01/01/2023
UPA S. THANTLUANGA KAN THLAH LIAM TA.
THIH NI - 31.12.2022 (Tlai dar 4:00 PM)
Upa S. Thantluanga hi Ni 15 Nov 1949 khan Khawnglung khuaah Pu Bungkawna leh Pi Chalthangi te fa pathumna ni turin a lo piang a. Unau mi 13 niin, mipa 9 leh hmeichhia 4 an ni. Naupan lai atang a mi pawi sawi ngailo leh mahni thiamthu ngei pawh sawi thiamlo khawp a mi kam tam lo a ni a. A tleirawl chhuah atangin Pathian thu leh Solfa a tuipui hle a, inkhawm ngaipawimawh tak mi, inkhawm thulh mai mai ngailo mi a ni. Tleirawl sual pawh nei lem lovin a piangthar a, thlarau bo vei tak mi a ni bawk a, a theih ang angin thlarau bo zawngin a lo fehchhuak thin a ni. Ni 10 April 1975 khan Pi Chalkungi nen inneiin, fa 3 an nei a, tu 3 an nei bawk. K*m 1995 khan Bungtlang atangin Bawngkawnah an pem thla a, k*m 2015 atang khan Brigade vengah an awm nghet ta a ni.
K*m 1988 khan BCM Khawnglungah Rawngbawltu ah thlan a ni a, Aizawl lama an pem thlak hnu k*m 1999 khan BCM Bawngkawn ah Rawngbawltu a thlan leh niin, a nihna chu chhunzawm zelin, k*m 2017 khan BCM Brigade Upa thlanna neih hmasak berah Upa Vanlaldika Pachuau nen thlan tlin niin K*m 2018 Aizawl Area ABC Inkhawmpui, BCM Biak In, Rakhun North ah Rev Lianruaia'n Upa a tan a nemnghet a ni. K*m 1978 - 1995 chhung khan BCM Khawnglungah Sunday School zirtirtu a ni a, k*m 1985 - 1995 chhung Zaipawl Conductor a lo ni tawh bawk. TKP lamah, K*m 1977-1979 chhung khan Treasurer niin, K*m 1980-ah Secretary a ni a, K*m 1981-1984 leh k*m 1986-ah Fin. Secretary niin, K*m 1987-1990 chhung khan President a lo ni tawh bawk. K*m 1995-a Aizawl an pem atang khan BCM Bawngkawnah lawiin; Sunday School zirtirtu leh Mission Committee-ah te a tel thin a, BMP Bawngkawn Unit President, Vice President, Treasure, Fin. Secretary nihna te a lo chelh tawh thin a ni. Ton, BCM Bawngkawn Pastor Bial ah hian Bial Executive Committee Member a ni mek a, Worship Committe Vice Chairman nihna pawh a lo chelh tawh a ni. BCM Brigade Kohhran Chairman, Sunday School Superintendent, Mission Committee Chairman, Building Committee Chairman, nihna te a lo chelh teh thin bawk a, k*m 2022 khan Kohhran Chairman a ni bawk a ni.
BCM Brigade, Fellowship a nih lai K*m 2015 atanga lawi tanin, Upa J Neihkunga nen Kohhran bul tan pui tu niin, a phak tawka Kohhran ngaipawimawh em em thin a ni a, a dam a nih phawt chuan Kohhran Programme a thulh ngai lo. Hnatlang a thawhchhuah a taima em em a, ruah leh thli pawhin a dan zawh loh khawp a Biak In Maicham mei chhit nun zel tum tlat mi a ni.
Upa Tluanga hi kutthemthiam tak a ni a, Mistiri hna a thawk thin a. K*m 1995 May thla atang khan Hospital & Medical Education-ah IV Grade hna hmu in, rinawm leh taima takin a thih ni thlengin he hna hi a thawk ta a ni.
"BCM Brigade Kohhran tan a ro hlu Upa S Thantluanga chuan a hmangaih em em; a nupui fanau, a u leh naute mai bakah taima taka Lalpa hminga hmangaihna nena alo enkawl thin BCM Brigade Kohhran te hi, rinawm taka rawng a bawlsak thin Chungnungbera kiangah min haw san ta. Ui in, ngai hle mah ila; a dam a ni! A fak nin theihloh-a angchhungah ngei chuan thlamuangin, lungngaih, tah leh nat awm tawh lovin, a Chhandamtu, a hmangaih tak chu hlimin a fak reng tawh dawn a ni. Kan va lawmpui tehreng em!"
