Pieu de Port-au-Prince, Nord

25/05/2026

Pafwa nou fè efò pou nou chanje, pou nou vin pi bon, pou nou rete fidèl ak Bondye… men feblès, presyon lavi a oswa tantasyon ka fè nou tonbe ankò. Nan moman konsa, li fasil pou nou santi nou dekouraje oswa panse nou twò lwen pou Bondye ede nou. Men, nan leson semèn lan ke nou jwenn nan Jij 2–4 ; 6–8 ; 13–16, nou rann nou kont ke Bondye pa janm sispann bay pitit li yo yon lòt chans.

Malgre pèp Izrayèl la te kontinye vire do ba li epi suiv move enfliyans ki te antoure yo, li te toujou tande kri yo lè yo te repanti. Pou ede yo pi byen nan pwosesis sa, li te mete jij, kèk moun ki te egzèse lafwa ak kouraj, pou delivre yo epi ede yo retounen nan alyans yo te fè avèk li.

Chapit sa yo raple nou ke Bondye toujou pare pou ede nou leve apre nou tonbe. Kèlkeswa kantite fwa nou fè erè, gras li toujou disponib pou moun ki chwazi retounen jwenn li avèk yon kè sensè.

Tanpri, klike sou lyen sa pou w ka gen aksè ak tout leson an :
https://www.churchofjesuschrist.org/study/manual/come-follow-me-for-home-and-church-old-testament-2026/22?lang=hat

18/05/2026

Apre anpil ane ap mache nan dezè a, pèp Izrayèl la te finalman rive nan yon moman enpòtan nan istwa yo. Bondye te akonpli pwomès li te fè zansèt yo depi lontan, yo te sou wout pou antre nan tè pwomiz la. Men, menm lè benediksyon an te toupre, chemen an pa t vin pi fasil. Devan yo te gen rivyè Jouden an pou travèse, gwo mi Jeriko yo ki te sanble enposib pou kraze, ansanm ak lòt pèp ki te puisan epi ki pa t vle suiv Senyè a. Anplis de tout sa, Moyiz, pwofèt ak dirijan yo te toujou konte sou li a, pa t la ankò. Se Jozye ki te gen responsablite pou dirije pèp la nan nouvo etap sa a.

Li fasil pou imajine jan anpil nan yo te ka santi yo enkyè, fèb, oubyen menm pè devan kantite defi ki t ap tann yo. Men Bondye pa t kite yo poukont yo, nan mitan tout defi sa yo, li te bay Jozye yon mesaj ki te kapab bay tout pèp la espwa ak kouraj : “Rete fèm epi pran kouraj.” Li te vle pèp la konprann ke fòs yo pa t depann de kantite moun yo te genyen, ni de kapasite militè yo, men vrè fòs la soti nan Bondye. Se poutèt sa li te pwomèt yo nan Jozye 1:9 : “Senyè a, Bondye w la, ap toujou avèk ou kelkeswa kote w pase.”

Jodi a tou, nou chak konn fè fas ak pwòp rivyè Jouden pa nou kote moman difisil, desizyon ki lou, pwoblèm ki sanble twò gwo, oubyen batay pèsonèl fè nou santi nou pè oubyen dekouraje. Gen kèk mi Jeriko nan lavi nou ki ka sanble enposib pou kraze avèk pwòp fòs pa nou. Sonje, menm jan Bondye te mache devan pèp Izrayèl la, li kontinye mache avèk pitit li yo jodi a. Lè nou kontinye avanse avèk lafwa, menm lè nou pa wè tout repons yo touswit, Senyè a kapab ouvri chemen kote pa t sanble gen chemen ditou. Li kapab fè mèvèy devan je nou epi ede nou depase sa nou te panse ki te enposib.

Tanpri klike sou lyen sa pou w ka li tout leson an ke nou jwenn nan Jozye 1–8; 23–24:
https://www.churchofjesuschrist.org/study/manual/come-follow-me-for-home-and-church-old-testament-2026/21?lang=hat

18/05/2026

Pa rate okazyon sa pou w vinn nouri nanm ou nan bèl konferans sa.

Nap tann ou

11/05/2026

Gen kèk vwayaj ki chanje yon moun pou tout lavi, pou pitit Izrayèl yo, se te dezè a. Chak jou, Bondye te ba yo manje soti nan syèl la. Chak etap, li te montre yo chemen an. Chak eprèv, li te aprann yo gen plis konfyans nan li. Menm apre tout mirak sa yo, Moyiz te konnen pi gwo danje a pa t dezè a, mem se te pito bliye Bondye lè lavi a t ap vin pi fasil. Se poutèt sa, nan dènye pawòl li yo, li te sipliye pèp la pou yo pa bliye Senyè a.

Pafwa nou menm tou nou tankou pitit Izrayèl yo: Nou priye anpil nan tan difisil, men lè benediksyon yo vini, nou konn distrè, nou konn bliye kiyès ki te pote nou atravè tanpèt la. Men Bondye pa janm bliye nou. Li toujou la: nan priyè ki fèt an silans, nan jou nou santi nou fèb, nan moman nou bezwen direksyon, menm nan dezè espirityèl nou yo.

Semèn sa a, pandan n ap etidye Detewonòm 6–8; 15; 18; 29–30; 34, ann fè yon ti poz pou sonje kote Bondye te jwenn nou, sa li deja fè pou nou, ak kote li toujou ap mennen nou. Paske lè nou sonje Senyè a, lafwa nou vin pi fò, e chemen an vin pi klè.

Tanpri klike sou lyen sa pou w aprann plis de leson an:
https://www.churchofjesuschrist.org/study/manual/come-follow-me-for-home-and-church-old-testament-2026/20?lang=hat

04/05/2026

Pandan vwayaj pèp Izrayèl la nan dezè a, yo te temwen anpil mirak. Bondye te delivre yo, li te gide yo, epi li te pran swen yo chak jou. Men malgre tout sa, te gen anpil moman kote yo te kite laperèz ak dout pran plas lafwa yo. Malgre yo te nan wout pou rantre nan tè Bondye te pwomèt yo a, yo te manke gen konfyans nan li.

An reyalite, vwayaj la pa t dwe pran 40 an pou soti nan dezè Sinayi rive nan tè Pwomiz la nan Kanaan. Distans lan pa t tèlman long vre, men se pito tan sa a yo te bezwen pou kouvri distans ant moun yo te ye a ak moun yo te kapab vini kòm pèp alyans Bondye a.

Sa dwe fè nou reflechi sou pwòp lavi pa nou. Pafwa, se pa chemen an ki long, men se kè nou ki bezwen chanje. Se pa paske Bondye pa ouvè chemen an, men paske pafwa nou poko pare pou fè li konfyans nèt, men nou pito kite laperèz, dout, ak dezobeyisans ralanti pwogrè nou.

Envitasyon semèn lan se pou nou mete konfyans nou nan papa nou ki nan syèl la, rete fidèl, epi avanse avèk kouraj, paske vrè vwayaj la pa sèlman sou kote nou prale a, men sou moun nou ap vin tounen pandan n ap mache avèk li. Sonje, lè nou chwazi lafwa, menm piti, li ka ede nou grandi epi pwoche pi pre moun Bondye vle nou vini an.

Tanpri klike sou lyen sa pandan wap aprann plis de leson semèn lan ke nou jwenn nan
Resansman 11–14; 20–24; 27:
https://www.churchofjesuschrist.org/study/manual/come-follow-me-for-home-and-church-old-testament-2026/19?lang=hat

27/04/2026

Egzòd 35–40 · Levitik 1; 4; 16; 19

Kite Ejip te yon gwo etap pou pèp Izrayèl la. Yo te jwenn libète apre anpil ane esklavaj, men menm avèk delivrans sa a, Bondye te gen yon plan ki te ale pi lwen pase sa. An reyalite, objektif li pa t sèlman pou chanje sitiyasyon yo, men transfòme lavi yo paske li te vle yo vini sen.

Pou ede yo nan transfòmasyon sa, Bondye te mande yo bati yon tabènak, yon kote ki sen kote yo te ka vin jwenn li. Li te ba yo lwa ak alyans pou gide yo, epi pou ede yo aprann viv pi byen. Epi atravè sakrifis yo, li te montre yo ke padon posib. Tout bagay sa yo te la pou mennen yo vin jwenn Jezikri.

Menm jan an tou jodi a, nou gen tanp. Se kote nou ka ale pou nou pwoche pi pre Senyè a, renouvle angajman nou, epi santi prezans li nan lavi nou. Se menm envitasyon an nou resevwa jodi a: kite sa ki kenbe nou dèyè, epi vin pi pre li chak jou. Paske an reyalite, sentete pa yon bagay ki rive yon sèl fwa, se yon chemen nou aprann mache chak jou, avèk lafwa, e se nan Jezikri nou jwenn fòs pou nou kontinye mache sou chemen sa a.

🔗 Aprann plis de leson semèn lan pandan wap klike sou lyen sa:

https://www.churchofjesuschrist.org/study/manual/come-follow-me-for-home-and-church-old-testament-2026/18?lang=hat

20/04/2026

Gen yon verite ki pa toujou fasil pou nou admèt: nou pa toujou rete fidèl ak angajman nou fè ak Bondye. Gen moman kote nou te vrèman sensè, kote nou te santi nan kè nou ke nou pare pou obeyi, pou fè sa ki dwat, pou mache nan chemen li, men lavi gen yon fason pou teste desizyon sa yo. Tan pase, repons yo pa vini jan nou te espere, epi piti piti, san bri, kè nou kòmanse pran distans.

Se pa toujou yon gwo chanjman ki fè nou vire do, pafwa se jis enpasyans, laperèz, oswa dout ki antre tou dousman. Se egzakteman sa ki te rive ak pèp Izrayèl la. Yo te pwomèt pou yo obeyi Senyè a, men pandan yo t ap tann, yo te vin chèche yon bagay yo te ka wè, yon bagay yo te ka kontwole. E si nou reflechi byen, nou menm tou nou konn fè menm bagay la nan lavi nou.

Men sa ki vrèman bay espwa nan istwa sa a, se pa feblès pèp la, men fidelite Bondye. Malgre tout sa yo te fè, li pa t abandone yo, li pa t sispann renmen yo ni sispann rele yo pou yo retounen bò kote li. Sa montre nou ke relasyon nou ak Bondye pa depann de pèfeksyon nou, men de lanmou ak pasyans li.

Petèt kesyon an pou nou semèn sa a pa sèlman si nou ap fè tout sa Senyè a mande nou fè, men si nou toujou dispoze retounen bò kote li, menm apre nou fin fè erè.

Pou nou aprann plis de chapit 19–20; 24; 31–34 nan liv Egzòd la, tanpri klike sou lyen sa a:
https://www.churchofjesuschrist.org/study/manual/come-follow-me-for-home-and-church-old-testament-2026/17?lang=hat

Toujou sonje, Bondye pa janm sispann chèche nou, li toujou pare pou rekòmanse avèk nou.

13/04/2026

Imajine w kanpe devan yon lanmè, san pon, san bato, san okenn fason pou travèse. Dèyè w gen presyon, devan w pa gen solisyon. Se egzakteman sa pèp Izrayèl la te viv, yon moman kote tout bagay te sanble bloke, san okenn chemen pou avanse.

Men nan mitan sitiyasyon sa a, Bondye pa t mande yo batay ni chèche solisyon pa yo. Okontrè, li te mande yo rete dousman, pa panike, epi pa eseye kontwole tout bagay, paske pafwa, lè nou rive nan limit nou, se la menm Bondye kòmanse fè mirak li.

Petèt jodi a ou menm tou ou ap fè fas ak yon sitiyasyon ki sanble san solisyon. Petèt ou ap mande tèt ou ki jan bagay yo pral rezoud. Leson semèn sa a envite w fè yon pa dèyè, respire, epi sonje ke ou pa pou kont ou. Bondye deja devan ou, menm si ou pa wè li. Li konnen chemen an, li kontwole tan an, epi li toujou fidèl ak pwomès li yo. Rete dousman, kenbe lafwa, epi gade kijan li pral aji nan lavi ou.

Tanpri pran tan semèn sa a pou w aprann plis de chapit 14-18 nan liv Egzòd la padan wap klike sou lyen sa.
https://www.churchofjesuschrist.org/study/manual/come-follow-me-for-home-and-church-old-testament-2026/16?lang=hat

06/04/2026

Nan Egzòd 7–13, nou antre nan yon moman enpòtan nan listwa pèp Izrayèl la kote yo tap viv anba esklavaj nan peyi Lejip pandan plizyè ane. Lavi yo te difisil, men, menm nan mitan sa, Bondye pa t bliye yo. Li te rele Moyiz, epi li voye li ansanm ak Arawon devan Farawon pou mande libète pou pèp li a.

Malgre kè Farawon te di, Bondye te manifeste pouvwa li atravè plizyè mirak, jiskaske li ouvri chemen pou pèp li a soti lib. Men apre delivrans lan, Bondye te mande yo pou yo toujou sonje jou sa a, paske li te konnen, sa t ap ede yo fè l plis konfyans nan nenpòt sa ki ta gen pou rive.

Istwa sa a pa sèlman pou pèp Izrayèl la, li pale ak nou tou jodi a. Nou tout gen moman nan lavi nou kote nou santi nou bloke, tankou pa gen solisyon, pa gen chemen. Men menm Bondye sa a toujou ap travay, li toujou wè nou, e li toujou ap prepare yon fason pou delivre nou, pafwa menm san nou pa reyalize li touswit.

Se poutèt sa, envitasyon an rete menm bagay la: Sonje. Sonje priyè li te deja reponn, sonje moman li te pwoteje ou, epi sonje lè li te fè ou pase nan sitiyasyon ou pa t panse ou t ap ka travèse. Paske lè nou sonje, lafwa nou vin pi solid, e nou aprann fè Bondye plis konfyans menm lè nou poko wè solisyon an.

Pran yon ti moman jodi a epi mande tèt ou : Ki jou nan lavi mwen Bondye te delivre m ke mwen pa dwe janm bliye?

Aprann plis nan leson an pandan w ap klike sou lyen sa a:
https://www.churchofjesuschrist.org/study/manual/come-follow-me-for-home-and-church-old-testament-2026/15?lang=hat

05/04/2026