19/06/2026
በስመ አብ ወወልድ ወመንፈስ ቅዱስ አሐዱ አምላክ አሜን።!
ተኣምር ናይ ቅዱስ ሚካኤል ኣብ ወርሒ ሰኔ ዝንበብ
ናይቲ ክቡሩን ርህሩህን ዝኾነ ሊቀ መላእክት ቅዱስ ሚካኤል ኣማላድነቱ ካብ ፍላጻ ጸላኢ የድሕነና፥ ጥዑም ድምጺ ዜማ ዘለዎ ካብ ኣጽናፍ ናብ ኣጽናፍ ኣብ ኣርያም ብኣኽናፉ ዝመላለስ ካብ ናይ ጸላኢ ፍላጻ ካብ መኣሰርቲ ሲኦል ካብ ኣፍ በላዒ ተኹላ ርጉም ካብ ማእሰርቲ ሰይጣን ሕሱም የድሕነና ለዓለም ኣለም።
ሓደ ክርስቲያን ንእግዚኣብሔር ዝፈርሕ ሰብ ኣብ ደሴት ቆጵሮስ ነበረ። ኵሉ ጊዜ ድማ ብናይ ጸሎት ቅዱስ ሚካኤል ሊቀ መላእክት ይእመን ነበረ። ኵሉ ጊዜ ድማ ሰናይ ነገር ብልቡ ይሓስብ ነበረ። በስም ቅዱስ ሚካኤል ልቀ መላእክት ቤተ ክርስቲያን ከስርሕ ይሓስብ ነበረ።
ከምቲ ዝሓሰቦ ድማ ቤተ ክርስቲያን ሰሪሑ ወደኣ ብኹሉ ውቅብቲ ጌሩ ዛዘማን ሸለማን፥ ኣጸባቃን። ብድሕረዚ ናብ ኤጲስ ቆጶሳትን፡ ካህናትን፡ ዲያቆናትን፡ መጺኦም ክባርኽዋን፡ ክቅድሱዋን መልእክቲ ሰደደ። ዓቢይን ድሙቅን መመረቅታ ቤተ ክርስቲያን ድማ ገበረ። ኩሉ ህዝቢ ድማ ተኣከበ ካህናት፡ ዲያቆናት፡ ምእመን፡ ህዝቢ ክርስቲያን ኣብቲ ክቡር ዕለት ንጊዜ ቅዳሴ ተኣከቡ። ብድሕሪ እዚ ድማ ህዝቢ ምስ ተኣከቡ ኤጲስ ቆጶስ ከምቲ ዝግባእ ሕግን ስርዓትን ጸሎት ቅዳሴ ጀመረ።
ኣብኡ ድማ ሓደ ኣይሁዳዊ ወዲ እታ ሃገር ጌኒን ዘልዎ ነበረ። ኩሉ ኣካላቱ ድማ ብለምጺ ዝተወቀዐ ፡ስኑ የሕርቅሞ፥ ካብ ቃንዝኡ ዝተላዕለ ድውየ’ውን በቲ ሕማማ ይጭነቅ ነበረ። ካብ ቡዝሕ ሕማም ድማ ኩሉ ነብሱ ከም እምኒ ኮነ። በዚ ዕለት ኣብ ቤተ ክርስቲያን ቅዱስ ሚካኤል ጸሎት ቅዳሴ ከም ዘሎ ምስ ሰመዐ ናብ ቤተ ክርስቲያን ብድድ ኢሉ ካብ መደቀሲኡ ተንሲኡ ክዳውንቱ ዘነበሮ ቀይሩ ልክዕ ነቶም ክርስቲያን መሲሉ ናብ ውሽጢ ቤተ ክርስቲያን ኣተወ።
እቲ ኤጰስ ቆጶስ ስርዓተ ቅዳሴ ጸሎት ምስ ወደኤ ካብቲ ማይ ቅዳሴ ነቲ ኩሉ ቦታ ቀጽሪ ቤተ ክርስቲያን ማይ ነጸገሉ። እቲ ድውይ ኣይሁድዊ ድማ ካብቲ ማይ ወሲዱ ናብ ኵሉ ነብሱ ብማይ ጸሎት ብፍጽም እምነት ብምግባር ተሓጽበ ካብቲ ቅብኣ ዘይቲ ቀንዴል ኣብቲ ትሕቲ ስእሊ ቅዱስ ሚካኤል ዝነበረ ኵሉ ነብሱ ተቀብዐ ።
ከምዚ ድማ በለ “ኦ! ጐይታይ ሊቀ መላእክት ቅዱስ ሚካኤል ጥዕና ሃበኒ ካብዚ ኩሉ እዚ ለምጺ ድማ ፈውሰኒ ኢሉ ጸለየ። ካብዚ ለምጺ እንተ ኣሕዊኻኒ ኣነ ድማ ንቤተ ክርስቲያንካ ምጽዋት ክህበካ እየ ጽሩይ ዝኾነ 20 ግራም ወርቂ ብዘይ ግብዝና ክህበካ እየ። ኣነ ድማ ክርስቲያን ክኸውን ብስም እግዚእነ ኢየሱስ ክርስቶስ ድማ ክኣምን ካብ ድንግል ምውላዱን ትስብእቱን ንወልድ እግዚአብሔር ድማ ክኣምን እየ። በዛ ርትዕትን ሓቀኛን ሃይማኖት ክኣምን፥ ኣምላኽ ከሎ ሰብ ዝኾነ ካብ ዘርኢ ዳዊት ምእንቲ ድሕነት ኣዳምን ዘርኡን ከም ዝተወልደ ክእምን እየ። ንቤተ ክርስቲያንካ ድማ ንኹሉ ዘመነይ ከገልግለካ ክላኣኸካን እየ። እዚ ኢሉ ምስ ጸለየ ኣብቲ ቤተ ክርስትያን ድቃስ መጾ`ሞ ደቀሰ። ካብ ድቃሱ ምስ ተበራበረ ድማ ኵሉ ነብሱ ጥዑይ ኮነ። ኣብ ኣካላቱውን ዝኾነ ምልክት ናይ ለምጺ ኣይተረኸነሉን። ሽዑ ድማ ዓቢ ሓጐስ ተሓጐሰ ንእግዚአብሔር ድማ ኣመስገነ ንቅዱስ ሚካኤል`ውን ጥዕና ስለ ዝረኸበ ካብ ሕማሙ ስለ ዝፈወሶ ኣመስገኖ። እቲ ከጨንቖ ዝጸነሐ ጋኔን ካብ ነብሱ ወጸሉ። ኣብ ሰብነቱ`ውን ዝኾነ ነገር ኣይተረፈን።
ብድሕርዚ ድማ ነቲ ኣቀዲሙ ዝተመባጸዖ መብጽዓ 20 ግራም ወርቂ ንቤተ ክርስቲያን ቅዱስ ሚካኤል መብጽዕዑ ፈጸመ። ናብቲ ኤጰስ ቆጶስ ብምኻድ ድማ ነቲ ቅዱስ ሚካኤል ዝገበረሉ ተኣምር ኵሉ ነገር፥ ጋጌን ከም ዝነበሮ ብኸቢድ ለምጺ`ውን ተታሒዙ ከም ዝነበረ ነገሮ። ብድሕሪኡ ነቲ ኢጲስ ቆጶስ ኣብ እግሩ ብምውዳቕ ብስም ኢየሱስ ክርስቶስ ኣጥምቀኒ በሎ ምስ ማሕበር ክርስቲያን ድማ ከም ክርስቲያን ደምረኒ። እቲ ኤጰስ ቆጰስ ድማ ሕራይ ኢሉ ምስ ኵሎም ቤተሰቡ ኣጥመቆ። ብድሕርዚ ንቤተ ክርስቲያን ብእምነት እና ተላእከ የገልግል ይመላለስ ነበረ ብኹሉ ሰናይ ነገር እና ገበረ ናይ ቅዱስ ሚካኤል ተኣምር ድማ ኵሉ ጊዜ ይነግርን የዘንቱን ነበረ። ካብቲ ዝነበሮ ድቅድቅ ጸልማት ብርሃን ስለ ዝበረሃሉ።
ከምቲ ብነብይ ዝተነግረ “እቶም ኣብ ጸልማት፡ ጽላለ ሞት ዝነብሩ ህዝቢ ብርሃን ረኣዩ። ነቶም ኣብ ጸልማት ዝነብሩ ድማ ብርሃን ጸሓይ በረሀሎም።” ከምኦም ድማ ነቲ ኣብ ጸልማት ዝነበረ ብስቃይ ጋኔን`ውን ዝሳቀ ዝነበረ እቲ ጋኔን ዘጽልመት ብዙሕ ድውየ ሒዝዎ ዝነበረ፥ ብጸሎትን ተአምርን ቅዱስ ሚካኤል ኣብ ልዕሊኡ ብርሃን ክርስቶስ በርሃሉ።
ካብቲ ናይ ቀደም ሕማሙ ፈዊሱ ፡ ካብ ክሕደት ድማ ናብ ርትዕትን ሓቀኛን ዝኾነት እምነት ድማ መሎሶን መርሖን። ብሓያል ጸሎትን በረከቱን ናይ ቅዱስ ሚካኤል ሊቀ መላእክት ኣዕይንቲ ልበናኡ ካብ ዕውረት ኣብሪሁ፥ ብእምነት ቅድስቲ ስሳሴ ዝመርሐ። ንዓና`ውን ብረድኤቱ ኽሕልወና ካብ ማእሰርቲ ሰይጣን የድሕነና። ብምሕረቱ ይመግበና ምስ ኵሉም ሰራዊቱ ሰይፈ ረድኤቱ ካባና ኣይርሕቅ፡ ንሰራዊት ጸላኢ የሳድደልና ። ካብ ክፍኣት ሰባት ብሓሶት ካብ ዘስሕቱ ብእከይ ዝተመልኡ፥ ሓሶት ዝኣልሙ፥ ካብ ብቂም ዝተመልኡ ሰባት ብኣክናፉ ጌሩ ይከልለና። ካብ ቀደም ጀሚሩ ሰኣሊ ምሕረት ዝኾነ ሊቀ መላእት ምሕረቱ ይሃበና ንኽሉና ውሉደ ጥምቀት ኣሜን!።
ካብ 12 ሰኔ ታሪኽ ባህራን
በስመ አብ ወወልድ ወመንፈስ ቅዱስ አሐዱ አምላክ አሜን!።
ዓሰርተ ክልተ ሰኔ ክቡር ሊቀ መላእክት ሚካኤል ወርሓዊ በዓልን ክቡር ዕለትን እዩ። ጸሎቱን በረከቱን ምስ ኵሉና ይኹን። እዚ ዕለት ክኽበረሉ ዝባዓለሉን ኣብ እስክድርያ ዓቢይ ቤተ ክርስቲያን ነበረ። ኣብ እሰክንድርያ ጓል ንጉስ በልጢሞስ ንጉስ ግብጺ ኣክኣ ንግስት ትባሃል ነበረት። ኣብ ግብጺ ድማ ብስም ኮከብ(ዙሓል ) ዝባሃል ጣዖት ነበረ። ኣብ ሰነ ወርሓዊ ዕለት 12 ድማ ዓቢይ በዓል ይገብርሉ ነበሩ።
ኣብቲ ቤት ጸሎት ዓቢይ ካብ ነሓሰ ዝተሰርሐ ጣዖት ነበረ። ስሙ ድማ ( ዙሓል) ይባሃል። ኣብቲ በዓሉ ብዙሕ ህያባት የቕርቡሉ። ከምዚ እናበሉ ንብዙሕ ዘመን ይነብሩ ነበሩ። ክሳብ ኣባ እለእስክንድሮስ ዝተሸሙሉ ጊዜ ንልዕሊ 300 ዓመት ከምኡ ጌሮም የብዕሉ ነበሩ። እለእስክንድሮስ ኣብ እስክንድርያ ሊቀ ጳጳሳት ምስ ኮነ ነቲ ቤት ጣዖት ክሰብሮ ከፍርሶን ደለየን ሓሰበን። ግና እቶም ህዝቢ እስክንድርያ ድማ ከልእዎ።
ጻድቕ ንጉስ ቍስጢንጢኖስ ምስ ነገሰ፡ ሃይማኖት ክርስትና ኣስፋሕፈሐ። ኣባ እለእስክንድሮስ ድማ ድጊሙ ክሰብሮ ደለየን ሓሰበን ሕጂ’ውን ሕሱራት ዝኾኑ ናይ እስክንድርያ ህዝቢ ከልእዎ። ከምዚ ድማ በልዎ “ንሕና ነይዚ ጣዖት በዓል ምግባር ልምዲ ኣሎና ቅድመኻ 18 ሊቃነ ጳጳሳት ሓልፎም እዮም። ግና ነዚ ልምድና ኣይ ለወጡልናን ኣየፍረሱልናን” በልዎ። ኣባ እለእስክንድሮስ ድማ ንዘርቦኦም ገሰጾን ገነሖምን። ከምዚ ድማ በሎም “ስምዑ እዚ ጣዖት ይጐድእን ይሃስን እምበር ኣይጠቅምን እዩ። ነዚ በዓል ዘብዕል ዝነብር ድማ ንሰይጣናት እዩ መስዋእቲ ጌሩ ዘምልክ ዘሎ።” በሎም። ኣባ እለእስክንድሮስ ድማ “ንምኽረይ እንተ ሰመዕኩምኒ ኣነ ነዚ ቤት ጣዖት ድማ ባሪኸ ቤተ ክርስቲያን ቅዱስ ሚካኤል ሊቀ መላእክት ጌር ክባርኮ እየ። መስዋእቲ ንእግዚአብሔር ዘቅርብ ዘክብር ድማ ኣባጊዕ፡ ብዕራይ፡ ሓሪድና ነቶም መሳኪን ክክፍሉና ዘይክእሉ ንመጽውተሎምን፥ ነብላዓዮምን። ቅዱስ ሚካኤል ድማ ምእንታኹም ናብ ኣምላኹ ናብ ኢየሱስ ክርስቶስ ክልምነልኩም እዩ።” እዚ ኢሉ ኣረደኦም እሞ። ንእኡ ሕራይ በልዎ ቤተ ክርስቲያን ድማ ብስም ሊቀ መለእክት ቅዱስ ሚካኤል ሃነጹ። እዛ ቤተ ክርስቲያን ብብዝሕ ብዓባይን ትፍለጥ ነበረት ኣብ ግብጺ ድማ ክሳብ ኣስላም ዝነግሱ ተገልግል ነበረት። ኣስላም ምስ ነገሱ ግን ኣፍረስዋ። በዚ ዕለት ኵሎም ይዝክርዋን የብዕልዋን ነበሩ። ብስም ሊቀ መላእክት ቅዱስ ሚካኤል ኵሉ ጊዜ ዝክር ይገብሩ ነበሩ። ከምዚ እና ገበረ ዝነብር ንእግዚአብሔር ዝፈርህ ሓደ ሰብኣይ ነበረ ኵሉ ጊዜ ድማ ብፍላይ 12 ሕዳርን 12 ሰነን ዝክሪ ናይ ቅዱስ ሚካኤል ይገብር ነበረ።
እንተኾ ግና ኣብ ጐረቤቱ ሓደ ርጉም ሃብተም ሰብኣይ ነበረ ነዚ ድማ ንእግዚአብሔር ብምኽባሩን ብምፍሩሑን ይጸልኣሉ በዓል ቅዱስ ሚካኤል ከኽብር ከሎ ይንዕቆን የባጭወሉን ነበረ። እዚ እናገበረ ክነብር ከሎ ድሕሪ ጊዜ ሞቱ ምስ ቀረበ ካብዚ ዓለም ዝፍለየሉ ጊዜ በጽሐ። ስለዚ ብድሕረይ ዝክር ናይ ቅዱስ ሚካኤል በዓል ከይተ ቛርጺ ሓደራ ኢሉ ንሰበይቱ ኣዘዛ። ብፍላይ 12 ሕዳርን 12 ሰነን ኣየተቋርጺ። ንሱ ኣብ ጊዜ ዕረፍቱ ሰበይቱ ነብሰ ጾር ነበረት። ንሱ ድማ ሞተ። ኣብ መንግስተ ሰማይ ድማ ነብሱ ሊቀ መላእክት ተቀበላ። ሰበይቱ ሕማም ሕርሲ በጸሐት እሞ ብዙሕ ጻዓረት፥ ጸበባን ናብ ሊቀ መላእክት ኣብ ልዕለይ ምሕረት ግበር ርድእኒ ንእግዚአብሔር ድማ ምእንታይ ምእንቲ ከድሕነኒ ለምነለይ ንስኻ ዓቢ ሞጐስ ኣብ ቅድሚ እግዚአብሔር ኣለካ’ሞ ናብኻ ይልምን ኣለኹ እናበለት ብዓቢ ቃል ጸለየት። ከምዚ እናበለት ከላ ገዝኣ ሙሉእ ብርሃን ኮነ። በዚ ሰዓት ካብ ጻዕራን ሽግራን ተገላገለት። መልክዑ ጽቡቕ ህጻን ወለደት። ብድሕሪኡ ክቡር መልእከ እግዚአብሔር ቅዱስ ሚካኤል ካብ ሰማይ ወሪዱ ነቲ ህጻን ባረኾ። ከምዚ ድማ በሎ እግዚአብሔር ነዚ ህጻን ባሪኽዎ እዩ ንኹሉ ንብረትን ሃብትን ናይዚ ንጉስ ሃብተም ምሕረት ዘይብሉ ክወርሶ እዩ። እዚ እናበለ ከሎ እቲ ርጉም ብመስኮት ቤታ ናይታ ሰበይቲ ኮይኑ ኵሉ ሰሞዖ።
ነዚ ምስ ሰመዐ ልቡ ብጓህን ሓዘን ተመልአ፡ ነቲ ህጻን ንክቀትል ድማ ምኽንያት ይደሊ ነበረ። እግዚአብሔር ግን ብረዲኤት ናይ ሊቀ መላእክት ይሕልዎ ነበረ። ድሕሪ ዓሰርተ ዓመት ግና ኵሉ ሃብታን ኵሉ ንብረታን ተወደአ። ዝኾነ ኣብ ቤታ ኣይነበረን። እቲ ርጉም ምሕረት ዘይቡሉ ጐረቤታ ድማ በዚ ምኽንያት ረኸበ እሞ ከምዚ በለ “ወድኺ ክላኣኸኒ ሃብኒ ኣነ ድማ ክምግቦን ክኸድኖን ንዓኺ ድማ (20) ዲናር ወርቂ ክህበኪ እየ።” በላ ነዚ ምሰመዐት ተሓጐሰት ደስ’ውን በላ መግቢ ዝብላዕ ስለ ዘይነበራ 20 ዲናር ወርቂ ሃባ እሞ ንወዳ ሃበቶ። ነዚ ህጻን ምስ ወሰደ ብጣዕሚ ደስ በሎ ተሓጐሰ: ብልቡ ድማ እቲ ዝሓሰብኩዎ ፍቓድ ልበይ ተፈጸመላይ “ወይበ በልቡናሁ፡ ተፈጸመ፡ ሊተ፡ ዘእፈቅድ ።”
ብዕንጸይቲ ድማ ዓቀኑ ጌሩ ሳጹን ሰረሐ። ናብኡ ድማ ነቲ ህጻን ኣእተዩ ዓጸዎ ድማ ተሸኪሞም ድማ ናብ ባሕሪ ደርበይዎ። ነቲ መፍትሕ ሳጹን ድማ ናብቲ ባሕሪ ደርበያ። ብፍቓድ እግዚአብሔር ድማ እታ ሳጹን ኣብቲ ልዕሊ ማይ ጸለል እና በለት ናብ ሓደ ርሑቕ ሃገር ከይዳ ኣብቲ ገንገም ጠጠው በልት።
ሓደ ጓሳ ኣባጊዕ ዝኾኒ ሰብኣይ ኣብኡ ዘወር ይብል ነበረ። ኣባጊዑ ኣብቲ ገምገም ከይኑ እናጠመተ ከሎ ነታ ዝተዓጸወት ሳጹን ረኣያ ኣልዕል ኣቢሉ ድማ ተሸኪሙ ናብ ገዝኡ ወሰዳ። ብምንታይ ጌረ ክኸፍታ እየ ኢሉ ሐሰበ ኮሎ፥ እግዚአብሔር ድማ ኣብ ልቡ ሓሰባት ኣልዓለሉ። ነቲ ገፋፋይ ዓሳ (ጀላባይ) መርበብካ ደርቢ እሞ ዓሳ ሰሓበለይ ዋግኡ ድማ ኣነ ክኸፍላካ እየ በሎ። መርበቡ ደርበየ ዓቢይ ዓሳ ድማ ሓዘ ነቲ ሰብኣይ ድማ ዋግኡ’ውን ሃቦ ተቀበሎ`ውን። ዓሳ ሒዙ ናብ ቤቱ ከደ። ንስድርኡ ዓሳ ክንበልዕ ኢና ነዚ ድማ ንጥብሓዮ በሎም። ነቲ ዓሳ ጠበሕዎ እሞ መፍትሕ ናይታ ሳጹን ኣብኡ ረኸባ ። እዛ መፍቲሒት ናይዛ ሳጹን መኽፈቲ ክትከውን ትኽእል እያ ኢሉ ክኸፍታ ፈተና’ሞ ንሳ ኻኣ ተኸፍተት። ብድሕርዚ እቲ ጓሳ ኣባጊዕ ብጣዕሚ ተገረመ እቲ ሳጹን ህጻን እቲ ርጉም ሰብእይ ዝደርበዩ ረኸብዎ እዚ ምስ ረእየ ዓቢይ ፍሳሓ ዓቢይ ሓጐስ ተሓጐሰ።
ስሙ ድማ ባሕራን ኢሉ ሰመዮ (ባሕራን ኣብ ባሕሪ ዝረኸብክዎ እዩ።) ምስኡ ድማ ከም ወዱ ከይኑ ይነብር ነበረን ዓበየን፥ ሓላዊ ኣባጊዕ ከይኑ ድማ የገልግሎ ነበረ። 10 መዓልቲ ንበርኻ እና ወፋረ ጓሰየ፥ ንእኡ ድማ ይላኣኾን የገልግሎን ነበረ።
ድሕሪ ነዊሕ ጊዜ እቲ ምሕረት ዘይቡሉ ሰብኣይ ንንግዲ ኢሉ ናብ ርሑቅ ሃገር ተጓዕዘ ጻሓይ ስለ ዝዓረበቶ ድማ ናብቲ ቤት ሓላዊ ኣባጊዕ ደንበ ኣልገሰ ከምዚ ድማ በሎ። “ዓስብኻ ክህበካ እየ ኣብዚ ምሳኻ ኣሕድረኒ” በሎ። ንሱ ድማ ናብ ቤቱ ኣእተዎ እሞ ንወዱ ባሕራን ክብል ጸወዖ ነዚ ስም ምስ ሰመዐ “ወድኻ ድዩ፧ እዛ ስምከ ክንደይ ትጥዕም እያ፧” በሎ። እወ “ነዚ ህጻን ብንእሽተዩ ከሎ ኣብ ገምገም ባሕሪ ኣብ ሳጹን ረኺበዮ ከም ወደይ ጌረ ድማ ኣዕቤዮ ሱሙ ድማ ባህራን ኢለ ኣውጼኤሉ” በሎ። እዚ ምስ ሰመዐ ዳግማይ ልቡ ብሓዘን ተመልአ። እቲ ክቐትሎ ኢሉ ናብ ባሕሪ ዝደርበዮ ህጻን ምኻኑ ፈለጠን ተረደአን።
ምስ ወገሐ ድማ ሰይጣናዊ ሓሳብ ሓሰበ። ነቲ ጓሳ ኣባጊዕ ድማ “ነዚ ህጻን ሃበኒ መልእክቲ ከብጸሐለይ ናብ ቤተይ፥ ንዓኻ ድማ 20 ዲናር ወርቂ ክህበካ እየ። ሓደ ነግር ኣብገዛይ ስለ ዝረሳዕኩ እየ።” በሎ። ወርቂ ምስ ሰመዐ ተሓጐሰ’ሞ ንወዱ ክልእኮ ጸወዖ “ኦ! ባህራን ወደይ እዚ ጋሻ ናብ ቤቱ ክልእኸካ እዩ’ሞ ብሰላም ተጓዓዝ፥ ብሰላም እቶ።” እቲ ሃብታም ሰብኣይ ናብቲ መጋቤ ቤቱ መልእኽቲ ጸሓፈ ከምዚ ድማ ይበል ነበረ “ነዛ ደብዳቤ ምስ ኣንበብካያ ነቲ ሒዚዋ ዝመጸ ባህራን ዝስሙ ኣብ ጉድጓድ ቅተሎ ዝኾነ ሰብ ድማ ከይረኣየካ ቅበሮ።” ኢሉ መልእኽቱ ጽሒፉ ዛዘመ። ንባሕራን ንመንገዲ ዝኸውን ስንቂ ሂቡ ድማ ሰደዶ።
ባህራን ናብታ ዓዲ ክኣቱ ናይ ሓደ መዓልቲ ምስ ተረፎ ክቡር ሊቀ መላእክት ቅዱስ ሚካኤል ኣብ መንገዲ ተራኸቦ እሞ ከም ሓላፊ መንገዲ ተመሲሉ ኣብ ፈረስ ተወጢሑ ነበረ። “ንዓኻየ ዝወደይ ናበይ ትኸይድ ኣለኻ፧ እዚ ሕዚካዮ ዘላኻ እንታይ እዩ፧” “እዚ ምሳይ ዘሎ ደብዳቤ (መልእክቲ) እዩ ካብ ሓደ ሃብታም ሰብኣይ ናብ ቤቱ ተላኢኸ ይኸይድ ኣለኹ በሎ።
ሚካኤል ድማ እስከ እቲ መልእክቲ ኣርእየኒ በሎ። ባህራን ካብቲ ምስኡ ዘሎ ፈረሀ፥ ታ`መልእኽቲ ድማ ሃቦ ሚካኤል ድማ ነቲ መልእክቲ ኡፍ ብምባል ነቲ መልእክቲ ኣብ ብጥቕላላ(ፖስታ ወይ ሰታሪት) ከላ ቀየራ ነቲ ጽሑፍ ድማ ለወጦ። እቲ ጽሑፍ ከምዚ ይብል ነበረ፥ “ኣነ ጐይታኹም ነዚ ዝላእኽክዎ መንእሰይ ደብዳቤ ሒዙ ናባኩም ዝመጽእ ዘሎ። ንጓለይ ኣመርዕውዎ። ኵሉ ንብረት ቤተይ ናይ ገዛይ ይኹን ናይ ደገ ኣውርስዎ። ኣነ ስለ ዝድንጒ ንዓይ ኣይትጸበዩኒ ደስ ዝበሎ ኣብ ቤተይ ይግበር።” ትብል መልእክቲ ሚካኤል ነታ ደብዳቤ ቀየራ ንባህራን ድማ “እቲ ኣባይን ኣባኻን ዘሎ ዝምድና እዚ እዩ።” በሎ ።
“ኪድ ኣብ መንገዲ ኣነ ከም ዝረኸብኩኻ ንዝኾነ ሰብ ኣይትንገር. ነዚ መልእኽቲ ንኸይትቅተል ስለ ዝቀየርኩዎ።” “ኦ! ጐይታይ ዝኣዘዝካኒ ኵሉ ክገብር እየ።” ብምባል መንገዱ ቀጸለ። ኣብቲ ሃገር (ዓዲ) ድማ በጸሐ። ገዛ ናይቲ ንጉስ’ውን ሓተተ። ናብኡ ድማ ኣብጽሕዎ። ነቲ መልእኽቲ ድማ ነቲ መጋቤ ቤት ንጉስ ሃብዎ። ነቲ ደብዳቤ ኣንበባ። እቲ መልእክቲ ሓቀኛ ምኻኑ ተረደአ። ንባህራን ድማ ዓቢይ ከብካብ መርዓ ምስ ጓል ንጉስ ገበሩሉ። ብሕጊ ናብ ቤተክርስትያን ብምኻድ ቃል ተክሊል ፈጸመ። በቲ ዝኾነ ጊዜ እና ተሓጐሰ ኣብ ቤት ንጉስ ን40 መዓልታት ከብካብ ሓጐስ ደስታ ኮነ። ኣብ መወዳእታ ናይዚ ዕለት እቲ ሰብኣይ ካብ መገሽኡ ናብ ዓዱ ተመልሰ። ብርቱዕ ድምጺ ጓይላ ሰምዐ እሞ “ናይ ምንታይ ድምጺ እዩ።” ኢሉ ሓተተ ።
“እቲ መልእክትኻ ሒዙ ዝመጸ ባህራን ከምቲ መልእክትኻ ዝሓበረና ነታ በኩሪ ጓልካ ኣመርዒናዮ። ነዚ ክብሪ ብምግባር ኣብ ቤትካ ን40 መዓልታት ከብካብ ሓጐስን፥ ደስታን ተግበረ።” በልዎ። “ኵሉ እቲ ናትካ ንብረት ድማ ከምቲ መልእክቲ ዝሰደድካዮ ጌሮም ኣውረስዎ።” ነዚ ምስ ሰመዐ ብዓቢ ድምጺ ኣእወየ እሞ ብስንባዴ ናብ መሬት ወደቀ ብኡንቡኡ ድማ ሞተ። ንነብሱ ኣጋንንቲ ጽልመት ወሲዶም ናብ ሲኦል ኣውረድዋ።
ብድሕሪዚ ባህራን ኵሉ ጊዜ ናይ ሚካኤል ዝክር እና ገበረ ይነብር ነበረ። ባህራን ነዚ ኵሉ ዝገበረሉ ሚካኤል ምኻኑ ኣብ መንገዲ ረኪቡ ነታ ደብዳቤ ሞት ዝነበርት ናብ ሂወት ዝለወጠሉ ንሱ ምኻኑ ተረደአን ፈለጠን። ብድሕርዚ ናብ ቤተ ክርስቲያን ብምኻድ ናይ ቅዱስ ሚካኤል ቤተ ክርስትያን ክሃንጽ ሓሰበ። ሃኒጹ ዘዘመ’ውን። ኣብኡ ድማ ዓቢይ ስእሊ ናይ ቅዱስ ሚካኤል ኣንበረ። እቲ ስእሊ ብስም ቅዱስ ሚካኤል ዓቢይ ተኣምራት ይገብር ነበረ። ዝሓመሙ ድማ ይፍውሱ ነበሩ ።
ባህራን ኣብታ ዓዲ ካህን ከይኑ ተሸሙ የገልግል ነበረ። ንክቡር ሊቀ መልእክት ድማ ክሳብ ዕለተ ሞቱ የገልግሎ ነበረ። ኵሎም ስድርኡ ድማ ብረድኤት ቅዱስ ሚካኤል መንግስተ ሰማያት ናይ ዘልኣለም ሕይወት ወረሱ። ነቶም ብንጹህ ልቢ ዝቀርብዎን ዝልምንዎን ካብ ኣቦ ምሕረት ዘኮነ ምሕረት ይረኽቡ ብስእለትን ተራዳእነት ናይ ቅዱስ ሚካኤል ንኹሎም ዝክሩ ዝገብሩ ጽሑፍ ተጻሒፉ እዩ።
ኣብ ጊዜ ትንሳኤ ሙታን ወልድ ኣብ ዝመጻሉ ጊዜ ንፍርዲ ብዕለተ ሰንበት ክርስቲያን ኣብ ቅድሚ ጐይታ ቆይሙ ቅዱስ ሚካኤል ቀሪቡ ምሕረት ነብሲ ይልምንን የድሕኖምን። ከምዚ እናበለ ድማ “ኦ! እግዚእየ ወእምላኪየ፥ ኦ! ኣምላከይ ኣነ ኣገልጋሊኻን ተላኣኺካን እየ። ነዞም ኣብ ምድሪ ዝክረይ ዝገበሩ መሓረለይ ምእንቲ እሙንን ጻድቅን ቃልካ መሓርን፡ መስተሳህልን ስለ ዝኾንካ ።
“ንእግዚአብሔር ክብሪ ይኹኖ። ኦ! ሊቀ መላእክቲ ሚካኤል ነቶም ዝኣምኑኻን ዝክርካ ዝገበሩን፥ ባኣክናፍካ ጌርካ ክትጸሮም ናብ መንገዲ ሂወት ክትእትዎም ክሳብ ሰለስተ 3 ጊዜ ፈቒደ ኣለኹ።” ኢሉ ቃል ሃቦ።
ሚካኤል እዚ ምስ ሰመዐ ተሓጐሰን ደስ በሎን። ኣብ ቅድሚ እግዚአብሔር ሰገደ። ብኣክናፉ ጌሩ ነብሳት 3 ጊዜ ጾረ። ነቶም ዝክሩ ዝገብሩ ካብ ባሕሪ እሳት ኣሰገሮም። ብዝሖም ኣሻሓት እዮም። ብዘይ’ካ እግዚኣብሔር ንቁጽሮም ዝፈልጥን ዝገልጽን የለን። ነቶም ኣብ ኣኽናፉ ዝተሸከሞም። ስለዚ ኵልና ህዝበ ክርስቲያን ኣሕዋት ንንቃሕ ነስተውዕልን፥ ዝኽሪ ቅዱስ ሚካኤል ድማ ንግበር። ንዘክርን ከከም ፍቓድ ዓቕምና ንግበረሉ። ከምቲ ኣብ ወንጌል “ብስም ነብይ ማይ ቆሪር ዘስቲ ዓስቡ ከቶ ከም ዘይስእን።” ይብለና። (ማቴ. 10፡40)
ምሕረት እግዚአብሔር ብናይ ሊቀ መልእክት ኣመላድነት ይዓድለና ።
ካብ ማእሰርቲ ሰይጣን ይሰውረና። ካበና ድማ ከቢድ ዝኾነ ሕማም የርሕቀልና።
ኣብ ምድሪ ዝዘረኣናዮ የብዘሐልና። ንሰናይ ተግባር የንቅሐናን ይርድኣናን የበርትዐናን፥
ኣበሳና ይደምሰስሰልና። ካባና ንዘተፈልዩና ብሞት ነብሶም ይምሓረልና። ኣብ መገሻን ኣብ ስደትን ኣቦታትናን ኣሕዋትናን ድማ ብሰላም ናብ ቤቶም ይምለሶም። ኣብ ማእከልና ፍቕሪ ይግበረልና ክሳዕ ምጽኣት ጐይታ ድማ ኣብ ሃይማኖትና የጽንዓና። ናይ ሊቀ መልእክት ተኣምር ብዙሕ እዩ። ነገር ግን በቲ ቁጽሪ ኮነ ዓቀን ዘይብሉ ምሉእ ምሕረቱን ይርዳኣናን ይሓልወናን። ኣሜን!።
በስመ አብ ወወልድ ወመንፈስ ቅዱስ አሐዱ አምላክ አሜን።!
ብዕለት 12 ሰነ ቅዱስ ሚካኤል
ናይ ቤተክርስቲያን ኣቦታት ኣብ ወወርሑ ብ12 መዘከርትኡ ክንገብር ኣዚዞምና። ሰኔ 12 ኣብዚ ዕለት እግዚአብሔር ኣብ ሰማይ ካብ ዘለዉ ቅዱሳን መልኣኽቲ ካብ ኵሎም ንላዕሊ ጌሩ ሽሞ። ስለ ትሕትንኡን ተኣዛዝነቱን፣ ንጐይቱኡን ፈጣሪኡን ዝኸሓደ ንኹሉ ጽቡቅ ስራሕ ተጻባኢ ዝኾነ ንሰይጣን ንኽስዕሮ ሥልጣን ተዋሂብዎ።
ኣብ ቅዳሴ`ውን “ተውህቦ ምሕረት ለሚካኤል ፣ ንሚካኤል ምሕረት (ርህራሄ) ተዋሂብዎ።” ንብል። ነብዩ ሄኖክ’ውን ንቅዱስ ሚካኤል ምሕረት ከምዝተዋህቦ ገሊጹ እዩ። ትሕትንኡን ተኣዛዝነቱን ኣረዲኡ እዩ። (ሄኖክ 6፡5, 10፡11)።
ናይ ሰማያውያን ሰራዊት ሓለቃ ንደቂ ሰብ ኵሉ ዝርህርህን ንደቂ ሰባት ብዘይ ምቁራጽ ናብ ፈጣሪኡ ዝልምን ርህሩህ ትሑት ዝኾነ ሓያል ቅዱስ ሚካኤል ዝሰርሖ ስራሕ ተኣምሩን ክብሩን ብሓጺሩ ተጻሒፉ ክውዳእ ዝከኣል ኣይኮነን። ናይ ቅዱስ ሚካኤል ጸሎቱን በረከቱን ተራዳኢነቱን ኣይፈለየና።
ሰላም ለሚካኤል መሐሪ ውእቱ፣
ወተአዛዚ ለሰብእ በዲበ ሠናይቱ፣
ለቀርነ ዝንቱ መልአክ በድምፀ ንፍሐቱ፣
በከመ ኮነ ቀዳሚ ውስተ ሰማያት ዕርገቱ፣
ለእግዚአብሔር ይከውን ዳግመ ምጽአቱ።
ወስብሓት ለእግዚአብሔር
ወለወላዲቱ ድንግል
ወለመስቀሉ ክቡር አሜን።!
