20/03/2026
Assalamualaikum wa rahmatullahi wa barkatuhu,
Quran o Sunnat ke saaye mein guzra ek sunehra Ramadan
Masjid Ali Hazrami Ahl e Hadees
SAYEEDABAD, ARMOOR, NIZAMABAD, Telangana – 2026
Mah-e-Ramadan beshumar rehmaton, barkaton aur maghfiraton ka mubarak mahina hai. Yeh woh muqaddas mah hai jisme imaan taza hota hai, dil naram hote hain aur bande apne Rab se bahut qareeb ho jaate hain. Isi mubarak mahine mein Masjid Ali Hazrami Ahl e Hadees, SAYEEDABAD COLONY Armoor zilla Nizamabad (Telangana) mein jo rooh parwar aur imaan afroz mahaul dekhne ko mila, woh waqai apni misaal aap tha.
Is babarkat Ramadan mein Hafiz Abdul Rasheed ne mukammal Quran-e-Majeed sunane ki sa’adat hasil ki. Unki khush alhaani, tajweed ki pabandi aur khushu o khuzu ke saath tilawat ne namaziyon ke dilon ko mashoor kar diya. Har raat Taraweeh mein Quran-e-Kareem ki ayaat sunkar haazireen par ek roohani kaifiyat taari ho jaati thi, aur yun mehsoos hota tha jaise Quran barah-e-raast dilon mein utar raha ho.
Isi tarah is mah-e-mubarak mein naujawan aur jaid aalim-e-deen Shaikh Faisal Rashid Jamai Hafizahullah ne nihayat khoobsurat, moassar aur munfarid andaaz mein duroos o khutbaat ki zimmedari sambhali. Unka andaaz-e-bayan na sirf dilnasheen tha balki fikr o amal ko jhanjhodne wala bhi tha. Unhon ne har din mukhtalif aham mauzuaat par guftagu ki, jin mein aqeeda, ibaadaat, akhlaaqiyat, islaah-e-nafs aur muashrati masail jaise aham pehlu shamil the.
Khususi taur par baad namaz-e-fajr dars-e-Quran ka silsila jaari raha, jisme Quran-e-Majeed ki ayaat ki tafseer aur amli zindagi mein unke nafaz par roshni daali gayi. Isi tarah baad namaz-e-asr dars-e-hadees ka ehtemaam kiya gaya, jisme Nabi Kareem ﷺ ki ahadees mubarakah ki roshni mein zindagi guzarne ke usool sikhaye gaye. In duroos ne ahl-e-masjid aur ahl-e-basti ke dilon mein ilm o amal ka ek naya jazba paida kiya jiska woh saalon se intezar kar rahe the.
Yaqeenan yeh Ramadan masjid ke namaziyon aur ilaqe ke rehne walon ke liye ek anmol aur yaadgaar Ramadan sabit hua. Bohat se logon ke liye yeh apni zindagi ka pehla aisa Ramadan tha jisme ibaadat ke saath saath ilm-e-deen ki itni bharpoor mehfilen mayassar aayen. Logon ke andar namaz ki pabandi, Quran se talluq aur sunnat ki pairwi ka shauq numayan taur par badha.
Hum Allah Ta’ala ka shukr ada karte hain ke usne humein aise mubarak lamhaat ata farmaye, aur aise mukhlis khuddam-e-deen ata kiye jo apni mehnat, ikhlaas aur ilm ke zariye ummat ki islaah ka kaam kar rahe hain. Hum Hafiz Abdur Raqeeb Asri hafizaullah, janab MUJIBULLAH ASRI HAFIZAULLA, aur Hafiz Abdul Rasheed sahab ki mehnat aur Shaikh Faisal Rashid Jamai Hafizahullah ki ilmi o da’wati khidmaat par dil ki gehraiyon se unke shukr guzar hain.
Allah Ta’ala in dono hazraat ki khidmaat ko qubool farmaye, unke ilm o amal mein barkat ata kare, aur unhe ummat ke liye mazeed nafa bakhsh banaye. Nez Jamiyat e Masjid Ali hazrami Zahra hazrami Sayeedabad colony Armoor aur ahl-e-basti ko bhi is Ramadan ki barkaton ko apni zindagiyon mein baqi rakhne ki taufeeq ata farmaye.
Aameen ya Rabbul Aalameen 🤲
