09/10/2022
*A pawi lo ve, Lalpa.*
Lungchhuan KPP.
_Lalremruata_
Khatia min bialtu Pastorin M.Th. a zir a vanga N. Vanlaiphai Damdawi Veng bialtu Pastor K. Vanlalhriatan min bial laia a bial rawn fan te khan KPP te khan hla te kan lo rem ve a. Kha pastor khan kan phu lohin min faka, min fuih a, min tuipui ta hrep a. Pastor Bial Inkhawmpui leh Bial KPP Intawhkhawmah te khan kan zai ta vak vak a. Min bialtu tur Pastor Jehu Laldintluanga lo thlen hnuah pawh Damdawi Veng Pastor Bial Pavalai Intawhkhawmah te khan min rawn sawm angin kan va zai ta zel kha a nia. DDK leh Local TV lama zai tur te khan min thurawn ta deuh deuh a.
Kan zai zel a. Hla panga chu dah ṭha ve reng reng ang tiin kan record ve ta mai a.
Chutih lai chuan Synod Revival Committee lamin Kohhran Pavalai Pawl Ram pum Intawhkhawma zai turin programe-ah min lo dah ta tlat mai. Revival lam hian khawi a ṭang takin keini ho zai hi lo hria ni maw. Programe kan han hmu chiah chu kan lawmna aiin kan huphurhna a sang zawk. A zai hrim hrim chu kan huphurh lutuk bik pawh a ni lo, Pathianni zana kan zai pui tur te kan han hriat khan kan tha a khur nghal der.
Chumai a ni lo, keini Lungchhuan khua in 150 lek, KPP member 60 awmna Pavalai member te tan chuan Aizawla zu zai tur hian cheng tam fe neih a ngai a, thingtlang khaw kil khawr a awm tan chuan a rit em a ni. Mahse, revival committee te min beiseina chu tih thlawn kan tum bik lo kha chu a nia.
Ram pum huap intawhkhawmna a zai tur khan Aiawt tah in bul kan han ṭan ta ngawt a. Kan aiawt kan hralh a, heti ngawt chuan kan sum mamawh zat hi k*m nga hnu velah kan hmu thei chauh mai thei. Aiawt chu kan tah zela, a Aiawta hralh lo in keimahnin kan chiah a. Kohhran comitte lamin min ngaihtuah a cheng engemaw zat min sih chhuah a, KṬP leh Kohhran Hmeichhe lam thlengin Pavalaite zaina tur hian sum lamin ṭan min lak pui a. Aiawt tah chungin kan zai kan zai ta mai.
Heng kan harsatna leh kan sum pai mamawhna hi khawi aṭangin nge Mission Veng pavalai te hian an lo hriit le. In chakai leh in thlai neih ang ang te rawn thawn thla teh u, tiin min rawn bia !! Kan thawn thla a, kan thawnthlak man tur zat let tam tak pawisa an rawn thawn let a.
Sum rawn suih teh u an la ti ta deuh deuh !!. Keini lam lahin Ram pum intawhkhawma kan zai theihna tur a nih phawt chuan tiin sum suih chungin kan zai leh ta. Kan sumsuih 50 awrh chauh Mission veng KPP te hnenah kan thawn thla leh a. He sumte tlemte kan thawn thlak hi Mission Veng KPP te hian kan mamawh tawk sum(pawisa) ah an lo chantir nia. !! Ram pum huapa intawhkhawm Pathianni zana mipui sangnga inkhawmte hrai nan khan chakai tlem a zawng, thlai thar tlemte leh sumte 50 kha Lal Isuan Mission Veng KPP te kal tlangin zu tipunga!!
A sum(pawisa) lam buaipui kan ngaih tak lohah chuan kan zai uar ta sauh sauh a, intawhkhawm kal dawn kar Nilaini phei chuan awm ni kham meuhin kan zai ta a nih kha.
Kan hlapui(titawh mai ang) A pawi lo ve Lalpa tih hian *Mittui tla fo dawn pawh ni ila,* tia min fuih miau a vangin kan hla rem leh zirna hmunah te hian mittui kan seng fo a sin.
Sum harsatna leh member tlemte kan nih a vang hian kan lama Lalpa a ṭan theih nan kan ṭawngṭai tam phah em em mai bawk.
Khai a sei lutuk dawn. Intawhkhawm kal dawnah hian kan member ṭhenkhatte leh an chhungkuaah natna in ro a rel ve mek bawk a. Mahse heng kan member te tumruh zia leh paukhauh zia hi sawiin a siak lo ve. Kan hla zirna hmunah an kal ngei ngei theih nana mittui tla zawih zawiha Lalpa kan han kar tak tak kha mihring thlirna a ṭanga kal ve lo tura kan ngaih te khan damna an changa kal thei tura kan beisei phak loh Member 30 lai mai kan kal thei ta tlat nia. Hei hi member pum a ṭanga chhut in zaa sawmnga(50%) daih a sin. Lalpa chu fakin awm rawh se.
Kal hun a lo thleng ta. T. Upa Ngura te ina in nghakkhawmin Kohhran represent in ṭawngṭaiin min thlah a, zing dar 6:30 a rik chuan Mission Vengthlang lam panin Sumo pathumah khat ṭhap in kan chhuak ta.
Mission Vengthlang Kohhran ten duat takin min lo thlenga, thlen in nuam taka min dah bakah Zaipawl nei tur leh khawmpui zawh ruala hla record te kan duh a vangin hla zir awlsam nan riah khawmna hmun nuam tak min lo pe bawk a. Ram pum intawhkhawm kal zawng zawngah kan hlim ber awm e. Zirtawp zan chu kan chau deuh a ni mahna kan mu vata. Inrinni zanah ve thung chuan mut dawnah thuamhnaw pawh inbel mumal lo in kan zaia, kan lam bawk a nih kha, hetah pawh hian tinungtu thlarau thianghlim ho in kan zai tho mai.
Pathianni tlai a lo thlenga zana zai tur kan nih a vangin kan riahkhawmna hmunah hla kan han enlawk ve a. A enlawkna ringawt pawh hi a sehsam a na khawp mai, mittui tla chungin kan zai a. Kan hun tawpah kan chairman in ṭawngṭaina hmangin, kan nghahhlelh em em kan huphurh bawk si chu enlawkna hun awm tawh lo a kan rem tawh tur a ni a nih a vangin hnukulh ṭeuh in "A hun a thleng ta kan hla leh kan aw rawlte hi thlaraua i tihnun a tan i k*tah kan hla e" an ti mai chu Halelui leh Amen in member te kan lo ṭawmpui vek a.
Inkhawm dangah chuan keini ho kha hmun thuma ṭhena hmun khat pawh kan lam mang lo ang tihtur a nih laiin Pathianni zanah chuan lam loa ram kan awm ta lo.
Inkhawm ṭan hmain darkar hnih ngawt mai kan zai a, chumai a ni lo Pathian in lam dan thar a pek dawng te kan awm a, kan hla rem hma hian kan chau zo mai awm mang e tih khawpin kha mi zan khan Thlarau pawlna kan chang hlawm a sin.
Kan hma chiaha Mission Vengthlak Kohhran Zaipawl za rual dawn zai thiam em em mai khan zai min tihuphurh thar leh hlawm a vangin rilrua ṭawngṭai chungin Pathian kan au leh ta.
Anni an zai zo keini kan hun a thleng ve ta.
Kan kohhrana kan zaia keimahni leh min lo thlirtuten min duhkhawp loh em em na chu. Kan zai lai hian kan taksa han chet vel hi kan thiam meuh lo va, hmuh hahdam lam aiin kan zai hmel hian hmuh hahthlak lam a pawl zawk.
Chutiang chu nimahse, Pathianni zanah hi chuan kan rimawi a rik rualin Lalpan kan k*t leh ban te chung lamah min khai kan sakin Amah fak nan kan phar ta lawp lawp mai a. Kan su lawp lawpa kan then dial dial tih hre miah lo in a hnua kan enlet hian kan lo su hle hlawm a lo nia. Mak tak maiin hun danga he hla hmanga Lalpa kan faka kan mittui tla a, hnukulha zai hleithei lo ṭhin kha. Lalpan kan mittui min hrukhul saka, ka awrawl min hawnsak thung nia.
Anchhe dawng hnu hi Lal Isuan chatuan nun min pe miau a lawm le.
Kan theih tawpin Lalpa fakin kan zai a, lam tual lama lo lam te, Halelui lo pe tute leh inkhawm ho zawng zawngte nen tuihna hmun khatin Lalpan min chawma. Kham lo takin kan hla chu Pathian ropui nan kan hlan zo ve ta a nih kha.
Inkhawm kan banga tak tak nge, hawihhawm thil pawh hriat hran ni tawh hek suh in va zai ṭha em em ve tih te, in zai a nung hle mai tihte chu kan hlawh ve ta zel a.
Chung karah chuan Pu Huala te chhungkuain an ina zaia thingpui inah min sawm hlauh mai a. Kan hla neih ang ang te sain ṭawngṭaina te kan han neia, thingpui tuihnai tak leh ei tur chi tin reng kan han dawng leh ta a. Chumai a ni lo, kan haw kawnga kan hman tur cheng singkhat lai mai min pai tir bawk nia. Dar sawmpahnih dawnah ṭinin Ram pum huap Kohhran Pavalai Intawhkhawm Vawi 5-na Mission Vengthlanga neih chu kan ṭiak ta ruai ruai mai le.
A tuk zingah kan thuam hnawte Mission Veng Pavalai lamin motor pathum rawn tir thla in an rawn la chhuak a, Thawhṭan zana kan riah natur Synod Conference Center-ah min dah sak leh ta tlap mai. A mak leh zel mang e.
Mission Vengthlangah tukṭhuan ei lehin chaw ei kham lamah kan hla te record turin Venghuai lam kan pan chho leh a. Kan hla record-na senso zawng zawng hi Nl.Lalhmunchami leh Pu R.Lalduhawma te chhungkuain min tumsak vek bawk. He kan hla record-na hmunah pawh hian Nl.Laldingliani hnen a ṭangin energy drink leh tuisik in tur box khat ve ve kan han dawng leh ngawt a. Tluang taka kan hlate kan record zawhah Synod Office canteen-ah Mission Veng Pavalaite min buatsaihsak zan riah kan han kilho leh a. Kan va tlai teh l*l em.
Zanriah eikhamah lo ruahman lawk tawh angin Mission Veng KPP te nen join felloship hlimawm tak mai chu hlawk takin kan hmang ho leh ta a. Banah thingpui leh a hmeh tuihnai tak min buatsaihsak chu hlim takin kan kil ho leh ta.
Zanah Synod Conference center ah kan riah man leh buaipui ngai zawng zawng te Mission Veng KPP te lo tihfel savekah tui takin kan han mu leh ta phawt a.
Zingah Synod conference center aṭanga kan chhuah dawnin Pu Sanga te, Pi Remi te leh Pu Faka ten min rawn thlahin kal kawnga in hman a tan tiin pawisa min rawn pe leh ṭheuh mai te kha kan va phu lo tak em. Dar 7:00-ah Aizawl chhuah sanin kan haw chho ve ta a. Tachhipah Pu Chungnunga ten thingpui min lo buatsaihsak a, kan in zawh hnuin Kan kal kawng hotel chaw ei man tur min pe leh ta. A mak mawlh mawlh teh e. Sialsukah chaw eiin kan chawl a, kan kal leh vang vang hnuah Tuichangaah thingpui in in kan chawla hetah hian kan hmel hriat pawh ni lem lo hnen aṭangin kan thingpui in man kan dawng leh ta. A mak tih loh rual a ni lo.
Dar 3:15-ah khua kan thlenga, khuaah hian welcome banner te tarin Pu Rema te inah an veng nu ho leh Kohhran Committee awm ang ang ten min lo hmuakin Upa R.Lalnunmawian kan thingpui leh a hmeh zawng zawng te a lo tum leh ta vek mai a nih kha. Thingpui kan in zawhah Kohhran Chairmanin ṭawngṭaina hun hmangin mahni in lamah kan ṭin fel ta a nih kha.
A fak hla hmang a:
"Kei thisena i tlan hian eng nge ka tih ang,
Khawi hmunah nge i aw in min hrilh la,"
tia kan zawhna chu, Synod Revival committee kal tlangin a chhanna min kawhhmuh a. Tlawm harsa leh hreawm tam tak, mittui tla fo chunga a fak hla kan sak theih nan intumchawp ṭhin Pathian chuan kan thawh ve ngai hauh loin mite thinlungah hna a thawk ta zel mai.
Kan phu lohin taksa leh thlarauah malsawmna kan dawnga, min duhsaktu ṭanpuitute hi kan tan in va hlu em. Ka sawi hmaih te pawh an la awm mai thei a sin.
A pawi lo ve Lalpa tih hla phuahtu hian malsawmna dawng zel se la. He hla satu leh lo ngaithlatu a piang ten thlarau malsawmna lo chang zel rawh se.
