St.Stephen Catholic Church,Mandwi

St.Stephen Catholic Church,Mandwi Contact information, map and directions, contact form, opening hours, services, ratings, photos, videos and announcements from St.Stephen Catholic Church,Mandwi, Christian church, Mandwi west, Agartala.

27/03/2026

PHASAL 27TH MARCH 2026
JIRIMIA 20:10-13
JIRIMIA SUBRAIYUNGNO TENTAIWI SAMANI
[10] Ang kwbángma bororokno serek-serek khe, “Babaibrwi bwkhak kirimasingcha! bono khibi si di! Phai di chwng bono khibi lai sinai!” Ani khásukni kiching song ang thutaimano naisigwi tongo tei “Bo bandijaknai’-no, hakhe aphuru chwng bono mechenwi mannai tei aphuru khe bono yagul sunai,” hwnwi sa laimano khna-o. [11] Phiya ba Subraiyung se ang bai baksa phan gwnang choba khlainai hai khe ani logi tongwi tongo; aboni bagwi ano sátoknairok thutainai, bórok tei kwplai wng glak. Bórok khlai man ya wngwi lachi kothrojak anw. Bórokni a lachi kothrojakma mol brúmno tong phlai anw, khoroksabo abono pok glak. [12] O kwplaisa Subraiyung, nwng borok kahamno amjogwi nai-o, nwng borokni uansukma bai bwkhano nugo; bórok yagul sujakmano ano phunuk di, tamni hwn ba ang ani bebakno nini thani yaphar kha. [13] Norok Subraiyungni bagwi rwchap di; Subraiyungno lob di! Tamni hwnma le bo borok hamyarokni yakni bigra bororokni langmano mwthang kha.
KOTHOMA KAHAM
JOHON 10:31-42
JUDAIROK BAI JISU NORJAKMANI
[31] Judairok bono khitarna hwnwi hai’-no hai holong khocha lai phi kha. [32] Hakhe Jisu bórokno hai hwnwi sa kha, “Apha khlai di hwnwi rwmani samung kaham kwbángma ang norokni bwskango khlai kha. Abórokni bisingo bu samungni bagwi norok ano khitar laina nai ba?” [33] Judairok hai hwnwi sa kha, “Samung kahamni bagwi chwng nono khitarna nai ya, Kaitorno hamya sama bagwi se, tamni hwn khe borok wngwi se nwng saichung-saichung Kaitor wngna nai-o!” [34] Jisu hai hwnwi sa kha, “ ‘Norok Kaitor bai baksa,’ hwnwi Kaitor samani abo ba norokni Kerongo’-no swijak tong bla. [35] Kaitor bini kók sa rwmani a bororokno ‘Kaitor bai baksa’ hwno, phiya Elembakni kók tháisa phano ha-o klai ya hwnwi chwng saui mano. [36] Apha se ano chongwi o swngcharo rohoro. Hakhe ang Kaitorni Sajla hwnwi sama bai bahai khe norok ano Kaitorno hamya sa-o hwn ba? [37] Ano Aphani samung khlaima nuk ya khe norok ano poito ta khlai di. [38] Abórokno khlaima nuk khe ano poito khlai ya phano ani samungrokno simi phano poito khlai di. Hakhe Apha ani bisingo tongo, phiya ang Aphani bisingo tongo, o kókno norok saui man súk nai.” [39] Hakhe bórok hai’-no hai bono romna nai kha, ahai phano bo bórokni yakni parsa keple lang kha. [40] Jisu hai’-no hai kiphilwi Jordanni ayang naro Johon agi baptisma rwui tong thani thángwi tongwi kha. [41] Aphuru borok kwbángma bini thani phai kha. Bórok hai hwnwi sa lai kha, “Johon mungsa phano soidomni samung khlai lang ya, ahai phano bo o borokni mungwi kók sa langmarok bebak’-no kubui máng se.” [42] Hakhe aroni borok kwbángma bono poito khlai kha.
CATHOLIC PASTORAL COUNCIL

13/03/2026

PHASAL 13TH MAR 2026
HOSEA 14:2-9
HOSEA ISRAILROKNO KOBOKMANI
[2] Norok kóktháirok bai khe Subraiyungni thani kiphilwi phai di; bono hai hwnwi sa di ani sumsokrokno tlangwi pái si di; kaham tongmano yachak di, chwng chini khukrokni bwtháino yapharnai. [3] Asiriya chwngno mwthang glak; chwng korai kasa glak; chwng tei chini Kaitor, chini yakni samungrok, ma-pha kwrwirokno nwng khairogo hwnwi sa glak.
SUBRAIYUNG ISRAILROKNO Langma KWTAL RWNA BAGWI KÓK RWMANI
[4] Ang bórokni kók khna ya wngmano ham rwnai; Bórokno kha sutrang khe hamjaknai, tamni hwn ba ang bórokno jolima ham kha. [5] Ang Israilrokni bagwi pantwi hai wngnai; bo lili khum hai barsanai, tei bini yarwng Lebanonni buphang hai suhornai; [6] Bini bosokrok torsanai; bini bedekrok suhorsanai, bini naithokma olib buphang hai naithok wngnai bini motomma Lebanonni sidar hai wngnai. [7] Bororok haino hai bini saklomo tong phinai Bórok buphang bwlwng hai khe er sanai; bo angur buphang hai khe hom-hom khe hamchanai, bini motomma Lebanonni angur bwtwi hai wngnai. [8] O Ephraim, takjak mwtairokno Ang tamo khlainai? Ang bwlái kormosa ya pain buphang hai wngnai; nini bwthái ani oroni se phai-o;
MWTHAKMA
[9] Khá sinairok, cherwi nainairok o kókno si-o; tamni hwn ba Subraiyungni lama khe kaham, borok kahamrok a lama tẃi himo, tamo khe borok hamyarok le aro thutaiwi klai-o.
KOTHOMA KAHAM
MATHAI 12:28-34
JISU BA BELSEBUL BAI MWTAI HAMYA RWKLAI PHO
[28] Ahai ya, Kaitorni Phola se ano mwtai hamya rwkhlainani phan rw-o, abo’-no Kaitorni ha norokni thani sók phai kha hwnwi sijak rw-o. [29] “Phan gwnang borokno swkang baira kha ya khe bini nogo habwi manwirok segwi tubu-ui man ya; kha khe se bini nok sodro-podro khlai mano. [30] “Ani bwkhak tong ya borok bo ani kena ari se; ang bai thumchru ya khe a borok piring-poroi se khlai-o. [31] Aboni bagwino ang norokno o kók sa-o: bororok jesa sumsok khlaimani, jesa kók hamya samani abo nakarjakna tongo; tamo khe Phola Kwtharno hamya sanai borok bo nakarjak glak. [32] Borokni Sajlano hamya sanai borok bo nakarjakna tongo, tamo khe Phola Kwtharno hamya sanai borok bo nakarjak glak; tabuk buya, ulo buya.”
BWTHÁI BÁI-NO BUPHAG SINIJAGO
[33] “Bwthái kaham manna khe buphang kaham wngna nango; buphang hamya khe bwthái hamya mannai, Buphang bini bwthái bai’-no sinijago. [34] Norok chibukrok; norok hamya twtwi bahai khe norok kók kaham saui man? Bwkha-o kupulung wngwi tongma hai’-no borok búkhúk bai sa-o.
CATHOLIC PASTORAL COUNCIL

10/03/2026

KRAKSAL 10TH MAR 2026
Daniel 3: 25, 34-43

Aboni ulo Asaria horo bachawi tongkha tei khorang sotanwi suhrikha.

Nini mungni jarwi molburumni bagwi ta yakharjadi, Nini smaino (covenant) chwngno ta yakhar rwjadi.

Nini khajuksa Abrahamni jarwi tei nini sebuk Isakni jarwi chini sakni nini kairokmano ta rosa jadi tei nini kwthar khoroksa Israel no.

Nwng rwna hwnmani nokhani athukiri bangmani slaiphano kwbang tei twijwlang rukungni hasing bangmaswk khe bosong bangrwna hwnwi kok rwmani.

O bugra o hayungni kubun bosongni slai kisa phano jotoni slai kisisakhe chwngno khlaikha, chini sumsokni bagwi.

chini o molo (O jorao) chini naikolphan kwrwi eba diari eba twiphang, sokjak yapharma eba puntok ratharma, joggo khlaima, sathrai motomno yapharnani thai kwrwi tei nini kairokmano manthai kwrwi.

tobophano khaphiljak tei koinene phola wngmabai chwng yachakjakthwng,

Aro pun mera tei musuk beres no sogwi yapharma bagwi eba tei chisai kuphung mera bwsarok chini phaiching twi tini nini thani rwjak kha, chwng khatijakya twi nono rwktharkha, nono kha beranai rokni thani lachima phaiya.

Chini je khathongsak chwng nono rwktharo, chwng nono kirio tei nwng tongmano rutugo.

Chwngno lachima-swngsao ta tubujadi, phiya nini kha kolok tei nini mojomo khairokma bai chwngno nini phaiching khlaidi.

Nini wanama-swngcha samungni twi chwngno khengjadi tei nini chwngsacha mwngno tubojadi.
KOTHOMA KAHAM
MATHAI 18:21-35
NAKAR YA SELENGNI RWNGTHOMA
[21] Hakhe Pitor Jisuni thani phaiwi hai hwnwi sẃng phai kha, “Subrai, ani takhuk ani thani uái bwswk sumsok khlai khe ang bono uái bwswk nakarnai? Uáisni da?” [22] Jisu hai hwnwi sa kha, “I’nhi, uáisni ya, uái snichi máng uáisni nakar di. [23] Tamni hwn khe Kaitorni ha wng kha omo hai se: bugra khoroksa bini selengrokni isap nainani khá chong kha. [24] Bo isap naui tongma jora seleng khoroksa bini thani tubujak kha, bini lakai chisai. [25] A lakai su bainani a selengni rang kwrwi, hakhe lakai su baina bagwi bugra hai hwnwi dagi kha, ‘Hik-sa bai tei bebak tong-kwrwi bai baksa nwng phaljak di.’ [26] Hakhe a seleng bini bugrani yakungo klaiwi ‘Ano khá lok ja di, ang bebak’-no su-ui rw anw!’ hwnwi koi kha. [27] Bugra bono khairokjak kha, hakhe bini lakaino yakarwi bono phiyógwi rohor kha. [28] “A seleng tháng khe’-no bo hai tei khoroksa selengno malai kha bini thani a selengni kisa lakai tongo. Bo bono romwi totra sebwi ‘Nini lakaino su-ui pái di!’ hwnwi hwn kha. [29] A seleng ha-o klaiwi ‘Ano khá lok ja di, ang su-ui rw bai anw!’ hwnwi koi kha. [30] Hai phano bo gosi li ya; tamo khe lakai su bai ya sakni bagwi bono alongo chobwi ton kha. [31] Abono nugwi tei selengrok khá hamya wng kha, hakhe bugrani thani thángwi joto kók khupro-ui saui lai kha. [32] Hakhe bugra a selengno tubu di hwn kha. Bo hai hwnwi sa kha, ‘Nwng bwswk seleng hamya! Nwng ano koima bai se ang nini bebak lakaino yakaro. [33] Ang nono khairokma hai’-no nwngbo a selengno khairokthai klaimani.’ [34] Bugra panjalwi jolijak kha, hakhe a selengno bebak lakai su bai ya sak sátokna hwnwi alongo chop kha.” [35] Jisu hai hwnwi saui kók mwthak kha, “Tumungno norok jotono norokni takhukno khá bai nakar ya khe chuknohani ani Aphabo norokno omo hai khlainai.”
CATHOLIC PASTORAL COUNCIL

28/02/2026

CHASAL 28TH FEB 2026
UÁINWINI SA PHIMA 26:16-19
SUBRAIYUNGNI SAKNI BÓROK
[16] “Subraiyung norokni Kaitor tini norokno dagi-o o dagimarokno tei kerongrokno tẃi di; norokni bebak bwkha bai khúk bai tei yak bai omorokno bebakno khir khir khe tẃiwi tong di. [17] Tini norok hai hwnwi sakhlai kha, Subraiyungno norokni Kaitor wngnai tei norok bini lama tẃi him di, bini dagimarokno tei raidarokno tẃi di tei bini khorangno khunju-o kái di. [18] Tei Subraiyungbo tini hai hwnwi sakhlai kha, bo swmai tangma haino norok bini sakni borok tei rangchak-ríchak wng kha tei bini bebak dagimarokno norok khnaui ma tongnai. [19] Tei bo bini snamjak bebak dopharokni bere norokno kotor kwplai lobjaknai, mung kotor tei bórom gwnang khlainai tei bo swmai tangma haino norokno Subraiyung norokni Kaitorni bagwi borok kwthar khlai kha.”
KOTHOMA KAHAM
MATHAI 5:43-48
KENA ARIROKNO HAMJAK DI
[43] “ ‘Nini nok-arini bororokno hamjak di, tei kena arirokno naisler di,’ hwnwi sajakmani o kókno norok khna kha. [44] Phiya ba ang norokno o kók sa-o, norokni kena arirokno hamjak di, norokno swrainairokno hamari rw di, norokno naislernairokni kaham khlai di, norokni hamya khlainairokni bagwi tei sátoknairokni bagwi suri san di; [45] hakhe norok chuknohani norokni Phani sajla wngnai, tamni hwn khe bo bini satungno borok kahamnobo rw-o, borok hamyanobo rw-o; phiya kaham khlainainobo uatwi rw-o, hamya khlainainobo rw-o. [46] Norokno hamjaknairokno simi norok hamjak khe Kaitor tamo wngwi norokno sokat rwnai. Teks romnairokbo abo tẃi hamjak lai bla! [47] Norokni bororok bai simi kók sa lai khe buini slái kwbáng tamo khlaima klai? Tei buirokbo abo tẃi ba sa lai bla! [48] Chuknohani norokni Pha kaham wng tẃi norokbo katswi bo hai’-no kaham wng di.”
CATHOLIC PASTORAL COUNCIL

07/02/2026

CHASAL 7TH FEB 2026
1 HABUGRA 3:4-13
SOLOMON SIMUNGNI BAGWI SURIMANI
[4] Salsa habugra Gibeono ratharwi yapharna bagwi tháng kha tei Solomon a háyá-o sai-sai sógwi yapharmung yaphar kha. [5] A horo Subraiyung bono imango nukjagwi, “Nwng ani thani tamo nai?” Hwnwi sẃng kha. [6] Solomon hai hwnwi sa kha, “Nwng ani apha nini seleng Daudno belai khe hamjagwi tongo, phiya bo’-bo nwng bai kaham kók khnaui, bujsói tẃiwi, bwkha srai-srai khe’-no tong lang kha. Tei nwng bai hamjak máng tongmano phunukna bagwi bono sajla khoroksano rwui tabuk bini achukthayungo achuk rw kha. [7] Tabuk, o Subraiyung ani Kaitor nwng ani apha Daudni yagulo ano bugra chá rw kha. Tamo khe ang belai chwrai bahai khe hano tẃinai si ya. [8] Nini o seleng nwng chongmani o borok kwbángmarokni bisingo lekhana phano lekha bai yarokni bisingo nwng ano oro nini borok wngna bagwi chong kha. [9] Aboni bagwi nwng ano simung rw di, ang nini bororokno bujsói khlaina bagwi tei bubo kaham bubo hamya sinani bagwi simung rw di. Wng ya khe ang bahai khe nini o luku kwbángmano tẃitherwi mannai?” [10] Omo haino sanmani bai Subraiyung Solomonno chajak kha. [11] Hakhe bo bono hai hwnwi sa kha, “Tamni hwn ba nwng sakni umor kolok san yaui, hamchanano san yaui eba nini arirokno thwi thung hwnwibo san yaui nwng bujsói khe tẃina bagwi tei simungni bagwi simi se san si-o, [12] nai di, ang nwng samani haino khlai kha; nai di ang nono teibo simung tei rwngmung rw kha, tamo khe nini slái swkang khoroksa phano nwng hai kwrwi tei nini slái ulobo wng glak. [13] Tei nwng san yanobo ang nono rw kha, nwng gwnang wngnai tei bórom mannai, aboni bagwi nini a jora-o bugrarokni bisingo khoroksa phano nwng hai tong glak.
KOTHOMA KAHAM
MARK 6:30-34
BÓROK KHOROK BASAINO JISU CHÁ RWMANI
[30] Chonghorrok Jisuni thani kiphilwi bórok khlaimarok bai phrwngmarokno bebak sa phai kha. [31] Aphuru aro borok kwbángma tháng lai-o phai lai-o wngwi tongma bai Jisu bai bini sagrirok chána suda jora manjak li ya. Aboni bagwino Jisu bórokno hai hwnwi sa kha, “Hwm tho, chwng simi siring siring kwrẃngsa-o tháng anw, hakhe norokbo kisa lenglaui man anw.” [32] Hakhe bórok simi siring siring kwrẃngsa-o rung bai khe lam rw kha. [33] Hai phano luku kwbángma bórok thángmano nuk rwgwi bórokno sini rwk kha, hakhe taun brúm brúmni bororok ha tẃi khachik lai thángwi Jisu bai bini sagrirokni slái swkang aro sógwi tong lai kha. [34] Rungni ongkhor kheno Jisu aswk borok kwbángmano nugwi jai kheno kháirokjak kha, tamni hwn khe bórok mwrwknai kwrwi merarok hai. Hakhe bo bórokno kwbángma phrwng kha.
CATHOLIC PASTORAL COUNCIL

04/02/2026

SRANGSAL 4TH FEB 2026
2 SAMUEL 24:2, 9-17
DAUD BÓROK LEKHAMANI
[2] Hakhe Daud sengkrak bokhorok Joab bai tongnairokno hai hwnwi dagi kha, “Tháng di, ha gwnangwini bebak Israil bosongno, Danni simi Birseba jora bororokno lekhaui di, hakhe bwswk bororok tong ang saui mannai.”
[9] Hakhe Joab habugrani thani choba nang lai mannai Israilo khorok 800,000 tei Juda-o khorok 500,000 choba bachaui mannai bororok tongo. [10] Tamo khe Daud bororokno lekha bai khe bini bwkha thwijak kha; Daud Subraiyungno hai hwnwi sa kha, “Ang abo hai samung tangwi sumsok kotorma khlai kha. Hai phano Subraiyung ano nakar ja si di. Ang khá si ya wngwi belai butuani samung khlaijak kha.” [11] Teini phungo Daud phung aiwi bacha khe, Daudni, diyari Gadni thani kók diyari sajak kha. [12] Daudno thángwi, “Subraiyung nini bwskango podtham yapharo, nwng chongwi namani hai’-no ang khlai manna tẃi nwng podsano saiwi na di,” hwnwi sa kha. [13] Hakhe Gad Daudni thani phaiwi hai hwnwi sẃng phai kha, “Nini ha-o nokha bisik tham asari da nangno eba taltham jora riphrikjagwi da khárwi tongnai eba saltham jora nini ha-o bok de nangjak rwnai? Tabuk uansugwi chong di, ano rwui rohornaino ang tamo sauinai ano saui rohor di.” [14] Hakhe Daud Gadno hai hwnwi sa kha, “Ang belai ayuk-muyuk nang kha, Subraiyungni yago klaimani se, ham kugo tamni hwn ba bo khairokma kupulung; hai phano borokni yago le ta klai thung.” [15] Hakhe Subraiyung, Israilrokni ha-o phungni simi chongjakmani jora bok manjak rw kha. Danni simi Birseba jora khorok 70,000 bororok thwi bai kha. [16] Subraiyungni suari Jerusalemno sokomorna bagwi yak pholok khe, Subraiyung bini bwkha sláiwi bororokno sokomorwi tongnai suarino, “Wng kha, nini yak thak si di!” hwnwi sa kha. Suari aphuru Jebussa Arauna mai nakma khola-o tongo. [17] Hakhe Daud bororokno butharnai suarino nuk khe Subraiyungno hai hwnwi sa kha, “Nai di, ang sumsok khlai kha, ang se samung cha ya khlainai; bórok tamo khlai kha ba? Nwng ang bai ani núkhungno simi se sátok di.”
KOTHOMA KAHAM
MARK 6:1-6
NASARETSONG JISUNO GWNDA KHLAI YA WNGMANI
[1] Ulo Jisu aroni thángwi bini ha-o phai kha, bini sagrirok bo bai baksa tháng lai kha. [2] Sabat salo bo thumnogo phrwngwi kha. Aswk bororok bini a phrwngmano khnaui uanajak bai kha, hakhe hai hwnwi sa lai kha, “O borok omorokno biyangni man? Bo aswk elem kwrwng wngma ba abo tamo? Bini yak tẃi ha-o nuk ya samungrok omorok ba tamo? [3] O borok a mistri ya diba? Bo Mariamni a bwsla, Jakob, Josi, Juda tei Simonni takhuk ya diba? Bini bahanokjwksong chwng bai baksa oro tong ya diba?” Hakhe bórok bono gwnda khlai li ya. [4] Jisu bórokno hai hwnwi sa kha, “Diyari joto jaga-o bórijago, bini ha bai, sandai-masak bai tei nokni bororok bai simi se bórijak ya.” [5] Hakhe bo khoroknwi khoroktham hamyarokni saka yak beraui ham rwma karwi aro tei mungsa phano ha-o nuk ya samung khlaiwi man li ya. [6] Bórok poito khlai ya wngmano nugwi bo uanajak kha. Hakhe Jisu kami brúm brúm thángwi bororokno phrwng kha.
CATHOLIC PASTORAL COUNCIL

31/01/2026

CHASAL 31ST JAN 2026
2 SAMUEL 12:1-7, 10-17
NATHANNI KÓK BAI DAUD KHA KIPHILMANI
[1] Hakhe Subraiyung Nathanno Daudni thani rohor kha. Bo bini thani phaiwi bono hai hwnwi sa phai kha, “Kamiyung khungsa-o khoroknwi borok tongo, khoroksa khe gwnang tei khoroksa khe bigra ja. [2] Gwnangsani khe kwbángma musukrok tei merarok tongo, [3] tamo khe kwrwisani khe bo páimani merajwk bwsa masa susuk tong ja-o. Bo abono kaham khe naikini khlaiwi bini nogo bini chwrairok bai baksa tor rw kha, bo bini chámungno chá rw-o tei bini khuri bai twi khan rw-o, bini khúri’-ono thu-o tei abo bini bwsajwk hai se. [4] Salsa gwnangsani nogo nograirok phai kha tei a gwnangsa bini nograirokno chá rwna bagwi bini merano butharna muchungjak li ya, phiya ba bo a bigrasani mera masasusukno naui nograirokni banta abono sóng kha.” [5] Aphuru khe Daud a gwnangsano belai jolijagwi Nathanno hai hwnwi sa kha, “Kwthang tongnaisa Subraiyungni mung bai sa-o, omo hai samung khlainai bo ma butharjakna se nango. [6] Bo abo hai samung hamya tangmani bagwi bo a mera masani mak brwi rwui ma suthai tamni hwn ba bini khairokma kwrwi.” [7] Nathan Daudno, “Nwng’-no a borok,” hwnwi sa kha. Subraiyung Israilni Kaitor hai hwnwi sa-o, ang nono Israilni habugra chongmani tei nono Solni yaknibo phiyók kha;
[10] Aboni bagwi tabuk nini núkhungni sakani seng tei yakarwi tháng glak, tamni hwn ba nwng Hitisa Uriani hikno naui ani kók khna ya wng kha. [11] Subraiyung hai hwnwi sa-o, “Ang nini núkhungni’-no nini bagwi jwngjal phnangnaino bacha rwnai; tei nini mokol bwskangni nihiksongno segwi nini nok arirokno rwnai tei bórok nihiksong bai sal kwthango’-no pal thunai. [12] Nwng abono tepsa khe khlai kha, tamo khe ang abono bebak Israilrokni bwskango sal kwthango’-no abono khlainai.” [13] Daud Nathanno, “Ang Subraiyungni thani sumsok khlai kha,” hwnwi sa kha. Nathan Daudno hai hwnwi sa kha, “Subraiyung nono nakar kha, nwng thwi glak. [14] Tamo khe omo tẃi samung khlaimani bagwi Subraiyung nono swprak sinai, hakhe nini a achainai absa kwlwi ma thwinai.” [15] Aphuru khe Nathan bini nogo kiphilwi tháng kha.
DAUDNI BWSLA TWIMANI
Hakhe Uriani bihik bai manmani Daudni bwslano Subraiyung lum rw kha. [16] Hakhe Daud chwraino ham rw ja di hwnwi Kaitorni thani suri san kha; Daud mungsa chá li ya tei bini nok bisingo thángwi hopung ha-o klaiwi tong kha. [17] Bini nokni okrarok bini gana-o thángwi, bono bacha rwna nai lai kha, hai phano bo bacha li ya tei bórok bai pal mungsa chá li ya.
KOTHOMA KAHAM
MARK 4:35-41
JISU NOKBAR KOTOR THAK RWMANI
[35] A salni sarigo Jisu bini sagrirokno hai hwnwi sa kha, “Hwm tho, chwng twibom ayang naro tháng anw.” [36] Hakhe bórok lukuno khibi tháng lai kha. Jisu achukmani rungo’-no sagrirokbo kasaui kha, hakhe bono bórok bai tlang kha. Tei rungrokbo aro tongo. [37] Nokbar kotor belai khe sipchaui phai kha, hakhe twi aphal rungo bu phaijagwi tongma bai rungo twi pungna naiwi tong kha. [38] Jisu kobongo bokhorok beraui rung uklogo thu-ui tongo. Sagrirok bono sochaui hai hwnwi sa kha, “Hodakra, chwng thwina naiwi tongmani nwng uana ya diba?” [39] Jisu bachaui nokbarno hai hwnwi damrok kha, “Siringcha wng di!” Hakhe bo twi aphalrokno hai hwnwi sa kha, “Thak si di!” Nokbar thak kha, hakhe kwchang kwchang wng kha. [40] Jisu aphuru sagrirokno hai hwnwi sa kha, “Norok tamo swk aswk kirijak? Tamo swk norok poito kwrwi wng bai?” [41] Hakhe bórok kirima habwi hai hwnwi sa lai kha, “Hakhe o borok sabo? Nokbar bai twirok suda bini kók khnaui ma tongo!”
CATHOLIC PASTORAL COUNCIL

27/01/2026

KRAKSAL 27TH JANUARY 2026
2 SAMUEL 6:12-15, 17-19
JERUSALEMO SWMAIKHOK TUBUJAKMA
[12] Hakhe habugra Daudno sajak kha, Subraiyungni swmai bokhok tongmani bagwi Obed-Idom bai bini núkhungni tong kwrwi bebakno hamari man kha, hakhe Daud belai tongthokjagwi Obed-Idomni nokni swmai bokhokno thángwi tubu kha. [13] Subraini swmai bokhokno tẃinairok yakam dok swkang tháng kha, hakhe bo musuk masa tei kuphung musuk bwsa masa ratharwi yaphar kha. [14] Daud chango rí bwsate kanwi Subraiyungni bwskango jai kheno mwsa kha. [15] Hakhe Daud tei Israil bororok chirikhógwi bokorong sup laiwi Subraiyungni swmai bokhokno Jerusalem o tubu lai kha.
[17] Hakhe bórok swmai bokhokno tubu-ui ríni nok bisingo Daud snammani-o abono ton kha. Hakhe Daud Subraiyungni thani sógwi yapharmung tei kwthamungni yapharmungrok yaphar kha. [18] Bo sógwi yaphar mungrok tei kwthamungni yapharmung yapharwi pái bai khe, bo bororokno phan gwnang Subraiyungni mung bai hamari rw kha. [19] Bo chámung bak kha, Israilni chwla-bwrwi thwgwi’-no auang belep lepsa, muihan phonsa, angur kwranni auan rw kha. Aboni yagulo bebak borok sak sakni nogo kiphilwi tháng bai kha.
KOTHOMA KAHAM
MARK 3:31-35
JISUNI SAKNI BÓROK
[31] Aphuru Jisuni buma bai bini takhuksong phaiwi sók phai kha. Bórok phataro bachaui tong laiwi bono ring rw hor kha. [32] Luku kwbángma Jisuno rekerwi achuk laijak, hakhe bórok bono hai hwnwi sa kha, “Nahar di, nwma bai nini takhuksong phataro, bórok nono naituk lai-o.” [33] Jisu hai hwnwi sa kha, “Sabo ani ama? Sabo ani takhuksong?” [34] Hakhe bono rekerwi achugwi tongnai bororokno naisigwi bo hai hwnwi sa kha, “Iko, bo se ani ama, bórok se ani takhuksong! [35] Kaitorni muchung tẃi tongnai borok bo’ se ani takhuk, ani bukhuk, ani ama.”
CATHOLIC PASTORAL COUNCIL

20/01/2026

KRAKSAL 20TH JAN 2026
1 SAMUEL 16:1-13
DAUD HABUGRA CHONGJAKMANI
[1] Subraiyung Samuelno hai hwnwi sa kha, “Nwng bwswk tei Solni bagwi khá khamwi tong sinai? Ang bono Israilni saka-o habugra tongma nor kha. Tabuk nwng bokorongo thok kupulung naui Betlehemo Jisaini thani tháng di, tamni hwn ba ang bini bwslasongni bisingo khoroksano habugra chong kha.” [2] Samuel hai hwnwi sa kha, “Ang bahai khe thángnai? Sol abono khna khe ano bo butharnai!” Tei Subraiyung hai hwnwi sa kha, “Musuk bwsa masa na di, hakhe ang Subraiyungno yapharnani bagwi se phai-o hwnwi sa di. [3] Yapharma jora-o Jisaino ring di, hakhe nwng tamo khlaina nangno ang nono phunuknai. Ang nono samani borokno nwng habugra wngnani thok ma lunai.” [4] Samuel Subraiyung samani haino khlai kha tei Betlehemo phai kha, kamiyungni tẃiphangrok kwlwi twtwi bo bai malainani phaiwi hai hwnwi sa phai kha, “Kaham kwrwng khe da phai kha?” [5] Tei bo hai hwnwi sa kha, “I’n, kahamno, ang Subraiyungno yapharnani bagwi se phai-o. Norok sak sak kwthar wng baiwi ang bai pal phai di. Bo Jisai bai bini bwslasongno kwthar wngwi yapharma-o phainani kobok kha.” [6] Bórok sók phai khe bo Eliabno nuk khe hai hwnwi uansuk kha, “Bwskango bachaui tongnai bono Subraiyung chongmani wng anw.” [7] Phiya ba Subraiyung bono hai hwnwi sa kha, “Bini mwkhang bai tormani simi ta naisik di, tamni hwn ba ang bono gosi li ya, tamo khe Subraiyung borok naima hai khe nai ya, borok khe saka saka naisigo, tamo khe Subraiyung khe bwkhano se nai-o.” [8] Hakhe Jisai bini bwsla Abinadabno ringwi Samuelni bwskango tubu kha. Tamo khe Samuel, “Subraiyung bonobo chong ya kho,” hwnwi sa kha. [9] Hakhe Jisai Sammano tubu khe Samuel, “Subraiyung bonobo chong ya,” hwnwi sa kha. [10] Abo hai khe Jisai bini khoroksni bwslasongno Samuelni bwskango tubu kha, Samuel Jisaino hai hwnwi sa kha, “Subraiyung abórokni bisingo khoroksano phano se chong ya.” [11] Samuel Jisaino hai hwnwi sa kha, “Nini bwsa bebak de oro sók phai bai kha?” Jisai hai hwnwi sa kha, “Tei kusu k*k khoroksa tong kho, phiya ba bo mera se mwrwgwi tongo.” Samuel Jisaino hai hwnwi sa kha, “Bono oro na rw hor di, bo sók phai ya sak chwng achuk lai glak.” [12] Hakhe Jisai bono na rw hor kha, bo belai chwla kaham, mokolbo naithokma goron gwnang. Subraiyung Samuelno, “Bacha di, bono thok phulwi chong chongthar chong di, omo se ang chongmani,” hwnwi sa kha. [13] Hakhe Samuel bokorongni thok naui bini takhukrokni bwskango Daudno thok phul kha, a salni simi khe Subraiyungni phola Daudni thani phai kha. Samuel aboni ulo Rama-o kiphilwi tháng kha.
KOTHOMA KAHAM
MARK 2:23-28
SABAT SALNI KÓK SẂNGMANI
[23] Salsa Sabat salo Jisu gom bwlwng bising bising himwi thángmani. Bini sagrirok bo bai him lai twtwi gom bwtang cherna cheng lai kha. [24] Hakhe Pharisairok Jisuno hai hwnwi sa kha, “Nai di, nini sagrirok Sabat salo abo hai khlaimani abo chini Kerong swbaima klai-o.” [25] Jisu hai hwnwi sa kha, “Chámung kwrwi wngwi tong phuru Daud tamo khlai kha norok abo poriui nai ya kho diba? Bo bai bini logisongrok ok khuijakmani; [26] aboni bagwino bo Kaitorni nogo habwi Kaitorno barokmani a ruti chá kha. Ochai bokhorok Abiatharni molo omo wngo. Chini Kerongo rwksa khe ochairok simi se a ruti cháui mano; aile Daudbo abono chá kha, bini logisongroknobo chá rw kha.” [27] Jisu hai hwnwi saui kók mwthak kha “Borokni bagwi se Sabat sal khlaijago, Sabat salni bagwi borok khlaijak ya. [28] Aboni bagwino Borokni Sajla wng kha Sabat salnibo bokhorok.”
CATHOLIC PASTORAL COUNCIL

19/01/2026

TANGSAL 19TH JAN 2026
1 SAMUEL 15:16-23
SOL HABUGRA NORJAKMANI
[16] Hakhe Samuel Solno, “Thak di, tini horo Subraiyung ano tamo sa kha ang saui khna rw anw,” hwnwi sa kha. Sol, “Ano sa di,” hwnwi sa kha. [17] Samuel hai hwnwi sa kha, “Nini sakno nwng mungsa chúk ya hwnwi chong phano nwng Israilrokni bokhorok. Subraiyung nono Israil bosongni habugra chong kha.” [18] Subraiyung nono bebak borok hamya Amaleksarokno sokomor di hwnwi dagiui rohor kha tei bórokno komor súk ya sak choba nangwi di hwnwi sa kha. [19] Nwng tamni Subraiyungni kók khna li ya? Hakhe tamni manwirokno segwi naui Subraiyungni bwskango cha ya samung tang? [20] Sol Samuelno hai hwnwi sa kha, “Ang Subraiyungni kók khna kha, bo sama haino ang ongkhorwi thángwi Amaleksani habugra Agagno tubu kha, bebak Amaleksarokno sokomor kha. [21] Tamo khe ani bororok se kaham kaham merarok, musukrokno Gilgalo Subraiyung nini Kaitorni thani yapharnani bagwi buthar lai ya khe tubu lai kha.” [22] Hakhe Samuel hai hwnwi sa kha, “Subraiyung tamono chajak, sógwi yapharma de tei bini kók khnanani de? Nai di, yapharmani slái bini kók khnamani se ham kugo. [23] Bono kebengmani le danda-baji phunuknairok bai baksano hamya, khá si ya wngmarokbo mwtai khulummani bai baksano sumsok khlaima klai-o. Nwng Subraiyungni kók na li ya wngmani bagwi’-no bo’-bo nono tei habugra ton glak.”
KOTHOMA KAHAM
MARK 2:18-22
UBASNI KÓK SẂNGMANI
[18] Baptisma rwnai Johonni sagrirok bai Pharisairok salsa ubas tong lai kha. Baksa borok Jisuni thani phaiwi hai hwnwi sẃng lai kha, “Tamo wngwi baptisma rwnai Johonni sagrirok bai Pharisairokni sagrirok ubas tong lai? Nini khe tamo tong lai ya sla?” [19] Jisu hai hwnwi sa kha, “Káijaknaisa tong twtwi kái lai panda-o phainairok ma chá ya wng anw hwnwi da norok khá ka? I’nhi, káijaknaisa tong sak bórok ma chá ya wng glak. [20] Tamo khe omo tẃi sal phai anw, káijaknaisa bórok bai swkagwi tlangjak anw, a salo bórok chá yaui ma tong anw. [21] “Rí kwchamo khoroksa phano rí kwtal thap ya. Thab khe a rí kwtal kwchamno kichik rwnai, hakhe a bwlam uar rwnai. [22] Eba khe khoroksa phano angur bwtwi kwtalno twk mosonjago ton ya. Ton khe angur bwtwi a twkno rechek rachak khlainai, hakhe angur bwtwi bai twkbo hamya wngnai. I’nhi, angur bwtwi kwtalni bagwino twk kwtal.”
CATHOLIC PASTORAL COUNCIL

18/01/2026

ERENGMOLNI 2ND KOKTISAL
JISAIA 49:3, 5-6
ISRAIL WNG KHA DOPHANI KAISA POHOR
[3] Tei bo ano hai hwnwi sa kha, “Nwng ani seleng, Israil, nini bising tẃi’-no ang chẃngsacha khlaijaknai.”
[5] Tabuk Subraiyung hai hwnwi sa kha, bo ano oksingni simi snamwi tubu kha, ang bini seleng wngwi Jakobno bini thani kiphilwi tubuna bagwi; tei Israilrok bini thani kuthumui manna tẃi khe, Subraiyungni mokolo ang bórom man kha; Ani Kaitor ani bagwi phan wng kha. [6] Bo hai hwnwi sa kha, “Nwng Jakobni bebak bosongno songchana bagwi, tei Israilni khatijak bororokno tei uáisa kiphilwi tubunani bagwi, ani seleng wngnani, abo belai klai kók; ani mwthangma ha páithak jora sógwina bagwi, ang nono dopharokni thani pohor hai khlainai.”
KIPHILNWI POREMA
1 KORINTH 1:1-3
[1] Ang Pol omono swihoro, ang Kaitorni morji bai Khristo Jisuni chonghor wngna hwnwi ringjak. Ang bai baksa takhuk Sostinibo omono swihoro. [2] Korinthni Kaitorni mothano, Kaitorni borok kwthar wngna bagwi ringjagwi Khristo Jisu bai thansa wngma tẃi bini borok wngnairokno chini Subrai Jisu Khristoni mungwi ringnai joto hani bororokno omono swihoro. Jisu Khristo wng kha bóroknibo Subrai, chinibo Subrai. [3] Chini Apha Kaitor bai Subrai Jisu Khristo norokno khairok thung, norokno khá kwchang rw thung.
KOTHOMA KAHAM
JOHON 1:29-34
KAITORNI MERA BWSA
[29] Teini salo Jisuno bini phaising phaima nugwi Johon hai hwnwi sa kha, “Iko, nahar di, Kaitorni mera bwsa! Swngcharni sumsokno bo’- se ruju-ui tlangnai. [30] Omono ang hai hwnwi samani a borok, ‘Khoroksa ani slái ulo phainai, phiya ba bo ani slái tor kugo, tamni hwn khe ang achai ya sini’-no bo tongo.’ [31] A borok sabo ang saui man ya, tamo khe bo’-no Israilrokni thani sini rwna hwnwi se ang twi bai baptisma rwna phai-o.” [32] Johon Jisuni kók hai hwnwi sa kha, “Ang Pholano pharuk hai khe nokhani birkhlai bini sago tong phaima nuk kha. [33] Ang bono sini ya tongmani’-no, tamo khe twi bai baptisma rw di hwnwi ano rohornai Kaitor hai hwnwi sa kha, ‘Nwng Pholano birkhlai khoroksani sago tong phaima nuk anw, a borok’-no Phola Kwthar bai baptisma rwnai.’ [34] Ang omono nuk kha, hakhe norokno o kók sa-o, omono Kaitorni Sajla.”
CATHOLIC PASTORAL COUNCIL

13/01/2026

KRAKSAL 13TH JAN 2026
1 SAMUEL 1:9-20
HANNA BAI ELI
[9] Salsa bórok Silo-o Subraiyungni nok bisingo chá bai khe nung bai khe Hanna bacha kha. Eli ochai Subraiyungni nokni dugar gana-o achugwi tongo. [10] Hanna belai bwkha hamya wngwi Subraiyungni thani suriui kap kha. [11] Hakhe bo swmai tangwi hai hwnwi sa kha, “Sengkrakrokni Subraiyung!Nini selengjwk, ano naikhlai ja di, ani tektono naiwi ano muitu khlai ja di, ano ta pok ja di! Nwng ano bwsa chwla khoroksa rw khe, ang swmai tangwi sa-o, ang bono kwthang tong sak Subraiyungni thani yapharnai teibo bwkhnai bo rajak glak.” [12] Hanna Subraiyungni thani suri san máng tong kha, Eli khe bini búkhúkno naichomwi tongo. [13] Hanna bini bwkha bisingo kók saui tongo, bini búkhúk simi se ula-ula wngo, bini khorang khe khna ya; hakhe Eli bo chuak nungjak se wng khna hwnwi chong kha. [14] Hakhe Eli bono, “Nwng bwswk kwdwk arak phegwi tong sinai? Nini aroni arak khibiui rohor si di!” hwnwi sa kha. [15] Phiya ba Hanna hai hwnwi sa kha, “I’nhi, bubagra ang arak kephek ya, ang belai’-no tekto nangjak bwrwija se; ang suri twtwi Subraiyungni thani bwkhani kók se saui tongo. [16] Ahaino baliknai bwrwi hwnwi ta chong di, ang belai bwkha ui-ui wngwi se abo hai khe suri-o.” [17] Hakhe Eli, “Kwchang kwchang khe tháng di, Israilni Kaitor nwng sanmano rw si thung,” hwnwi sa kha. [18] Tei bwrwi hai hwnwi sa kha, “Nini selengjwk khairokmung man thung.” Hakhe Hanna thángwi chá kha-nung kha tei bwkha-o tekto kwrwi kha.
SAMUEL ACHAIMA TEI YAPHARJAKMANI
[19] Bórok teini phung aidrobo dakti bachaui Subraiyungno khulum baiwi Rama-o bórokni nogo kiphilwi tháng kha. Elkana bini bihik Hanna bai thu kha-chá kha; hakhe Subraiyung bini surimano khna kha. [20] Hanna jora’-ono sakderiya wngwi chwla bwsa khoroksa bá kha, bini mung Samuel hwnwi phar kha, tamni hwn ba bwrwi hai hwnwi sa kha, “Ang bini bagwi Subraiyungno san kha.”
KOTHOMA KAHAM
MARK 1:21-28
MWTAI HAMYA KOBOLJAKNO JISU SRA RWMANI
[21] Bórok Kapharnaumo phai lai kha, hakhe bwskangni Sabat salo Jisu thumnogo habwi phrwngwi kha. [22] Bo phrwngmano khnanairok uanajak bai kha. Bo Kerong phrwngnairok hai phrwng ya, suar gwnang khe se phrwngo. [23] Aphuruno mwtai hamya kolobjak khoroksa a thumnogo habwi hai hwnwi chirikhók kha, [24] “O Nasaretni Jisu, nwng chwng bai tamo nangjak? Nwng chwngno sokomorna da phai? Nwng sabo ang saui mano. Nwng Kaitorni aroni borok kwthar!” [25] Jisu a mwtaino hai hwnwi damrok kha, “Siringcha wng di! O borok bisingni ongkhorwi phai di!” [26] Hakhe a mwtai a borokno leng rwui sotonwi chirikhók kha, hakhe bini bisingni ongkhorwi phai kha. [27] Bebak bororok aswk khe uanajak bai kha, hakhe hai hwnwi sa lai kha, “Omo tamo? Bo phrwngmani omo tail juda ya da? Bo kwplai khe mwtai hamyarokno suda dagi-o, bo dagimano bórokbo ma khna-o!” [28] Aboni bagwino Jisuni kók Galili amchoi gwnangwi dakti pírjak kha.
CATHOLIC PASTORAL COUNCIL

Address

Mandwi West
Agartala
799045

Telephone

+919862215322

Website

Alerts

Be the first to know and let us send you an email when St.Stephen Catholic Church,Mandwi posts news and promotions. Your email address will not be used for any other purpose, and you can unsubscribe at any time.

Shortcuts

Share

Category