01/05/2026
ਜਿੱਥੇ ਸਾਡੀ ਸਿਰਮੌਰ ਸੰਸਥਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਗੁਰਮਤਿ ਸਮਾਗਮਾਂ ਵਿੱਚ ਵੱਖ-ਵੱਖ ਪਕਵਾਨਾਂ ਦੇ ਲੰਗਰ ਚਲਾਏ ਜਾਂਦੇ ਹਨ, ਉੱਥੇ ਹੀ ਇਕ ਹੋਰ ਬਹੁਤ ਵੱਡਾ ਤੇ ਕੀਮਤੀ ਲੰਗਰ ਵੀ ਚੱਲ ਰਿਹਾ ਹੈ—ਗਿਆਨ ਦਾ ਲੰਗਰ। “ਲੰਗਰੁ ਚਲੈ ਗੁਰ ਸਬਦਿ ਹਰਿ” ਵਰਗੇ ਮਹਾਵਾਕਾਂ ਨੂੰ ਅਮਲ ਵਿੱਚ ਲਿਆਉਂਦਿਆਂ ਸੰਸਥਾ ਵੱਲੋਂ ਸੰਗਤ ਨੂੰ ਗੁਰਬਾਣੀ ਤੇ ਇਤਿਹਾਸ ਨਾਲ ਜੋੜਿਆ ਜਾ ਰਿਹਾ ਹੈ।
ਸੰਸਥਾ ਵੱਲੋਂ ਬੱਚਿਆਂ, ਨੌਜਵਾਨਾਂ ਅਤੇ ਬਜ਼ੁਰਗਾਂ ਲਈ ਮੁਫ਼ਤ ਲਿਟਰੇਚਰ ਛਪਵਾ ਕੇ ਵੰਡਿਆ ਜਾਂਦਾ ਹੈ। ਇਸ ਵਿੱਚ ਛੋਟੀਆਂ-ਛੋਟੀਆਂ ਕਿਤਾਬਾਂ ਹੁੰਦੀਆਂ ਹਨ ਜਿਵੇਂ “ਖੂਨ ਸ਼ਹੀਦਾਂ ਦਾ”, “ਸਾਕਾ ਸਰਹਿੰਦ–ਚਮਕੌਰ ਸਾਹਿਬ”, “ਸਾਕਾ ਨਨਕਾਣਾ ਸਾਹਿਬ”, “ਸਿੱਖ ਰਹਿਤ ਮਰਿਆਦਾ”, “ਗੁਰਬਾਣੀ ਦੇ ਗੁੱਝੇ ਭੇਦ” ਆਦਿ। ਇਹ ਕਿਤਾਬਾਂ ਪੜ੍ਹ ਕੇ ਸਾਡੀ ਨਵੀਂ ਪੀੜ੍ਹੀ ਆਪਣੇ ਗੁਰਬਾਣੀ ਅਤੇ ਸਿੱਖ ਇਤਿਹਾਸ ਨਾਲ ਜੁੜ ਰਹੀ ਹੈ। ਇਹ ਲਿਟਰੇਚਰ ਸ੍ਰੌਮਣੀ ਕਮੇਟੀ ਦੇ ਪ੍ਰਬੰਧ ਅਧੀਨ ਆਉਦੇ ਹਰੇੇਕ ਇਤਿਹਾਸਿਕ ਅਸਥਾਨ ਤੇ ਬਣੀ ਲਾਇਬ੍ਰੇਰੀ ਤੋ ਪ੍ਰਾਪਤ ਹੋ ਸਕਦਾ ਹੈ ਮਾਜੂਦਾ ਸਮੇ ਦਫਤਰ ਧਰਮ ਪ੍ਰਚਾਰ ਕਮੇਟੀ ਦੀ ਫ੍ਰੀ ਲਿਟਰੇਚਰ ਬ੍ਰਾਂਚ ਦੇ ਸ੍ਰ ਗੁਰਮੀਤ ਸਿੰਘ ਜੀ ਇੰਚਾਰਜ ਵਜੋ ਸੇਵਾਵਾ ਨਿਭਾ ਰਹੇ ਹਨ ਆਪ ਜੀ ਇਹਨਾ ਨਾਲ ਵੀ ਸੰਪਰਕ ਕਰਕੇ ਫ੍ਰੀ ਲਿਟਰੇਚਰ ਪ੍ਰਾਪਤ ਕਰ ਸਕਦੇ ਹੋ |
ਪਿਛਲੇ ਦਿਨੀਂ ਸੰਸਥਾ ਵੱਲੋਂ ਸੰਗਤ ਦੇ ਸਹਿਯੋਗ ਨਾਲ ਪਿੰਡ ਵਾਂ (ਜ਼ਿਲ੍ਹਾ ਤਰਨਤਾਰਨ) ਵਿੱਚ ਸ਼ਹੀਦ ਭਾਈ ਤਾਰਾ ਸਿੰਘ ਵਾਂ ਜੀ ਦੀ ਸ਼ਹੀਦੀ ਸਤਾਬਦੀ ਮਨਾਈ ਗਈ। ਇਸ ਮੌਕੇ ‘ਤੇ ਧਰਮ ਪ੍ਰਚਾਰ ਕਮੇਟੀ ਵੱਲੋਂ ਉਨ੍ਹਾਂ ਦੇ ਜੀਵਨ ਅਤੇ ਸ਼ਹਾਦਤ ਬਾਰੇ ਲਿਟਰੇਚਰ ਤਿਆਰ ਕਰਕੇ ਪ੍ਰਚਾਰਕਾਂ, ਢਾਡੀਆਂ ਅਤੇ ਕਵੀਸ਼ਰ ਸਾਹਿਬਾਨਾ ਰਾਹੀਂ ਇਲਾਕੇ ਵਿੱਚ ਵੰਡਿਆ ਗਿਆ, ਤਾਂ ਜੋ ਸੰਗਤ ਆਪਣੇ ਸ਼ਹੀਦਾਂ ਬਾਰੇ ਜਾਣ ਸਕੇ ਤੇ ਪ੍ਰੇਰਣਾ ਲੈ ਸਕੇ।
ਜਿੱਥੇ ਵੀ ਵੱਡੇ ਪੱਧਰ ‘ਤੇ SGPC ਵੱਲੋ ਗੁਰਮਤਿ ਸਮਾਗਮ ਹੁੰਦੇ ਹਨ, ਉੱਥੇ ਭੇਟਾ ਰਹਿਤ ਲਿਟਰੇਚਰ ਦੇ ਸਟਾਲ ਵੀ ਲਗਾਏ ਜਾਂਦੇ ਹਨ। ਸੰਗਤਾਂ ਬੜੇ ਪਿਆਰ ਅਤੇ ਸਤਿਕਾਰ ਨਾਲ ਇਹ ਕਿਤਾਬਾਂ ਲੈਂ ਕੇ ਪੜ੍ਹਦੀਆਂ ਹਨ ।
ਗਰਮੀਆਂ ਦੀਆਂ ਛੁੱਟੀਆਂ ਵਿੱਚ ਵੀ ਛੋਟੇ ਬੱਚਿਆਂ ਨੂੰ ਗੁਰਮੁਖੀ ਸਿਖਾਉਣ ਲਈ ਪੈਤੀ ਅੱਖਰੀ ਦੇ ਕੈਤੇ ਅਤੇ ਬਾਲ ਬੋਧ ਵਰਗੀਆਂ ਕਿਤਾਬਾ ਵੰਡੀਆਂ ਜਾਂਦੀਆਂ ਹਨ। ਬੱਚੇ ਬੜੇ ਚਾਅ ਨਾਲ ਇਹਨਾ ਨੂੰ ਪ੍ਰਾਪਤ ਕਰਦੇ ਅਤੇ ਹੌਲੀ-ਹੌਲੀ ਗੁਰਮੁਖੀ ਸਿੱਖ ਲੈਂਦੇ ਹਨ।
ਪੰਜਾਬ ਤੋਂ ਬਾਹਰ ਵੱਸਦੇ ਉਹ ਸਿੱਖ, ਜੋ ਗੁਰਮੁਖੀ ਜਾਂ ਪੰਜਾਬੀ ਨਹੀਂ ਪੜ੍ਹ ਸਕਦੇ, ਉਨ੍ਹਾਂ ਲਈ ਹਿੰਦੀ ਅਤੇ ਅੰਗਰੇਜ਼ੀ ਵਿੱਚ ਵੀ ਲਿਟਰੇਚਰ ਤਿਆਰ ਕਰਕੇ ਵੰਡਿਆ ਜਾਂਦਾ ਹੈ।
ਇਹ ਸਾਰੇ ਉਪਰਾਲੇ ਵੇਖ ਕੇ ਸੱਚੀ ਦਿਲ ਬਹੁਤ ਖੁਸ਼ ਹੁੰਦਾ ਹੈ ਤੇ ਸੱਚਮੁੱਚ ਮੇਰਾ ਸਿਰ ਆਪਣੀ ਇਸ ਮਹਾਨ ਸੰਸਥਾ ਅੱਗੇ ਝੁਕ ਜਾਂਦਾ ਹੈ।
✍ਜਗਦੇਵ ਸਿੰਘ ਗੋਇੰਦਵਾਲ ਸਾਹਿਬ
ਨੋਟ: ਫੋਟੋ ai ਨਾਲ ਬਣਾਈ ਗਈ ਹੈ
