14/05/2026
Theofilusi! Mappersakkami allakkanni siullermi oqaluttuuppakkit Jiisusip qanoq sulineranik ajoqersuineranillu aallaqqaataaniit ulloq qilaliartitaaffini tikillugu, apustilit qinikkani Anersaakkut Illernartukkut peqqusiffigereerlugit.
Anniarnermi toqunermilu kingornagut Jiisusip ajoqersukkani saqqummerfigisarpai amerlasuunik uppernarsaateqarluni ilumut uumagami, ullunimi 40-ni taakkununnga takutittarami Guutillu naalagaaffia eqqartortarlugu.
Nereqatigigamigillu peqquai Jerusalemi qimassanngikkaat utaqqissagaalli Ataatap neriorsuutigisaa – »taanna pillugu oqartunga tusarsimavassinga:
Johannesi imermik kuisisarpoq, ilissili ullut amerlanngitsut qaangiuppata Anersaamik Illernartumik kuineqarumaarpusi.«
Katisimatillutik Jiisusi aperaat: »Naalagaq, maannakkununa Israelikkunnut naalagaaffik kingumut pilersinniarit?« Akivai: »Piffissarititat nalunaaquttallunniit-akunneri Ataatap nammineq pissaanermigut aalajangigai ilissi ilisimasussaanngilasi.
Anersaalli Illernartup tikippasi pissatsitaajumaarpusi, nalunaajaasigissavassilu Jerusalemimi Judæamilu tamarmi Samariamilu nunarsuullu isua tikillugu allaat.«
Tamanna oqaatigereeramiuk isigitillugit qangattartitaavoq, nuissallu taakkununnga ersikkunnaarsippaa. Qangattarnerani qilammut nakkussitillugit angutit marluk qaqortunik atisallit akornanniileriataarput.
Taakkulu oqarput: »Galilæamiuususi! Sooq qilammut isigivisi? Jiisusi taanna ilissinnit qimagutitinneqarluni qilaliartitaasoq taamatut tikiuteqqikkumaarpoq, soorlu qilammukartoq takugissi.«
Taava Jerusalemimut uterput Uuliap Qaqqaanit Jerusalemip eqqannguani sabbatikkut ingerlavigisariatut ungasitsigisumiittumit. Illoqarfimmut pigamik inimut qullermut isersimaarfigisartakkaminnut majuarput ukuullutik: Petrusi Johannesilu, Jaaku Andreasilu, Filipi Tuumalu, Bartholomæusi Matthæusilu, Jaaku Alfæusip ernera Siimuullu zelotiusoq Judasilu Jaakup ernera. Taakku tamarmik isumaqatigiillutik qinusarnertik aalajangiuppaat, arnat, Jiisusip anaanaa Maria Jiisusillu qatanngutai ilagalugit. (ApS.1,1-14)
