26/11/2016
ਇਤਿਹਾਸਕ ਗੁਰਦੁਆਰਾ ਨਾਨਕਸਰ ਸਾਹਿਬ ਸੋੜੀਆਂ
ਪਹਿਲੀ ਪਾਤਸ਼ਾਹੀ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੀ ਚਰਨ ਛੋਹ ਪ੍ਰਾਪਤ ਇਤਿਹਾਸਕ ਗੁਰਦੁਆਰਾ ਨਾਨਕਸਰ ਸਾਹਿਬ ਸੋੜੀਆਂ ਕਸਬਾ ਚੋਗਾਵਾਂ ਤੋਂ 5 ਕਿਲੋਮੀਟਰ ਦੂਰ ਕਿਲ੍ਹਾ ਅੰਮ੍ਰਿਤਸਰ ਵਿਚ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਚੌਥੀ ਉਦਾਸੀ ਸਮੇਂ ਇਸ ਨਗਰ ਨੂੰ ਭਾਗ ਲਾਏ। ਇਹ ਨਗਰ ਨਿਰੋਲ ਮੁਸਲਮਾਨਾਂ ਦਾ ਸੀ ਅਤੇ ਵੱਡੇ ਕਾਰੋਬਾਰ ਵਾਲਾ ਖੇਤਰ ਸੀ। ਇਥੋਂ ਦੇ ਹਾਕਮ ਸੂਬੇਦਾਰ ਭਾਈ ਉਬਾਰੇ ਖਾਨ ਨੂੰ ਗੁਰੂ ਜੀ ਦੇ ਆਉਣ ਦਾ ਪਤਾ ਲੱਗਾ ਤਾਂ ਉਸ ਨੇ ਗੁਰੂ ਜੀ ਨੂੰ 16 ਗਜ਼ ਦਾ ਰੇਜਾ ਭੇਟ ਕੀਤਾ ਤੇ ਚਰਨੀਂ ਲੱਗਾ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਇਸ ਅਸਥਾਨ 'ਤੇ 9 ਮਹੀਨੇ, 9 ਦਿਨ ਅਤੇ 9 ਘੜੀਆਂ ਆਪਣਾ ਨਿਵਾਸ ਕੀਤਾ ਅਤੇ ਆਪਣੇ ਕਮਲਾਂ ਨਾਲ ਸੰਗਤਾਂ ਦੇ ਸਹਿਯੋਗ ਨਾਲ ਖੂਹੀ ਦਾ ਨਿਰਮਾਣ ਕਰਵਾਇਆ ਅਤੇ ਅਨੇਕਾਂ ਵਰ ਬਖਸ਼ੇ।
ਇਸੇ ਨਗਰ ਤੋਂ ਬਾਹਰਵਾਰ ਹਾਜੀ ਫੱਕਰ ਰਹਿੰਦਾ ਸੀ, ਜੋ ਬਹੁਤ ਹੰਕਾਰੀ ਸੀ। ਗੁਰੂ ਜੀ ਨੇ ਭਾਈ ਮਰਦਾਨੇ ਨੂੰ ਕਿਹਾ ਕਿ ਫੱਕਰ ਨੂੰ ਸੱਦ ਕੇ ਲਿਆਓ। ਜਦੋਂ ਭਾਈ ਮਰਦਾਨਾ ਗਿਆ ਤਾਂ ਉਸ ਨੇ ਆਉਣ ਤੋਂ ਨਾਂਹ ਕਰ ਦਿੱਤੀ, ਤਾਂ ਭਾਈ ਮਰਦਾਨਾ ਗੁਰੂ ਜੀ ਦੇ ਕਹਿਣ 'ਤੇ ਦੂਜੀ ਵਾਰ ਫਿਰ ਗਿਆ, ਤਾਂ ਹਾਜੀ ਪੀਰ ਪਾਲਕੀ ਵਿਚ ਸਵਾਰ ਹੋ ਕੇ ਗੁਰੂ ਜੀ ਕੋਲ ਆਉਣ ਲੱਗਾ ਤਾਂ ਪਾਲਕੀ ਦੀ ਬਾਹੀ ਟੁੱਟ ਗਈ ਅਤੇ ਹਾਜੀ ਦੀ ਡਿਗ ਕੇ ਲੱਤ ਟੁੱਟ ਗਈ। ਫੱਕਰ ਦਾ ਹੰਕਾਰ ਚੂਰ-ਚੂਰ ਹੋ ਗਿਆ। ਉਹ ਸਮਝ ਗਿਆ ਕਿ ਇਹ ਕੋਈ ਰੱਬੀ ਨੂਰ ਹਨ। ਫੱਕਰ ਹਾਜੀ ਲੰਗੇਵਾਹ ਗੁਰੂ ਜੀ ਦੀ ਸ਼ਰਨ ਪਹੁੰਚ ਗਿਆ ਅਤੇ ਗੁਰੂ ਦਾ ਸ਼ਰਧਾਲੂ ਬਣ ਗਿਆ। ਉਧਰ 9 ਮਹੀਨੇ ਮਗਰੋਂ ਉਬਾਰੇ ਖਾਨ ਦੇ ਘਰ ਦੋ ਜੌੜੇ ਪੁੱਤਰਾਂ ਨੇ ਜਨਮ ਲਿਆ। ਗੁਰੂ ਜੀ ਨੇ ਉਨ੍ਹਾਂ ਦੇ ਨਾਂਅ ਕੁਤਬਦੀਨ ਖਾਂ, ਦੂਸਰੇ ਦਾ ਬੁਲਦਦੀਨ ਖਾਂ ਆਪ ਰੱਖੇ।
ਇਸ ਅਸਥਾਨ ਦੀ ਸੇਵਾ ਸੰਤ ਬਾਬਾ ਹਜ਼ਾਰਾ ਸਿੰਘ ਕਾਰ ਸੇਵਾ ਵਾਲਿਆਂ ਤੋਂ ਵਰੋਸਾਇ ਜਥੇਦਾਰ ਬਾਬਾ ਲੱਖਾ ਸਿੰਘ ਗੁਰੂ ਕਾ ਬਾਗ ਵਾਲੇ ਕਰਵਾ ਰਹੇ ਹਨ। ਬਹੁਤ ਹੀ ਸੁੰਦਰ ਗੁਰਦੁਆਰਾ, ਦੀਵਾਨ ਹਾਲ, ਸਰੋਵਰ, ਲੰਗਰ ਹਾਲ ਤਿਆਰ ਹੈ। ਇਸ ਅਸਥਾਨ 'ਤੇ ਹਰਮਹੀਨੇ ਮੱਸਿਆ ਦੇ ਦਿਹਾੜੇ ਉੱਪਰ ਵੱਡੀ ਗਿਣਤੀ ਵਿਚ ਸੰਗਤਾਂ ਪਹੁੰਚਦੀਆਂ ਹਨ ਅਤੇ ਗੁਰੂ ਸਾਹਿਬਾਨ ਦੇ ਗੁਰਪੁਰਬ ਬੜੀ ਸ਼ਰਧਾ ਨਾਲ ਮਨਾਏ ਜਾਂਦੇ ਹਨ।
