19/05/2020
ACARA PARTANGIANGAN KELUARGA
HKBP TIGALINGGA RESSORT TIGALINGGA
SELASA, 19 Mei 2020
Partangiangan Keluarga on diuluhon Ama manang Ina. Diaturhon ma na mamboan tangiang Pangondianon.
ACARA PARTANGIANGAN
Marende BE. 9: 1 + 3 “HUPUJI HOLONG NI ROHAMU”
Hupuji holong ni rohaMu, o Tuhan Jesus Rajangki.
Tu Ho hulehon ma diringku, ai ido pinangidoMi
Huhaluoahon ma diringku, mamingkir holong ni rohaMu.
Huhilala ingkon martuhan, ingkon mangolu ai di Ho.
Ndang jumpang au be hangoluan, aut unang dipatupa Ho.
Sai Ho do paradiananku, sai gok di Ho nama langkangku.
Votum-Introitus-Tangiang (A.XII/B – D.X/32)
U: Marhitehite goar ni Debata Ama, dohot goar ni AnakNa Tuhan Jesus
Kristus dohot goar ni Tondi Parbadia na tumompa langit dohot tano on. Amen. Sai tangihon ma soarangku, ale Jahowa, molo joujou ahu. Didok rohangku, Ho mandok: Lului hamu ma bohingKu! Antong bohiM ma nahulului, ale Jahowa. Sai unang ma tabunihon bohiM maradophon ahu. Jahowa do panondangi di ahu dohot hatuaonhu, tung mida ise ma mabiar ahu? Jahowa do partanobatoan ni ngolungku, tung mida ise ma ahu biahaton? Haleluya. Martangiang ma hita: Ale Tuhan Debata, Pargogo na so hatudosan, Amanami na di banua ginjang i ! Usehon ma TondiM na badia i dohot hapistaran na sian Ho i tu saluhut HuriaM, asa lam rarat jala lam hot HataM na badia i di tongatonga ni hami on. Lehon ma hiras ni roha di naposoM manjamitahon HataM, asa lam pita jala lam ganda HuriaM na badia i. Patongtong ma huhut rohanami mangoloi Ho sahat ro di ujung di bagasan haporseaon na ture marhitehite AnakMu, Tuhan Jesus Kristus, Tuhannami. Amen.
Manjaha Turpuk: Mateus 20: 29 – 34
U : Turpuk dipartangiangan borngin on tarsurat di Mateus 20: 29-34. Jadi
laho ruarsian Jeriko, torop ma halak mangihuthon Ibana.
R: Jala hundulhundul ma dua halak na mapitung di pinggol ni dalan i; jadi
Dung dibege mamolus Jesus, joujou ma nasida, ninna ma: Asi ma roham
di hami, Anak ni si Daud!
U: Alai dipinsang angka natorop i ma nasida, asa sip nian: Alai lam gogo ma nasida manjoujou: Asi ma roham di hami, Tuhan, Anak ni si Daud!
R: Jadi mangulon ma Jesus, dipanghulingi ma nasida: Aha dipangido rohamuna sibahenonku tu hamu?
U: Dung i didok nasida ma: Naeng ma mungkap matanami, Tuhan!
R: Gabe asi ma roha ni Jesus, dijama ma matanasida jadi pintor marnida ma. Jadi diihuthon nasida ma Ibana.
U: Ido sahatna. Martua ma na tumangihon hata ni Debata jala na umpeopsa. Amen
Marende BE. 275: 1 + 3 “ Ho Jesus Tuhanhi”
Ho Jesus Tuhanki, Ho Siparmonang i, Raja tongtong.
Ndang na margogo au, molo so Ho di au.
Ipe dongani au di tano on.
Molo burju au on, maniop Ho tongtong, sitobus au.
Talu do musu i, ndang be agoon nii.
Au na hinongkopMi monang ma au.
Jamita: Psalmen 27: 7--14
U: Sai tangihon ma soarangku, ale Jahowa, molo joujou ahu, asi ma roham mida ahu, jala alusi ahu.
R: Ninna rohangku do mandok Ho: lulu i hamu ma bohingku! Antong bohim ma na hulului, ale Jahowa.
U: Unang tung tabunihon bohim maradophon ahu, unang tung tulak naposom di bagasan rimasmu, matua Ho do pangurupingku, unang tung ambolongkon ahu, jala unang tadingkon ahu, ale Debata ni hatuaonku!
R: Ai nunga ditadingkon damang dohot dainang ahu, alai dijangkon Jahowa do ahu.
U: Sai podahon ma tu ahu dalanmu, ale Jahowa, jala togu ahu di dalan hatigoran, ala ni angka alongku.
R: Unang tung pasahat ahu * guru roharoha ni angka musungku, ai hehe do dompak ahu angka sitindangi pargabus, jala * dibuashon hajahaton.
U: Aut unang huhaporseai paidaidaonku sogot * hinadenggan ni Jahowa di * tano hangoluan on!
R: Parhanalom ma Jahowa, pagomos jala patogu roham jala parhanalom Jahowa!
U: Ima sahatna.
“TANGIANG MANGIDO HALUAON”
Huria ni Tuhanta Tangiang ima Ojahan ni halak na porsea i. Turpuk on manoarahon tangiang ni halak na Porseai tu Debata asa di urupi, dipalua halak na porseai sian ganup parungkilonna dohot parsorionna, Joujou parpesalmeni mangido asi ni roha ni Tuhani asa dipalua ibana sian angka pangunjunan na naeng mangaroro ngoluna. Marhite turpuk on dipaingot hita , asa lam ringgas hita mangalului bohi ni Debata na tuk paluahon hita. Diparhatot si Daud do holan Debata do na boi mangurupi, paluahon dohot manumpahi hita sian angka musu, mara nang angka parungkilon na na sonson di ngolunta Ibana do na tuk managaramoti hita tarlumobima di Hamamasa dohot di hararat ni Corona Virus Deses 19 namansai jorbut situtu na pola mambahen hita biahaton jala agoan hosa ni torop jolma di portibion, na umbalga sian i, disesa Ibana do dosanta dipalua ibana do Hosanta sian angka pangango ni musu, dohot sibahen hajahaton . Ala nii ingkon sai Jou jou ma hita tu Debata mangido pangurupion marhite tangiangta, lam ringgas jala tinggil ma sipareonta tumangihon hata ni Debata, lam serep nang rohanta mameop jala mangulahon angka poda jala unang manimbil hita sian dalan ni Debata asa unang di tinggalhon hita. Tongtong mangido sipatudu (Petunjuk sian Debata) marsomba huhut mamuji Debata, mangulahon lomo ni rohaNa, marsihohot marhaporseaon tu Ibana huhut mangolu hombar tu hataNa.
Antong pos ma rohanta laho mandalani Pardalanan ni ngolun ta on. Sai olo ma hita pasahathon dirinta tu gomgoman ni Debata Haporusan i. Ai Debata do Pangalualuanta, Ibana do Pangunsandeanta jala ibana panumpahi di ngolunta songon si Daud na tongtong marhanalomhon Jahowa, gomos pasahathon diriNa tu Jahowa, songoni ma hita pasahathon jala parhanalomhon Jahowa di ngolunta on. Marudut ari, marganti Minggu jala pasingkat sorin nang angka bulan ndang mansohot dope pangontak ni hararat ni Covid 19 on. Ngolunta pe sai busisaon jala bobonosan do huhut sungkun sungkun andigan do salpu angka mara on? Songon dia do ulaning masa depan nami, masa depan ni parngoluon nami, Ekonomi dohot masa depan ni Parugamoon nami? Sahat tu sadarion dang adong sada hapastian andigan marujung mara ni Covid 19 on. Tudos tu parau na mamolus laut na bidang manalpui galumbang paima sahat tu labuan ima hita nuaeng na mangadopi mangadopi na masa on . Pangalaho na biasa do i di hajolmaon. Ai molo tubu biar, gabe adong do roha mangalului parondingondingan na tau mangaramoti diri. Alai molo so adong be biar ni jolma taringot tu na naeng masa di ngoluna, naung dirina dohot gogo na nama dipangasahon, Hape talpe do ganup jolma tu parmaraan nang tu hamatean di ganup tingki dohot di sude inganan. Didok par-Psalmen i Songon duhutduhut do ariari ni jolma na gale i, marbunga ibana songon bunga di ladang. Ai dibolus alogo ibana, jadi ndang disi be, jala ndang tartanda be ingananna i (Psalm 103: 15-16).
I do nang pergumulan ni par-Psalmen i. Dipsalmen 128 Mangaranap ibana dao tu jolo di dalan sidalananna. Diranap nang dolok dohot rura. Gok mara dalan sibolusonna i. Hape ingkon bolusanna do i. Tubu ma sungkunsungkun huhut mardongan biar: Sian dia do ulaning ro pangurupion tu ahu? Alai ro ma alus sian ginjang mandok: Sian Jahowa Sitompa langit dohot tano on sambing ro pangurupion. Lapatanna, ndang sian jolma ro pangurupion i, alai sian Debata do. Tung sura songon halongonan humaliang hita, jala hira na so adong na tau mangurupi, alai anggo Debata sai tongtong do mian di sude inganan. Lam dipagomos do panumpahionNa asa tung pos rohanta borhat mandalani ngolunta on, didok Ibana: Ndang tagamon loasonna tarsulandit patmu, ndang tagamon nok mata ni Sijaga ho. Sada sifat ni parjaga na so muba sian na jolo sahat ro di nuaeng, i ma: Ndang jadi nok. Ingkon torang roha dohot pingkiran a***n manang borngin pe. Aut nok mata ni parjaga, masuk ma panakko manursari ugasan ni tuanna. Asa parjaga ingkon tongtong do siaga, tongtong tinggil manangihon soarani na jinagana, Songon i ma Tuhanta i, ndang olo nok manjagahon daging nang tondinta unang marmara hita. Alani i do umbahen pos roha ni si Daud mandok: Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotMu dohot batahiM mangapuli ahu. Nang pe mardalan hita di hamamasa ni Pandemi Covid 19 on ndang mabiar hita disi, ai Ho do mandongani hami, tungkotMu dohot batahiM Mangapuli hami
Antong pos ma rohanta laho mandalani Pardalanan ni ngolun ta on. Sai olo ma hita pasahathon dirinta tu gomgoman ni Debata Silehon Panumpahioni Jala gomos ma tangiangta tu Debata songon goarni Minggunta Minggu Exaudi Sai Tangihon ma soarangku Ale Jahowa.
Sai Tumpahan ni Jahowa do hita, jala Paluaon ni Jahowa do tondim sian nasa parmaraan, as alma taparhanalom Ibana . Antong posma rohanta di sandok angka hamaolon alani Covid 19 on ai adong do Tuhanta do paluahon huhut Manumpahi hita di sude parungkilonon, ai ditangihon Jahowa do jou jou ni angka na porseai, Manang aha pe namasa, las ni roha arsak pe tioponhu Ho Nabasa na marholong roha i. Amen
Pdt. B. Sianturi
Marende BE. 403 “Pos Rohangku di Tuhanhu”
Pos rohangku di Tuhanhu, ndang tarbahen tarhirim au.
On do tongtong tangianghu, tu lambungMu au patau.
Lobi pos do rohangki, sai patulusonna i, boanonNa au tu si.
Huhilala ganup ari, paniopNa di au on.
Sai tong dipasarisari, naeng badia rohangkon.
Naeng lam tu tinggilna i, pinggol partondionhi, lao mambaen lomoNa i.
Tangiang PANGONDIANON
Marende BE. 252: 1-2 “ O Jesus Sai Dongani” (Papungu Pelean)
O Jesus sai dongani ma hami sasude
Pasada rohanami asa bulus sude
Ndang hadalanan hami, salangka na ture.
Dung Ho pe dongannami tiur ma sasude.
TANGIANG ALE AMANAMI – Amen3x
Pelean Partangiangan Keluarga tu Huria:
Sian Hami Keluarga: __________________________________
Godang na : __________________________________
( 2 Kor 9: 7b “ Ai dihaholongi Debata do na las roha mangalehon)
