23/02/2021
VAWIIN RINGTHAR BAPTISMA CHANG KHA, A RINNA AVA ROPUI TAK EM.
By. Rev. Ellis Joel Lava.
23/February/ 2021.
K*m 18 dawn rawngbawlin Mission field ah ka lo awm ve ta a, ka thawhpuite zarah ringthar tam tak, (midang chu tluk lo mah ila, kei tlinglo tan chuan an tam hi ka ti ve khawp mai) hi lawmlutin baptisma ka lo chan tir ve tawh a, a k*m chiah kalo hre ta lova, 2015 a nih loh chuan 2016 a, Chhattisgarh, Bamani khua a ringthar kan neih baptisma a chan avanga an vengten tui chawi leh an zinga a awm duh lova an thin hrik tak, chutiang harsatna an tawh avanga an pa in Kristian na chhuahsan a, Hindu a awm leh tura a hrilh pawn duh lova engkim huama rinawm taka Lal Isua hnungzui thlang tu Pi. Urmila khan a rinna avangin a pasal tih ngaihna hre lo leh an khawtlang/ vengchhungte thin hrik hreawm ti lutuk avangin Train a in chilhlum tir ta kha a ni a, sawi nuam em em lo ni mahse Pi. Urmila rinna leh rinawmna erawh chu ropui ka ti em em a ni.
Vawiin lamah Gondagaon Chhattisgarh lam mi pahnih leh Majhidhanua, Odisha a mipahnih baptisma chang tur kan neih avangin zing dar 5:30 AM ah ka thova, Motor te ka silfai a, ka inbual zo a, dar 7:45 AM ah in ka chhuahsan a, Haresh ka va lam phei a, Jiban pawh dar 8:00AM ah Petrol pump a rawn thleng phei ve nghal bawk a.
Thudangah han peng lawk ila, tukin ka zinchhuak chu harsatna neuh neuh in min tlak buak ve deuh reuh a, ka motor chu a ri a dik lova, Haresh te inbulah Air Filter box ka rinhlelh avangin ka thlawn a, ka rin ang ngei chuan Air Filter box chhung chu sazu bu in a lo khat a, ka han la chhuak chu sazu pawh a tlanchhuak nghal a, Air Filter alo sehpawp a, dawr lah chu zingkarah an hawng silo, han țhul mai dawn chuan ringthar baptisma chang tur ten min lo nghak dawn si tiin rilru a buai hle a, engpawh nise Pathian rinchhan in eng a ti em lovang chu tiin sazu sehpawpna lai ah chuan puanchhia a hnawhphui in petrol pump kan pan ta a, thla tawp lam pocket phai hun a ni tawh a, chutah vawiin hi kan nu Birthday a ni bawk nen ka sum neih a beitham tawh nen kan Nula in min rawn phone a, Apate tlai ah buhfai lei a ngai ang min rawn ti zui, kan kalna tur hi Kms 95 vel ni mahse tui awmna leh hmun remchang pan ngai kan nih leh dawn avangin Petrol chu ₹ 1000 (10 ltrs) chu ka mamawh a ni si, rilru buai tak chung leh tlai lam lo haw hun a tihdan tur ngaihtuah ran chung chuan Odisha leh Chhattisgarh state border lam chu kan pan ta a, Limguda khua hi Chhattisgarh lam atanga lo kal tur te tan remchang ber a ni dawn avangin chutah chuan programme hmang turin kan in hrilh hlawm ta a, kan tum hmun chu tluang takin kan thleng a, Chhattisgarh lama ringthar pahnih pawh chu kan thlen hnu rei lote ah an rawn thleng ve nghal a, Odisha lam Majhidhanua lama ringthar baptisma chang tur te erawh vanduai thlak takin an chhungte damlo a boral tak avangin an ni chu kan cancell a lo ngai ta a.
Chhattisgarh lam nupa te chu thu kan han in zawt chiang a, court a innei chhungten an la pawm chiah lo nupa tuak an lo nia, chutia baptisma chang tura border an lo pan mek lai chuan a mipa zawk chhungte chuan nang chu baptisma chang leh lo rih mai rawh in nu chu a duh chuan chang mai rawhse an rawn tih avangin chawp leh chilh chuan baptisma chan chu a duh leh ta lova, chutianga thil a nih tak avang chuan an nu pawh chu, chang ri lova anpa nen hun remchang hmasa ber a chang dun mai tur leh apasal chhungte thu ngaichang rih turin kan thurawn ve a, mahse a duh tlat lo.
A chan tur ngaihtuahin kan rilru a buai hle a, apasal chhungte thil rawn tihdan te ngaihtuahin atan a him dawn lova kan hriat thu te, baptisma hi i chan chuan in nupa inkar thu pawh a chhe thei dawn a, nang chu Kristian I ni tih finfiah I ni tawh anga, I pasal erawh finfiahna a awm dawn lova court lamah zualkovin rinna in ang lo, Kristian leh Hindu tih in an pawt țhen thei che u nia, chuvang chuan țha takin ngaihtuah rawh tiin thurawn chu kan han pe ve lawm lawm a, a pasal pawh chuan chang rihlo mai rawh hun remchangah kan chang mai dawn nia a rawn tive bawk a, mahse Nikita rinna hi ava ropui tak em.
Ti hian min chhang a, "Pastor ka pasal nen hian in hmangaihin kan innei a, a chhungten min pawm thei lova, kan inneih atangin thilsual (sual hnathawh) in mi bei a, chu ramhuai hnathawh chu in staff, Bhagtu hmang hian Lal Isuan min tidam tawh a, chuvang chuan min tidamtu hi Pathian diktak a ni tih hi ka hre chiang tawh a, Lal Isua chu ka ring tawh a, chu ka rinna chu ka sawhsawn thei tawh lo. Baptisma hi ka chang ngei tur a ni, rem min tihsak rawh u, engpawh lo thleng se, ka pasal chhungten inchhunga luh min khap emaw ka pasal ngei pawh hi țhen alo ngai a ni pawn Lal Isua avangin tuar ka huam a ni" tih a sawi chuan min hnehin min va ti tlawm chiang tak em.
A rinna ropui zia leh a rinawm zia ka hmuh khan kei hi ka te chem chem mai.
Chutia a tih tak avang chuan apasal chu thutiam kamna leh a nupui baptisma chang tur chu a hriatpui thu ziah tirin, In nu hi I chhungte atangin engpawh a chungah lo thleng se phatsan lovin I vuan tlat ang em tih te ka han zawt a, phatsan lovang a tih avangin, thil lo kal fuh loh takin tiin ziakin kan dah tir thlap hnu chuan kms 5 vel hla ah inphur phei in baptisma kan in chan tir ta a ni.
Ka kal dawn a, rilru buai leh ngaihtuahna kal thui deuh pawh kha he nu hian min țhiat fai vekin, ropui ti em em leh thawveng tak leh hlimtakin in lam ka lo pan leh ta a ni.
