05/06/2026
ജീവിക്കാം - പ്രകൃതിയെ നോവിക്കാതെ സ്നേഹിക്കാം
മുല്ലയ്ക്കൽ ക്ഷേത്രത്തിൽ പരിസ്ഥിതി ദിനത്തിൽ വൃക്ഷ തൈ നടൽ🕉️
ആലപ്പുഴ: പ്രകൃതിയെ നോവിക്കാതെ വേണം നമ്മൾ ജീവിക്കേണ്ടതെന്നും നമ്മുടെ പൂർവ്വികർ കാത്തു സൂക്ഷിച്ച പ്രകൃതിയെ അതേ പോലെ വരും തലമുറയ്ക്ക് നൽകുവാനുള്ള ബാധ്യത നമുക്കുണ്ടെന്നും
മുല്ലയ്ക്കൽ ക്ഷേത്ര ഉപദേശക സമിതി പ്രസിഡന്റ് ജി. വിനോദ് കുമാർ പറഞ്ഞു.
ക്ഷേത്രവും, വൃക്ഷങ്ങളും, പ്രകൃതിയും ഒരേ ജീവിതചക്രത്തിന്റെ ഭാഗമാണ്. ക്ഷേത്രങ്ങൾ പണ്ടുമുതലേ പ്രകൃതിയെ ദൈവമായി കണ്ടു പൂജിച്ച സ്ഥലങ്ങളാണ്. വൃക്ഷങ്ങൾ പ്രകൃതിയുടെ ശ്വാസവുമാണ്. മൂന്നും ചേർന്ന് മനുഷ്യനെ പ്രകൃതിയോട് ബന്ധിപ്പിക്കുന്നു. ക്ഷേത്രത്തിൽ പോകുന്നത് വെറും ആചാരമല്ല, മറിച്ച് പ്രകൃതിയോട് അടുക്കാനും അതിനെ ബഹുമാനിക്കാനുമുള്ള ഒരു വഴിയാണ്.
പരിസ്ഥിതി സംരക്ഷണം ഒരു സാമൂഹിക ഉത്തരവാദിത്തമാണ്. കേവലം മരങ്ങൾ നടുന്നു എന്നതിനേക്കാൾ ഉപരി അത് പരിപാലിക്കുന്നതിന് നാം മുൻകൈ എടുക്കണം. ഇത് നമുക്കും ഇനി വരുന്ന തലമുറയ്ക്കും വേണ്ടിയാണെന്ന ബോധം നമുക്ക് ഉണ്ടാവണം അദ്ദേഹം പറഞ്ഞു.
തിരുവതാം കൂർ ദേവസ്വം ബോർഡ് നടപ്പാക്കുന്ന 'ദേവാരണ്യം" പദ്ധതിയുടെ ഭാഗമായി പരിസ്ഥിതി ദിനത്തോടനുബന്ധിച്ച്
മുല്ലയ് ക്കൽ ക്ഷേത്രോപദേശക സമിതിയുടെ നേതൃത്വത്തിൽ വൃക്ഷതൈ നടുന്നതുമായി ബന്ധപ്പെട്ട് സന്ദേശം നൽകുകയായിരുന്നു അദ്ദേഹം.
മുല്ലയ്ക്കൽ സബ് ഗ്രൂപ്പ് ഓഫീസർ ലേഖ ആർ. പണിക്കർ, ക്ഷേത്ര ഉപദേശക സമിതി പ്രസിഡന്റ് ജി. വിനോദ് കുമാർ, സെക്രട്ടറി TGH വെങ്കിട്ടശ്വരൻ എന്നിവർ ചേർന്ന് ക്ഷേത്രത്തിൽ വൃക്ഷ തൈ നട്ടു.
ചടങ്ങിൽ ഉപദേശക സമിതി വൈസ് പ്രസിഡന്റ് എസ്. രഘുനാഥൻ നായർ, കമ്മറ്റി അംഗങ്ങളായ കെ.എം. ബാബു, അനിൽ കുമാർ ജി, പ്രസാദ് ജി, രാജേഷ് പി, സുനിൽ ടി.എസ്, രാജേഷ് കനകൻ, ഹരികുട്ടൻ പി.വി എന്നിവർ പങ്കെടുത്തു.
