https://www.facebook.com/104444868209393/

Desa Adat Gunaksa

Home
Indonesia
Klungkung
Desa Adat Gunaksa

Halaman ini dibangun sebagai upaya menjembatani segala bentuk informasi, baik menyangkut kebijakan p

30/01/2022

Om Swastiastu,

Redite, 30 Januari 2022

Magenah ring ruang rapat Sabha Mandala LPD Gunaksa sampun kamargiang pasangkepan Prajuru Kelihan Patus, Sabha Desa, mwang Paiketan Pacalang nganenin indik tata pemerintahan Desa Adat miwah kawentenan ngupapira karajegan kasukertan palemahan ring wewidangan Desa Adat Gunaksa.

Puniki kaunggahang pinaka kasungkeman utawi pamutus pasangkepan :

1. Jagi kamargiang panureksan utawi Audit Ekstenal ring LPD pinaka cihna nincapang uratian ring kawentenan LPD.

2. Indik leluu (Residu) saking galian C marupa akah, ranting, miwah tiosan nyujur Pura Dalem Cungkub sampun nenten kadadosang malih (disetop).

3. Ngawit rahina mangkin Nenten kasungkemin (tidak diberikan ijin) pacang ngemargiang "Pengerukan Bukit, Penataan lahan utawi Alih fungsi lahan" ring wewidangan Desa Adat Gunaksa.

Wantah asapunika prasida katur, dumogi sareng sami mapikayun becik, gumanti Desa Adat Gunaksa prasida sayan Rajeg turmaning Lestari.

Om Santih, Santih, Santih Om

02/01/2022

Om Swastiastu,

Tirta Yatra Desa Adat Gunaksa.

Nemonin rahina Redite Pon, pinanggal 2 Januari 2022 nepek Tilem Kapitu, Desa Adat Gunaksa ngelaksanayang Tirta Yatra nyujur ring Pura Pulaki, Pura Syah Bandar, ngelantur ring Pura Melanting.

Parikrama puniki kamiletin olih para pedagang pasar miwah prajuru Desa Adat Gunaksa sane makatah kirang langkung 120 diri.

Tathastu swaha, parikrama nyujur Den Bukit Buleleng sida mamargi antar turmaning labda karya. Dumogi parikrama puniki sida mapikenoh ri sajeroning angga sarira saha sareng sami mangguh karahayuan sekala miwah niskala.

Bandesa Adat Gunaksa
Ir. I Nengah Ariyanta

Om Santih, Santih, Santih Om

25/12/2021

Om Swastiastu,

Ngaturang pangastuti pangayubagia pinaka jalaran ngrajegang seni pamakas ring swara gambelan ri sajeroning krama Bali kamargiang ring Saniscara Kliwon wuku Krulut sane ketah kabaos "Tumpek Krulut".

Pemargi puniki majeng krama Hindu ring Bali kasungkemin ngaturang paramasuksma majeng "Dewa Iswara" sane marupa gambelan. Rahina puniki kamargiang panyiratan tirta suci ring gambelan, sane matatujon ngicalang sekancan mala sane wenten ring gambelan punika.

Selanturnyane, tatuek suara ring sajeroning upacara Tumpek Krulut puniki wantah piranti mababaosan majeng para jana, artosipun sapunapi iraga mangda prasida ngawedarang babaosan sane becik, ngelantur maparilaksana becik madasar antuk sagilik saguluk, paras paros sarpanaya.

Ring rahina Tumpek Krulut mangkin, pinanggal 25 Desember 2021 kasanggra olih Sekaha Wimala Kerthi sane rauh saking alit-alit Desa Adat Gunaksa. Asapunika taler karauhin saking Jero Bandesa saha pangabih dane, Jero Mekel, Jero mangku Ratu Sakti, Kelihan Sekeha Barong, miwah semeton tiosan.

Suksmaning manah katur majeng sinareng sami, gumanti parikrama sida mamargi antar. Dumogi malarapan antuk parikrama punika pamargi Seni ring Desa Adat Gunaksa sida sayan Ajeg.

Bandesa Adat Gunaksa
Ir. I Nengah Ariyanta

Om Santih, Santih, Santih Om

19/12/2021

Om Swastiastu,

Om Annobadrah Kratawo Yantu Wiswatah.

Paruman Bandesa Sajebag Kecamatan Dawan.

Puja pangastuti angayubagia katur, duaning malarapan antuk asung kerta wara nugraha Ida Sang Hyang Parama kawi paruman nyabran tigang sasih (tri wulan) prasida kamargiang. Paruman ring galah mangkin magenah ring Desa Adat Gunaksa.

Paruman kaenter olih Bandesa Alitan Kecamatan Dawan. Mungguwing daging paruman sane kabligbagang nganenin indik ;
1. Dudukan (pungutan) ri sajeroning Desa Adat, mangda kakaryanang pararem asiki nganutin draf sane pacang kasobyahang.
2. Soang-soang Desa Adat mangda stata sayaga Indik Protokol kesehatan rikala ngemargiang yadnya,
3. Nitenin indik LPD soang-soang Desa Adat ring kawentenan Aab jagat mangkin.
4. Pamargi kremasi utawi pitra yadnya ring soang-soang Desa Adat mangda nenten kamargiang ritatkala pujawali ring pura sad kayangan jagat pura Goa Lawah nemonin Anggra Kasih Medangsia.

Parikrama prasida mamargi antar sane kasarengin olih Bandesa Adat sajebag Kecamatan Dawan, Perbekel Desa Gunaksa, mwang Prajuru Klian Patus Desa Adat Gunaksa.

Inggih wantah asapunika prasida kauningayang. Dumogi malarapan antuk pamargi puniki, Desa Adat prasida masikian nepasin kawentenan-kawentenan sane wenten ring Desa Adat, turmaning pangaptine mangda prasida sayan nincap ri sajeroning ngemargiang swadharma.

Matur Suksma🙏🏻

Om Santih, Santih, Santih Om

11/12/2021

Om Swastiastu,

Dumogi sami kenak turmaning rahayu🙏🏻

Bantuan Pangan Non Tunai Tahap II

Majalaran antuk media puniki, uningayang titiang ring rahina mangkin Saniscara, 11 Desember 2021 sampun prasida kasukserahang BPNT Tahap II majeng pengayah ring Desa Adat Gunaksa minakadi Sabha Desa, Kertha Desa, miwah pangayah Ida Sasuhunan Ratu Sakti.

Ledangan pisan, wantah asapunika prasida kaaturang, dumogi napi sane kapolihang prasida ngewantu ri sajeroning kawentenan jagat sekadi mangkin.

Asapunika prasida kauningan, nunas pangampura yening wenten atur, panyapa miwah panyanggra sane nenten manut. Dumogi sareng sami ngamolihang karahayuan miwah karahajengan.

Bandesa Adat Gunaksa
Ir. I Nengah Ariyanta

Om Santih, Santih, Santih Om

08/12/2021

Om Swastyastu,

Bantuan Pangan Non Tunai (BPNT)

Puja pangastuti pangayubagia katur, duaning ring rahina Buda, 8 Desember 2021 sampun prasida kamargiang BPNT majeng paiketan Pamangku sajebag Desa Adat Gunaksa. Prabea sane kaanggen mawiwit saking anggaran Semesta Berencana Provinsi Bali.

Parikrama inucap karauhin saking Bandesa Madya Kabupaten Klungkung, Bandesa Alitan Kecamatan Dawan, Bandesa Adat Gunaksa, Perbekel Desa Gunaksa miwah Prajuru Desa Adat Gunaksa.

Suksma katur majeng uleman sinareng sami sampun prasida ngrauhin, dumogi napi sane kapolihang prasida ngwantu ring kawentenan aab jagat sekadi mangkin. Nenten lali taler nunas pangaksama yening wenten pamargi sane singsal.

Bandesa Adat Gunaksa
Ir. I Nengah Ariyanta

Om Santih, Santih, Santih Om

04/12/2021

Om Swastiastu,

Malarapan antuk piranti puniki, lugrayang titiang ngunggahang indik pamargi Yasa Kerti Bhumi Sudha sane kamargiang ring Desa Adat.

Pamargi kadulurin antuk nunas tirta ring pura Watu Klotok. Selanturnyane krama Desa Adat Gunaksa kaangkat nunas ring soang-soang Banjar utawi ring Pura Bale Agung.

Uningayang titiang majeng krama Desa sinareng sami indik pamargi puniki pacang ngamolihang Nasi Tawur,
Tirta Panawar, miwah Tirta Bhumi Sudha. Mangda sami sauninga uningayang titiang pamarginnyane.
1. Nasi tawur kasiratang ring tatanduran (tanaman)
2. Tirta Penawar kasiratang ring wawalungan (hewan)
3. Tirta Bhumi Sudha kasiratang manut sewalapatra sane sampun kasobyhang.

Inggih, wantah kadi asapunika daging pawungu titiang. Dumogi malarapan upacara upakara puniki sedaging jagat pamekas ring Desa Adat Gunaksa mangguh Rahayu.

Om Santih Santih Santih Om

26/06/2021

Om Suastiastu,

Papalihan Upacara Pitra Yadnya sampun Prasida Puput.

Nemonin Rahina Saniscara, tanggal 26 Juni 2021 papalihan upacara Pitra Yadnya Desa Adat Gunaksa sampun mawastu puput sane kakawitin dina ne dibine kamargiang Ngaskara miwah Ngwangun ring soang-soang rompok, ngelantur kamargiang pangutangan utawi pangiriman sane pinaka panguntat kalaksanayang "Nganyud" ring segara Goa Lawah.

Rumasa gargita turmaning angayubagia, duaning upacara sida mamargi turmaning prasida puput. Ring Setra Kangin Upacara Kapuput Olih Ida Pedanda saking Gria Kediri Kamasan miwah ring Setra Kelod kapuput olih Ida Pedanda Saking Gria Satria Kanginan.

Suksma katur majeng pangarep, patulung, paiketang pecalang, panglingsir miwah krama Desa sinareng sami, sampun sareng-sareng ngeremba miwah urati saha sampunang puput-puput nitenin miwah ngicenin pamargi mangda kapungkur prasida sayan nicap.

Prawartaka karya taler ngaturang suksma sampun kaicen galah ngaturang ayah pacang malajahang dewek saha nenten lali nunas pangaksama, duaning akehan kantun wimuda, janten sampun durung tatas pisan ring sajeroning pamargi.

Asapunika prasida katur, dumogi sareng sami mangguh rahayu.

Bandesa Adat Gunaksa
Ir. I Nengah Ariyanta

Om Santih, Santih, Santih Om

20/06/2021

Om Swastyastu,

Rompok Genah Patulangan.

Rahina Redite, 20 Juni 2021 sampun kamargiang upacara macaru miwah melaspas rompok ring Setra Kangin miwah Setra Kelod Desa Adat Gunaksa.

Upacara prasida mamargi antar sane Kasanggra olih Kelihan Patus pinaka prawartaka karya, Krama pangarep miwah kapuput olih Dane Jero Mangku Dalem ring Setra Kelod miwah Jro Mangku Alit ring Setra Kangin.

Ri sampune puput kamargiang pamlaspas ring rompok, kalanturang para pangarep mapupul ring payadnyan jaga nureksain uparengga miwah upakara pamargi pitra yadnya, ngelantur nincap ring ngambil wewantenan nunas tirta.

Suksma katur majeng semeton sinareng sami, dumogi saking rahina mangkin kantos puput, upacara Pitra Yadnya prasida mamargi antar turmaning mangguh Rahayu.

Bandesa Adat Gunaksa
Ir. I Nengah Ariyanta

Om Santih, Santih, Santih Om

Address

Desa Gunaksa
Klungkung
80752

Website

facebook.com

Alerts

Be the first to know and let us send you an email when Desa Adat Gunaksa posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Desa Adat Gunaksa:

Shortcuts

Want your place of worship to be the top-listed Place Of Worship in Klungkung?