CTP Cathedral

24/02/2026

CHHINCHHIAHNA I BEISEI EM?
Luka 11:29-32 (25.2.2026)
Fr. Denis Lalfela sdb

Mipui pungkhâwmte hnênah Isuan thu a sawi a. “Tûnlai thangtharte hi an sual a ni, chhinchhiahna an zawng a” a ti a. Mipui sângnga a hrâi a, dam lo tinreng a tidam a, mitthi a kâitho a, ramhuai a hnawtchhuak a. Pathian fapa, nghakhlel taka an thlîr Messia an zînga awm reng aia ropui a awm lo. A thilmak tih zozaite avângin chhinchhiahna dang a ngai hran tawh lo. Chuti chung chuan chhinchhiahna an la beisei tlat a ni.

Zâwlnei Jona chhinchhiahna chauh lo chu an hnênah chhinchhiahna rêng rêng pêk a ni lo vang” a ti a. Jona chu a inlamlêt hnuah Ninevi mipuite tân chhinchhiahna a ni. Jona chu ni thum leh zan thum nghapui kawchhûnga a awm ang khân, Amah pawh ni thum leh zan thum lei chhûngah a awm dâwn tih Isuan a sawi a. Isuan, “Jona aia ropui zâwk hetah hian a awm asin” a ti a. Amah a insawina a ni.

Tin, Solomona finna ngaithla tûrin Chhim lam lalnu kâwlkil ata a lo kal a. Isuan, “Solomona aia ropui zâwk hetah hian a awm asin” tiin ama nihna a sawi leh a. Kohhran Pa thenkhat chuan Isua hi “Pathian finna” tiin an lo sawi hial thin.

Ka nitin nunah hian Pathian chhinchhiahna, a ropuina puangtu leh Pathian a nihzia tifiahtu kan va hmu hnem em! Thilsiam dang chu sawi loh kan taksa kan en ringawt pawh hian Pathian finzia leh a ngaihtuah kimzia a chiang teh e. Chutichung chuan rinhlelh châng kan nei thin. Dam lo tân kan tawngtai a, kan duh angin an dam si lo. Malsawmna kan dil a, a rawn thlen dân a dang thin si.

Thlarau lama hmasâwn nan kan tawngtai a, kan tlahniam leh vawng vawng lawi si. Ruahmanna kan siama a thleng dik thei si lo. Hlawhtlinna kan dil ve a, a chhânna kan hmu mai si lo. Mahse Pathian ropuina hi chhuthan khat pawhin a tidanglam dâwn si lo. Chuvângin Pathian thûin min kawhhmuh leh kan hmuh theih khawvêlah hian Pathianin chhinchhiahna tam tak a dah a, a zawng hmu ve tûra tan lâk leh ahnên atanga finna dîl chu ringtute tih tûr a ni.

24/02/2026

KAN PA, VÂNA MI
Matthaia 6:7-15 (24.2.2026)
Fr. Denis Lalfela sdb

Isuan tawngtaina mawi leh fâwmkim ber "Kan Pa vâna mi ' Lal Tawngtaina" min pe a. Pathian chuan kan dîl hma hauh pawhin kan mamawh engkim a hriat thu a sawi a. Engkim thlenna tur Pa min kawhhmuh a, Pa malsawmna dawng tura ngaihdamna nunpuitu nih a pawimawhzia a tarlang bawk.

Matthaia 6:33 ah “A ram leh a felna zawng hma turin” Isuan min sâwm a. He tawngtainaah pawh hian Pathian chu hmun hmasa ber pe turin min duh a ni. Pathian duhzâwng zawngtu chuan midangte a ngâidam ang. Vawiin atân eitur kan dil a, thinlung erawh chuan damchhung daih hausakna a ît fo si. Chin tâwk neihna hi Pathian zawngtu chuan a nei ang.

“Fiahna/ thlêmna kan tawh huna min awmpui tlat tur leh sual laka min veng turin kan dil a ni.

Thlemna kan tih hi “fiahna” ti a sawi a ni bawk a. Pathian phat mai thei dinhmuna awm hi a hlauhawm a. Chuvangin Pathian a nihna ringhlel hial tura thil thleng a awm pawh a min hum tlat hi a tûl takzet a, kal dil bawk a ni.

Pathianin min hmangaih tih kan ring a. Vanduaina kan tawh erawh chuan “hmangaih Pathian a ni si” tih a har tlat. “Hun lawmawma Pathian hi lungngaihniah pawh kan Pathian a ni.

Ringtute chuan thlemna chu kan tâwk zêl ang, mak tih vak tur pawh a ni lo. Thlêmna tam zâwk hi chu min tibuai tur hrim hrim a lo kal an ni a, thlêmna thenkhat chu Pathian fa kan nihna min chhuhsak tûra lo kal an ni. Hêng thlêmna te hian kan nihna (identity) min laksak an tum tih hriata do fan fan a ngâi a.

Lalpa kan lam tanga siam tûl a, insûmna leh mahni inthununna hi hnehna hmanrua a ni. Tin, Pathian kan rinna leh “Kan Pa” a nihna humhim erawh kan kovah Lalpan a nghat a ni.

Kristian nun chu kraws kawng a ni. Krista nêna lêndun leh amah nêna hnehna puan zêl ava pawimawh em! Vânah Pa kan neih si chuan fapa / fanu tha tak nih ve i tum tâng tang ang u.

22/02/2026

MI TÊ BERTE CHUNGA THIL THA TIH
Mathaia 25:31-46 [23.2.2026]
Fr. Denis Lalfela sdb

Matthaia 25:31-46 ah Isua lo kal lehna chungchâng tarlan a ni. He khawvêlah hian nitin mamawh ngaihtuahin kan buai theuh a, a châng chuan thih hnu lam thil ngaihtuahna hun tha pawh kan inpe tâwk lo fo awm e.

Isua chu a ropuinaa inthuamin a lo kal dawn si a. A lo kal hunah chuan a ropuina thutphahah a thu ang a, a hmâah chuan hnam tin an inkhâwm ang (Mt 25:31-32).

Mihringte hian thihna kan tâwk vek dawn a, chumi hnuah rorêlna kan hmachhawn ang. Rorel tûra a lo kal hunah Isua chuan berâmte leh kêlte a thliar hrang ang.

Rorêlna ni ah hian Isuan tehfung a hman tur a sawi lâwk a, chu chu “mi tê berte chunga thil tha tih” a ni. India ramah hian kan mihring puite vantlânga an nihna leh dinhmun ang zela ngaihhlut leh ngaihsân kan chîng a. A nih dân tur takah chuan kan mihring pui chu mihring a nih avângin kan zahin kan hlut tûr a ni.

Mirethei tak pawh nise zahawm tak leh hawihhâwm taka biak tur a ni. Nihna ngaisângte lênna Mizoramah chuan motor hmaah nihna kan intârsiak a. Pharisaite ang maiin ‘mi ten min zahin min ngaisâng se’ kan ti hlawm ni berin a lang.

Isua kha lalah siam an tum a, a tlanchhia a nih kha! Isuan a zirtirte hnênah, “In zinga ropui ber chu in rawngbawltuah a awm zâwk tur a ni” (Mt 23:11) a ti hmiah mai. Krista inngaihtlâwmna leh inphahhniamna nun entawntu nun chu a hausa a, thatna leh ngilneihnain a khat ang.

Mihringte thinlungah hian chapona tlâng a awm theuh a, chu kan sahuat chu midangin an rawn deh fuh palh chuan kan na a, kan tliak hnâwp thin. He natna lak ata kan dam ve nan Isuan damdawi min chawh a, chu chu “phût let nei lova rawngbâwlna a ni.”

Isua tehkhinthu sawiah hian a tak takah Isua riltam chaw pe a, silfen pe a, a dam lo enkawl a, tâninah va tlawh an tam awm lo teh e. Mahse Isua chuan, “Hêng mi tê berte zinga mi pakhat chunga in tih chu ka chunga ti in ni” a ti tlat a ni.

Mi tê ber chunga kan tih chu Isua chunga ti kan ni tih i chiang ang u. Pathian be peih hle si a mi harsa leh retheite ngaihsak lotu chuan chanvo a nei lo tih a chiang hle.

Vawiin Chanchintha hian kan khualzinna ramah hian thiltha tih ning lo tur leh mi tê berte ngaihthah hauh lo turin min fuih thar leh a. He zinkawngah hian ringtu ten hlauh tur kan nei lo.

Mt. Iranaeus chuan “Pathian fain thil tha lo a hlau ngai lo” a ti a. Avila (Spain) khuaa Mt. Teresa chuan, “Engmahin tibuai che u suh se, engmahin tihlâu che suh se, Pathian chauh a tâwk a ni” a ti bawk a. Sâm 23 ah “Thil tha lo reng reng ka hlau lovang; nang ka hnenah i awm si a, i talhtum leh i tiangin mi thlamuan thin a ni” tih kan hmu a.

Ringtu dik chuan engmah a hlau lovang. Krista chu lei leh vân lal ber a ni. Mahse i thinlung lal ber a nih si loh chuan i tum i la thelh tihna a ni ang.

22/02/2026

Lent Pathianni vawi - 1na
ISUAN THLALÊRAH THLÊMNA A TÂWK
Matthaia 4:1-11 (22.2.2026)
Fr. Denis Lalfela sdb

Chumi zawhah chuan Isua chu diabola thlêma awm tûrin thlalêrah Thlarau hruai chhohvin a awm ta a. Ni sawmli leh zan sawmli chaw a nghei hnuin a ril a lo tâm ta a.

· Isua chu thlêma awm tûra hruai a ni. Hun rei tak chaw ngheiin a tawngtai a. He hun lo châng rântu diabola chuan a thlêm ta a.

· Isua ang hian mi tinin thlêmna kan tâwk theuh a. Mi fing leh mi chak berte pawh thlêmin an awm vek a ni.

Thlêmna hmasa ber chu "Pathian Fapa i nih chuan heng lung hi chhanga chang tûrin thu pe rawh," tih hi a ni.

· Isua chu Pathian fapa a ni. Isuan a nihna hi a hai lo. Lung hi chhangah a chantîr thei reng. Mahse a thilmak tih theih reng chu Pathian fapa a nihna fiahna atân a phal lo. A Pa thu chu nunna a ni zâwk a, a dah pawimawh ber a ni. Eng vang mahin a pa chu a fiah dâwn lo va, fapa a nihna chu a phatsan dâwn hek lo.
Isuan, "Mihring hi chhang chauhvin an nung lo vang a, Pathian kâa thu tin chhuakin an nung zawk ang" tiin a chhang a. A pa thu lo chuan engmah a ti dawn lo tih a tilang a ni.

Ramhuai chuan khaw thianghlimah chuan a hruai lût a, Pathian biak in chhîp zumah chuan a dah a, a hnênah, "Pathian Fapa i nih chuan tla thla rawh; 'I chung thûah zawng a vantirhkohte thu a pe ang a…” tiin a thlêm leh a.

· Isua tân zuan thlak mai kha a har lovang. Mahse Isua chuan, "Lalpa i Pathian fiah suh” tih ziak a nih thu a hrilh a. A Pa thiltihtheihna leh venhimna chu fiah rualah a ruat lo. A pa chuan engkim a ti thei tih a hria a, thlamuang takin a awm mai a ni.

Ramhuai chuan, "Bawkkhupin Pathian biakin mi bia la, hêng zawng zawng hi ka pe vek ang che," a ti a.

· Khawvêl mawina leh ropuina aiin a Pa ropuina Isuan a thlang a. Lalna leh thiltihtheihna hi khawvelin kan buaipui ber pakhat a ni a. Sum leh pâi vângin Kohhran a buai thin a, chhungkua an kehdarh a, mi thenkhat an tâl buai a. Isuan a hnênah, "Setan, kal bo daih rawh! 'Lalpa i Pathian chibai bûk la, ama rawng chauh bâwl rawh,' tih ziak a ni," a ti a. Pathian nung rawng chauh a bâwl tur thu Isuan huai takin a sawi a. Ramhuai chibai bûka ropuina neih aiin a Pa chauh chibai bûk a thlang a ni.

17/02/2026

17/02/2026

Vut inhnawihni – Ash Wednesday (18.2.2026)
IN THINLUNG THLÊR ULA
Fr. Denis Lalfela sdb

Kristiante kût pawimawh ber Easter atân a ni 40 chhûng inbuatsaihna hun (Lent) kan tan leh dawn ta. Kan chalah puithiamin vut hnawihin vaivuta siam kan nih thu leh vaivut vêka kîr leh tûr kan ni tih min hrilh leh dâwn a. Vut inhnawihna hian kan thinlung chhûngril a inlamlêt tûrin min ko va. Kan nunah a lal tur chu dah lal a, sim ngâi te sim tûrin Lent hun hian min sâwm thar leh a ni. K*m tinin Joela 2:12-18 thu hi he nî ah hian kan chhiar thin a. Pathianin “In puanin ni lovin in thinlung thlêr ula” ti a min sâwmna hi ngaihthah chi a ni lovang. Mahni sahimna leh hamthatna zawngin kan buai kumtluan a. Lent hun erawh chuan abikin thil pathum min phût a, chungte chu: tawngtaina, thilpêk (thiltha tih) leh chawnghei te a ni. Tawngtaina hmangin Pathian nêna kan inkâr chingfel tûrin hma kan la dâwn a. Baptisma hmanga Pathian fa kan nihna chu a hlu si a. Pafa kan nih zêl a pawimawh a, tawngtaina chuan Pathian nêna kan inlaichînna chu a tinghetin a hum tlat dâwn a ni.

Chawngheina chu pâwnlama mahni tâna thil tha kan tih a nih rualin chhûngrilah hnehna nun min petu a ni. Tumruhna min pe a, huaisenna min pe bawk a, ringtu nuna kan mamawh ber te zinga mi mahni inthununna (self-discipline) min pe bawk a ni.

Mahni mamawh dah tha a kan mamawh ve ngawih ngawih pawh mamawh zâwkte kan pêk hian Pathian a lâwm a. Chhungrilah thilphalna min siam a, sawi hleih theih loh hlimna kan chang thin. “Pêk hi dawnna a ni” tih thudik hrefiah tur chuan kan pêk ve phawt a ngâi a ni.

Lent hun hian pâwnlam mawina aia chhunglam thianghlimna ngaihtuah turin min sawm a. Joela hmanga Pathian min kohna pawh “thinlung zawng zawnga tap chunga a lam pan a ni”. Kan sualte ngâidam tûra Pathian inhawnzia a tilang chiang hle.

Matthaia 6:1-6, 16-18 ah Isuan ringtute awm dân tur min zirtir a. “In thiltha tihte mi hmuh atân, mihring mit hmuha ti lo tûrin fimkhur rawh u” tiin a zirtir a. Kan thiltih thatte hi sawi lan mai kan châk a, miten hre ve thuai se kan duh thin. Mahse ropuina leh fakna kan zawn chuan he leiah kan lâwmman a tâwp ang tih Isuan chiang takin a sawi thung. Tirhkoh Paula chuan, “Thiltha tih ning suh u” tiin Kristiante a lo fuih tawh a. Thil tha chu a that avangin kan ti mai tur a ni. Miten min fak lem lo mahse thil tha chu kan tingam tur a ni.

Fakna leh mite fakna beisei râna thil tite chuan chutiang chhânlêtna an hmuh lohvin an tâl buai thin. Thil tha chu hun harsa leh khirh tak kâra ti zêl tûrin chhûngrilah chakna kan neih a ngâi a, kan tumah kan chian a ngâi bawk ang. He Lent hun hian khawvêl thil kan mamawhte titlêm turin min pui se la. Krista chu kan nunah a lal deuh deuh theih nan Kohhranin tih tur min pêkte hi tha takin tih tum ila. Kraws kawngzawhna leh tawngtainate hi hlut thiam ila. Pathian chu thinlung tak zawngin i hnaih zual zel ang u. Lent hun hlâwk taka hmang turin duhsakna ka hlan a che.

14/02/2026

Pathianni sermon
MAICHÂM HMÂ A THILPÊK
Matthaia 5:17-37 [15.2.2026]
Fr. Denis Lalfela sdb

Isuan amah zuitute awm dân tur felfai takin a sawi a. Dân chu Pathian hmangaihnain a tifamkim tawh a. Chuvangin amah ringtute pawhin sual lian chauh do lova sual tenâu pawh an do a ngai tawh ang.

Hmangaihna a dah lal tlat avangin chhungkua pawh he hmangaihna hian a tinungin a kâihruai tûr a ni. Unaute chu eng dinhmunah pawh ding se hmusit mai tur kan ni lo. Vânneihnain min daih sên loh châng a awm thei a, mihring dinhmun a inher danglam fo bawk. Chuvangin tumah hmusit lo leh ngilneihna nêna puitu ni zawk turin zirtir kan ni. Isuan maichama thil hlan hmaa midang nêna inrem a pawimawhzia min zirtir a. Ngaihdam theih loh nei tûn chunga inthawina hlan chuan rah tha a chhuah tam thei lova. Keimahnia Thlarau Thianghlim zalen taka thawk tur chu danbehin a awm phah thei a ni. Ngaihdamna pêk leh dawn hnua tawngtaina chuan thil a tithei hle a. Kan rin phâk bakin a rah kan hmu thin. Mi huat kan neih tlat chuan kan zalên lova, ngaihdam duhna kan neih loh phei chuan ngaihdamna dawng tlâk kan ni bik lovang. Pathian chakna tel lo chuan ngaidamtu nih hi a har a. Pathianah erawh chuan chhuanlam a tla fai a, thiamthu chuh a tûl tawh lova, min tinatu chuan a phû vâng pawh ni hran lovin mahni zâwk sal atâ kan inchhuah nân kan ngaihdam a tûl zâwk a ni. Ngâidam thintu nun chu a hahdam a, a zalen a, a hlim bawk thin. A rilru leh thlarau a hlim tlat chuan taksa hrisel zâwk pawh a nei fo ang.

Pathian maichâm hmaa thil kan hlan hmain midangte nêna inrem a ngâi tlat a nih chu! Ngaidamtu nih hi a ropuiin a har a, Pathian tanpuina kan auh fo a ngâi ang.

Isuan, “In thu sawi chu “a ni tih chu a ni”, “a ni lo tih chu ni lo” ni ngawt rawh se a ti a. Krista kan thlan chuan engemaw kan châna kan kalsan ve a ngai ngei ang. Khâwl thil thiamna thang chak tak avângin thil thar duhna a hluar a, duhthlanna nghet siam pawh a har phah niin a lang. Tirhkoh Paulan “Thil tha tih hi ning suh u” a tih ang khan thiltha ti thei tûra rilru leh taksa kan buaitsaih a tûl thin.

Tirhkoh Paulan Kristaa awm chu mi thar a ni tiin a sawi a. Isuan ngaihdamna hmanga min tihthar leh thin avangin inremna rawngbâwl hna kan chang ve a ni. "Krista hmangaihna chuan min tîr lui a ni" a ti bawk a. Krista neitu chuan a hlimna leh lâwmna chu midangte hriat ve hlân a nghâkhlel a. Ama tân chauh a kawmpui phal lo. Nu Mari pawhin Pathian kohna a chhân hnuah a chanchin lâwmawm hrilh turin a laizâwnnu Elizabeti a pan vang vang a nih kha! Krista hmangaihna temtu chu a thu mai mai hman lova, Chanchintha thehdarh chu a mawhphurhna tih a hria a. Phûr takin a tlângaupui thin.

Duhthlanna tha leh nghet chuan hun a duh a, làwmna a thlen thin. Chutiang duhthlanna chuan inpékna a phût a, engemaw chân a ngaih châng a awm a, kalsan ngam neih angâi a, kan la hmuh loh ram pan ve turin rinna a ngâi thin. Duhthlanna hi nitina tuai thar a tûl avângin finna petu Pathian kan auh fo a pawimawh a ni.

Vawiin hian i mamawhna zâwnah Lalpan rawn tlawh chein chakna thar pe che se la, taksa leh rilruah damna lo chang ang che.

07/02/2026

Pathianni sermon
KHAWVÊL ÊNG IN NI E
Matthaia 5:13-16 (8.2.2026)
Fr. Denis Lalfela sdb

Tlâng chunga thû a sawi zawhin Isuan zirtîrna a pe chhunzawm zêl a. Isuan, “Lei chî (salt) in ni e; khawvêl êng in ni e” a ti a. Pope Paul VI khan kan nun hmanga chanchintha puan a pawimawhzia a lo sawi tawh a. Tunlai khawvêlah phei chuan thusawi tha ai mahin entawn tûr tha beisei an tam tawh a. Kristian kan nihna lantirna kawngah pawh lan mawi duhna bansan a tihtakzeta kan nunpui a tûl takzet a ni. Pathian mite laka beiseina pawh a sâng a, thuhriltute nun dân an thlir reng a ni. Hlâin “Mi ten min chhiar, min thlir reng e, ka awm dân zawng min hai lo…” a tih angin rawngbawltute nunah beram ten ei tûr thlarau chaw tak (real spiritual food) an beisei a, puarna an zawng thin.

Tirhkoh Paulan, “Engpawhnise in awm dân chu Krista chanchintha nen lo inmil phawt rawh se” a tih ang khan kan thusawi leh kan nun a inmil a tûl thin a. Pathian laka thil mawi kan zawn rualin mihring lakah pawh zawn tel a ngâi a. Mi ten min hmuh tlêu tawh chuan siam that leh a har tawh thin a, kan thusawi pawh a tla na thei lo. Chî (salt) pawhin a alna a hloh chuan a hman tlâk tawh thin lo.

Famkim lo, chaklohna hrang hrang nei theuh ni mah ila Lalpa chuan “khawvêl êng (light of the world)” ni turin min ko tlat si a. Amah kan en tlat a, ama lamah rilru kan pêk ngam a pawimawh hle. Kan tihtûr tê ber pawh tha taka hlen zêl hi “chî leh êng (salt & light)” nihna rahbi hmasa ber a ni. Thil tê tham tê tih that nachâng kan hriat chuan a aia lian pawh Pathian chakna ringin tha takin kan ti zêl ang.

24/01/2026

Pathianni sermon
MI ZUI RAWH U
Matthaia 4:12-23 (25.1.2026)
Fr. Denis Lalfela sdb

Isuan Pathian ram Chanchin Ṭha hrilin Galili ramah a lo kal a. Simna thu puang tanin “Sim ula, Chanchin Ṭha hi ring rawh u” a ti a. A Pa hnêna a tam thei ang ber hruai kir chu a tum ber a ni. A Pa thu a awih avangin vân ropuina kalsanin he khawvelah rethei takin a lo piang a. K*m tam tak Messia lo kal tur Israel faten an nghah hnuah Isua Krista a lo kal ta a, amah chu messia a ni. “A hun chu a lo thleng ta a, Pathian ram pawh a lo hnai ta” Isuan a ti. Pathian lalram chu a rawn din a, a thih hnu pawha a chhandamna hna chhunzawm zel turin mi rintlâk a mamawh a. Ziritrte a ko tan ta a. “Galili dîl kam chu a hrût laiin Simona leh a unau Andria chu dîlah chuan lên dêngin a hmu a; sangha mantu an ni rêng a. Isuan an hnênah, “Mi zui rawh u, tichuan mihring mantu ah ka siam ang che u,” a ti a.

Isua mi kohte hi mi tlâwmte, khawvel thila chhuan tur nei tehchiam bik lo an ni. A koh a te chu hman tlâkah a siam mai a ni. Andria leh Petera te inpêkna hi a ropui takzet a ni. “Chawp chilhin an lênte chu kalsanin amah chu an zui ta nghâl a” tih kan hmu a. Chhuanlam engmah siam lovin Isua chu an zui tawp mai a ni. Chhuanlam ngah lutuk tân chuan Isua zui hi a har rêng a ni.

“Thui lo tê a kalin, Zebedaia fapa Jakoba leh a unau Johana chu a hmu a, chu mite chu lên siam ṭhain an lawngah an awm a” tiin Marka ziakah phei chuan tarlan a ni. An eizawnna ber lên an siamtha mêk a ni a, an buai hle tih a lang. An pa Zebedaia pawh lawngah a awm ve reng a. Mahse engmah sawi buai lovin Isua chu an zui ta daih mai a. Isua kan zuina kawngah leh rawngbawlnaah chhuanlam a tam thin. Min kotu inpêkna kan en erawh chuan a zahthlâk hle thung.

Jakoba leh Johana hian an eizawnna ber an lawng bakah anmahni enkawltu an chhungkaw pa ber pawh chu an kalsan daih mai a, hei hian ngaihtuahna thar min siam theuh se la. An sahimna leh an thiam thil ve te chu an kalsan hmiah mai le.

Petera, Johana leh Jakoba te hi Isua hun pawimawh deuh deuh a awm deuh tlat te an ni hlawm a, Andria erawh chu mi langsâr lo, midangte dinhmun sâng zawk a hlângkâitu a ni a, lârna leh ropuina a ûm lo hi a entawntlak takzet a ni.

Pathianin malsawm che u rawh se.

24/01/2026

MIPUITEN ISUA AN CHÎMBUAI
Marka 3:20-21 (24.1.2026)
Fr. Denis Lalfela sdb

Isuan Pathian ram chanchintha hrilin ram tin kil tin a fang a. dam lo tinreng a tidam a, a taksa pawh a hah tawh a ni. Dam loh leh chauh chângin mahni in kan thlahlel lehzual a. Isua pawh ama inah a hawng a. Chawlh hahdam duh mah sela mipui ahnênah an lo kal khâwm leh a, chuvâng chuan chhang takngial pawh an ei thei ta lo va. Chaw eina hun pawh nei lo hial khawpin a mite tân a inpe a ni.

Rome a theology kan zirlaia kan professor-in “Zanlaiah confession kal duh awm se, in tho mai tur a ni” ti a thlarau chhanchhuahna atana thahnemngai tura min fuihnate rilruah a lo lang a. Isua inpêkna khan ramri a nei lo va, thlei bik a nei hek lo. A lo kal chhan, a hnathawh leh a hahzia hre lote chuan “A â ta a ni,” an ti hial a. Mi nuna thilthleng hi kan hre sêng lo va. Eng harsatna nge an neih a, eng vanga hrehawm taka hun hmang nge an nih tih te kan hriat loh chuan pawnlam lan dân chhete atangin mi nun kan fakin kan sawichhe thiang lovang.

“A kâwm atangin lehkhabu sawisêl suh” tih a nih kha! Kan thiltih leh kan hnathawh hi mi zawng zawngin an hrethiam ngai dawn lo va, sawisêlna leh itsîkna kârah chak tak leh huai taka bei zel turin rilru i siam theuh ang u.