Leson dominikal

22/05/2026

*LESON DOMINIKAL 24 ΜΕ 2026*

*Tit: Pòl ak Banabas fonde plizyè lòt legliz*

*Lekti: Travay Apòt 14:1-28*

*Tèks dò:*
*Tout moun ki vle viv nan sèvis Bondye ansanm ak Jezikri gen pou soufri pèsekisyon. 2 Timote 3:12*

*Entwodiksyon:*
Pòl ak Banabas, nan premye vwayaj misyonè a, te fonde anpil legliz nan plizyè vil nan *Azi-Minè.* Lè opozisyon an te anpeche yo pouswiv travay yo nan Antyòch nan peyi Pisidi, yo kite la pou yo ale nan Ikonyòm. *Nan lavil Ikonyòm te gen anpil moun Jwif ak Grèk ki te aksepte Levanjil la,* men pèsekisyon an te vin mete lavi yo an danje ankò, yo kite Ikonyòm epi yo ale List kote moun yo t ap sèvi zidòl.

*I. Eprèv ak laviktwa nan Evanjelizasyon*
Aprè yon mirak kote Pòl te geri yon moun enfim, *yo te pran Banabas pou Jipitè epi Pòl pou Mèki oubyen Emès,* fo dye yo te konn adore.

*Mèki* se non zidòl la nan lang Laten an epi Emès se non Grèk la pou menm zidòl la.
Se avèk anpil difikilte misyonè yo te anpeche moun yo fè sakrifis pou yo. Men sa pat pran lontan, kèk Jwif ki te soti nan Antyòch ak Ikonyòm te vire tèt moun yo kont misyonè yo.

Moun k ap sevi zidòl yo te chanje rapidman, soti nan adorasyon, rantre nan pèsekisyon. Yo te touye Pòl ak kout woch. Aprè sa yo te trennen I andeyò vil la epi yo te kite I la, paske yo te konprann li te mouri. Men kwayan yo te reyini bò kote I, nou kwè yo t ap priye pou li. Lamenm, devan je yo, Pòl te leve kanpe epi li te mache retounen avèk yo nan vil la. Frè yo te bay misyonè yo asistans epi nan denmen, yo te kite vil la pou yo te ale Dèb epi yo te fonde yon legliz nan vil sa tou. Misyonè yo pa t dekouraje pou sa te ka rive yo, men yo te mete konfyans yo nan Bondye, yo avanse nan travay yo. Si ou ta gen yon gwo pwoblèm konsa, èske ou ta toujou , dispoze kontinye travay Evanjelizasyon an?

Pòl ak Banabas te kite Dèb aprè yo te fonde yon legliz, epi avèk yon gwo kouraj, yo te retounen List, Ikonyòm ak Antyòch. Yo pat pè pésekisyon an, paske moun ki te fèk konvèti yo te bezwen ankourajman ak ansèyman. Apòt yo te egzote kwayan yo pou yo pèsevere nan lafwa epi yo te avèti yo ke se avèk anpil afliksyon yo kapab pèsevere nan lafwa. Yo te di chak kretyen gen pou soufri anpil anvan I ka rive nan syèl la.

Nan chak legliz, Pòl ak Banabas te nonmen kèk ansyen, sa vle di, pastè ak dyak, pou legliz yo te kapab byen fonksyone. Daprè sa nou wè nan nouvo Testaman an, chak nouvo konvèti dwe vin batize epi devni yon manm nan legliz lokal. Tout legliz k ap evanjelize dwe fòme disip epi batize kwayan yo.

*II. Misyonè yo retounen lakay yo*
Anfen, misyonè yo te pran wout pou retounen lavil Antyòch nan peyi Siri. Yo travèse peyi Panfili epi lè yo rive lavil Pèj, yo fè yon ti rete pou preche Levanjil la. Apre sa yo ale Itali epi yo pran bato a pou ale nan peyi Siri. Lè yo rive lavil Antyòch, yo reyini legliz la epi yo rakonte yo tout sa Bondye te akonpli pa mwayen sèvis yo. Yo te fè legliz la konnen kòman anpil payen ak Jwif te rive konvèti, konbyen legliz ki te fonde, tout pèsekisyon yo te sibi, gwo mirak Bondye te akonpli pou yo epi pou lòt moun. Se avèk anpil chalè, misyonè yo te rakonte manifestasyon pwisans Bondye pou plante Levanjil nan mitan payen yo.

*III. Se yon gwo privilėj pou nou sèvi Bondye*
Pou nou Li pa ase pou nou preche Levanjil la sèlman, men nou dwe fonde lòt legliz, fòme kwayan yo pou yo pran tout reskonsabilite yo pou kontinye evanjelize. Tout bagay ki gen enpòtans mande anpil jefò. viv yon vi ki pwop, fòk nou goumen kont mal, kont tout salte moral epi ekspoze nou anba gwo kritik lènmi yo.

Kèk fwa, sa mande gwo sakrifis pou fè kèk sèvis sosyal, ede yon moun ki nan prizon, moun ki abandonen pou kont yo, yon lòt ki viktim gwo trajedi kote nou dwe ofri yo ed nou. Kèk fwa se pou fè yon travay nan legliz ki mande anpil sakrifis. Tout moun ki konsakre yo pou sèvis Kris la dwe fè I avèk kouraj epi detèminasyon.

Gen anpil legliz ki atache yon gran enpòtans sou sove nanm yon moun, aprè sa yo rete la. Nou te deja di, modèl Nouvo Testaman an se pou konvèsyon an mennen nan yon lòt lavi ki nan kominyon ak Kris epi k ap sèvi Kris kòm yon manm legliz lokal.

*Konklizyon:*
Leson jodi a te anseye nou sou laviktwa ak eprèv ekip misyonè a te rankontre nan premye vwayaj misyonè a. Lè yo te kite Ikonyòm, *yo tale List, yon vil moun yo t ap sèvi zidòl.* Moun yo te kontan tande Levanjil epi wè bèl mirak Apot yo te fè. Yo te panse mesye yo se fo dye pa yo ki tounen moun. *Men lè yon gwoup moun sòti Antyòch Pisidi ak Ikonyom te rive List, yo te vire tèt moun yo fè kalonnen Pòl ak kout woch.* Yo te menm panse li te mouri. Nan demen, akonpaye frè ak sè ki te konvèti yo, yo te ale Dèb, yo te fonde yon legliz la. Se nan Dèb premye vwayaj misyonè a t ap pran fen. Yo te retounen pran menm chemen an, fòtifye, ankouraje ak mete lidè nan tèt legliz ki te fonde yo, retounen Antyòch nan peyi Siri kote yo te sòti, bay rapò sou jan vwayaj la te ye. Nan vwayaj sa yo te rankontre pwoblèm, men tou yo te gen anpil viktwa ak konkou Sentespri a. Moun k ap travay pou Bondye dwe fè I ak kouraj epi detèminasyon paske sou wout la ap gen difikilte men ap gen anpil viktwa tou.

+18493598495
Gwoup watsap

*Josué JEAN PIERRE*
*(El negro de Dios)*

*Devwa yo*

1) Kòman pèp payen an te konsidere Pòl aprè gwo mirak li te fè?

2) Kilès ki te otè pèsekisyon an nan lavil List?

3) Sak te pase ak Pòl anba pèsekisyon sa a?

4) Aprè yo te fin touye Pòl ak kout woch, kisa frè yo te fè epi kisa Bondye te fè pou Pòl?

5) Aprè Misyonè yo kite vil List la, ki kote yo te ale? Ki gwo bagay ki te fèt la?

18/05/2026

Happy Haitian Flag 🇭🇹🇭🇹
18 mai🇭🇹
Fête du drapeau 🇭🇹🇭🇹

16/05/2026

15/05/2026

*LESON DOMINIKAL 17 ΜΕ 2026*

*Tit: Pòl ak Banabas nan lavil Antyòch nan Pisidi*

*Lekti: Travay Apòt 13:13-52*

*Tèks dò:*
*Y ap pran Non Kris la pou yo mache fè konnen m esaj la nan tout peyi, kòmanse lavil Jerizalèm, pou mande tout moun pou yo tounen vin jwenn Bondye pou yo ka resevwa padon peche yo. Lik 24:47*

*Entwodiksyon:*
Pòl ak Banabas te kite zile Chip aprè ke Seyè a te fè anpil bagay nan Lil sa a. Levanjil la te preche, moun te sove. Men sa pa t fèt san pwoblèm Satan te mete sou wout yo. Youn nan gwo pwoblèm yo te rankontre yo te pèdi youn nan ekip misyonè a: *Jan Mak te tounen lakay li;* san dout paske li te pè devan tout pwoblèm li te rankontre, li pa t deside ale pi lwen. Eske Janmak fè byen pou kite frè yo epi tounen lakay li? Mesye yo pa t dekouraje epi yo kontinye vwayaj misyonè yo pou rive nan *Lazi-Minè.*
Ann gade sa k te pase la.

*I. Diskou Pòl nan sinagòg Antyòch nan peyi Pisidi (v. 13-43)*
Ekip misyonè a rive Pèj nan Panfili. *Bib la pa di si yo te preche Levanjil la lavil Pèj.* Sa kapab, paske pa t gen yon sinagòg nan vil la. Yon sinagòg se kote Jwif yo te konn reyini. Yo te pran wout pou ale Antyòch nan Pisidi. Kite lavil Pèj pou rive Antyòch se yon distans de *200km anviwon (distans Pòtoprens Okay).*

Rive Antyòch, yo antre nan sinagòg Jwif yo nan jou Saba a. Eske Pòl te konn obsève jou Saba? Sonje, Jwif yo pa t ko tande pale sou Levanjil la, yo te toujou kenbe menm koutim Ansyen Testaman pou selebre jou Saba. Se jou sa a Pòl te ka jwenn yo nan reyinyon. Li te rantre pou anonse Levanjil la premye fwa.

Pòl kanpe nan sinagòg la, li eksplike Ansyen Testaman an bay Jwif yo epi fè yo wè pwomès Redanmsyon an, kòman Jezikri te dwe mouri epi resisite pou padon peche chak moun. Li te kòmanse avèk sejou pèp Izrayèl la nan peyi Lejip, *kòman Bondye te wete yo avèk pwisans nan esklavaj.* Aprè sa, Bondye te nouri pèp la nan dezè a; se te plis ke yon milyon moun. Aprè sa, Bondye te ba yo peyi Kanaran pandan li te chase tout pèp yo devan yo. *Pòl te rakonte ba yo tout istwa pèp Izrayèl la jouk li rive nan lanmò ak rezirèksyon Kris la.* Pòl te site anpil vèsè nan Ansyen Testaman ki montre ke Kris la ta dwe mouri pou padon peche tout moun.

Ki apwòch evanjelizasyon lapòt la te sèvi pou preche Jwif yo Levanjil la? Li te kòmanse nan sa moun yo konnen; li te pran istwa pèp Izrayèl la konnen. Konbyen tan pèp Izrayèl la te pase nan dezè a? Kilès ki te dènye ke Jwif yo konnen byen pou rive nan listwa Redanmsyon an ke yo pa t jij nan Izrayèl? Konbyen nasyon Bondye te chase devan pèp Izrayèl lan? Ki gwo temwayaj Bondye te rann pou David? Selon vèsè 15 la, moun sa yo ki t ap dirije sinagòg la, èske yo te deja konvèti? Eske tout detay nan lavi Jezi, lanmò ak rezirèksyon li te predi deja nan Ansyen Testaman? Selon vèsè 39, èske lalwa Moyiz la kapab sove moun?

Kòman moun yo te santi yo, aprè Pòl te fin bay gwo mesaj sa a? Mesaj Pòl la te pote anpil fwi, paske te gen anpil moun ki te konvèti, anpil patizan relijyon Jwif yo te konvèti epi te kenbe kontak ak misyonè yo pou yo jwenn enstriksyon pou yo kapab grandi nan lavi esprirityèl yo.

*II. Dezyèm diskou Pòl nan sinagòg la (v. 44-52)*
Nan 8 jou, Pòl ak Banabas te retounen pou esplike yo Pawòl Bondye, jou sa a, prèske tout vil la te reyini pou tande Pawòl Bondye, paske bri sou premye mesaj Pòl te bay la gentan gaye tout kote. Menm lè a, Satan kòmanse pèsekisyon li. Jwif yo pa t kontan, yo te kanpe nan sinagòg la epi yo kontredi tout sa apòt yo te di.

Bondye te la nan kontwòl pa fòs Sentespri a; li kenbe atansyon tout moun sou mesaj Pòl la. Moun yo pi enterese nan mesaj Levanjil la epi yo te koute avèk atansyon.

Pòl te pale ak Jwif yo pou montre yo se paske yo te rejete sali nan Jezikri a, y ap vire bò kote payen pou ba yo Levanjil la. Li te fè yo konnen ke Seyè a te chwazi I kòm yon limyè pou payen yo, li te dwe pote Levanjil la jouk nan dènye bout latè a. Lè payen yo te tande sa, yo te kontan, sa yo ke Seyè te chwazi te aksepte Levanjil la, yo te vin sove *(vèsè 48).* Sa vle di pou nou, gen anpil moun ki se ajan satanik ki p ap janm chanje ni sove. Si nou priye, evanjelize tout moun, se Sentespri a ki kapab konvenk moun pou yo konvèti; nou sèlman bezwen fè devwa nou.

Nan yon kanpay evanjelizasyon, nou toujou ap fè fas ak opozisyon satanik. Jwif yo te òganize yon woulo ak yon pèsekisyon ouvèt kont apòt yo epi yo te chase misyonè yo nan vil Antyòch nan peyi Pisidi.

Lapòt yo te fè sa Seyè a te di yo fè. Si yo pèsekite nou nan yon vil, ale nan yon lòt vil, si yo pa resevwa nou, souke pousyè pye nou. Se egzateman sa apòt yo te fè; yo te kite Antyòch pou ale nan Ikonyòm.

Nou va toujou jwenn pèsekisyon sou wout nou, men, si nou kanpe fèm nan konfyans nou nan Seyè a, Bondye ap toujou ban nou laviktwa.

*Konklizyon:*
Leson jodi a t ap anseye nou sou ministè ekip misyonè a nan Antyòch Pisidi, ki diferan ak Antyòch nan Siri. Nan Sinagòg nan lavi I sa, Pòl te eksplike tout fasèt Levanjil la ba yo. Li te kòmanse ak sa yo te konnen pou mennen yo nan sa yo pa t konnen. Sa te fè mesaj la te pote anpil fwi ak konkou Sentespri a. Nan demen, tout lavil la te reyini pou vin tande ekip la ankò. Sa te fè Jwif yo te vin jalou lè yo wè kantite moun ki t ap vin aksepte mesaj Levanjil la. Lè sa a, yo te fòse ekip misyonè a kite Antyòch, yo te pran wout ou Ikonyòm.

Plan Satan, se toujou anpeche Levanjil la fè wout li. Li toujou fè opozisyon paske li wè moun ap tounen vin jwenn Kris la. Men nou bezwen kenbe fèm nan konfyans nou nan Bondye. Se li k ap fè nou genyen batay la.

+18493598495
Gwoup watsap
Josué JEAN PIERRE
(El negr ⚫️ de Dios)

Devwa yo

1) Ki efè premye reyinyon an te fè sou moun lavil Antyòch yo?

2) Kòman atmosfè dezyèm reyinyon an te ye?

3) Eske entèvansyon Jwif yo te kraze reyinyon an?

4) Ki repwòch Pòl te bay Jwif yo ki t ap kanpe kont Levanjil la?

5) Lè Jwif yo te wè anpil moun konvèti, ki dènye reyaksyon yo te fè kont apòt yo?

15/05/2026

https://chat.whatsapp.com/ChYi0h0pp2Z0IDiUdBweeN?mode=gi_t

08/05/2026

08/05/2026

*LESON DOMINIKAL 10 ΜΕ 2026*

*Tit: Pòl ak Banabas nan Lil Chip*

*Lekti: Travay Apòt 13:4-12*

*Tèks dò:*
*Bondye pa gade sou figi m oun. Li kontan ak tout moun nan tout nasyon ki gen krentif pou li epi ki fè sa ki dwat devan li. Travay Apòt 10:34,35*

*Entwodiksyon:*
Nan leson pase a nou te wè kòman Sentespri a te fè apèl ak premye misyonè yo. Banabas ak Pòl te dwe kite legliz yo pou yo t al preche Levanjil la kote ki pa t ko tande I.

Nan karyè misyonè li, lapot Pòl te fè 4 gwo vwayaj ki te mennen I nan plizyè peyi epi li te fonde anpil legliz. Prèske tout vwayaj sa yo te gen pou depa ak retou legliz lavil Antyòch nan peyi Siri.

Jodi a, nou va wè kòmansman premye vwayaj la. Nou espere sa kapab ede nou nan lèv misyonè pa nou.

*I. Kòmansman premye vwayaj misyonè a (vèsè 4-5)*
Premye ekip misyonè a te konpoze ak 3 moun: *Banabas, Pòl ak Jan-Mak.* Aprè benediksyon legliz Antyòch la, yo te di orevwa epi yo pati. Yo te pati sou lòd Jezi te bay nan *Matye 10:6-15: "Ale preche, di yo ke wayòm Bondye a tou pre, pa pote anyen avèk nou, paske kote n ap rive, nou kapab viv la, si yo pa resevwa nou, pa rete, souke pousyè pye nou. Si yo pèsekite nou nan yon vil, ale nan yon lòt vil".*

Nou kwè ke tout prensip sa yo ke Kris te bay kapab byen aplike nan kwazad evanjelizasyon epi pou tout misyonè k'ap deplase de yon kote ak yon lòt.

Bib la di Sentespri a te bay lòd pou Pòl ak Banabas kite legliz Antyòch la, men sanble li pa t di yo ki kote yo dwe ale. Nou li nan vèsè 4 la ke misyonè yo te pran yon batiman pou ale Lil Chip. *Travay Apòt 4:36 di nou ke Banabas te moun Lil Chip. Misyonè yo fè sa Jezi te di yo pou fè nan Travay 1:8*

"Kòmanse lavil Jerizalèm", sa vle di lakay yo.*Lil Chip te "Jerizalèm"* pa Banabas la. Se la yo kòmanse anvan yo ale nan kote ki pi Iwen.

Sa gen 2 leson pou nou:
1) Kote Pawòl Bondye ban nou direksyon ki klè, nou pa bezwen mande Seyè a pou montre nou chemen pou nou pran, se pou nou obeyi Pawòl Bondye ki ekri nan Bib la.

2) Fòk nou gen yon bon temwayaj lakay nou ak nan vwazinaj nou anvan nou ale pi Iwen. Si nou pa kapab yon bon misyonè bò lakay nou, nou p'ap kapab yon misyonè okenn kote.

Vèsè 5 lan di, lè misyonè yo rive lavil la, yo anonse Pawòl la nan sinagòg Jwif yo. Se yon patwon Banabas ak Pòl t ap swiv nan tout kote yo t ap pase: Kou yo te rive nan yon vil, yo te pran kontak ak Jwif yo epi yo bay yo nouvèl ke Mesi Jwif yo ap tann lan gentan vini, se Jezikri. Epi yo te eksplike Jwif yo tout Levanjil la. Aprè yo fin preche Levanjil la bay Jwif yo, yo pale ak moun lòt nasyon yo tou.

*II. Premye mirak Pòl la (vèsè 6-12)*
Ekip misyonè a te travèse tout Lil la jouk yo rive lavil Pafòs. Sanble pa t gen yon sinagòg nan vil sa. Lè yo te rive la, yo jwenn yon Jwif yo rele *Elimas oubyen Bajezi,* yon majisyen ki pran pòz yon pwofèt pral fè misyonè yo opozisyon.

_*A. Opozisyon nan travay la*_
Elimas oubyen Ba-jezi, majisyen jwif, fo pwofèt la te bon zanmi ak chèf zile a, Sèjiyis Polis. Chèf la te fè rele Banabas ak Pòl, paske li te vle tande pawòl Bondye. Satan te sèvi ak Elimas pou anpeche Sèjiyis Polis tande Levanjil la. "Li t ap detounen atansyon gouvènè a pou li pa t kwè". Gen anpil moun satan itilize konsa nan legliz lè mesaj ap preche pou kenbe yon lòt nan pale pou li pa tande sa k ap di a.

Pa janm mete nan tèt nou, si n ap preche Levanjil la, nou kapab preche I nan dousè. Okontrè, se anba anpil pèsekisyon ak opozisyon n ap rive preche Bòn nouvel la.

_*B. Pòl denonse atitid divinò a*_
Pòl te ranpli ak Sentespri a, li gade divinò a fiks epi li denonse sa l ye: Nèg ki gen tout kalite riz, nèg kwochi, plen ak tout kalite mechanste, pitit djab la, lènmi lajistis; èske ou p ap sispann vire travay Bondye lanvè? Mwen sipoze, misye t ap pare pou li reponn. Men Pòl kontinye pale, ak otorite Bondye, li pwononse pou nonm lan vin avèg pou yon tan. Menm lè a yon gwo fènwa kouvri nonm lan, li t ap tatonnen epi li pa gen mo pou di devan pwisans Bondye. Avèk demonstrasyon pwisans Bondye a, tout moun te sezi, gouvènè a te kwè nan Levanjil la, li te aksepte Jezi kòm Sovè li. Doktrin Kris la te frape li, li pa t kapab rete san li pa fè anyen.

Evanjelizasyon pa posib san pwisans Lespri Bondye a. Ou bezwen disponib pou Sentespri a travay nan ou, epi lè li bezwen sèvis ou, ou dwe toujou tou pare pou obeyi I.

Kisa ki te pase ak divinò a? Sanble Elimas pa t aksepte Kris kom Sovè li. Gen anpil moun ki di fòk lanfè gen moun pa l', konsa yo aksepte pou yo al nan lanfè. Men moun ki pou Bondye ap toujou reponn apèl Levanjil pou yo aksepte I. Toujou gen anpil moun ki pa kwè nan Levanjil la. Ki dispozisyon nou pou predikasyon Levanjil la?

Mwen swete nou tout prèt pou evanjelize tout kote nou pase.

Leson jodi a t ap anseye nou sou ekip misyonè a ki te rive nan lil Chip. Se te kòmansman premye vwayaj misyonè ekip la ki te fòme ak Pòl, *Banabas epi Jan Mak.* Chip se te kote Banabas te sòti. Ekip la te kòmanse travay la lakay youn nan yo. Sa montre Banabas te gen bon temwayaj nan Zòn li te sòti a. Anpil moun ka al preche deyò, men yo pa ka fè sa lakay yo paske temwayaj yo pa kòrèk. Se te nan Chip Pòl te fè premye mirak li tou lè li te fè yon majisyen Jwif ki rele Bajezi te vin avèg pou yon ti tan akòz li t ap fè opozisyon ak ekip misyonè a nan predikasyon Levanjil la. Levanjil la pa preche san pwisans. Nou jwenn pwisans nan li labib, lapriyè ak yon vi konsakre pou Bondye. *Moun k ap viv nan peche pa p gen pwisans.* Konsa pou nou kapab pote laviktwa sou opozisyon n ap jwenn nan predikasyon Levanjil la, fòk lavi nou pwòp devan Bondye.

+18493598495
Gwoup watsap

Josué JEAN PIERRE
( El negr ⚫️ de Dios )
*Devwa yo*

1) Konbyen gran vwayaj misyonè Pòl te fè nan karyè misyonè li?

2) Ki kote ki se pwen depa ak retou vwayaj yo?

3) Konbyen misyonè ki te konpoze ekip premye vwayaj la?

4) Ki lòd Jezi te bay disip yo nan Matye chapit 10?

5) Poukisa se nan Lil Chip ekip la te ale?

6) Abityèlman, ki premye kote ekip la rantre pou rann temwayaj nan chak vil?

7) Ki gwo travay ekip la te fè nan vil Pafòs?

8) Ki mirak ekip la te fè nan vil Pafòs?

9) Eske nou kapab evanjelize san nou pa gen pwisans Bondye?

10) Eske gen yon pwogram evanjelizasyon nan legliz pa ou?
Kòman sa ap mache?

-

07/05/2026

30/04/2026

*LESON DOMINIKAL 3 ME 2026*

*Tit: Lespri Bondye rele Banabas ak Pòl pou yon misyon mondyal*

*Lekti: Travay Apòt 13:1-3*

*Tèks dò: Yon jou, yo t ap fè sèvis pou Bondye, yo t ap fè jèn lè Sentespri a di yo: Mete Banabas ak Sòl apa pou mwen, pou yo fè travay mwen chwazi pou yo fè a. Travay Apòt 13:2*

*Entwodisyon:*
Nan leson pase a, nou te wè sa Bondye te fè pou lapòt Pyè nan lavil Jerizalèm. Bondye te delivre Pyè nan prizon an epi li te jije wa Ewòd. Jodi a n ap kòmanse ak etid *Travay Apòt chapit 13 la.* Pasaj sa kontinye ak istwa legliz lavil Antyòch nan peyi Siri ki te kòmanse nan *Travay Apòt chapit 11 la. Avèk chapit 13 la,* nou rive nan yon lòt faz liv Travay Apòt la, se misyon apot la pami payen yo.

Pou kòmanse ak leson nou jodi a, nou pral konsantre nou sou ministè Lapòt Pòl pami payen yo. Sa gen anpil enpòtans pou nou wè Pòl ak ekip li nan travay evanjelizasyon an. *Travay sa ki te anba pouvwa Sentespri a te pèmèt Legliz Jezikri a fè anpil pwogrè.*

Legliz lavil Antyòch la te devni *yon sant misyonè.* Se legliz sa a ki te voye premye misyonè yo pou yo ale pote Levanjil la kote ki pa t ko tande l. Ann gade kijan sa te rive epi ki enpòtans sa genyen pou nou jodi a.

*I. Sentespri a fè apèl 2 lidè nan legliz la.*
Kòm nou deja di, gen 2 vil Antiyòch: *Antyòch nan peyi Siri ak Antyoch nan peyi Pisidi* ke nou va rankontre pi devan nan *Travay Apòt chapit 13.* Antyòch nan *peyi Siri te yon gran vil avèk 500 mil abitan,* li te yon gran sant komèsyal. *Antyòch sa ki te vil kapital peyi Siri te devni dezyèm sant evanjelizasyon pou legliz primitiv la.*

Legliz Antyòch la te konsakre I *nan adorasyon, jèn ak lapriyè.* Nan yon jounen jèn ak lapriyè, *Sentespri a te pale byen klè pou legliz la mete Pòl ak Banabas apa pou y al anonse Levanjil la nan lòt peyi.* Sa vle di, Banabas ak Pòl ta dwe di legliz la orevwa. Eske fidèl legliz Antyòch yo te dwe dako ak yon desizyon konsa? *Sonje se te Banabas ak Pòl ki te premye dirijan legliz la;* se yo menm ki te fòme legliz la.

Eske te gen lidè ki deja prepare pou ranplase Banabas ak Pòl? *Vèsè premye a di nou te gen pwofèt ak doktè nan legliz la.* Doktè nan lang grèk la vle di moun ki anseye, ki bay enstriksyon. Vèsè premye a nonmen *Simeyon, Lisivis ak Manayen ki t ap dirije legliz la ansanm ak Banabas ak Pòl* nan lè Sentespri a te mande pou voye de (2) fondatè legliz la yo ale. Paske yo te kite Sentespri a dirije yo. Twa (3) lidè sa yo te kapab mennen legliz la nan yon kwasans espirityėl.

Alò, dèske se te Sentespri a ki te pale, tout moun te vin dako pou kite Banabas ak Pòl ale, malgre yo t ap fè bon travay. *Legliz la te fè yon gran sèvis de konsekrasyon kote tout ansyen yo te mete men sou tèt misyonè yo pou konsakre yo pou ministè evanjelizasyon.*

Ide santral nou jwenn nan vèsè sa yo se Sentespri a k ap dirije tout bagay. Li chwazi misyonè yo epi li voye yo kote I vle. Koman sa ye nan legliz nou? Eske se Sentespri a oubyen entèlijans lòm ak lachè a k ap dirije legliz pa nou?

*II. Evanjelizasyon mondyal ak legliz lokal.*
Tout legliz yo ansanm genyen devwa pou evanjelize lemonn antye. Pa gen yon legliz ki kapab jistifye endiferans li anvè gran tach sa a. Si yon legliz pa gen yon pwogram devanjelizasyon oubyen si li pa enterese nan evanjelizasyon, li pèdi rezon egzistans li. Nan bidjè chak legliz ta dwe genyen yon pousantaj pou lamisyon mondyal. Chak legliz gen pou rann kont devan Bondye sou jerans lajan li pandan ke gen anpil milyon moun ki pa konnen laverite Levanjil la.

Chak kretyen gen obligasyon pou obeyi kòmandman Kris la *(Matye 29:18-20; Mak 16:15).* Chak moun ki sove dwe gen yon sousi pou moun pèdi yo. Si nou vle reyèlman nan kominyon avèk Kris, nou dwe sousye nou de sa yo k ap mouri nan peche yo, paske se pou yo Kris te mouri. *Bondye rele chak kretyen pèsonèlman pou I priye, ale bay temwayaj epi fè sakrifis pou kòz Levanjil la.*

Bondye bezwen tout kalite moun nan chan travay li: *Evanjelis, anseyan, doktè, travayè, tout moun ki gen yon don espirityèl oubyen kèk talan natirèl. Chak kretyen ta dwe konprann nesesite pou li yon temwen pou Kris. Eske ou deside pou reponn Mèt la: *"Men mwen, Seyè, voye m."*

*Konklizyon:*
Leson jodi a te anseye nou sou apèl Pòl ak Banabas pou al preche Levanjil la nan lemonn antye. Nan *Travay 1:8,* Bondye te gentan bay lòd pou Levanjil la preche: *Jerizalèm, Jide, Samari epi nan dènye bout latè.* Ak apèl Pòl epi Banabas pou ale kòm misyonè, Levanjil la ta praI touche dènye bout latè. Lapot Pòl 'pra I sèvi tankou yon enstriman nan men Bondye pou travay sa.

*"Yon legliz ki pa yon legliz misyonè, li se yon legliz demisyone",* Evanjelizasyon ak lèv misyonè dwe pwen santral chak legliz. Lè nou pa fè sa, Bondye ap itilize tout mwayen pou akonpli plan li. Nou kwè ke Bondye ap itilize sitiyasyon difisil peyi Ayiti a pou kretyen yo ka gaye nan lemonn antye pou preche Levanjil la. Eske ou disponib nan men Seyè a kòm enstriman pou pote Levanjil la? Ou ka priye pou moun ale, bay lajan pou moun ale epi ale ou menm menm.

*Koman legliz ou ye nan kesyon evanjelizasyon an?*

+18493598495
Gwoup watsap
*Josué JEAN PIERRE*
*(El negro ⚫️ de Dios)*

*Devwa yo*

1) Vrè ou fo: Dezyèm sant misyonè a te tabli nan Antyoch nan peyi Pisidi ki se yon peyi nan Lazi Minè.

2) Ki gwo pwogram dezyèm sant legliz primitiv la te genyen ki te fè li grandi? Eske nou kapab genyen menm pwogram sa yo tou pou grandisman legliz?

3) Kisa Lespri Bondye a te di byen klè pou kretyen yo fè? Kòman Lespri a te rive di sa? (Nou kwè li te travay nan lespri moun yo pou yo te eksprime verite sa a.)

4) Ki reyaksyon legliz lè yo tande fòk fondatè yo kite?

5) Site 5 dirijan legliz Antyòch te genyen lè sa a. Nan ki kapasite yo t ap sèvi Bondye nan legliz la?

6) Vrè ou fo: Wòl yon dirijan legliz se prepare lidè ki kapab pran reskonsabilite nan legliz la.

7) Kisa moun legliz yo te fè pou yo voye Pòl ak Banabas ale?

8) An reyalite, ki pèsonaj ki t ap dirije legliz Antyoch?

9) Ki rezon egzistans chak legliz sou latè?

10) Ki gwo sousi legliz ta dwe genyen jodi a?

11) Eske ou angaje tèt ou nan lèv misyonè?