ቤ/ት/ሰ/ማሕበር ቅዱስ ሚካኤል ኣሽዶድ ቤተ/ክ መድኃኔ ዓለም ቴል ኣቪቭ እስራኤል።

  • Home
  • Israel
  • Ashdod
  • ቤ/ት/ሰ/ማሕበር ቅዱስ ሚካኤል ኣሽዶድ ቤተ/ክ መድኃኔ ዓለም ቴል ኣቪቭ እስራኤል።

ቤ/ት/ሰ/ማሕበር ቅዱስ ሚካኤል ኣሽዶድ ቤተ/ክ መድኃኔ ዓለም ቴል ኣቪቭ እስራኤል። ብናይ ኤርትራ ኦርቶዶክስ ተዋህዶ ቤተክርስቲያን ትምህርቲ ሃይማኖትን ስርዓትን ሓልዩ ዝዳሎ መንፈሳዊ ገጽ። st. michael sunday school association ashdod at the holy land of israel

በስመ አብ ወወልድ ወመንፈስ ቅዱስ አሐዱ አምላክ አሜን።!!​ዝኸበርኩም ህዝበ እግዚአብሔር ርሑስ በዓል መንፈስ ቅዱስ(ጵራቅሊጦስ) እንዳበልና፥ ናይ ሎሚ ዓመት ዝጅምረሉካብ ​ሰኑይ ዕለት...
31/05/2026

በስመ አብ ወወልድ ወመንፈስ ቅዱስ አሐዱ አምላክ አሜን።!!​
ዝኸበርኩም ህዝበ እግዚአብሔር ርሑስ በዓል መንፈስ ቅዱስ(ጵራቅሊጦስ) እንዳበልና፥ ናይ ሎሚ ዓመት
ዝጅምረሉ
ካብ ​ሰኑይ ዕለት ፳፬ ግንቦት ​ጀሚሩ ክሳዕ​ ፭ ሓምለ ፳፻፲፰ ዓ.ም.ግእዝ ​
(01/06/2026 ​ጀሚሩ ክሳዕ​ 12/07/2026 ዓ.ም.ፈረንጂ) ድማ ይውድእ።
“እምብኣርሲ ሕጂ'ውን ብጾምን ብብኽያትን
ብቝዝማን ብምሉእ ልብኹም ናባይ ተመለሱ
ክዳንኩም ዘይኮነስ ልብኹም ደኣ ቕደዱ።” /ኢዩ. 2፡12/
"ጾሙን ጸለዩን"/ግ.ሃ 13፡3/
ጾምና ብሰላም ኣጀሚሩ ብሰላም የፍጽመና
ጾምና ኃጢአትና መደምሰሲ መንግሥተ ሰማያት መውረሲ ይግበረልና አሜን።​
ቤ/ት/ሰ/ማ/ቅዱስ ሚካኤል ኣሽዶድ፡ ቤተ ክርስቲያን መድኃኔ ዓለም ቴል ኣቪቭ፡ ኣብ ቅድስት ሃገር እስራኤል።
ስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።

በስመ አብ ወወልድ ወመንፈስ ቅዱስ አሐዱ አምላክ አሜን።! ተኣምር ናይ ቅዱስ ዑራኤል ወርሒ ግንቦት ጸሎቱን በረኸቱን ምስ ኩሉና ውሉደ ጥምቀት ሰማዕትን ኣንበብትን ይኹን ኣሜን።!ኣብ ሃገረ...
30/05/2026

በስመ አብ ወወልድ ወመንፈስ ቅዱስ አሐዱ አምላክ አሜን።!


ተኣምር ናይ ቅዱስ ዑራኤል ወርሒ ግንቦት ጸሎቱን በረኸቱን ምስ ኩሉና ውሉደ ጥምቀት ሰማዕትን ኣንበብትን ይኹን ኣሜን።!
ኣብ ሃገረ ሲዶና ሓደ ሰብኣይ ጋኔን ዝሓዞ ነበረ። ኵሉ ጊዜ`ውን ብመዓልትን ብለይትን እቲ ጋኔን የወድቆን ኮለል የብሎን ነበረ። ኣብ ዓዲ ድማ ብስም ቅዱስ ዑራኤል ዝተሃንጸት ቤተ ክርስትያን ነበረት።
እቲ ሰብኣይ ኣብ ክብረ በዓል ናይ ቅዱስ ዑራኤል ብዕለት (22) ዕስራን ክልተን ጥሪ ዓቢይ ክብረ በዓል ስለ ዝነበረ ናብ ቤተ ክርስትያን ኣተወ። ኣብኡ ድማ ካህናት ብዝማሬ መላእኽቲ ብማህሌት ብሰላምን ብፍቅርን ከጸልቱ ረኣየ። ኣብቲ ውሽጢ ድማ ሓደ ቀይሕ ሰብኣይ ካብ ኵሎም ዝጸበቐ ኣብ ማእከሎም ኮይኑ እቲ ካብ ገጾም ዝወርድ ዝነበረ ረሃጽ ክኣልየሎም(ክደርዘሎም) ረኣየ። ገጾም`ውን ኣዝዩ ብሩህ ኮይኑ ረኣየ።
ብኡ ንብኡ ድማ ኣብ ትሕቲ እግሩ ወዲቁ ኣንገርገረ ሽዑ ድማ እቲ ሒዝዎ ዝነበረ ጋኔን ከም ጸሊም ቅረፍቲ ካብኡ ወጸ። ጐይዩ ድማ ክኸይድ ፈተነ‘ሞ ቅዱስ ዑራኤል ንዓ ኢሉ ስሒቡ ናብ ትሕቲ እግሩ ኣውዲቁ ብበትሪ መሰቀል ብክሳዱ ሓኒቑ ኣውደቆ ብዙሕ ኣእወየን ገዓረን። “ብድሕሪ ሕጂ’ኸ ዳግማይ ትኣትዎ ዲኻ፧” ክብል ቅዱስ ዑራኤል ሓተቶ። “ድሕሪ ሕጂ ዳግማይ ተመሊሰ ናብኡ ከይኣቱ ስይፊ ኣምላኽካ በሊሕ ኣብ ክልተ ይኽፈለኒ።” በለ። ብድሕሪኡ ክከይድ ሓደጐ። እቲ ሰብኣይ ድማ ኵሉ ዝሰምዖን ዝረኣዮን ንኩሎም ህዝቢ ነገረ። እቶም ነዚ ዝረኣዩን ዝሰምዑ ህዝቢ ተኣኪቦም ንእግዚአብሔር ኣመስገኑ ብናይ ቅዱስ ዑራኤል ውዕለትን ረዲኤትን ድማ ተገረሙ። ናይ ቅዱስ ዑራኤል ጸሎቱን በረኸቱን ምስ ኵሉና ውሉደ ጥምቀት ይኹን ኣሜን።!

ናሁ ጸገየ ጽጌ ማኅሌት፡ ወናሁ ፈረየ ፍሬ ስብሐት፣
ዘእምጕንደ መስቀል ተረክበ በቀራንዮ ገነት፣
ዑራኤል ናርዶስ ዘመዓዛሁ ሕይወት፣
ስበሐቲነ ያምዕዝ መዓዛሁ ከመ ዘሱራፊ ማዕጠንት፣
ቅድመ ገጸ ሕያው ክርስቶስ ወእሙ ቅድስት።

ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።!

በስመ አብ ወወልድ ወመንፈስ ቅዱስ አሐዱ አምላክ አሜን።!ተኣምር ናይ ቅዱስ ገብርኤል ሊቀ መላእክት ናይ ወርሒ ኣብ ሓንቲ ኔቅሎን እትበሃል ሃገር ቤተ ክርስቲያን ንምስራሕ ብዙሕ ድሌት ዝነበ...
27/05/2026

በስመ አብ ወወልድ ወመንፈስ ቅዱስ አሐዱ አምላክ አሜን።!
ተኣምር ናይ ቅዱስ ገብርኤል ሊቀ መላእክት ናይ ወርሒ
ኣብ ሓንቲ ኔቅሎን እትበሃል ሃገር ቤተ ክርስቲያን ንምስራሕ ብዙሕ ድሌት ዝነበሮም ህዝቢ ነበሩ’ሞ እንተኾነ ፍቓድ ናይ ንግስቲ ይዓግቶም ነይሩ እዩ። ኣውር ዝተባህለ ድማ ብዙሕ ይሓስብ ነበረ። ሊቀ መላእክት ቅዱስ ገብርኤል ኣበይ ክሃንጾ ከም ዘለዎ ነገሮ። ኣወር ንንግስቲ ፍቓድ ሓተታ። ክሃንጾ ስለ ዝተኸልከለ ድማ በዚ እንዳ ተጨነቐ እንከሎ ቅዱስ ገብርኤል ነቲ ንጉስ ኣብ መንገዲ ተራኸቦ። እቲ ንጉስ ድማ ወደቀ። ቅዱስ ገብርኤል ኣልዓሉ ድማ ከምዚ በሎ፡ ``ትፈልጠኒ’ዶ፧`` ክብል ሓተቶ። ንሱ ድማ ``ኣይፈለጥኩኻን መን ኢኻ፧ ከምዚ ዓይነት ግርማ ዘለዎ’ውን ኣይረኣኹን። መን ኢኻ፧ ስጋይ ቅንጥጥ ይብለኒ ኣሎ’ሞ መን ኢኻ፧ እስከ ንገረኒ ኣምላክ ሰማይ ዲኻ፧`` ቅዱስ ገበርኤል ድማ ``ኣነ ኣምላኽ ኣይኮንኩን። ኣነ ኣገልጋሊ እቲ ልዕሊ ኵሉ ዝኾነ ኣምላኽ ሰማይ፥ ንጉሰ ነገስት፡ ኣምላከ ኣማልክት፡ ፈጣሪ ሰማይን ምድርን፡ ኵሉ ብእኡ ዝተፈጥረ፥ ንውዳሴ’ኡ ባርያኡ እየ። ስመይ ከኣ ገብርኤል ይበሃል። ሓደ ካብ ሊቃነ መላእክት ኣብ ቅድሚ ጐይታ ዝቐውም፥ መልኣከ ሓይሉ ነቲ ኵሉ ዝፈጠረ፥ ሰባኺ ሓድሽ ዜናዌ ፍስሐ ወሐሴት፥ ናይ ሓድሽ ኪዳን ሰባኺ፥ ኣብሳሪ ጥዑም ዜና፥ ናይ ሓጐስን ደስታን፥ ንናይ ጐይታ ልደቱ ዘበሰርኩ። ኣብ ከርሲ ድንግል ክሓድር ኣብ ማህጸና ንኽጸውር ዘበሰርኩዋ። ንድንግል ማርያም ንጽህቲ ንጹሃን፥ ካብ ኵሉ ንጽህቲ፥ ካብ ኵለን ኣንስትን ካብ ኵሉ ዓለም ዘለዋ ኵለን ነገስታት፥ ነቲ ኵሉ ዝዅንን አምላከ አማልክት ንክትወልድ ዘበሰርኩ መልኣኽ እየ። እዚ ኣነ ሕጂ ዝነግረካ እንተዘይፈጺምካን እንተዘይሰሚዒካን ክቐትለካን ክወስደካን እየ።`` ክብል ኣፈራርሖ። ንጉስ ድማ ``ጐይታይ ተዛረብ ባርያኻ ይሰምዓካ ኣለኹ። ዝኣዘዝካኒ ንስለ ክብርኻ ክፍጽም እየ።`` በሎ። ``ጽባሕ ንግሆ ኬድካ ንንግስቲ ከም ዝረኸብኩኻን እዚ ኵሉ ዝበልኩኻን ንገራ። ኵሉ ገንዘብን መስርሕን ሂብካ ንኣውር ኣፍቅደሉ ክኸይድ ትግደፎ። እዚ እንተ ፈጸምካ ኣነ ንመንግስት ኸእ ክሕልወልካ እየ። ካብ ኵሉ ክፉእ ነገር’ውን ክስውረካ`የ ሕጂ ኬድካ ንንግስቲ ንገራ። ኣብ መንግስተ ሰማይ’ውን ዋሕስ ክኾነካ እየ።`` ኢሉ ካብ ቅድሚኡ ተሰወረ። ብድሕርዚ ንጉስ ወተሃደራት ልኢኹ ንንግስቲ ጸወዓ’ሞ ኵሉ እቲ መልኣኽ ዝበሎ ነገራ። ንሳ ድማ ኵሉ እቲ ዝበለካ ይፈጸም ይኹን በለቶ። ``እዚ ራእይ ኣውር ብህጻኑ እንከሎ ዝርእዮ ዝነበረ መልኣኽ እዩ። መን ምኳኑ ኣይፈልጥን ዝነበርኩ ሕጂ ግና ኣውር ናብ ግብጺ ክኸይድ ፍቐድሉ። ኵሉ መሳርሒ ሒዙ ይኺድ። ንስኻ ኣውር ከኣ እንካ እዚ ወርቂን ቡሩርን ጽቡቕን ውቁብን ጌርካ ስርሓዮ። ክፍልታት መደቀሲ ንኣገልገልትን፡ ንኣጋይሽን፡ ንመነኮሳትን ዝኸውን ግበረሉ።`` ብጽሕድን ሓዱሽ ጡብን ክሰርሖ ናብ ግብጺ ተበገሰ። ናብቲ ቦታ ድማ ብሰላም በጽሐ ቅዱስ ገብርኤል`ውን ኣይተፈለዮን። እቶም ህዝቢ ኣውር መጺኡ ምስ ሰምዑ ተሓጐሱ። እቲ ኵሉ ዝተመባጽዕዎ ድማ ንቤተ ክርስቲያን መሳርሒ ንኣውር ኣምጽእሉ። ኣውር ነቲ ህንጻ ከምቲ ንግስቲ ዝበለቶ ጌሩ ኣብ ኔቅሎን ብጽቡቕ ሰርሓን ዛዘማን በዚ፥ እቲ ጸላኢ ጽቡቕ ዝኾነ ዲያብሎስ ኣይተሓጐሰን ብዙሕ ኣዕገርገረ ሊቀ መላእክት ግን ይረድኦን ይሕልዎን ነበረ። ስለ ቤተ ክርስቲያን ኮነ ስለ ጽቡቕ ነገር ክንሓስብ ቅዱስ ገብርኤል ይሓግዘና። ጸሎት ኵሎም ቅዱሳን ምስ ኵልና ይኹን።

በስመ አብ ወወልድ ወመንፈስ ቅዱስ አሐዱ አምላክ አሜን።!
በዚ ዕለት ወርሒ ቅዱስ ገብርኤል ኣብሳሬ ትስብእት ዝበዓለሉ እዩ። ቅዱስ ገብርኤል ካብ እግዚአብሔር ተላኢኹ ናብ ሰለተ ደቂቅ ብፍጥነት ዝመጻሉ ዕለት እዩ። ኣብ ዘመን ድዮቅልጥያኖስ ከሓዲ እዞም ሰለስተ መንእሰይ ኣቅሮንስ፡ ዲሙስርያ፡ ሚናስ ዝተባህሉ ነቲ ከሓዲ ድዮቅልጥያኖስ ዘቆሞ ጣዖት ስለዘይ ሰገዱን፥ ብኢየሱስ ክርስቶስ’ውን ስለ ዝኣመኑን ኣብ ልዕሊኦም ከቢድ ቅጽዓትን መግረፍትን ኣውሪዱ ናብ ጉድጓድ ኣናብስቲ ደርበዮም። ቅዱስ ገብርኤል ድማ ካብ ጉድጓድ ኣናብስቲ ኣውጺኡ ክሳብ ኣኽሊል ሰማእትነት ብዓወት ካብ መንግስቲ ኣምላክ ዝቕበሉ ኣብ እምነቶም ክጸንዑ ከም ዘለዎም ነገሮምን፡ ኣባራተዖምን። ብድሕርዚ ካብኦም ተሰወረ፥ ብዓቢይ ክብሪ ናብ ሰማይ ዓረገ። ጸሎቱን ረድኤቱን ምስ ኵልና ውሉደ ጥምቀት ይኹን አሜን።!
ዘአውፃእኮሙ፡ እግበ፡ አናብስት፡ በሥምረትከ፡ ኰናኒ።
ለአቅሮንዮስ፡ ወሚናስ፡ ወዲሙስርያ፡ እኅተ፡ አሞኒ።
ሊሉየ፡ ምግባር፡ ገብርኤል፡ እምግባረ፡ ሰይጣን፡ ተቃራኒ።
ናዝዘኒ፡ ለገብርከ፡ እምትካዘ፡ ዓለም፡ ማሳኒ።
አዕፅምቲሁ፡ ያየብስ፡ ብእሲ፡ ኅዛኒ።

ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።!

በስመ አብ ወወልድ ወወመንፈስ ቅዱስ አሐዱ አምላክ አሜን።! #ተኣምር ናይ ሊቀ መላእክት ቅዱስ ሩፋኤል ኣብ ዝገበሮ እዚ እዩ።ጸሎቱን በረኸቱን ምስ ኩልና ይኹን። እዚ ክቡር ሊቀ መላእክት ...
21/05/2026

በስመ አብ ወወልድ ወወመንፈስ ቅዱስ አሐዱ አምላክ አሜን።!
#ተኣምር ናይ ሊቀ መላእክት ቅዱስ ሩፋኤል ኣብ ዝገበሮ እዚ እዩ።
ጸሎቱን በረኸቱን ምስ ኩልና ይኹን። እዚ ክቡር ሊቀ መላእክት ዝገበሮ ተኣምር ዘውትር ኣፍንጪኣ እንዳ ዓጸወ ዘጨንቓ ሕማም ዝሓመመት ሓንቲ ሰበይቲ ነበረት ።
ናብ ብስም ሊቀ መላእክት ቅዱስ ሩፋኤል ዝተሰምየ ቤተ ክርስቲያን እና ኸደት “ኦ! ብማላድነትካ ምሕረት እተውህብ ናይ መላእክት ሓለቃ ቅዱስ ሩፋኤል፧ ንሰብነተይ ካብ ዘጨንቓ ካብ ዘሎ ካብዚ ሕማም መኣስ ተጋላግላ ትኸ’ውን፧ ምኽንያቱ ናብ ኣምላኻ ናብ እግዚአብሔር ለሚንካ ንዝጭነቕ ተድሕን ንዝዓወረ’ውን ተብርሃሉ ኢኻ።” እንዳበለት ትበኪ ነበረት። እዛ ሰበይቲ እዚኣ ናብ ቤተ ክርስቲያን ቅዱስ ሩፋኤል ምስ መጸት። ኣብ ቅድሚ ስእሉ ክልተ ኣእዳዋ ዘርጊሓ ብምንቅዕራር ምስ ብዙሕ ንብዓት ትልምን ነበረት። ብድሕር’ዚ ሓደ መዓልቲ ከም ልማዳ ስለቲ ጽኑዕ ሕማማ ክትበኪ ጀመረት። ቅዳሴ ምስ ተወደአ’ውን ጸበል ሰተየት። ኣብ’ዚ ጊዜ እዚ ካብ ጎሮረኣ ጸሊም ዝሕብሩ ዓኽታ ዝመስል ምራቕ ወጸላ።
እዚ ድንቂ ዝኾነ ስራሕ እግዚኣብሔር ዝራኣዩ ሰባት(ህዝቢ) ድማ ንኣማላድነት ክቡር ሊቀ መላእክት ቅዱስ ሩፋኤል ኣድነቑ። እታ ሕምምቲ’ውን ስለ ዝዳሓነት ዓለለት። ንእግዚአብሔር’ውን ኣመስገነት። ነቲ ብኣማላድነቱ ዝፈወሳ ቅዱስ ሩፋኤል’ውን ኣድነቀቶ። ከይዳ’ውን ብስም ሊቀ መላእክት ቅዱስ ሩፋኤል ንድኻታት ምጽዋት ሃበት።
ኦ! ዝተፈተኹም ኣሕዋት ናይ ሊቀ መላእክት ቅዱስ ሩፋኤል ብዝሒ ርህራሄኡ ተመልኪትኩም’ዶ፧ ካብ ከቢድ ሽግር፥ ካብ ጥፋኣት፥ ካብ ሞት፥ ካብ ኢድ ጸላኢ ዘድሓኖም ብዙሓት እዮም። ሩፋኤል ናብ’ቲ ይቅረ ዝብልን ንስሙ ንዝጽውዑ ማሓርን ናብ ዝኾነ ምስጋና ናብ ዝግበኦ እግዚአብሔር ኵሉ ጊዜ እዩ ዝልምነሎም። ሊቀ መላእክት ቅዱስ ሩፋኤል ንዝልምነሎ ኣብዚ ዓለም ኮነ፥ ኣብቲ ዝመጽእ ዓለም ክብርን ምስጋናን ይህቦም። ናይ ቅዱስ ሩፋኤል ጸሎትን በረኸትን ምስኩሉና ይኹን ንዘላልም ዓለም ኣሜን።!
ዐርኬ፦
አሐቲ ብእሲት ዘተፀፅወ አዕናፊሃ፣
ታስቈቁ ዘልፈ እምነ ሕማማ ዘበዝኅ፣
ወተሐውር ዘልፈ ዘሩፋኤል ጽርሐ፣
አመ ሰትየትሂ በስቈቃው ማየ ቅዳሴ ንጹሐ፣
በብዝኅ ኂሩቱ ሩፋኤል አግኅሠ ደቄሃ።
ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።!

በስመ አብ ወወልድ ወመንፈስ ቅዱስ አሐዱ አምላክ አሜን!።ካብ ተኣምር ቅዱስ ሚካኤል ወርሒ ኣብዚ ወርሒ ቅዱስ ሚካኤል ሊቀ መላእክት ዝገቦሮ ተኣምር ሓደ ክርስቲያን ባዓል ብዙሕ ሃብቲ ብሃብ...
20/05/2026

በስመ አብ ወወልድ ወመንፈስ ቅዱስ አሐዱ አምላክ አሜን!።
ካብ ተኣምር ቅዱስ ሚካኤል ወርሒ
ኣብዚ ወርሒ ቅዱስ ሚካኤል ሊቀ መላእክት ዝገቦሮ ተኣምር ሓደ ክርስቲያን ባዓል ብዙሕ ሃብቲ ብሃብቱ’ውን ካብ ዓበይቲ ሃብታማት ናይ ሮማ በዓል ብዙሕ ሃብቲ ጸጋን ነበረ። ሰበይቱ’ውን ውላድ ዘይብላ መኻን ነበረት። እዛ ሰበቲ ውላድ ብዘይምንባራ ኵሉ ጊዜ ትበክን ትሓዝን ነበረት። ክልቲኦም ብጽኑዕ ልቢ ውሉድ ምእንቲ ክህቦም ናብ እግዚአብሔር አምላከ ቅዱስ ሚካኤል ብኑጹህ ልቢ ቀሪቦም ይልሙኑ ነበሩ። እዞም ክልተ ሰብ ሓዳር ውላድ ብዘይ ምንባሮም ብብዝሕ ምህላን ብፉጹም ልመናን ይነብሩ ነበሩ። ከምዚ ኢሎም ከሎው ድማ ወርሓዊ ክብረ ባዓል ናይ ቅዱስ ሚካኤል ሊቀ መላእኽት ወርሒ(12) ሕዳር ኮነ። ናብዚ ክብረ በዓል መግቦምን ስንቆምን ሒዞም መንገዲ ናብ ንግደት ተጓዓዙ። ክብረ በዓል ንኽሕሉፉ ኣብ ሓሳቦም’ውን ብዛዕባ ኣበዓዕላ ዝኽሮም ከመይ ከም ዝውዕል ይሓስቡ ነበሩ።
እቲ ሰብኣይ ከኣ ምስ ሰበይቱን ምስ ኣዝማዱን ኣገልገልቱን ናብ ቤተ ክርስቲያን ከደ። ኣብ መንገዲ ክኸዱ ከለው ድማ እታ ሰበይቲ ካልኦት ሕዝበ ክርስቲያን ረኣየት። ንሳቶም ድማ ናይ ሊቀ መላእክት ቅዱስ ሚካኤል በዓል ከብዕሉ ይኸዱ ነበሩ። ብዙሓት ኣንስቲ ድማ ምስ ደቀን ረኣየት። ገልኤን ኣብ ዝባነን ዝሓዘላኦም፥ ገልኤን ድማ ዝሓቖፋኦም፥ ገልኤን ድማ ዘጥብዋኦም ምስ ረኣየት ብብርቱዕ ድምጺ ብዙሕ ብኽያትን መሪር ሓዘንን ከምዚ’በለት “ኦ! እግዚእየ ወኣምላኪየ ኢየሱስ ክርስቶስ ወልደ እግዚአብሔር ሕያው ነጽር ኅበ ትሕትናየ ወጽሉ እዝነከ ኅበ ስእለትየ። ኦ! ኣምላኸይን ጐይታይን ኢየሱስ ክርስቶስ ወልደ እግዚአብሔር ጸሎቶይ ስማዕ ኣእዛንካ’ውን ናብ ምህለላይ ጽን በል ንዓይ ንድኽምትን፡ ሕዝንትን፡ ሕስርትን፡ ፍንፍትን፡ ዝኾንኩ ባርያኻ ንድምጺ ልመናይ ተቀበል ኦ! ጐታየ ንዓይ ንድኽምቲ ኣጻናንዓኒ ኣበርተዓኒ ሸለል ኣይትበለኒ። ካብ ውሽጢ ልበይ ናባኻ ይልምን የእውን ኣለኩ። ተስፋ ዝኾነኒ ውላድ ንልበይ ዝሕጉስ፥ ውሉድ ፍረ ሰናይ ካብ ከርሰይ ዝወጸ ክርኢ ሃበኒ። ኦ! ቅዱስ ሚካኤል ሓለቓ መላእኽት ምእንታይ ናብ እግዚአብሔር ጸልየለይ ንጸሎተይ ተቐቢልካ ናብ እግዚአብሔር ኣዕርግ። ንዓይ ንጓልካ ውልድ ክህበኒ ብጸሎትካ ሓግዘኒ፡ ርድኣኒ። ወዲ ይኹን ጓል ውሉድ እንተዳኣ ሂብካኒ ኣነ’ውን ንዓካ ኣብ ቤትካ ከገልግል ክህበካ ከወፍዮ። ምሉእ ሂወቱ ናትካ ኣገልጋሊ ክከውን ክህበካ እየ።” ኢላ ትጽሊ ነበረት።
ከምዚ ኢላ ምስ ተመባጸዕት ናብ ቤተ ክርስቲያን ቅዱስ ሚካኤል ትከይድ ነበረት ምስ ባዓል ቤታ’ውን ኣብ ኣፍ ቤት መቅደስ ቤተ ክርስቲያን ቅዱስ ሚካኤል ኣትዮም ፊት ንፊት ኮይኖም ይጽልዩ ኣኒቃዕሪሮም ድማ ይሉምኑ። ኣብ ቅድሚ ስእሉ ኮይኖም ናብ ሰማይ ዓንቃዕሪሮም ብብዝሕ ብክያትን ብጽኑዕ ንብዓት ብመንፈስዊ ሕብረት ብሓደ ልቢ ውላድ ክህቦም ይልሙኑ ነበሩ። በዚ ዕለት ቅዳሴ ተቀዲሱ ከም’ቲ ሕጊ ድማ ካብ ናይ ክርስቶስ ስጋን ደምን ተቀቢሉ።
ብድሕሪ’ዚ ድማ እቲ ካህን ባረኾም ብሰላም እተዉ ምስ ተባሃለ ኵሉ ህዝቢ ነናብ ቤቱ ተመልሰ። እታ ሰበይቲ ግና ድሕሪ ቅዳሴ ካብ ቤተ ክርስቲያን ኣይወጸትን ነበረት። ኣብቲ ዓንዲ ጸግዒ ደቀሰት ብብዙሕ ሓዘን ትበኪ ነበረት። ብርሃናዊ መልኣክ ድማ ተራኣያ ከምዚ ድማ በላ “ኣንቲ ሰበይቲ ኣይትብከዪ ሓዘን ልብክን ድምጺ ልመናክን እግዚአብሔር ተቀቢሉልኪ ወዲ ክትወልዲ እኺ ስሙ ድማ ተስፋ ሚካኤል ኢልኪ ስመይዮ ኢኺ” በላ። ከምዚ ምስ በላ ድማ ካብኣ ተሰወረ። እዚ ምስ ሰምዕት ድማ ካብ ድቃሳ ተባራበረት ብዓቢይ ሓጐስ’ዉን ተሓጐሰት ልባ’ዉን ሓጐስ መልአ። ንእግዚአብሔር ድማ ኣመስገነቶ ብሓጐስ’ዉን ናብ ቤታ ተመልሰት። እግዚአብሔር ድማ ብድምጺ መልኣክ ጌሩ ዝተዛረቦ ፈጸመላ። ጠነሰትን፥ ጽቡቅ ህጻን‘ዉን ወለዱ መልክዑ‘ዉን ሰናይ ባህ ዘብልን ዉላድ ተዋህቡ። ኣቡኡን ኣዱኡን ድማ ተሓጐሱ ደስ’ዉን በሎም። ስሙ ድማ ተስፋ ሚካኤል ኢሎም ኣዉጽሉ።
ውላድ ስለዝረኸቡ ንዓበይቲ ዓድን ንዅሉ ህዝብን ጸውዑ። ንእግዚአብሔር እንዳመስገኑ። ናይ ሊቀ መላእክት ቅዱስ ሚካኤል ሓይሊ ጸሎት እንዳመስከሩ ዓቢይ ድግስ(ምሳሕ) ገበሩ። እዞም ስድራ ግና ውላድ ምስ ተዋህቡ ነቲ ዝተመባጽዕዎ ቃል ረስዑ’ሞ ነቲ ህጻን ናብ ቤተ ክርስቲያን ናይ ቅዱስ ሚካኤል ኣይሃብዎን። ብድሕርዚ እቲ ህጻን ወዲ ሐደ ዓመት ምስ ኮነ ጽኑዕ ደውየ ሓመመ። ሓኻይም ደኸሙ። ክፍውስዎ(ከሕውይዎ) ግና ኣይከኣሉን።
ኣዲኡ ግና ድሕሪ ብዙሕ ጻዕሪ ፈወስቲ፥ እቲ ዝኣተወቶ ቃል ዝተመባጸዐቶ ዘከረት። እቲ ንቤተ ክርስቲያን ቅዱስ ሚካኤል ኣገልጋሊ ክከውን ክህቦ እየ ኢላ ዝኣተወቶ ቃል ዘከረት። “ሕማሙ’ውን እንታይ ከም ዝኾነ ሎሚ ፈልጠዮ ኣሎኩ። ንሱ’ወን እቲ ውላድ ንዓካ ዘገልግል ኢለ ዝኣተክዎ ቃል እዩ። ንቅዱስ ሚካኤል ክህበካ እየ ዝበሉኩዎ ዝኣተክዎ መብጻዓይ ኣይፈጸምኩን ሓጢኣት ጌረ እየ።” በለት። ብድሕሪዚ ብቅሉጡፍ ካብ ቤታ ወጸት ንወዳ ሒዛ’ውን ናብ ቤተ ክርስቲያን ናብ ናይ ቅዱስ ሚካኤል ሊቀ መላኣኽት ኣብጸሖቶ። ካብቲ ማይ ጾሎት ቤተ ክርስትያን ጌራ ድማ ነጸገትሉ። ሓጸበቶ ካብቲ ቅዱስ ቅብኢ ቄንደል ጌራ ድማ ቀብኣቶ። ኣብኡ ኾይና ድማ ከምዚ በለት “ኦ! እግዚእየ ሊቀ መለኣኽት ሚካኤል ኣህይዎ ወፈውሶ ለወልድየ እምዝንቱ ደውየ ዕጹብ ወድሩክ፥ ኦ! ሊቀ መላእክት ቅዱስ ሚካኤል ነዚ ህጻን ካብ ዘሎዎ ሕማም ፈውሶ ኣሕውዮን ካብዚ ዘለዎ ሕማም እንድሕር ኣሕዊካዮ ክሳዕ ዕለተ ሞቱ ንቤትካ ከገልግል ክህቦ እየ።” በለት። በታ ሰዓት ድማ እቲ ህጻን ሓወየ።
ብድሕርዚ እቲ ህጻን ኣብ ቤቱ ክርስቲያን ቅዱስ ሚካኤል ሊቀ መላእኽቲ ብመንፈሳዊ ኣገልግሎትን ስራሕን ዓበየ ኣብ ኣገልግሎት’ውን ክሳብ ዕለቱ ዘመኑ ተጸምደ። ብድሕሪ’ዚ ኣዲኡ ብሓጐስ ናብ ቤታ ተመልሰት። ኵሉ ጊዜ ንልዑል እግዚአብሔር ድማ ተመስግን ነበረት። ተኣምር ናይ ቅዱስ ሚካኤል ሊቀ መላእኽት እንዳ ኣመስገነት ትነግርን ተዘንቱን ነበረት። ከምኡ’ውን ንኵልና ውሉደ ጥምቀት ካብ ሓጢኣት ነፍስን ስጋን የድሕነናን ይፈውሰናን። ካብ ናይ ዓለም ክፉእ ድማ ይሰውረና። ስራሕ ሓጢኣት ኵሉ ካባና የርሕቕ። ናይ ሓጢኣት ማእሰርቲ ካባና የርሕቕ። ንእግዚአብሔር ካብ ዘየሕጉስ ተፈሊና ከይንተርፍ ይርድኣና ንዘለኣለም ኣሜን።!!

በስመ አብ ወወልድ ወመንፈስ ቅዱስ አሐዱ አምላክ አሜን!።
ብዕለት 12 ግንቦት ቅዱስ ሚካኤል ወርሓዊ በዓሉ በዚ ዕለት ሊቀ መላእክት ቅዱስ ሚካኤል ካብ እግዚአብሔር ተለኢኹ ናብ እንባቆም ነብይ ዝመጻሉ ዕለት እዩ።
ነብይ እንባቆም ኣብ ኢየሩሳሌም ነቶም ኣብ ግራት ዝዓጽዱ ዝነበሩ መግቢ ዓደስ(ብርስን) ሒዙ ኣብ ርእሱ ተሸኪሙ እና ኸደ ከሎ ቅዱስ ሚካኤል ሊቀ መላእክት ድማ ንነብይ እንባቆም ብርእሱ ሒዙ ብእኽናፉ ጸይሩ ናብ ባቢሎን ናብ ነቢይ ዳኒኤል ኣብጾሖ ነበይ ዳኒኤል ድማ ካብቲ መግቢ በልዐ።
ቅዱስ ሚካኤል ሊቀ መላእክት ድማ በዚ ዕለት ንነብይ ዳኒኤል ካብ ኣፍ ኣናብስት ኣድሓኖን ኣውጸኦን።(ት.ዳን.6፡21-22) ንነብይ እንባቆም ድማ ናብ ይሁዳ ናብቶም እኽሎም ዝዓጽዱ ዝነበሩ ኣምጺኡ ኣቆሞ ።
ናይ ቤተ ክርስቲያንና መምህራን (ሊቃውንትን) በብ ወርሑ ናይ ሊቀ መላእክት ቅዱስ ሚካኤል ዝኽሪ ክንገብር ይእዙዙናን ይሙህሩናን።(ት.እን. 2፡1-4) ልማንኡን በረኽዕቱን ኣማላድነቱን ምስ ኩላትና ህዝበ ክርስትያን ንዘልኣለም ኣለም ይኹን ኣሜን ።!
ሰላም ለህላዌከ ዘምሥዋዓ አብ መቅደሰ።
ከመ ታዕርግ ህየ ጸሎተ ቅዱሳን ጢሰ።
ኃፍረተ መስቀል ወልድ ጊዜ ተዓገሠ።
ኢትርአይ ብድንጋፄ እንዘ ታንቃዓዱ ነፍሰ።
ሚካኤል አትሐትከ፡ ወአድነንከ ርእሰ።
ወስብሓት ለእግዚአብሔር ልዑል
ወለወላዲቱ ድንግል
ወለመስቀሉ ክቡር ኣሜን።!

ተኣምር ቅዱስ ዑራኤል ናይ ወርሒ #ሚያዝያናይ ጸሎቱን በረከቱን ምስ ኩልና ሕዝበ ክርስቲያን ይኹን ለዓለመ ዓለም ኣሜን ?!ሓንቲ ሰበይቲ ካብ ዓረባዊት ወገን ዝኾነት ፈትሊ ፈቲላ እትሸይጥ...
30/04/2026

ተኣምር ቅዱስ ዑራኤል ናይ ወርሒ #ሚያዝያ
ናይ ጸሎቱን በረከቱን ምስ ኩልና ሕዝበ ክርስቲያን ይኹን ለዓለመ ዓለም ኣሜን ?!
ሓንቲ ሰበይቲ ካብ ዓረባዊት ወገን ዝኾነት ፈትሊ ፈቲላ እትሸይጥ ነበረት። ከምኣ ዝበለት ካልኣይታ ኸኣ ካብ ቤተ ክርስቲያን ናይ ቅዱስ ዑራኤል ፈትሊ ሰሪቓ(ወሲዳ) ንዓኣ ሸጠትላ። በቲ ግዜ እቲ ድማ ናይ እግዚኣብሔር መልኣክ ተራአያ ከም’ዚ ኸኣ በላ “ካብ ድቃስኪ ተንስኢ! ፈትለይ ኸኣ ምለስዮ፡ ኣነ ዑራኤል መልኣክ እየ፡ ነታ ፈትለይ ዝሸጥክላ ሰበይቲ ዘድሓንክዋ ኣነ እየ።
ሽዑ ካብ ድቃሳ ነቂሓ ድማ ፈትሊ ሒዛ ኣብ ክንዲ እቲ ዝሸጠትላ ፈትሊ፡ ካብ ናይ ቅዱስ ዑራኤል መልኣክ ቤተ ክርስቲያን ካልእ ፈትሊ ሃበታ። እታ ዓረባዊት ድማ ፈትላ መለሰትላ እታ ፈለማ ዝሰረቀቶ ድማ ተቐቢላ ናብ ቤተ ክርስቲያን ቅዱስ ዑራኤል ከይዳ ነቲ ሓላዊ(ዓቃቢ) ቤተ ክርስቲያን ሃበቶ።
በዚ ተግሳጽ እዚ ድማ ነቲ እከይ ግብራ ገዲፋ ናብ እግዚኣብሔር ተመለሰት ፍርሓት እግዚኣብሔር ድማ ሓዛ። ብኩሉ መዋእለ ሕይወታ ድማ ንእግዚኣብሔር እንዳ ኣስመረት ነቲ ንኩሉ ፍጥረት ሳህልን ምሕረትን ዝልምን ገባሬ ተኣምር ቅዱስ ዑራኤል ሊቀ መላእክት ተኣምሩ ትነግር ነበረት።
ምስጋና ንእግዚኣብሔር ንወላዲቱ ድንግል ኣብ ልዕሌና ድማ ሳህልን ምሕረትን ይኹን ለዓለመ ዓለም ኣሜን?!
ጸሎቱን ልማኖኡን ናይ ቅዱስ ዑራኤል ምስ ኩልና ህዝበ ክርስቲያን ይኹን።

ዑራኤል ኮከብ ለሰብኣ ሰገል ሔራን፡
መርሆሙ ወአብጽሖሙ እስከ ቤተልሔም መካን፡
በአስተርእዮቱ ለወልድ ዘድንግል ሕጻን።

ወስብሐት ለእግዚኣብሔር ልዑል
ወለወላዲቱ ድንግል
ወለመስቀሉ ክቡር ኣሜን?!

በስመ አብ ወወልድ ወመንፈስ ቅዱስ አሐዱ አምላክ አሜን።! ተኣምር ናይ ቅዱስ ገብርኤል ሊቀ መላእክት ናይ ወርሒ ሚያዝያ 19ተኣምር ናይ ሊቀ መላኣክት ቅዱስ ገብርኤል ጸሎቱን ረድኤቱን ምስ ኵ...
27/04/2026

በስመ አብ ወወልድ ወመንፈስ ቅዱስ አሐዱ አምላክ አሜን።!
ተኣምር ናይ ቅዱስ ገብርኤል ሊቀ መላእክት ናይ ወርሒ ሚያዝያ 19
ተኣምር ናይ ሊቀ መላኣክት ቅዱስ ገብርኤል ጸሎቱን ረድኤቱን ምስ ኵልና ውሉደ ጥምቀት ይኹን ኣሜን።
ኣብ ሓደ ሃገር/ዓዲ/ ሓደ ኒቆሎን ዝስሙ ሰብኣይ ይቕመጥ ነበረ. እዚ ሰብኣይ ምስቶም ምስኡ ዝነበሩ ህዝቢ ናይ ሊቀ መላእክት ቅዱስ ገብርኤል ቤተ ክርስቲያን ክሃንጹ ደለዩ። ዝሃንጽሉ ቦታ እና ደለዩ ከለው ድማ ኵል ጊዜ ቅዱስ ገብርኤል ቀቅድሚኦም ኮይኑ፥ እግዝእትነ ማርያም’ውን ምስኦም ኮይና ኣበይ ቦታ ክሃንጽዎ ከም ዘለዎም ነገረቶም። ቅዱስ ገብርኤል ድማ ከመይ ጌይሮም ክሰርሕዎ ከምዘለዎም ካብቲ ዝተሓተ መሰረት ክሳዕ ኵሉ ኣዕንዱን፡ ጉልላቱን፡ ቀመሩን ሃበሮምን ሓገዞምን ባረኾምውን። ብዙሕ ተሓጐሱን ባህ`ውን በሎምን። ብድሕርዚ ሊቀ መላእክት ቅዱስ ገብርኤል ንሰማይ ዓረገ። ኣብ’ታ ቦታ ድማ ብዙሕ ተኣምራትን ጸሎትን ክግበር ከሎ ኵል ጊዜ ምስኦም ከም ዝረደኦም በዚ ዕለት ነገሮም። ድሕሪ 8 መዓልታት ድማ ሊቀ መላኣክት ቅዱስ ገብርኤል ክሰርሕዋ ነገሮም። ኵሉ ንቤተ መቅደስ ዘድሊ ድማ ኣዳለውን ብዓቢይ ሓጐስን ደስታን ኩሎም ዓበይቶምን፡ ንእሽትኦምን፡ ምህናጽ ተጀሚሩ ምስ ረኣዩ ኵሉ እቲ ዝፈቀድዎ ንዋይ ዝተመባጽዕዎ ምጽዋትን ኣምጽኡ። ከምዚ ገይሮም ምስ ዛዘምዎ ኣገልግሎቱ ጽቡቕ ኮይኑ ጀመረ። ህዝቢ ድማ ኣብኡ ኮይኖም ልክዕ ከምቲ ዝግባእ ኣገልግሎት ብጸሎት ሊቀ መላእክት የዕርጉ ነበሩ።ጸሎቱን ረድኤቱን ናይ ሊቀ መላእክት ቅዱስ ገብርኤል ምስ ኵልና ህዝበ ክርስቲያን ይኹን ኣሜን።!

በስመ አብ ወወልድ ወመንፈስ ቅዱስ አሐዱ አምላክ አሜን።!
በዚ ዕለት 19 ሚያዝያ ሊቀ መላእክት ቅዱስ ገብርኤል ካብ እግዚአብሔር ኣምላክ ተላኢኹ ንቡሰይን ጴጥሮስ ሓውን ዝተገልጸሎምን ዝሓገዞምን ዕለት እዩ።
ብሶይን ሓው ጴጥሮስን ካብ ጽኑዕ እሱርቤት ስለ ናይ ጐይታናን መድኃኒናን ኢየሱስ ክርስቶስ ዝረኸቦም መከራን ማእሰርትን፥ ኣብዚ ቦታ ሊቀ መላእክት ቅዱስ ገብርኤል “ሰላም ንዓኹም ኣነ ኣብሳሪ ቅዱስ ገብርኤል እየ። ናባኻትኩም ዝለኣኸኒ ድማ እግዚአብሔር ኣምላኽ እዩ’ሞ ስምኩም ክዓቢ፥ ንዘልኣለም ክነብር እዩ። ስለዚ ንስኻ ቡሰይ በርቲዕካ ጽናዕን ተጋደልን።” ኢልዎ ካብኡ ተሰወረ። ብድሕርዚ እቲ መኮንን(ንጉስ) ነቶም ወተሃደራቱ ዕንጸይቲ መስቀል ግበሩ’ሞ ብኸቢድ መግረፍቲ ገሪፍኩም ስቐልዎ በሎም። እቶም ወተሃደራት ድማ ከምኡ ከምቲ ዝተኣዘዝዎ ገበሩ። በዚ ዕለት ሊቀ መላእክት ቅዱስ ገብርኤል “ኦ! ሕሩየይ እግዚአብሔር ዝመረጸካ ቡሰይ ኣጆኻ ኣይትፍራሕ። ኣነ ምሳኻ ኣለኹ ኵሉ ግብርኻ ክሳዕ እትፍጽም ምሳኻ ኣለኹ።`` በሎ። ክሳዕ 7 ጊዜ እና ተገልጽሉን ኣበራተዖን ክሳዕ ኣኽሊል ሰማእትነት ካብ መንግስተ ሰማያት ዝቕበል ሓገዞን ተራድኦን።
ረድኤቱን ጸሎቱን ምስ ኵልና ህዝበ ክርስቲያን ይኹን፡ ሰላሙ ድማ ይልኣኸልና።
አመ፡ አላዊ፡ አዘዘ፡ በዲበ፡ ኅንበዘ፡ ስቅለተ።
እንዘ፡ ትናዝዞ፡ ገብርኤል፡ ወታስተርእዮ፡ ክሡተ።
ከመ፡ አጽናእኮ፡ ለብሶይ፡ እስከ፡ ይከውን፡ ሰማዕተ።
አጽንዓኒ፡ ወአጥብዐኒ፡ ከመ፡ ኢየሐሊ፡ ምንተ።
እንበለ፡ ርስትየ፡ መቃብር፡ ዘጽኑሕ፡ ሊተ።

ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።!

በስመ አብ ወወልድ ወመንፈስ ቅዱስ አሐዱ አምላክ አሜን።!ተኣምር ናይ ሊቀ መላእክት ቅዱስ ሩፋኤል ኣብ ወርሒ #ሚያዝያ ዝገበሮ እዚ እዩ።ጸሎቱን በረኸቱን ረድኤቱን ምስ ኩላትና ይኹን። ሊቀ ...
21/04/2026

በስመ አብ ወወልድ ወመንፈስ ቅዱስ አሐዱ አምላክ አሜን።!
ተኣምር ናይ ሊቀ መላእክት ቅዱስ ሩፋኤል ኣብ ወርሒ #ሚያዝያ ዝገበሮ እዚ እዩ።
ጸሎቱን በረኸቱን ረድኤቱን ምስ ኩላትና ይኹን። ሊቀ መላእኽቲ ዝገበሮ ተኣምር እዚ ዝስዕብ እዩ።
ዝኸበርኩም ህዝበ ክርስቲያን ኣብ ቅድሚ ናይ እግዚአብሔር መንበረ ስብሐት ዝቐውም ሊቀ መላእኽቲ ቅዱስ ሩፋኤል፥ ኣብ ውሽጢ አትሮንስ ማርያም ቀረባ ዝኾነት አምባ ኣብ ዝተባህለ አምሐራሳይንት ዝገበሮ ተኣምር ክንነግረኩም ልቦናኹም ክፈቱ። ተቀማጦ ናይዛ ዓዲ ኣብቲ በረኻ ቤተ ክርስቲያን ክሰርሑ ብሓይሊ መንፈስ ቅዱስ ተበገሱ። ንቤተ ክርስቲያን መስርሒ ዝኸ’ውን እንጨይቲ ብምእካብ ብሓገዝ እግዚአብሔር ቅድስቲ ቤተ ክርስቲያን ክሰርሑ ጀመሩ።
ካብ ዕለታት ሓንቲ መዓልቲ ናይ ቤተ ክርስቲያን ዓንዲ ክቑሙ እንከለው ሓንቲ ዓንዲ ሓጸረቶም። ምሕጻራ ድማ ካብተን ካልኦት ዓንድታት ክልተ እመት ነበረ። ሓጻር ምዃና ምስ ፈለጡ ብስም እዚ መልኣኽ ኣብ ዝተሰየመት ቀጽሪ ቤተ ክርስቲያን ገዲፎማ ኵሎም ነናብ ቤቶም ከዱ። ንጽባሒታ ተመሊሶም ናይቲ ዓንዲ ቅያር እትኸውን ዓንዲ ንምርካብ ናብ ምፍታሽ ኣተው። ነታ ሓጻር ዓንዲ ብድጋሜ ምስ ረአይዋ እቶም ሃነጽቲ ብጣዕሚ ተደነቑ። እዛ ዓንዲ ኣብ ሓንቲ ለይቲ ዓሰርተ እመት ወሲኻ ሓደረት።
ነዚ ተኣምር ምስ ረኣዩ እግዚአብሔር ኣብ ቅዱስ ሩፋኤል ሓዲሩ ነዚ ዓቢይ ተኣምር ከም ዝገበረ ኣስተውዓሉን ብጣዕሚ’ውን ተደነቑ። በዚ ዓቢይ ተኣምር ዓቢይ ሓጐስ ገበሩ። “ካብ ቀደም ጀሚሩ ኣምላኽ ኣብ ቅዱሳኑ ሓዲሩ ድንቂ ስራሕ ዝሰርሕ ኣምላክ’ዩ።” በሉ። ነታ ዓንዲ ብዝግባእ ጸሪቦም ናብ ቦታኣ ኣምጺኦም ተጠቀሙላ። ዓባይ ዓንዲ’ውን ኮነት።
በቲ ክቡር ሊቀ መላእኽቲ ቅዱስ ሩፋኤል ዝተገብረ ዓቢይ ተኣምር ካብታ ዓንዲ ዝተረፈ ተረፍ፡ ክሳዕ ሎሚ ጊዜ ብዙሓት ድውያን ይፍውስ ኣሎ። ኣብ በብጊዚኡ ዝገበሮ ዓበይቲን ድንቂ ተኣምራት ዝገብር ቅዱስ ሩፋኤል ጸሎቱን በረከቱን ኣማላድነቱን ምስ ኩላትና ህዝበ ክርስቲያን ይኹን። ኣሜን።!
ዐርኬ፦
ሰላም ሰላም ለወላዴ ጦቢት ጦቢያ፣
ዘፈጸመ ቃሎ ለአሞፅ ኬንያ፣
አመ በመሥያጥ ረከበ ምውተ ሀገር ዘልያ፣
በድኖ አንሥአ ከመ ይቅብር በከዊነ ኅዲግ ጕሕልያ፣
ትእዛዝ ንጉሥ ኢፈርሐ ወኮነ አርአያ።
ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።!

ተኣምር ቅዱስ ሚካኤል ናይ ወርሒ #ሚያዝያበስመ አብ ወወልድ ወመንፈስ ቅዱስ አሐዱ አምላክ አሜን !።ተኣምር ናይ ቅዱስ ሚካኤል ሊቀ መላእክት እሳታዊ ባህርይ ዘለዎ ናይ ቅዱስ ሚካኤል ሊቀ መ...
20/04/2026

ተኣምር ቅዱስ ሚካኤል ናይ ወርሒ #ሚያዝያ
በስመ አብ ወወልድ ወመንፈስ ቅዱስ አሐዱ አምላክ አሜን !።
ተኣምር ናይ ቅዱስ ሚካኤል ሊቀ መላእክት እሳታዊ ባህርይ ዘለዎ ናይ ቅዱስ ሚካኤል ሊቀ መላእክት ዝገበሮ ተኣምር እዚ እዩ። ጸሎቱን ኣማላድነቱን ምስኩልና ይኹን።
ሓደ ኣይሁዳዊ ሰብኣይ ኣብ ሃገረ ሮም ዝነብር። ንሱ ድማ ሃብታም ብንብረት ናይዛ ሓላፊት ዓለም ወርቅን ቡሩርን ቡዝሓት እንስሳታትን ድማ ነበረኦ። ካብ ዕለታት ሓንቲ መዓልቲ ከምቲ ሕጊ ኣቦታቱ ኪሰግድ ኢሉ ናብ ቤተ መቅደስ እና ከደ ኣብ መንገዲ ድማ ምስ ሓደ ክርስቲያን ሰብኣይ ተራኸቡ። እቲ ክርስቲያን ድማ ኣቀዲሙ ኣዝዩ ሃብታም ሰብ ነበረ። ሕጂ ግና ድኻን ነዳይ ሓጥእን ናይ ዕለት መግቡ ዘይረኸበ ዝተሸገር ኮነ ብድሕርዚ ናብ ግራት ወፈረ ብሕፍረት ተጐልቢቡ ናይ ዕለተ መግቡ፥ ንኽምእርር እናኸደ። እቲ ኣይሁዳዊ ኣብ መንገዲ ረኸቦ። ከምዚ ድማ በሎ፥ “ንዓ ሳዓበኒ ኣነ ድማ 10 ዲናር ክህበካ እየ’ሞ በአአን ከኣ ክትረብሕን ክትነግድ ኢኻ። ኣቀዲምካ ግና ናብ ናይ ቅዱስ ሚካኤል ሊቀ መላእክት ቤተ ክርስቲያን ከይድካ ክትምሕለለይ ኢኻ ምኽንያቱ ከይትዕምጸኒ ወይ ድማ ንብረተይ ከይተጥፍአለይ።” በሎ። ተታሓሒዞም ድማ ናብ ናይ ቅዱስ ሚካኤል ሊቀ መላእክት ቤተ ክርስቲያን ከምቲ ዝደለዮ ገይሩ ኣምሓሎ’ሞ፥ ነቲ ክርስቲያን ወርቂ ድማ ሃቦ፥ እቲ ክርስቲያን ድማ ናብ ሩሑቅ ሃገር ከይዱ ካብቲ ኣይሁዳዊ ተሓቢኡ ንብዙሕ ዓመታት ይነግድ ነበረ። ብድሕርዚ እቲ ክርስቲያን ናብ ሮም ድሕሪ ነዊሕ እዋን ተመልሰ’ሞ እቲ ኣይሁዳዊ ድማ ተመሊሱ ምስ ሰመዐ ደለዮ፥ ድልዩ’ውን ረኸቦ ከምዚ ድማ በሎ፥ “ንምንታይ ገንዘበይ እቲ ዘለቓሕኩኻ ዘይትመልሰለይ ክትረብሓሉ፥ ኽትነግደሉ ዘሃብኩኻ፧” በሎ. እቲ ክርስቲያን ድማ እንታይ ትብል ኣለኻ ንዓይ ዝሃብካኒ ነገር የብልካን በሎ ። እቲ ኣይሁዳዊ ድማ “ኣነ ዓሰርተ ዲናር ወርቂ ክትነግደሉን ክትረብሓሉን፥ ተሪፉ ድማ ናዓኻ ክኸውን፥ ክትሓውን ከሙኡ’ውን ናይ ዕለተ መግብኻ ክትምገብ።” ምስ በሎ.
እቲ ክርስቲያን ከኣ ብቃል ክሕደት፥ “ኣነስ ናትካ ንብረት (ገንዘብ) ወልሓንቲ ኣይራኣኹን ኣይፈለጥኩን።” በሎ። እቲ ኣይሁዳዊ ድማ “ካብ ቀደሙ’ውን ፈሊጠካ ነይረ ካሕዳም ዓማጽን ምኳንካ ብታቦት ቅዱስ ሚካኤል ሊቀ መላእክት ዘምሓልኩኻ፥ ሕጂ’ውን ናዓ ከምዘይሃብኩኻ ደጊምካ ማሓል፧ ኣነ ድማ ናብ ዝዳለኻዮ ክትከይድ ክሓድገካ እየ። ንሱ ድማ ናብ ቅዱስ ስም ሊቀ መላእክት ተኣሚኑ፥ ቅዱስ ሚካኤል ኣብ ልዕለኻ ሓይሊ የርኢ ንሱ ነቲ ኣብ ውሽጥኻ ተሓቢኡ ዘሎ ይፈልጦ እዩ ምኽንያቱ ንስኻ ሓሳዊ ኢኻ። ንሱ መንፈሳዊ ብርሓናዊ መልኣኽ እዩ።” ከምኡ እሉ ድማ ብሓደ ናብ ቤተ ክርስቲያን ቅዱስ ሚካኤል ሊቀ መላእክት ከዱ.
እቲ ኣይሁዳዊ ኣብቲ መንጹሩ ደው ኢሉ ናብ ውሽጢ ኣይኣተወን እቲ ኻሓዲን ሓጥእን ዝኸነ ክርስቲያን ግና መጺዩ ብድፍረት ናብ ናይ ቅዱስ ሚካኤል ሊቀ መላእክት ቤተ ክርስቲያን ብድፍረት ኣተወ ከምኡ’ውን ብናይ ቅዱስ ሚካኤል ሊቀ መላእክት ታቦት ብሓሶት ማሓለ ብድሕሪዚ ካብ ቤተ ክርስቲያን ወጹ ኣብ ኣፍደገ ገዙኡ ምስ በጸሐ የእዳዉን የእጋሩን ለመሰ ከም እምኒ ከኣ ኮነ። ጠንቀላላዕ እና በለ ዓው ኢሉ ኣእወየ ከምዚ እናበለ ድማ ኣእወየ፥ “ኦ! ሊቀ መላእክት መልኣከ ረድኤትን፥ ምሕረትን ኣበሳይ ስረየልይ፥ ንሓጢኣተይ’ውን ደምስስ ኣነ ኣዝዩ ዓቢይ ኣበሳ ገበርኩ ናብ ቤትካ መጼ ናብ ቤት መቅደስካ ኣትየ ብሓሶት ማሓልኩ። ብስም እግዚአብሔር ኣምላኽካ እሓተካን እልምነካን ጐይታይ መሓረኒ ደንግጸለይን። ኵሉ ሓጢኣተይን ኣበሳይን ግደፈለይን ስረየለይን። ምኽንያቱ ኣነ ናብ ቤት መቅደስካ መጼ ብድፍረት ብሓሶት ምሒለ። ከም ምግባረይ ግብረይን ኣይትፍደየኒ ንሓጢኣተይ ኣበሳይን ድማ ኣይትዘክር። ንስኻ ንደቂ ሰባት ደንጋጽን ንኹሉ ፍጥረት ምሕረት እትልምን ኢኻ። ካብ’ዚ ሕማመይ እንተ ፈዊስካኒን ዳግም ከምዚ ዓይነት ግብሪ ኣይገብርን ብሓሶት ድማ ኣይምሕልን እየ።” በለ።
“እንተ ዳኣ ድሒነ ጥዕና’ውን እንተረኺበ፥ ከም ቀደመይ ናብ ቤተ ክርስቲያንካ ሙሉእ ዕድመይ ክሳብ ዕለት ሞተይ ከገልግለካ እየ።” እና በለ ይበክን፥ ኣምሪሩ ይነብዕ፥ እንግድዑ እናሃረመ ካብ ልቡ ይነብዕን ይልምንን ነበረ። ናብ እግዚአብሔር ናብ ቅዱስ ሚካኤል ሊቀ መላእክት ከምዚ እናበለ ከኣ ድቃስ ወሰዶ። ኣብ ጊዜ ፍርቂ ለይቲ ቅዱስ ሚካኤል ሊቀ መላእክት ተገለጸሉ’ሞ፥ “ኣንታ ደፋር ሰብ ንምንታይ ንእግዚአብሔር ሙስጉን ዘይፈረሕካ፧ ብድፍረት ናብ ቤተ መቅደሱ ኣትኻ፧ ብሓሶት ስሙ እናጸወዕካ እግዚአብሔር ፍጹም ዕጉስ ሓቀኛ ምሕረተኛ እዩ። እምበር ሃንደበት ምቐዘፈካ ብቅጽበት`ውን መጥፈኣካ ነይሩ። ምድሪ’ውን ኣይምጸረትካን ከም ዳታንን ኣቤሮን ምዋሕጠትካ ኵሉ ብስም እግዚአብሔር ዝሕሱን ዝምሕልን ካብ ሓጢኣቱ ኣይነጽሕን ።” በሎ።
እቲ ሕሙም ድማ፦ “በጃኻ ካብ ሕማማይ ማሓረንን ፈውሰንን ምኽንያቱ እግዚአብሔር ምሕረቱ ልሙድ እዩ። ንስኻ’ውን ከም ኣምላኽ መፍቐሪ ሰብ ንምሕረት እትልምን ኢኻ።” በሎ። ሊቀ መላእክት ቅዱስ ሚካኤል ድማ መሓሮ የእዳዉ ኣብ ልዕልኡ ብምንባር ደረዞ። ከምዚ ድማ በሎ፥ “እንሆ እግዚአብሔር ካብ ሕማምካ የሕውይካ`ዩ ዳግማይ ድማ ኣይትበድል። ካብዚ ዝኸፍእ ከይረኽበካ።” ብምባል ቅዱስ ሚካኤል ሊቀ መላእክቲ ሓዲግዎ ናብ ሰማይ ዓረገ።
በቲ ጊዜ ካብ ድቃሱ ተባረበረ እቲ ሕማሙ ከም ዝሓወየሉ ኵሉ ኣካላቱ’ውን ጥዑይ ኮነ። ብፍጹም ደስ በሎ ንእግዚአብሔር ኣመስገኖ። ንሊቀ መላእክት ቅዱስ ሚካኤል ኣድነቆ። ከምኡ’ውን እቲ ኣይሁዳዊ ነዚ ድንቂ ተኣምርን ዝኾነ ስራሕን ቅዱስ ሚካኤል ሊቀ መላእኽት ርእዩ፥ ነቲ ወርቂ ካብቲ ሰብኣይ ተቀቢሉ ናብ ናይ ቅዱስ ሚካኤል ቤተ ክርስቲያን መባእ ሃቦ። ብጐይታን መድኃኒናን ኢየሱስ ክርስቶስ ኣሚኑ ተጠምቀ። ጥምቀት ክርስትና ጸጋ መንፈስ ቅዱስ ድማ ተቀበለ። በረኸትን መድኃኒትነፍሱን ስጋኡን ክቡር ደሙን ቅዱስ ሥጋኡን ወሲዱ፥ ምእመን ሰናይ ብኣማን ብሃይማነቱ ጹኑዕ ኮነ። ከምዚ ኢሎም ኣይሁዳዊን ክርስትያናዊን ብሓደ ንቤተ ክርስቲያን ቅዱስ ሚካኤል ሊቀ መላእክት ተኣምራቱ ድንቂ ዝኾነ ግብሩ እና ነገሩ ከምኡ’ውን ምሕረት ከምዘውርድ ንደቂ ስባት እና ነገሩ ብሓደ ይነብሩ ነበሩ።
እግዚአብሔር ይሓልወና ብጸሎቱ ኣማላድነቱ ናይ ቅዱስ ሚካኤል ሊቀ መላኣክት ንኵሉና ውሉደ ጥምቀጥት ለዓለም ዓለም ኣሜን!።

በስመ አብ ወወልድ ወመንፈስ ቅዱስ አሐዱ አምላክ አሜን።!
ብዕለት 12 ሚያዝያ ተዝካር በዓሉ ናይ ክቡር ሊቀ መላእክት ቅዱስ ሚካኤል እዩ።
በዚ ዕለት ንእግዚአብሔር ምስጋና (ስብሃት) ይኹኖ። ቅዱስ ሚካኤል ሊቀ መላእክት ናብ ነቢይ ኤርምያስ ካብቲ ጸቢብ ዓዘቅቲ ቤት ማእሰርቲ ንጉስ ሰዴቅያስ ዝኣሶሮ። ብኣቤሜሌክ ኢትዮጵያዊ ኣገልጋሊ ንጉስን ሓለቓ ወተሃደራትን ጌሩ ዘውጸኣሉ ዕለት እዩ።(ኤርምያስ 38:7-12)። ከምኡ’ውን ኤርምያስ ንኣቤሜሌክ ባረኾ። ናይ ኢየሩሳሌም ጥፍኣትን መሪር ዝኾነ ጽዋእ ምርኮ ከይጥዕም ይምነ ነበረ። ከምኡ ድማ ኰነሉ። በዚ ምኽንያት ደቂ እስራኤል ካም ምርኮ ተመሊሶም ክሳዕ ዝመጹ ን(66) ዓመት ደቂሱ ቅድሚ ምርኮ ቆሪጹ ኣቐሚጥወን ዝነበረ ወይኒን በለስን ከይነቐጻን ቆጽለን ከይጸልመወን ስለዝረኸበን ኣምጺኡ ንነቢይ ኤርምያስ ሃቦ ።
በዚ ምኽንያት መማህራን ቤተ ክርስቲያን ኣብ ዕለት 12 ወወርሑ በዓል ናይ ሊቀ መላእክት ክቡር መልኣኽ ቅዱስ ሚካኤል ንኽነክብር ኣዚዞም። ናይ ቅዱስ ሚካኤል ኣማላድነትን ጸሎትን በረኸትን ካባና ኣይፈለ ንዘለኣለም ኣሜን።!
ስላም ለከ ዘረስየከ በክብር፣
መልአከ ኪዳኑ ወምክሩ ለእግዚአብሔር፣
ሚካኤል ረዳኢ ለእለ ውስተ የብስ ወባሕር፣
ለረድኤትከስ ዘየዐፅቦ ነገር፣
አልቦ በሰማይ ወአልቦ በምድር።
ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር ኣሜን።!

በስመ አብ ወወልድ ወመንፈስ ቅዱስ አሐዱ አምላክ አሜን።!ተአምር ናይ ቅዱስ ገብርኤል ሊቀ መላእክት ናይ ወርሒ #መጋቢት 19 ዘናዌ ፍስሐ ወሐሴት። ናይ እሳት ነበልባል ካብ ኣፉ ዝወጽእ፡ ጥ...
28/03/2026

በስመ አብ ወወልድ ወመንፈስ ቅዱስ አሐዱ አምላክ አሜን።!
ተአምር ናይ ቅዱስ ገብርኤል ሊቀ መላእክት ናይ ወርሒ #መጋቢት 19
ዘናዌ ፍስሐ ወሐሴት። ናይ እሳት ነበልባል ካብ ኣፉ ዝወጽእ፡ ጥዑመ ዜማ ድንቂ ምስጋና ዝፍልፍለሉ መልኣክ እዩ። ልማኑኡን ኣማላድነቱን ጸሎቱን በረኸቱን ምስ ኩልና ውልደ ጥምቀት ይኹን ኣሜን።!
ኣብ ሓደ ሃገር ክልተ ሰብኣይን ሰበይትን ነገስታት ነበሩ። ሓንቲ ጓል ድማ ነበሮቶም። ኣብ ቤት ንጉስ ኣገልጋሊ ዝነብር ሓደ ኣብራሲት ዝባሃል ሰብኣይ ጠቢብ(ቡዳ መስተስርይ) ነበረ። ኩሉ ጊዜ ንጓል ንጉስ ክርእያ እንከሎ ብጽባቐኣ ይማረኽ በልቡ ድማ ይፈትዋ ነበረ። ካብ ዕለታት ሓደ መዓልቲ ምስኣ ደቀሰ’ሞ ካብኡ ጥንሲ ሓዘት፥ ምልኩዕ ጽቡቅ ዝኾነ ህጻን ድማ ወለደት። ስድራኣ ግን ካብ መን ከም ዝኾነ ኣይፈልጡን ነይሮም። ኣብራሲት ንጓሉ ከም ዘጥነሳ እቲ ንጉስ ኣይፈልጥን ነይሩ። ህጻን ምስ ዓበየ ኣብራሲት ኣቡኡ ከምዚ ክብል ምስ ወዱ ተዛራረበ። ``ካብ’ታ ንስኻ ዝተወለድካላ መዓልቲ ጀሚሩ ሓይለይ እንዳ ደኸመ ከይዱ`` ክብል ሓተቶ። እቲ ወዱ ድማ ``ካብ ጊዜ ልደተይ ጀሚሩ ኣብ ኩሉ ወርሒ ብዕለት 19 ንጉሆ ንጉሆ ጸሓይ ብራቕ፥ ልክዕ መልክዑ ከም ጸሓይ ዘንጸባርቕ፥ ብቅናት ወርቁ ኣብ ሕቚኡ ድማ ሴፍ ዝተዓጥቐ፥ ኣብ ርእሱ ድማ ኣኽሊል ግርማ ዝተጓነጸፈ፥ ኣብ ኢዱ ድማ በትሪ ወርቂ ዝሓዘ፥ ገጹ ድማ ልክዕ ከም ሰብ ይመስል ንክትርእዮ ግና ዘፍርሕ ብርሃን ዝመለኦ፥ ድምጺ ቃሉ ድማ ከም ነጎድጓድ መብረቕ፥ ከም ድምጺ ባሕሪ ዝጋጮ እንዳ ጎሰዐ ይመጻኒ። ኣነ ድማ ክርእዮ ከለኹ ኣብ ቅድሚኡ ምቛም ሲኢነ ይወድቕ። ንሱ ድማ ብርህራሄ ምስ ዝደንገጸለይ ድማ ካብ ውድቀተይ የተንሳኣኒ’ሞ። ኣጆኻ ኣይትፍራህ ኣነ ምሳኻ ዘለኹ ገብርኤል ሊቀ መላእክት ኣብ ቅድሚ ዝፋን እግዚአብሔር ዝቐውም እየ። ኣነ ኩሉ ጊዜ ካብ ዕለት ልደትካ ጀሚረ ክሳብ ሕጂ ምሳኻን ካባኻ’ውን ኣይተፈለኹን። ካባኻ’ውን ኣይክፍለን እየ። ክሳብ ጊዜ ሕልፋትካ ኣለኹ። ኣይፍለየካን እየ። ስምካ ድማ ብዓብይ ክብሪ ልዕል ክብል እዩ።`` በለኒ።
መስተስርይ ኣብራሲት ምስ ሰበይቱ ንግስቲ ነዚ ምስ ሰምዑ ብጣዕሚ ተደነቑ። ዓቢይ ዝኾነ ፍርሓት ድማ ሓዞምን ተገረሙን። ንወዶም ግና ኩሉ ጊዜ ሊቀ መላእክት ቅዱስ ገብሪኤል ከምቲ ኣቐዲሙ ዝበሎ። ኩሉ ጊዜ ምስኡ ኮይኑ ይሕልዎ ነበረ። ጸሎቱን በረከቱን ናይ ሊቀ መላእክት ምስ ኩላትና ህዝበ ክርስቲያ ይኹን ኣሜን።!
በስም አብ፡ ወወልድ፡ ወመንፈስ ቅዱስ፡ አሐዱ አምላከ አሜን።!
በዚ ወርሒ 19 #መጋቢት ሊቀ መላእክት ቅዱስ ገብሪኤል፥ ነቲ ኣብ መስቀል ኢዱን እግሩን ተሸንኪሩ ዝረኣዮ ጐይትኡ፥ ነቲ ካብ መላእክቲ ክብሪ ሂቡ ልዕል ዘበሎ ጐይትኡ ብምርኣይ ብጣዕሚ ሓዘነ፥ ክዕገስ’ውን ኣይካኣለን። በዚ ድማ ነቲ መጋረጃ ቤተ መቅደስ ኣብ ክልተ ተርተሮ። ብዕለተ ዓርቢ ሴፉ መሊሑ ነቶም ዝሰቀልዎ ክመትሮም ደለየ እሞ ብምሕረት እግዚአብሔር ግና እቲ ሴፉ ንመጋረጃ ቤተ መቅደስ ካብ ላዕሊ ክሳብ ታሕቲ ኣብ ክልተ ተተርተረ።/ማቴ.27፡51/። ምሕረት እግዚአብሔር እንተዘይክልክሎ ሊቀ መላእክት ቅዱስ ገብርኤል ንዓለም ብቑጠዓ ሴፉ መሊሑ ነበረ። ነገር ግን ምሕረተኛ እግዚአብሔር መድኃኒ ዓለም ምሕረቱ ገበረልናን ብመሰቀሉ ድማ ኣድሓነናን። ብጸሎቱን ኣማላድነቱን ናይ ቅዱስ ገብርኤል ሊቀ መላእክት ምስ ኩሉና ውሉደ ጥምቀት ይኹን ለዓለም ዓለም ኣሜን!።
አፅምሞተ፡ዕዝንከ ፡ ምንት፡ እምሰሚዓ፡ ብዙኅ፡ ጸሎቱ።
ለሰብእናየ ፡ ግፉእ፡ እንተ ረዳኢ፡ ኣልቦቱ።
መንሥኤ ፡ ሙታን፡ ገብርኤል፡ ዘተማዕከ ፡ በዕለተ፡ ሞቱ።
ለሰሐኑ ፡ ሰይፍከ ፡ እሰብነ ፡ ላዕሉ፡ ወታሕቱ።
መንጦላዕተ ፡ ምዅራብ ፡ ቅድመ ፡ ዘሠጠጥከ ቦቱ ።

ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር አሜን።!

Address

Ashdod
77134

Website

Alerts

Be the first to know and let us send you an email when ቤ/ት/ሰ/ማሕበር ቅዱስ ሚካኤል ኣሽዶድ ቤተ/ክ መድኃኔ ዓለም ቴል ኣቪቭ እስራኤል። posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to ቤ/ት/ሰ/ማሕበር ቅዱስ ሚካኤል ኣሽዶድ ቤተ/ክ መድኃኔ ዓለም ቴል ኣቪቭ እስራኤል።:

Shortcuts

Share

Category