrat Ibrāheem bin Ata'ullāh al-Ansaari hai.
*******************
Bachpan se hi Aap ko ilme deen sikhne ka shauq tha.
Aap safar karte hua Baghdad pahunche. Waha Hazrat Ghauṡ e aazam Abdul Qaadir Jilaai radiy-Allāhu ta’ala anhu ke mazaar par haazir hue to parde door ho gaye aur Faizaane Ghauṡ e aazam haasil karke uloom e baatini se faizyaab hue.
Phir Haram me Makka shareef me Hazrat Sayyed Ahmad Jilani al-Halabi rahmatullāhi alaihi ke mureed hokar Peer ki khidmat karte rahe aur jumla awraad o ashgaal ki ta’aleem haasil ki aur Khirqa e khilaafat haasil kiya.
*******************
Phir Peer ke farmaan par Sultaan Ghayaaṡ-ud-deen bin Sultaan Muhammad Khilji ke zamaane me Hindustan tashreef laaye aur ta’aleem aur faiz ata karte rahe.
Aap ke faizaan aur khidmat se Silsila e Aaliya Qaadriya Hindustan me har kone me roshan hai aur Kakori, Unnao, Kalpi, Marehra, Badaun, Bareilly, Dewa, Bansa wagairah jaisi khaanqaahen mash'hoor hain.
*******************
Karaamat :
‾‾‾‾‾‾‾‾‾‾‾‾‾‾
Ek martaba Aap ka ek mureed samundar me kashti me safar kar raha tha. Achaanak paani zyada tez ho jaane ki wajah se wo doobne laga. Us ne Aap ko madad ke liye pukaara. Foran ek buzurg waha aa pahunche aur use bachaakar baahar niakaala. Us ne jab dekha to pata chala ke wo Hazrat Baha-ud-deen Ansaari the.
*******************
Aap Hazrat Sayyed Ahmad Jeelaani al-Halabi rahmatullāhi alaihi (Baghdad) ke mureed aur khalifa hain.
Aur ‘Qaadri’ silsila ke Shaikh hain.
Aap ke Khulfa :
(1) Hazrat Shaikh Sayyed Ibrāheem Irji (Delhi),
(2) Hazrat Shaikh Muhammad bin Shaikh Ibrāheem Multani,
(3) Hazrat Shaikh Maulana Aleem-ud-deen,
(4) Hazrat Shaikh Muhammad Shareef Qaadri.
*******************
Ek martaba ek shakhs Aap ki khidmat me umda khushboo waali ek cheez laaya. Jis ke aṡar se Aap par haalate wajd taari ho gaya aur usi haal me Aap ka wisaal hua.
Aap ka wisaal 11 Zil Hijja 921 Hijri (16 January 1516 A.D.) ko hua.
Aap ka mazaar Daulatabad (Maharashtra) me hai.
****************
Ek martaba Pune ke Ghulaam Muhammad Qaadri Aap ke mazaar par haazir hue. Un ke pairo me faalij (paralysis) tha. Aap ki baargaah me dua karne se ALLĀH ke fazl se woh bilkul tandurast ho gaye.
****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Baha-ud-deen Sattari Ansaari Qaadri rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.
