Eglise Mebsh De Petit-Goave

01/07/2023

LESON DOMINIKAL 2 JIYÈ 2023

TIT: Zidòl ak sakrifis pou zidòl yo nan korent

LEKTI: 1Korent 8:1-6

TÈKS DÒ: Moun ki mete nan tèt li li konn kichòy li poko konnen jan l' dwe konnen an. 1korent 8:2

ENTWODIKSYON:Lane pase nou te etidye plizyè leson enpòtan nan liv premye korent ki gen pou sijè jeneral: konpòteman kretyen an. Ane sa a ankò , n'ap aprann kèk leson toujou. Nan legliz korent te gen anpil moun ki te gen gwo konesans , men gwo konesans lakay yon moun ki manke lanmou pou frè parèy li, se yon andikap espirityèl. Lavil korent menm jan ak lavil Atèn , te ranpli ak zidòl.
Te gen anpil fo dye ke payen yo te konn adore. Te gen Sakrifis ki te konn fèt chak jou pou fo dye sa yo. Kretyen korent yo te manke konesans sou koze zidòl yo ak konpòteman yo te dwe adopte devan vyann bèt yo te konn ofri kòm sakrifis pou zidòl yo. Konsa yo te voye mande lapòt pòl pou li mete limyè sou sijè a. Yon kesyon delika anpil anpil. Twa chapit nan liv la ap trete kesyon sa. Nan leson jodi a, n'ap gade sèvis zidòl yo lakay payen yo nan korent ak konpòteman diferan kretyen yo.
I. KWAYANS PAYEN KORENT YO SOU ZAFÈ ZIDÒL

Korent te yon lavil nan peyi lagrès ki te gen anpil zidòl menm jan ak lavil Atèn (travay 17:16) .Nan peyi lagrès , zidòl yo te konn rele dye oubyen deyès yo te gen fòm moun. Yo te fè yo ak lò , lajan epi wòch (travay 17: 29) .Daprè kwayans yo, dye yi pa t' kapab mouri , men yo te kapab manje , bwè ak soufri. Yo te kapab renmen ak rayi tou. Yo te divize yo ant dye ak demidye.

A. Prensipal dye grèk yo

Prensipal dye moun lagrès yo se zeyis(Zéus ) .Li bay règleman pou tout linivè a. Nan mitoloji grèk la , se li menm ki fè loray gronde epi li se wa tout lòt dye yo. Era , madanm li , te deyès maryaj. Pami pitit gason li yo : Arès te dye lagè ; Apolonte dye limyè , ladrès yo ak lamaji , Enès , dye machann yi; Dyonizos , dye diven an ak tout lòt bwason ki fè moun sou.
Pami pitit fi li yo te gen Atènè , deyès entelijans ki te patwòn lavil Atèn ; Afwodit , deyès bèlte ak lanmou : Atemis , deyès lachas. Akote fanmiy dye sa a te gen poseyidon , dye lanmè a ki te patwon lavil korent ; Adès , dye sejou mò yo; Efayistos , dye dife ak fòjwon yo ; Demetè ,, deyès ki fè latè donnen ak pou kiltivatè yo; ak yon bann lòt zidòl ankò. Konsa chak moun te adore yo zidòl selon gou l oubyen selon metyel.

B. Demi dye yo.

Moun peyi lagrès yo te onore tou demi dye yo ke yo te rele mèt oubyen seyè (1korent 8:6) .Ewo sa yo te pèsonifye bravou ak lafòs ; pami yo nou jwenn Eraklès, pwomete Ofe , sezè , Edip , Jazon , etc.
Ansyen filozòf Grèk yo te ekri yon bann istwa sou dye , deyès epi ewo sa yo ki te anseye nan tout gran lekòl peyi lagrès yo.
Anvan frè korent yo te konvèti , yo te konn adore epi onore dye ak seyè sa yo menm jan ak moun Galasi yo (Galat 4:8) .Nan jou pa nou yo gen yon bann istwa envante sou sen patwon , sou sent patwòn , sou lwa vodou , sou lasirèn , sou bawon , etc.. Istwa sa yo ki se sipètisyon mare ak lamaji pa mache kole ak levanjil kris la.

II. SAKRIFIS PAYEN YO NAN KORENT POU ZIDÒL YO

Daprè ansèyman ki te bay sou sèvis zidòl yo , se te yon obligasyon poy ofri yon sakrifis swa pou rale chans , pou reklame pwoteksyon , pou mande vanjans oubyen pou manifeste rekonesans. Sakrifis yo pat' gen yon prensip jeneral ki reglemante yo, sa te depann de kapasite moun k'ap ofri l' la epi pouki zidòl sakrifis la ap fèt. Nan korent, yo te toujou mennen bèt yo nan lakou tanp zidòl la kote yo touye yo. Nan vyann lan, yon pati boule sou lotèl zidòl la, yon pati pou prèt yo ki prezide seremoni an, rès vyann lan rete pou mèt sakrifis la.
Lè se yon moun ki gen kapasite , nan okazyon sakrifis la, li fè fèt la lakay li , kote li envite fanmiy ak zanmi pou patisipe (1 korent 10: 27 - 28) lè se yon moun ki pa gen mwayen , rès vyann lan ale vann nan mache piblik bay nenpòt moun ki vle achte (1korent 10:25) .Lè se fèt yon dye nasyonal oubyen yon dye patwonal kòm fèt poseyidon nan korent , se te gwo zafè. Yi te fè anpil sakrifis. Nan jou sa yo se otorite yo ki òganize fèt la nan lakou tanp Zidòl la kote diskou , dans epi gwo resepsyon ap fèt (1 kor 8: 10)
Ak latriye zidòl sa yo ki te nan korent , sakrifis t'ap fèt prèske chak jou swa pou yon dye oubyen pou yon deyès epi vyann bèt yo ofri yo nou te jwenn yo nan mache piblik , sou tab prive moun , nan restoran , nan festen , etc... Frè kretyen yo nan korent pat' kanpe sou menm bit sou kesyon vyann sa yo. Te gen anpil diskisyon pou konnen si kretyen ka achte yo epi manje yo.
Konsa tou jodi a gen fèt ak seremoni ki ògonize nan okazyon mès pou lemò , pou lezanj , pou sen patwon , pou lwa fanmiy , pou batèm ak kominyon , etc...ki konpòteman yon kretyen dwe genyen nan ka sa yo ?

III. KONPÒTEMAN KRETYEN KORENT YO DEVAN VYANN SAKRIFIS YO.

Akòz konpreyansyon yo ki te diferan sou kesyon zidòl ak sou zafè sakrifis yo ki T'ap fèt , frè yo nan korent te divize nan atitid yo ak nan konpòteman yo sou sijè sa a. Te genyen pou pipiti 3 gwoup.
A. Zidòl pa reprezante anyen
Pou yon premye gwoup , kesyon zidòl la pa reprezante anyen pou yo. Se moso lò , moso lajan , moso wòch lèzòm prepare ak aldrès yo. Pou gwoup sa , gen yon sèl Bondye ki kreye tout bagay epi tout bagay se pou li. Tout vyann se vyann , yo lib pou manje vyann san pwoblèm nenpòt kote , depi se pa bèt toufe. Yo kore rezon yo ak sa pawòl Bondye a di nan sòm 115:4-8 ak nan Jeremi 10:3-5. Zafè yon lòt k'ap fè renka.

B. Vyann ki ofri an sakrifis bay zidol souye.

Gen yon dezyèm gwoup ki kwè gen yon sèl Bondye ki kreye tout bagay. Li kreye bèt yo pou moun sèvi ak yo. Men paske pa gen relasyon ant tanp Bondye a ak zidòl , depi yin vyann te ofri an sakrifis. Pou yo menm vyann sa a souye , yo p ' ap manje l' .yo konnen Egzòd 20: 23 di : pinga n'al fè lòt Bondye an ajan osinon an lò pou nou al sèvi yo ansanm avèm epi Danyèl sèvitè Bondye te derefize manje manje ki t'ap sèvi nan palè wa Nebikadneza paske yo te ofri yo devan zidòl (Dan 1: 8) konsa , moun ki manje vyann konsa , peche

C. Moun ki gen dout nan manje vyann sakrifye pou zidòl

Gen yon twazyèm gwoup ki kwè depi yon vyann ofri an sakrifis devan yon zidòl , li pa bon pou yon kretyen manjel' .Men lè li wè frè entèl ki sanble gen plis konesans pasel' ap manje , festen an tante l' .li rantre nan manje tou ak kè sote , ak doutans nan kèl' .Bib la di: Moun ki gen doutans sou sa l'ap manje a , Bondye kondanel' lè l' manjel' , paske li aji san konviksyon. Tout sa ou fè san konvisyon se peche (Rom 14:23)

KONKLIZYON : Nan leson nou jodi a nou te etidye kantite fo dye moun korent yo te konn adore epi sèvi avan yo te konvèti. Korent te chaje ak zidòl. Moun korent te konn fè gwo sakrifis bèt pou zidòl yo. Aprè yo te fin retire vyann ki te pou prèt yo, sa pou yo boule sou lotèl zidòl yo , yo te souvan al vann rès vyann nan nan mache. Kesyon vyann sakrifye pou zidòl la te divize legliz korent nan twa gwoup; sa ki ka achte epi manje san li pa peche , sa ki peche lè yo achte epi manje , ak yon gwoup ki te gen anpil dout nan kè yo lè yo manje. Ak dezakò sa yo, youn tap akize lòt. Konsa yo te ekri lapot Pòl sou kesyon an. Kote ou kanpe nan chak gwoup sa yo ?

BYENN APRANN AK ÈD SENTESPRI A 🙌🏻🙌🏻

REDAKTÈ : Josué JEAN PIERRE

EL VARÓN DE DIOS

24/06/2023

Lidè nou bezwen an.

24/06/2023

22/06/2023

Pap gen kou rate menm. Seyè a devan. EE answit epi Jenès la deyè .

22/06/2023

LESON DOMINIKAL DIMANCH 25 JEN 2023
TIT : Wa a rantre lakay li
LEKTI : Zakari 14
TÈKS DÒ : Jou sa a Seyè a pral fè yo pèdi tèt yo pran kouri. Yo pral tonbe youn sou lòt, youn pral touye lòt (Zakari 14 : 13).
OBJEKTIF: Etidye pwofesi sou « pawouzi » a jan l prezante nan liv Zakari a.
ENTWODIKSYON : Leson dimanch pase a se te yon kout flach sou pwofesi batay amagedon an jan l prezante nan liv Zakari a. Nou pral etidye chapit 14 liv Zakari a ki se chapit nan liv la. Chapit sa a se yon konklizyon jeneral pou liv la. Ladan l otè a repran kèk gran tèm li te trete nan chapit anvan yo. Nou kapab divize chapit la an kat pati konsa:
1. Izrayèl soti anba lòt nasyon yo (1-3).
2. Mesi a etabli wayòm li (4-5).
3. Lènmi Izrayèl yo detwi (12-15).
4. Nasyon yo ap onore Mesi a (16-25).
I. IZRAYEL SOTI ANBA LOT NASYON YO (v. 1-3)
Nan plan Bondye trase a, Izrayèl va sibi yon atak san parèy anba men yon kowalisyon mondyal k ap anba lidèchip antikris la…
• Yo pral piye Jerizalèm;
• Y ap vyole medam yo ;
• Y ap depòte mwatye nan popilasyon an;
• Men Seyè a ap parèt pou l koresponn ak ènmi l yo e pran defans Izrayèl.
• L ap vin pote ti rès Jwif ki vire je gade l yo sekou.
II. MESI A ETABLI WAYÒM LI (v. 4-5)
Mesi a k ap pote delivrans lan ap parèt pou l poze pye l sou mòn Olivye a k ap fann an de anba pye l.
• Kote Bondye mete pye l tè a tranble epi li fann (Jij 5.5 ; Sòm 68 :8).
• Sezisman pral frape anpil moun.
• Mesi a va akonpaye ak sen yo (Legliz).
• Daprè vèsè 5 lan, aparisyon sa a sanble ak sa Letènèl te fè sou mòn Sinayi a (Egzòd 19: 16-18).
• Mesi a va pran kontwòl tout mond lan nèt apre l fin netralize antikris la ak fo pwofèt la ( Revelasyon 19 :20-21).
III. LÈNMI IZRAYÈL YO DETWI (v. 12-15)
Dapre pasaj sa a, tout moun ki te leve kont Izrayèl yo peri. Yo sibi chatiman yo merite.
• Zakari dekri envazyon an ak tout lame nasyon yo ki te fè yon sèl pou konbat Jerizalèm ;
• Tout lame sa yo ki t ap chache detwi Izrayèl, detwi jan sa te predi nan chapit 12 la;
• Letènèl pwovoke yon gwo twoub nan mitan yo ;
• Malgre Bondye pèmèt atak la, li pa kite yo fini ak peyi a ;
• Pèp Bondye pa janm pèdi batay nèt ale.
IV. NASYON YO AP ONORE MESI A (v. 16-25)
Apre viktwa Mesi a sou kowalisyon an ak bèt la, l ap tabli wayòm li sou tout tè a…
• Tout ènmi Mesi a ap peri san pitye.
• Tout moun lòt nasyon yo ap monte chak ane pou onore Mesi a (Ezayi 56 : 1-8 ;66 : 18-23).
• Bondye ap pini tout nasyon ki pa dakò al adore l Jerizalèm.
• Mesi a ap divize abitan latè yo an de gwoup : mouton ak bouk Sè mouton yo k ap gen dwa rantre nan wayòm mil an Mesi a (Matye 25 : 34-46).
• Gwoup mouton sa se tout moun lòt nasyon yo ki te ede Jwif yo sou yon fòm ou yon lòt pandan peryòd tribilasyon an.
• Bondye ap bay sekirite nèt ale nan peyi a.
• Mak fabrik wayòm sa se va Sentete (Zak. 8 : 3).
Tèm jeneral chapit sa a se « Bondye nou va vini » (v. 5b). Jou sa a, tout latè pral admèt otorite Bondye ak dwa l sou tout kreyasyon an. P ap gen ate ankò. P ap gen enkredil ankò.
Aplikasyon: Anyen pa ka anpeche pwofesi sou retou Kris la pa akonpli. An n kenbe pye l e rete nan kan moun pa Bondye yo, pou nou ka pa wont lè Kris va parèt paske n pa konnen kilè l ap vini (Matye 24 : 44).
KONKLIZYON: Nou rive nan fen etid sou liv Zakari a ki fini ak yon grenn mesaj pou tout latè : Mesi Bondye a ap vini pou l bay chak moun sa yo merite. Legliz dwe preche mesaj sa a tout tan e toupatou. An n rete fèm nan konfyans nou nan Bondye pou n ka toujou anba enfliyans li, li menm ki se espwa nou ak avni nou. Tout glwa, onè, respè ak louwanj se pou Bondye, li menm ki la, ki te la e ki gen pou vini an. Amèn !

22/06/2023

LESON DOMINIKAL DIMANCH 11 JEN 2023.
TIT : IZRAYÈL REJTE BON BÈJE A
LEKTI : Zakari 11
TÈKS DÒ : Gadò yo ban nou degoutans, nan yon mwa mwen te chanje twa gadò youn apre lòt, yo menm tou yo pa t vle wè m (Zakari 10 : 6a).
OBJEKTIF: Montre konsekans k ap tann moun ki rejte lidèship bon Bèje a.
ENTWODIKSYON : Manifestasyon Chilo Bondye a (Jenèz 49:10) nan istwa Izrayèl ak limanite se te tèm leson dimanch pase a. Nou te wè kouman entèvansyon sa a te dwe enspire lajwa pami pèp la e chanje destine nasyon an. Men Izrayèl pa t resevwa Mesi redanmtè a. Aksyon sa a se premye pa nasyon an nan yon nouvo fòm apostazi ki dire jouk jodi a. Rejè sa a pa t ap rete san konsekans. Zakari pwofetize Bondye pral jije nasyon an. Chapit onz Zakari a se yon tablo pwofetik ki etale chema jijman Bondye kont move chèf nasyon an e kont pèp la ki rejte bon Bèje Bondye te mete veye yo a. An n etidye leson sa a.
I. JIJMAN KÒLÈ BONDYE KONT MOVE BÈJE YO (v. 1-3)
Twa vèsè ki louvri chapit onz lan pran fòm yon powèm k ap anonse yon dezas. Vèsè sa yo eksplike nan fòm imaje atak Bondye kont senbòl prestij ak pisans chef/bèje k ap domine (sou Liban, Bazan) sou Izrayèl.
A.- Bondye va detwi prestij chèf yo (v. 1-2)
• Pou pwofèt la anonse twa (3) flewo ki gen pou frape prestij gwo zotobre yo, li itilize de (2) figi estil (entèpelasyon ak pèsonifikasyon) ki konsène peyi Liban, pye sikren yo ak pye bwadchenn yo.
• Chak eleman nan triyo sa a (pye sikren, pye bwadchenn e sitou pye sèd ki te pote non prens tout pye bwa yo) se te senbòl fyète, awogans, ògèy, prestij, santi-bon, rezistans ak majeste nan mond ansyen an (Ezekyèl 31, Sòm 1: 92:12).
• Men pwofèt la anonse yo gen pou tounen sann anba dife (detwi), yo gen pou tonbe atè (chit, imilyasyon) e yo gen pou ratibwaze (ravaj).
Non sèlman tout sa ki fè prestij dirijan yo gen pou sakaje, men Bondye ap aneyanti pouvwa yo tou.
- Bondye va aneyanti pouvwa chèf yo (v. 3)
• Kou Bondye bay chèf yo fè yo mal. Li evidan Bondye konn ki kote e kijan pou l atake mechan an. Bondye frape chèf-bèje kowonpi yo nan kè ògèy yo menm.
• Akoz atak Bondye a move bèje yo tonbe pouse “des cris lamentables”(vèsyon LSG). Menm ti jenn lyon yo ap jemi paske yo pèdi teritwa yo. Bèje yo pèdi pouvwa yo, y ap plenn. Chèf pa janm renmen pèdi pouvwa. Pouvwa gou. Pouvwa se kle privilèj.
• Men bèje sa yo pa bay mouton regle anyen pou yo. Yo devore sa pou yo devore. Yo kòche sa pou yo kòche san okenn remò.
«Non, mechan yo p ap dominen pou tout tan sou peyi ki pou moun ki mache dwat yo. » (Sòm 125 :3)
Aplikasyon: Chèf pou anpil moun nan kilti pa nou an vle di: itilize, imilye, maltrete, eksplwate ak gaspiye lòt moun. Men kretyen ki chèf la dwe veye sou modèl tretman l ap bay moun, paske l ap gen pou l rann kont sou sa (Efezyen 6:9).
II. JIJMAN BONDYE KONT PÈP LA KI REJTE BON BÈJE A (v. 4-17)
Nan pasaj sa a, Zakari resevwa yon lòd nan men Bondye pou l poze de (2) aksyon pwofetik kontradiktwa : l ap jwe wòl bèje fidèl an premye tan, apre sa, l ap konpòte l menm jan ak yon bèje san konsyans.
A.- Kòm bèje fidèl (v. 4-14)
Jezi se sèl bon Bèje ki bay vi l pou sove mouton l yo (Miche 5 :3, Ezekyèl 34 :29, Jan 10). Se li menm Zakari reprezante atravè premye aksyon pwofetik la.
• Zakari ta pral jwe wòl sa a nan moman lòt nasyon t ap maltrete pèp la tankou mouton destine pou labatwa.
• Zakari te aksepte pran swen mouton ki destine pou labatwa yo ak de (2) baton (youn li te rele Gras e lòt la Inyon).
• Li revoke nan yon mwa twa gadò (=>prèt, pwofèt ak wa ; twa ofis ki te responsab pou dirije pèp la ?).
• Men bout pou bout, Zakari dekouraje, menm nouton yo pa vle wè l; li kase 2 baton yo ; e yo peye l 30 pyès lajan.
• Jida pral vann Mesi/bon Bèje a pou trant pyès lajan tou (Mat. 26 :15)..- Kòm Bèje enfidèl (v. 15-17)
Akoz mouton yo rejte lidèchip bon Bèje a, yon move bèje va domine sou yo. Zakari dwe repran metye gadò mouton an, men fwa sa a, l ap yon bèje enfidèl san zantray mizerikòd. Va gen yon bèje san zantray ki va chita dominasyon l sou mouton yo…
• Mouton pèdi yo p ap vle di anyen pou li;
• Mouton blese yo p ap rive panse;
• Mouton ki malad yo p ap jwenn moso swen.
• Bèje enfidèl sa a va manje mouton ki gra yo;
• Epi li va kòche ata zago pye mouton yo.
Tout moun ki rejte lidèchip Bondye tonbe otomatikman anba dominasyon fewòs Satan.
Piske pèp la voye jete asistans ak benediksyon bon Bèje ki te fè yo gras la e ki te ini yo a, yo va tonbe anba dominasyon yon bèje kriminel kòm jijman e rekonpans aksyon yo.
Pou anpil kòmantatè, bèje enfidèl kriminèl sa a se Antikris la ki va parèt pou l domine e l va responsab pi gwo jenosid ki gen pou fèt sou jwif yo nan gran tribilasyon an.
Aplikasyon : Enjistis, koripsyon, eskandal ak mechanste se mak fabrik tout gouvènman nan epòk nou an. Men sa p ap rete konsa pou tout tan. Lè bon bèje nou an va parèt tout soufrans sa soufrans sa yo va disparèt (Revelasyon 21 :3-4).
KONKLIZYON: Leson jodi a montre jijman Bondye kont move bèje yo ak benediksyon dominasyon Bondye bay. Legliz dwe preche mesaj sa a toupatou. An n rete fèm nan konfyans nou nan Bondye pou n ka toujou anba enfiyans li ki se bon Bèje nou. Tout glwa, onè, respè ak louwanj se pou Sila a ki la, ki te la e ki gen pou vini an. Amèn !

17/06/2023

LESON DOMINIKAL DIMANCH 18 JEN 2023
TIT : BONDYE PWOMÈT L AP DELIVRE PÈP IZRAYÈL LA.
LEKTI : Zakari 12 : 1-14 ; 13 :1-9
TÈKS DÒ : Se mwen Seyè a ki di sa, m ap veye pèp Jida a pou anyen pa rive yo, m ap fè tout chwal lènmi l yo avèg (Zakari 12 : 4b).
OBJEKTIF: Etidye pwofesi sou batay amagedon an nan kad liv Zakari a.
ENTWODIKSYON : Leson dimanch pase a te fini sou pwofesi ki konsène bèje enfidèl ki gen pou chita dominasyon l sou jwif yo kòm jijman Bondye kont yo akoz yo te refize lidèchip bon Bèje a ki se Jezikris. Bèje enfidèl se va antikris la menm ki va pase yon alyans solid ak Jwif yo pandan yon semèn (Da. 9 :26-27). Nan mitan semèn nan l ap brize alyans lan e dechennen yon pèsekisyon san parèy kont Jwif yo jiskaske l va mobilize yon kowalisyon nasyon pou batay ak Jwif yo. Leson jodia a nan chapit 12 ak chapit 13 liv pwofesi Zakari a montre kijan Bondye va delivre pèp la anba kowalisyon tèrib sa a e restore l pou tout tan. An n etidye leson sa a.
I. BONDYE AP DELIVRE IZRAYÈL ANBA KOWALISYON AN (ch. 12)
A.- Fòmasyon kowalisyon an
• Zakari 12: 3b di : « Tout moun sou latè pral mete ansanm pou atake Izrayèl ». Nasyon sa yo pral sènen tout peyi a (v.2).
• Youn nan pi gwo opozisyon gouvènman mondyal antikris la va konnen ap soti bò kote Jwif yo.
• Konsa antikris la ap pran desizyon pou l trase yon egzanp sou yo.
• Revelasyon 16 : 12-16 eksplike kouman Bondye bay pèmisyon pou kowalisyon nasyon yo atake Izrayèl.
• Men si objektif kowalisyon an se efase Izrayèl, Bondye ap itilize kowalisyon sa a pou fòse Izrayèl leve je l gade Sila yo te pèse a (Jezikri).
• Men bilan batay sa a (Amagedon) daprè Zakari 14 : 1 : « Y ap pran lavil la, y ap piye tout kay yo, y ap fè kadejak sou medam yo. Yo pral depòte mwatye nan moun yo.
AN.- Destriksyon kowalisyon an
Zakari di: Men mesaj Seyè a bay pou fè konnen volonte l sou moun pèp Izrayèl yo. Men desizyon lip ran li menm Seyè a (souvren), ki louvri syèl la nan plas li (mèt sa ki anwo), ki kreye latè ak bay moun lavi (mèt sa ki anba sou latè).
Se Bondye sa a ki dekrete desten lame nasyon sa yo ki va ataque Izrayèl…
• L ap fè Jerizalèm fè moun lòt nasyon yo pèdi tèt yo (konfizyon, etoudisman?) v. 2.
• L ap fè Jerizalèm tounen yon gwo wòch lou k ap foule kèlkeswa moun ki eseye leve l (v.3).
• L ap fè ènmi Izrayèl yo avèg (v.4). Ekipman militè yo ap tonbe an pán.
• L ap fè fanmi Jida yo tounen yon boukan dife nan mitan yon rakbwa (v.6).
• L ap louvri zèl li pou pwoteje yo e l ap detwi lame tout nasyon sa yo ki te oze atake Izrayèl (Revelasyon 19:11-21).
Aplikasyon: Anpil pèsonaj nan listwa (tankou farawon, Aman, Antyokis Epifán, Titis, Adolf Itlè, Misolini…) tante elimine oswa efase pèp Izrayèl. Men yo tout te echwe paske Izrayèl fè pati plan Bondye. An n rete nan plan Bondye trase pou nou an nan Kris, paske pa gen kondanasyon pou moun ki nan Kris (Women 8:1).
II. BONDYE RESTORE LAVI ESPIRIYÈL PÈP LA (12 :10-14 ak ch. 13)
Bondye p ap sèlman pote yon delivrans materyèl pou Izrayèl, l ap delivre l espirityèlman tou. Bondye fè Zakari konnen omwen sèt (7) chanjman l ap opere nan lavi espirityèl nasyon an.
1. Yo va gen bon kè (12 :10).
2. Lè yo va wè sila yo te pèse a, yo va nan gwo lapenn, tout nasyon an va an dèy. “Y a pete rele tankou…
- Moun ki pèdi premye pitit yo,
- Moun ki pèdi sèl grenn pitit yo,
- Moun k ap rele nan vale Adad-Rimòn nan (vale Megido)
Twa konparezon sa yo tradui dimansyon dèy ki va frape nasyon lè yo wè se moun yo te pèse a ki vin delivre yo.
3. Yon sous dlo va pete pou pirifye moun Jida yo (13:1).
4. Ata non zidòl yo va disparèt nan peyi a (13:2). Bondye ap wete nan kè moun tout lide pou sèvi zidòl.
5. Fo pwofèt yo ap disparèt. Okenn moun p ap anvi pwofetize san aval Bondye (13:3-5).
6. L ap pase ti rès moun ki rete nan peyi a nan dife pou l pirifye yo (v. 8-9a).
7. Lè pèp la priye, Bondye ap reponn yo, e l ap Bondye yo nèt ale (v. 9b).
Aplikasyon : Monopol restorasyon espirityèl tout bon an se nan Bondye etènèl la sèlman li ye. Sèl moun ki ka restore w tout bon se Bondye. Pa neglije chache restorasyon nan men l (Jan 4.14).
KONKLIZYON: Leson jodi a se yon kout flach sou pwofesi batay amagedon an jan l prezante nan liv Zakari a. Pwofesi sa a montre aklè Bondye se mèt Listwa e se li ki fè listwa. Anyen pa echape l. Okenn evènman pa etone l ni siprann li. Kouman pou n pa renmen e adore Bondye sa a ki pa limite nan pouvwa ak konesans ? Se yon mesaj Legliz dwe preche tout tan e toupatou. An n rete fèm nan konfyans nou nan Bondye sa a. Tout glwa, onè, respè ak louwanj se pou Sila a ki la, ki te la e ki gen pou vini an. Amèn !

01/06/2023

01/06/2023

LESON DOMINIKAL DIMANCH 4 JEN 2023
TIT : BENEDIKSYON MESI A POU PÈP LI
LEKTI : Zakari 9 : 9-12 ; 10 : 1-12
TÈKS DÒ : Mwen pral bay moun peyi Jida yo fòs, mwen pral delivre moun Jozèf yo. M ap fè yo tounen lakay yo paske kè m fè m mal pou yo (Zakari 10 : 6a).
OBJEKTIF: Etidye youn nan pwofesi kle konsènan vini pitit Bondye a.
ENTWODIKSYON : Senk san lanne avan pitit Bondye a te fèt nan vil Betleyèm, Bondye te revele Zakari yon Wa gen pou l vini, e se wa sa ki pral chanje kondisyon egzistans pèp la pou tout tan. Chapit nèf pou rive chapit katòz nan liv Zakari a kouvri yon ansanm reyalizasyon Wa sa gen pou akonpli an favè Izrayèl. Jodi a n ap etidye vini Wa a ak nati wayòm li a.
I. ARIVE PRENS SIYON AN (9. 9-12)
Pwofesi sa a konsène de (2) vini Kris yo. Li klè vèsè nèf la predi rantre Jezi nan Jerizalèm sou yon ti bourik kèk jou avan lanmò li, pandan rès vèsè yo ap dekri retou Kris nan fen tan an.
A.- Premye vini Prens Siyon an (v.9)
Letènèl gen yon bòn nouvèl pou tout moun ki t ap tande l yo. Li anonse nan pwofesi sa a Wa a pral vini. Nan pwofesi sa a gen :
1. Yon doub envitasyon pou moun Jerizalem yo ki dwe fè kè yo kontan;
2. Yon prezantasyon : « Wa nou an ap vin jwenn nou »;
3. Yon deskripsyon sou karaktè wa a : Li dwat, li chaje imilite e li pa janm pèdi batay.
4. Yon endis pou yo rekonèt wa a : li monte sou yon ti bourik.
Pa gen dout pwofesi sa akonpli ak premye vini Kris la sou latè.
AN.- Dezyèm vini Prens Siyon an (v. 10-12)
Pwofèt yo pa t an mezi pou konprann vini kris la t ap fèt an de (2) tan.
• Menm jan yon obsèvatè k ap gade de tèt mòn ki youn dèyè lòt pa rive wè vale ki separe yo a, se menm jan an pwofèt yo pa t ka rive wè peryòd Legliz la ki se yon gwo espas ant de vini kris la.
• Aspè sa touche anpil pwofesi Ansyen Testaman ki konsène Kris (Ezayi 9.6-7).
Daprè Orak Bondye konfye Zakari, lè Wa a va tabli wayòm li :
• L ap detwi tout cha ak zam moun itilize pou fè lagè (v. 10a) ;
• L ap etann dominasyon l sou tout peyi, tout nasyon, tout pèp (v. 10b) ;
• L ap delivre prizónye nan tou san dlo a epi l ap restore kaptif yo (v. 11-12):
• L ap atake e detwi ènmi Izrayèl yo (v. 13).
Akonplisman pwofesi sa yo va debouche sou rèy inivèsèl Kris la apre gran tribilasyon an.
Aplikasyon: Anyen pa ka anpeche Kris retounen an n kenbe fè m pou n pa pèdi rekonpans nou (Revelasyon 3 :11).
II. NATI WAYÒM PRENS LAN (10. 1-12)
• Ki mak fabrik wayòm Prens sa a menm ? Wayòm sa a ap chita sou lapè inivèsèl, pwosperite inivèsèl, ak jistis inivèsèl
• Li vrèman enpòtan pou n raple depi apre peche, lòm pa t janm nan yon anviwónman ki anba kontwòl Bondye dirèkteman.
• Nan moman retou Kris la, limanite ap soti dirèkteman anndan gran tribilasyon an. Kidonk, kijan Kris pral òganize wayòm li a ?
• L ap restore ekilib natirèl e espirityèl orijinèl la epi l ap restore entegralman nasyon Izrayèl la.
A.- Restorasyon ekilib natirèl ak espirityèl la (v. 1-3)
Bondye ki gen tout pouvwa a pwomèt nasyon pa l la:
• Lap fè lapli tonbe kòrèkteman;
• L ap rann tè yo pwodiktif; Ekilib natirèl la va retabli.
• L ap koresponn ak fo pastè/fo bèje k ap mennen pèp la nan erè;
• L ap pini « bouk » yo pandan l ap vizite twoupo li a e fè l tounen chwal batay li. Ekilib espirityèl la restore.
An.- Restorasyon entegral nasyon Izrayèl la (v. 4-12)
Pasaj sa a rapòte ak anpil senbolis yon seri chanjman radikal k ap rive nan peryòd Kris va domine sou tè a:
• Bondye ap fè Izrayèl tounen yon pwisans militè.
• Wa a va reyini Izrayèl e fè l tounen yon sèl nasyon.
• Wa a va beni nasyon an e gide li.
• Wa a va depouye grann pisans yo (v. 11) [Politik kraze zo ak pese s***e a ap fini].
Gouvènman Kris la ap efikas sou tout fwon ak tout aspè. L ap pote lapè, jistis, pwosperite pou tout tè a e pou Izrayèl.
Aplikasyon : Enjistis, koripsyon, eskandal ak mechanste se mak fabrik tout gouvènman nan epòk nou an. Paske se Satan ki prens mond sa a. Men li p ap prens pou tout tan. An n priye e viv priyè sa Jezi te montre nou an : « Se pou wayò ou an vini ». (Mat 6.10)
KONKLIZYON: Vle pa vle Kris ap vini. Se esans leson nou t ap etidye jodi a. Sentespri ap prepare Legliz la pou gran evènman sa a. An n prepare nou e rete fèm nan konfyans nou nan Bondye pou n ka temwen tout mèvèy sa yo. Tout glwa, onè, respè ak louwanj se pou Sila a, ki te la, e ki gen pou vini an. Amèn !

28/05/2023

LESON DOMINIKAL DIMANCH 28 ME 2023
TIT : KONPAREZON ANT VIZYON AK ORAK KI NAN LIV ZAKARI A
LEKTI : Zakari 9 : 1-10
TÈKS DÒ : Seyè a pral pran lavil la pou li. Li pral voye tout richès li yo nan mitan dife. Dife pral boule lavil la nèt (Zakari 9 :4).

OBJEKTIF : Souliye amoni ant de pati liv Zakari a.
ENTWODIKSYON : Premye pòsyon liv Zakari a (ch. 1-8) chita sou yon seri vizyon pandan dezyèm pati a se konpilasyon de (2) orak Bondye te konfye Zakari. Malgre diferans nan mwayen revelasyon Bondye itilize nan de pati liv la, sa pa anpeche liv la abòde epi trete yon seri sijè ak verite espirityèl ki konsène tou de pati liv la. Leson jodi a se yon paralèl ant vizyon Bondye te bay pwofèt Zakari a ak de (2) orak prensipal Bondye yo ki nan liv sa a. Avan nou rantre nan paralèl la an n fè yon rapèl sou vizyon ak orak yo.

I. RAPÈL SOU VIZYON AK ORAK YO (ch. 1-6)
A.- Uit vizyon Zakari yo
1. Vizyon 4 kavalye yo: yon patwouy sou tout latè (1 :7-17);
2. Vizyon 4 kòn ak 4 bòs fòjon yo: Bondye ap koresponn ak nasyon ki te kontribiye nan egzil pèp la (2:1-4);
3. Vizyon nonm ak zouti pou mezire a : asire pwoteksyon Jerizalèm (2 :5-17) ;
4. Vizyon gran prèt Jozye devan twón nan: apwobasyon otorite Jida yo (ch. 3);
5. Vizyon chandelye ak olivye a : men Bondye sou otorite Jida yo (ch. 4);
6. Vizyon woulo liv k ap vole a : malediksyon Jida a va aneyanti (5.1-4);
7. Vizyon fanm ki te gwo pánye mezi a : madichon pèp Jida a va tonbe sou yon lòt nasyon (Babilòn) (5.5-11);
8. Vizyon 4 cha ak cheval diferan koulè yo (ch. 6).
AN.- Plan orak yo
I- Premye orak la (ch. 9-11)
 Bondye jije nasyon vwazen Izrayèl yo.
 Apèl pou pèp la akeyi Wa k ap vini an.
 Bondye libere prizónye yo.
 Bon e move bèje.
II.- Dezyèm orak la (ch. 12-14)
 Nasyon yo asyeje Jerizalèm pou dènye batay la;
 Moun yo te pèse a parèt.
 Jerizalèm pirifye.
 Yo atake bèje a e ti mouton yo gaye.
 Jou Letènèl la
II. PARALÈL ANT VIZYON AK ORAK YO
Rapwochman orak yo ak vizyon montre inite ki genyen nan liv Zakari a. Chak vizyon sa yo chaje eleman ki sanble ak mesaj nou jwenn nan orak yo.
Yon orak se yon pwoklamasyon. Yon anons ki ekspoze volonte Bondye oswa plan patikilye li genyen. Yon orak se souvan rezilta yon dekrè diven e ki mande moun k ap tande yo pou bay mesaj la tout atansyon yo.
VIZYON… ORAK RELASYON
Kat kavalye yo (1 :7-17) Premye orak (10.6-9) Pwosperite Izrayèl. Pwomès Bondye pou l fòtifye Jida, delivre Jozèf e rasanble tout pèp li a.
Kat kòn ak 4 bòs fòjon yo (2:1-4) Premye orak (9. 1-8)
Dezyèm orak (12.1-8 ; 14.1-3) Destriksyon ènmi Izrayèl yo. Bondye pwomèt l ap defann pèp li. Li p ap kite pèp li a pyetine anba pye nasyon yo pou tou tan.
Nonm ak zouti pou mezire a (2 :5-17) Premye orak (9. 9-17)
Dezyèm orak (12. 7-9 ; 14.4-11) Bondye pwoteje e konfime l ap leve pèp li. Kè pèp Bondye a pral konton akoz wa ki pral vini an, Wa tout moun ap tann nan.
Gran prèt Jozye devan twón nan (ch. 3) Premye orak (10. 2-3)
Dezyèm orak (12. 10-14 ;14.8) Pèp la pran wout repantans. Restorasyon Izrayèl la konsène ni aspè fizik nasyon an ni aspè espirityèl nasyon an.
Chandelye ak olivye a (ch. 4) Premye orak (10. 1-6)
Dezyèm orak (13. 1-6) Pèp la pral sèvi Bondye temwen pami nasyon yo. Moun lòt nasyon va temwaye Bondye avèk nasyon Izrayèl la tout bon.
Woulo liv k ap vole a (5.1-4) Premye orak (ch.11).
Dezyèm orak (13. 7-9 ; 1412-15). Pasaj sa yo mete anfaz sou jijman pechè yo, nasyon rebèl yo ak move plan yo.
Vizyon fanm ki te gwo pánye mezi a & vizyon 4 cha ak cheval diferan koulè yo (ch. 6) Dezyèm orak (14. 20-21). Dènye vizyon yo ak pasaj orak ki souliye a mete anfaz sou delivrans total nasyon Izrayèl la anba inikite.
KONKLIZYON: Leson jodi a te gen objektif souliye amoni ant vizyon ak orak ki nan liv Zakari a. An n viv menm amoni sa a nan antre nou pou glwa non Bondye n ap sèvi a. Tout glwa, onè, respè ak louwanj se pou Sila a, ki te la, e ki gen pou vini an. Amèn !

NÒT
_________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________

04/05/2023

LESON DOMINIKAL 7 ME 2023
TIT : BONDYE PWOMÈT PÈP LA RESTORASYON
LEKTI : Zakari 8: 1-17
TÈKS DÒ : Nou menm moun Jida ak moun Izrayèl, menm jan yon lè mwen te fè nou tounen madichon nan mitan lòt nasyon, konsa tou m a delivre nou, m a fè nou tounen benediksyon nan mitan lòt nasyon yo, nou pa bezwen pè pran kouraj ! Zakari 8:13
OBJEKTIF : Montre se Bondye ki konn restore moun tout bon
ENTWODIKSYON : Apre swasann dizan kaptivite, sitiyasyon Jwif ki te gen chans retounen Palestin pa t amelyore vrèman. Dènye vèsè chapit 7 la rezime dimansyon dezolasyon jeneralize ki te frape abitan sa yo : « Lènmi fin devalize tout peyi a, yo pa kite pèsonn ladan l. yon bon peyi konsa yo fè l tounen yon dezè. » (v.14) Men Bondye pwomèt sa p ap rete konsa. Tout rès liv Zakari a mete anfaz sou pwomès Bondye pou l restore pèp li a pandan l ap jije nasyon kriminèl yo. Leson sa a chita sou de (2) aspè kle nan restorasyon Bondye pwomèt pèp li a : restorasyon fizik ak restorasyon moral e espirityèl. An n etidye ansanm.
I. REVELASYON BONDYE POU YON RESTORASYON FIZIK (v. 1-6)
Nan pasaj sa a Bondye revele Zakari l ap restore nasyon an fizikman. Revelasyon sa a se alafwa yon dekrè e yon pwojè diven ki gen pou reyalize konplètman nan moman Kris va chèf sou latè.
Antanke dekrè diven: li irevokab pandan l pote siyati “Seyè ki gen tout pouvwa a” dis fwa.
Antanke pwojè diven: li ranpli omwen twa kondisyon ki nesesè pou tout pwojè ki se : jistifikasyon, dimansyon ak pwovizyon.
A.- Jistifikasyon restorasyon an
Renmen san parèy ak san limit Bondye gen pou pèp li a se eleman kle ki jistiye plan restorasyon sa a.
Renmen san parèy sa rann Seyè jalou pou pèp li e prè pou l vanje ènmi pèp li a
B.- Dimansyon restorasyon an
Se yon restorasyon entegral, ki konsène tout lavi nasyon an
Bondye a abite nan mitan pèp li a.
Ap gen sekirite nèt ale ni pou granmoun sou baton ni pou timoun piti.
Kondisyon vi moun ap amelyore yon fason ekstrawòdinè.
C.- Pwovizyon pou restorasyon an
Pou ti ponyen moun ki rete nan peyi a, pwomès sa yo enposib pou reyalize.
Okenn Wa oswa nasyon pa t ap ka restore Izrayèl pou l ta rejwenn glwa li te genyen sou Salomon an.
Men pwovizyon pou kalte restorasyon sa a chita sou gwo pouvwa Seyè a
Depi Bondye anonse yon bagay, l ap fè l kanmenm
Aplikasyon:Se sèl Bondye ki ka restore tout bon yon moun bandi, kriminèl ak malfektè dechèpiye, maltrete ak dezimanize. Legliz dwe kontinye preche mesaj restorasyon an e priye pou restorasyon nan nasyon nou an (Zakari 8:6)
II. PWOMÈS BONDYE POU RESTORASYON MORAL E ESPIRITYÈL (v. 7-17)
Restorasyon tout bon Bondye reyalize a toujou valorize moralite ak relasyon n ak Bondye. Bondye pwomèt l ap lave lavi moral ak espirityèl nasyon an.
A.- Restorasyon moral ak espirityèl
Bondye ki gen tout pouvwa a pwomèt :
L ap rasanble pèp la yon sèl kote –inite.
Pèp la va rele pèp li –rekonsilyasyon.
Li va Bondye yo –apwobasyon.
Y a fè sa Bondye mande –obeyisans.
Bondye ap kenbe kontra l ak yo –sekirite espirityèl etènèl.
Restorasyon espirityèl toujou trennen tout kalte benediksyon. Se pou sa Bondye anonse pèp la p ap manke beni.
B.- Benedikyon materyèl ann abondans
Tè a va bay rekòt kòrèkteman
Lapli p ap janm pa tonbe
Pèp la va tounen yon benediksyon nan mitan lòt nasyon yo
Pèp la pa gen dwa pè ankò
Bondye fini seri revelasyon sa yo a yon mizangad pou pèp la nan vèsè 16 la. Pandan y ap tann reyalizasyon restorasyon an nan lavi yo, yo te dwe viv tankou moun restore.S
Aplikasyon : Legliz la bezwen restore moralman ak espirityèlman paske nou nan twòp sòs. An n chache vrè restorasyon an nan men Seyè a pou n ka beni tout bon (Revelasyon 3:18).
KONKLIZYON: Leson jodi a te pale sou restorasyon Bondye pwomèt pèp li a. Nou wè kijan restorasyon sa a konsène tout sa ki gen rapò ak lavi pèp la e kijan Bondye pa neglije okenn aspè. An n rete fèm nan konfyans nou paske Bondye p ap neglije anyen nan lavi nou ki merite resto-rasyon. Li vle e li prè pou l restore nou. Èske nou prè pou sa nou menm?