06/08/2026
*കാന്തമല*
ശ്രീപരശുരാമന് സ്ഥാപിച്ച ശാസ്താക്ഷേത്രങ്ങളില് പ്രധാനപ്പെട്ട അഞ്ച് ശാസ്താക്ഷേത്രങ്ങളാണ് കുളത്തൂപുഴ, ആര്യങ്കാവ്, അച്ചന്കോവില്, ശബരിമല, കാന്തമല, എന്നിവ.
കുളത്തൂപുഴയില് - ബാല്യം,
ആര്യങ്കാവില് - കൗമാരം,
അച്ചന്കോവിലില് - ഗൃഹസ്ഥം,
ശബരിമലയില് - സന്യാസം,
കാന്ത മലയില് - വാനപ്രസ്ഥം ,
എന്നിങ്ങനെയാണ് ശാസ്താക്ഷേത്രങ്ങളില് ഭഗവാന്റെ ഭാവം. ഇതില് മോക്ഷാവസ്ഥയിലുള്ള കാന്തമല ക്ഷേത്രം മാത്രം വനത്തിലെവിടെയോ മറഞ്ഞുകിടക്കുകയാണ് എന്നാണ് പലരും പറയുന്നത്.
മകരജ്യോതി തെളിയുന്ന പൊന്നമ്പല മേടാണ് കാന്തമല എന്ന വാദം നിലവിലുണ്ട്. നൂറ്റാണ്ടുകള് പഴക്കമുള്ള ക്ഷേത്രാവശിഷ്ടങ്ങള് ഇപ്പോഴും അവിടെ കാണാം എന്നത് ഈ വാദത്തിനു ബലം നല്കുന്നുമുണ്ട്. എന്നാല് പൊന്നമ്പലമേട് ശബരിമലയുടെ മൂല സ്ഥാനമായത് കൊണ്ട് ഈ വാദവും തെറ്റാവാനേ വഴിയുള്ളൂ.
അച്ചന്കോവില് ധര്മ്മശാസ്താവിന്റെ തിരുവാഭരണങ്ങളില് കാന്തമല ശാസ്താവിന്റെതെന്ന് കരുതുന്ന വാളാണ് പ്രധാനം. ഈ തങ്കവാള് കാട്ടിനുള്ളില് വെച്ച് ഒരു ആദിവാസിമൂപ്പന് അയ്യപ്പന് സമ്മാനിച്ചെന്നും അദ്ദേഹം അത് അച്ചന്കോവില് ക്ഷേത്രത്തില് എത്തിച്ചെന്നുമാണ് ഐതിഹ്യം. ഈ വാളാണ് ഉത്സവകാലത്ത് പത്തുദിവസം അച്ചന്കോവില് ശാസ്താവിന്റെ അരികില് സ്ഥാപിക്കുക
കാന്തമല എവിടെയെന്ന് കണ്ടുപിടിക്കാന് പല അന്വേഷണങ്ങള് നടത്തിയെങ്കിലും കാടിന്റെ അഗാധതയിൽ എവിടെയോ മനുഷ്യസ്പര്ശം ഏല്ക്കാതെ കാന്തമലയെ പ്രകൃതി തന്നെ ഒളിപ്പിച്ചു വച്ചിരിക്കുകയാണ് എന്നാണ് പലരും പറയുന്നത്.
മൂഴിയാർ അയ്യപ്പ ക്ഷേത്രമാണ് കാന്തമല എന്ന് ചിലർ അഭിപ്രായപ്പെടുന്നു.
എന്നാൽ ഒരു ഡാം നിർമ്മിച്ചപ്പോൾ തുടച്ചുനീക്കപ്പെട്ട ഒരു അതി പുരാതന ശാസ്താക്ഷേത്രമുണ്ട്. കുട്ടിക്കാനം-കട്ടപ്പന റൂട്ടിലെ മാട്ടുക്കട്ടയിൽ ഇടുക്കി ഡാമിന്റെ റിസർവോയറിൽ ഇന്നും നിലകൊള്ളുന്ന പുരാതന അയ്യപ്പക്ഷേത്രം.
ഇന്നും ആ ഗ്രാമവും അവിടത്തെ പഞ്ചായത്തും അറിയപ്പെടുന്നത് "അയ്യപ്പൻകോവിൽ" എന്ന പേരിൽത്തന്നെയാണെന്നത് ആ പ്രദേശത്തിന്റെ ജീവിതത്തിൽ ക്ഷേത്രത്തിനു ലഭിച്ചിരുന്ന സ്ഥാനം വെളിവാക്കുന്നു.
സഹ്യാദ്രിയിൽ പരശുരാമനാൽ പ്രതിഷ്ഠിക്കപ്പെട്ടു എന്ന് വിശ്വസിക്കുന്ന അഞ്ചു ശാസ്താ ക്ഷേത്രങ്ങളിൽ ഒന്നാണിതെന്നാണ് ഐതിഹ്യം. പലരും ഈ ക്ഷേത്രം പഞ്ച-ശാസ്താ ക്ഷേത്രങ്ങളിൽ ഉൾപ്പെടുത്തിയിട്ടില്ല എന്നുകാണാം. പകരം കാന്തമല എന്നാണ് കാണുന്നത്. കാന്തമലയിൽ ശിവ ചൈതന്യമാണ്, ശബരിമലയ്ക്ക് നിലയ്ക്കൽ എന്ന പോലെ അച്ഛൻകോവിലിന് കാന്തമല. മറ്റു ചില കഥകളിൽ പഞ്ച-ശാസ്താ ക്ഷേത്രങ്ങളിൽ പൊന്നമ്പലമേട് ഉൾപ്പെടുത്തിയിരിക്കുന്നു, പൊന്നമ്പലമേട് ശബരിമലയുടെ മൂലസ്ഥാനമാണ്. അത് കൊണ്ട് കുളത്തുപുഴയും, ആര്യങ്കാവും, അച്ഛൻ കോവിലും, അയ്യപ്പൻ കോവിലും, ശബരിമലയുമാണ് പഞ്ച ശാസ്താ ക്ഷേത്രങ്ങളെന്ന് അനുമാനിക്കാം. ഈ അഞ്ചിടത്തും ശാസ്താവിന്റെ വ്യത്യസ്ത അവസ്ഥകളെ അടിസ്ഥാനമാക്കിയാണ് പരശുരാമൻ പ്രതിഷ്ഠനടത്തിയിരിക്കുന്നതെന്നാണ് ഐതിഹ്യം. കുളത്തുപുഴയിൽ ബാല്യം, ആര്യങ്കാവിൽ കൗമാരം, അച്ഛൻകോവിലിൽ ഗൃഹസ്ഥം, അയ്യപ്പൻകോവിലിൽ വാനപ്രസ്ഥം, ശബരിമലയിൽ സന്യാസം). ആദി ദ്രാവിഡ സംസ്ക്കാരത്തോട് ബന്ധപ്പെട്ടിരുന്നതുമായ പൈതൃകം ഈ ക്ഷേത്രത്തിനുണ്ടെന്ന് വിശ്വസിക്കുന്നു. പതിനേഴാം നൂറ്റാണ്ടിൽ മധുര ഭരിച്ചിരുന്ന തിരുമലനായ്ക്കൻ ഇവിടെ വേട്ടയ്ക്ക് വരികയും അമ്പലം കാണാൻ ഇടവരുകയും തുടർന്ന് ക്ഷേത്രത്തിനാവശ്യമായ സഹായങ്ങൾ നല്കുകയും ചെയ്തു. ക്ഷേത്രത്തിന്റെ പരിസരങ്ങളിൽ കാണുന്ന ശിലാ ലിഖിതങ്ങൾ ഇതിനുള്ള തെളിവുകളാണ്. ക്ഷേത്രം വകയായി ധാരാളം സ്വത്തുക്കൾ ഉണ്ടായിരുന്നത്രെ. അതിൽ പ്രധാനഭാഗം തമിഴ്നാട്ടിലെ ഡിണ്ടികലിൽ ആയിരുന്നു. പത്തനംതിട്ട ജില്ലയിൽ ശാസ്താംകണ്ടം (നാറാണംമുഴി പഞ്ചായത്തിൽ) എന്നറിയപ്പെടുന്ന പ്രദേശവും അയ്യപ്പൻ കോവിൽ വകയായിരുന്നു എന്നും പറയപ്പെടുന്നു. ഊരാളി, മലയരയൻ, മന്നാൻ എന്നീ ആദിവാസി ഗോത്രങ്ങളാണ് ഈ ക്ഷേത്രത്തിന്റെ അവകാശികൾ എന്നാണ് പണ്ട് മുതലേയുള്ള വിശ്വാസം. വർഷ കാലത്ത് ഇടുക്കി ജലായശത്തിൽ ജലനിരപ്പ് ഉയരുമ്പോൾ ക്ഷേത്രം ജലത്തിനടിയിലാകുന്നു. വേനലിൽ കരയിലൂടെ സഞ്ചരിച്ച് പടികെട്ട് കയറി ക്ഷേത്രത്തിലെത്താം. എന്നാൽ വർഷകാലത്ത് വള്ളങ്ങളിലാണ് ഭക്തർ ക്ഷേത്രത്തിലെത്തുന്നത്. റിസർവോയറിൽ ജലം നിറയ്ക്കാൻ തുടങ്ങിയപ്പോൾ (1975ൽ) കേരള സ്റ്റേറ്റ് ഇലക്ട്രിസിറ്റി ബോർഡ് ക്ഷേത്രം പൊളിച്ച് മാറ്റി അടുത്ത് തന്നെയുള്ള തൊപ്പിപ്പാള എന്ന സ്ഥലത്ത് പുതിയ ക്ഷേത്രം സ്ഥാപിച്ചു പ്രതിഷ്ഠ നടത്തുകയും ചെയ്തു. ഇത് ഊരാളി, മന്നാൻ സമുദായങ്ങളുടെ എതിർപ്പിന് ഇടയാക്കി. തുടർന്ന് 2001ൽ ചില സംഘടനകളുടെ നേതൃത്വത്തിൽ അയ്യപ്പൻ കോവിലിൽ ക്ഷേത്രം പുനർനിർമ്മിച്ചു. ഇതിനെതിരേ ബോർഡ് നിയമ നടപടി സ്വീകരിക്കുകയും കേസ് കട്ടപ്പന സബ് കോടതിയിൽ എത്തുകയും ചെയ്തു. എന്നാൽ തൽക്കാലം ക്ഷേത്രത്തിന്റെ ഇപ്പോഴത്തെ സ്ഥിതി തുടരാൻ കേരള ഹൈക്കോടതി അനുവദിച്ചു. സംസ്ഥാനത്തെ വിവിധ പ്രദേശങ്ങളിൽ നിന്ന് ധാരാളം ഭക്തജനങ്ങളിപ്പോൾ ക്ഷേത്രത്തിൽ എത്തിച്ചേരുന്നുണ്ട്.
ഇന്നും രാജഭരണം നിലനിൽക്കുന്ന ഇന്ത്യയിലെ രണ്ടുരാജാക്കന്മാരിൽ ഒരാളായ കോവിൽമല രാജാവിന്റെ ദേശവും ഇതിനടുത്താണ്.(കോവിൽമല ഇപ്പോൾ കോഴിമല എന്നും പറയുന്നു)
credits : respected Owner
