Pieu de Port-au-Prince, Nord

24/08/2026

Gen jou nou santi lafwa nou solid 💪🏾… gen lòt jou nou jis ap eseye kenbe 😅. Se youn nan bagay ki fè Sòm yo tèlman espesyal: yo pale ak nou nan tout kalite moman.

Semèn sa a, padan n ap li Sòm 49–51; 61–66; 69–72; 77–78; 85–86, ann pran yon ti moman pou nou sonje sa Bondye deja fè pou nou. Pafwa, se lè nou sonje sa li te fè yè, nou jwenn fòs pou nou fè li konfyans jodi a. 🙏🏾✨

https://www.churchofjesuschrist.org/study/manual/come-follow-me-for-home-and-church-old-testament-2026/35?lang=hat

17/08/2026

Ki sa sa vle di pou nou lè nou di: “Seyè a se Bèje mwen”?

Sa vle di nou chwazi fè li konfyans. Nou kite li gide pa nou, menm lè nou poko wè tout chemen an. Nou konnen nou ka jwenn fòs nan li lè nou febli, rekonfò lè kè nou lou, epi espwa lè lavi a pa fasil.

Se bèl mesaj sa a ki pral akonpaye nou nan etid Vini, Suiv Mwen semèn sa a ke nou jwenn nan Sòm 1–2; 8; 19–33; 40; 46.
https://www.churchofjesuschrist.org/study/manual/come-follow-me-for-home-and-church-old-testament-2026/34?lang=hat

Sòm yo se pawòl ki soti nan kè moun ki te aprann chèche Bondye nan tout kalite moman: nan lajwa, nan lapenn, nan laperèz, nan rekonesans ak nan espwa.

Pandan n ap etidye yo, ann chèche yon bagay ki ka ede nou konnen Senyè a pi byen, santi lanmou li epi rekonèt fason li ap gide nou pèsonèlman.

Petèt semèn sa a, yon Sòm ap vin tounen Sòm pa w la, youn ou pral retounen ladan l chak fwa ou bezwen sonje ke Bèje a toujou la.

12/08/2026

Make dat sa nan kalandriye nou!

29 ak 30 Dawout 2026, Prezidans Pye Pòtoprens Nò ap tann nou pou Konferans Pye a, sou tèm: « Jezikri se chemen an », ke nou jwenn nan Jan 14:6.

Nou envite tout manm ak zanmi Legliz la vin pataje moman espesyal sa a avèk nou.

Gade flyer la pou tout detay sou orè, sesyon ak adrès la.

Pataje envitasyon an ak yon moun ou ta renmen wè nan konferans lan. N ap tann nou!

10/08/2026

Poukisa bon moun konn pase nan gwo eprèv, pandan pafwa moun k ap fè sa ki mal sanble ap viv byen? Se yon kesyon ki ka vin nan lespri nou lè lavi a pran yon direksyon nou pa t atann.

Liv Jòb la montre nou yon moun ki te fidèl ak Bondye, men ki te wè lavi l chanje nèt. Li te pèdi anpil, li te soufri, e menm zanmi l yo te kòmanse mande si sa k te rive l la pa t yon konsekans yon bagay li te fè.

Nan mitan tout sa, Jòb te chèche konprann. Li te poze kesyon, li te pale ak Bondye, li te eksprime doulè li. Men eprèv la pa t fè l lage lafwa li.

Istwa Jòb la raple nou yon bagay enpòtan: nou pa bezwen gen tout repons yo pou nou rete fidèl. Kesyon yo ka toujou la, sitiyasyon an ka poko chanje, men sa pa anpeche nou pwoche bò kote Senyè a epi kontinye mache avèk li.

Sonje ke pafwa, lafwa se pa konprann tout sa k ap pase. Se konnen nan kiyès nou mete espwa nou, menm lè nou poko wè kijan istwa a pral fini.

Semèn sa a, annou dekouvri ansanm sa eksperyans Jòb la ka aprann nou sou lafwa, eprèv ak konfyans nan Senyè a. Epi di nou, ki leson nan istwa Jòb la ki pale plis ak ou?
https://www.churchofjesuschrist.org/study/manual/come-follow-me-for-home-and-church-old-testament-2026/33?lang=hat

03/08/2026

Èske w janm gade dèyè nan lavi w epi w di: "Si sa pa t rive, mwen pa t ap la jodi a..."?

Gen kèk bagay ki sanble se aza : yon rankont, yon reta, yon opòtinite... Men, pafwa se sèlman aprè nou fin pase moman an nou rann nou kont Bondye t ap gide chak etap yo.

Se egzakteman sa nou wè nan liv Estè a.

Yon jèn fi òfelen pa t janm imajine li t ap vin rèn. Men Bondye te deja prepare chemen an. Lè pèp li a te bezwen yon moun pou kanpe pou yo, Estè te la.

Se lè sa a Madoche te di l: "Se pou tan sa a menm... ou la a jounen jodia." (Estè 4:14)

Petèt pawòl sa yo pa t sèlman pou Estè.

Petèt yo pou ou menm tou.

Kèlkeswa kote ou ye jodi a, Bondye ka sèvi avèk ou pou fè yon diferans nan lavi yon lòt moun.

📖 Nou envite w etidye leson Vini, Suiv Mwen pou semèn sa a epi dekouvri kijan Senyè a ap travay nan lavi nou, menm lè nou pa toujou remake sa. https://www.churchofjesuschrist.org/study/manual/come-follow-me-for-home-and-church-old-testament-2026/32?lang=hat

❤️ Si mesaj sa a touche ou, pa bliye pataje l ak yon moun ki ka bezwen sonje ke Bondye toujou gen yon plan pou lavi li.

27/07/2026

Apre anviwon 70 ane nan kaptivite, Senyè a te fè yon chemen pou pèp Izrayèl la retounen Jerizalèm. Li te rele Zowobabèl, Esdras ak Neyemi pou rebati tanp lan, retabli lwa li a, epi rekonstwi miray vil la. Malgre opozisyon ak tantasyon pou yo abandone misyon an, yo te rete fèm.

Lè ènmi yo te eseye fè Neyemi sispann travay la, li te reponn avèk konviksyon: "M ap fè yon travay enpòtan; mwen pa ka desann." (Neemi 6:3). Pawòl sa yo envite nou rete konsantre sou sa Bondye mande nou fè, san nou pa kite distraksyon oswa difikilte fè nou abandone.

Klike sou lyen ki anba a pou li tout leson semèn lan ke nou jwenn nan Esdras 1; 3–7; Neemi 2; 4–6; 8,
epi dekouvri kijan eksperyans Esdras ak Neyemi yo ka ede w rete fidèl pandan w ap fè "travay enpòtan" Senyè a konfye w la.
https://www.churchofjesuschrist.org/study/manual/come-follow-me-for-home-and-church-old-testament-2026/31?lang=hat

20/07/2026

Lè Wa Jozafa te aprann 3 gwo lame t ap vini pou atake Jida, premye reyaksyon li pa t prepare pou lagè. Li te konnen pèp li a pa t gen fòs pou fè fas ak yon menas konsa poukont li.

Olye li te kite laperèz pran kontwòl, li te rasanble tout pèp la nan tanp lan pou yo chèche Senyè a ansanm. Nan priyè li, li te rekonèt limit yo epi li te di: "Nou pa konnen kisa pou nou fè, men je nou sou ou." (2 Istwa 20:12)

Senyè a te gade nivo lafwa yo epi li te fè yo pwomès sa: "Nou pa bezwen goumen nan batay sa a. Rete fèm... pa pè ni dekouraje, paske Senyè a ap avèk nou." (2 Istwa 20:17)

Nou menm tou, lavi konn mete nou devan eprèv, enkyetid ak desizyon ki depase kapasite nou. Men, menm jan ak Jozafa, nou ka chwazi vire jwenn Senyè a epi mete konfyans nou nan li.

Nan semèn sa a, pandan w ap etidye 2 Istwa 14–20; 26; 30, reflechi sou ki batay w ap mennen ki twòp pou ou e ke w bezwen konfye Senyè a.
https://www.churchofjesuschrist.org/study/manual/come-follow-me-for-home-and-church-old-testament-2026/30?lang=hat

Sonje, kèlkeswa sa w ap travèse jodi a, kenbe je w fikse sou Senyè a, paske li toujou fidèl pou gide moun ki chèche li.

13/07/2026

Lè tout bagay sanble ap tonbe, èske li toujou posib pou rete fidèl? Se kesyon leson semèn sa a envite nou reflechi sou li.

Malgre anpil mirak pwofèt Elize te fè, pèp Izrayèl la te kontinye vire do bay Senyè a. Konsekans lan te grav: Wayòm Nò a te tonbe anba men Asiryen yo, epi Wayòm Jida a te plonje nan idolatri.

Men, nan mitan tout fènwa sa a, te gen de wa ki te chwazi fè sa ki dwat: Ezekyas ak Jozyas. Youn te mete tout konfyans li nan Senyè a devan yon lènmi ki te sanble envenkib. Lòt la te kite pawòl Bondye a transfòme kè l epi li te ede pèp la retounen sou chemen alyans lan.

Klike sou lyen ki anba a pou etidye ansanm 2 Wa 16–25 epi chèche fason nou ka, menm jan ak Ezekyas ak Jozyas, mete konfyans nou nan Senyè Bondye nou an.

https://www.churchofjesuschrist.org/study/manual/come-follow-me-for-home-and-church-old-testament-2026/29?lang=hat

Apre etid ou a, pataje nan kòmantè yo yon leson oswa yon vèsè ki te touche kè ou.

06/07/2026

Gen moun ki panse yon pwofèt se sèlman yon moun ki pale nan non Bondye. Men, pafwa, se pa sèlman pawòl li ki temwaye de Kris la... se lavi l.

Lè n ap etidye istwa Elize, nou wè plis pase yon seri mirak. Nou wè yon Bondye ki bay espwa lè tout bagay sanble pèdi, ki geri sa moun pa t ka geri, epi ki fè yon ti bagay tounen yon gwo benediksyon.

Men leson an pa sèlman sou sa Bondye te fè nan tan lontan. Li envite nou poze tèt nou yon kesyon: Èske m ap remake fason Senyè a ap travay nan lavi mwen jodi a?

Petèt nou pa bezwen tann yon gwo mirak. Petèt nou bezwen menm priyè Elize te fè pou sèvitè li a:
"Senyè, tanpri louvri je m pou m ka wè." (2 Wa 6:17)

Nou envite w etidye 2 Wa 2–7 semèn sa a epi dekouvri kijan chak istwa kontinye temwaye de Jezikri ak pouvwa li pou beni lavi nou.
https://www.churchofjesuschrist.org/study/manual/come-follow-me-for-home-and-church-old-testament-2026/28?lang=hat

29/06/2026