10/09/2022
*KWASIDA A ƐTO SO ADUONU-NAN AFE NO MU (AFE C)*
(TWENTY-FOURTH SUNDAY IN ORDINARY TIME YEAR C)
*AKENKEN A EDI KAN (FIRST READING)*
Akenkan a efiri Nyansa Nhoma no mu 32:7-11, 13-14
Awurade ka kyerɛɛ Mose sɛ: “Siane kɔ, na wo man a wode wɔn firi Misraim asase so baeɛ no redi asɛmmɔne; wɔamane afiri kwan a mekyerɛɛ wɔn no so ntɛm; wɔayɛ nantwie ba a wɔaguo, na wɔasɔre no abɔ afɔdeɛ ama no aka sɛ: Israel, ‘yeinom ne w’anyame a wɔyii wo firii Misraim asase so baeɛ no.’ Na Awurade ka kyerɛɛ Mose sɛ: “Mahunu ɔman yi, na hwɛ, wɔyɛ ɔman a wɔn kɔn asene; na afei ma me kwan na me bo nhuru ntia wɔn, na memmene wɔn, na memfa wo menyɛ ɔman kɛseɛ.” Na Mose paa Awurade ne Nyankopɔn kyɛw sɛ: “Awurade, adɛn nti na wo bo huru tia ɔman a wode ahoɔden kɛseɛ ne nsa a ɛyɛ den kɔyii wɔn Misraim asase so baeɛ no? Kae Abraham, Isak ne Israel, wo nkoa a wokaa wɔn wo ara wo ntam see wɔn sɛ: Mɛma w’asefoɔ adɔɔso sɛ ɔsoro nsoromma, na asase a maka ho asɛm yi nyinaa, mede bɛma w’asefoɔ na wɔadi so akɔsi daa no.” Na Awurade nuu ne ho wɔ bɔne a ɔkaa sɛ ɔrebɛyɛ ne man no ho.
_Nea Nyame se ni._
*Gyeso Nnwom (Responsorial Psalm) Nnwom 50(51):1-2, 10-11, 15, 17 R/. Luke 15:18*
*G/: Mɛsɔre makɔ m’agya nkyɛn*
1. Onyankopɔn, hu me mmɔbɔ, sɛ w’adɔeɛ teɛ no,
wo mmɔborɔhunu a ɛdɔɔso nti pepa me mmarato.
Hohoro me ho firi m’amumuyɛ mu koraa,
na prapra me ho firi me bɔne mu. G/
2. Onyankopɔn, bɔ akoma a emu teɛ ma me,
na yɛ honhom foforɔ a aseɛ tim wɔ me mu.
Nto me mfiri w’anim ntwene,
na nyi wo kronkronyɛ honhom mfiri me so. G/.
3. Awurade, bue m’ano fafa,
na mede m’ano makyerɛ w’ayeyie.
Nyankopɔn afɔdeɛ ne honhom a abubuo;
Onyankopɔn, akoma a abubuo, na apɛkyɛ na worempoɔ. G/
*AKENKEN A ƐTO SO MMIƐNU (SECOND READING)*
Akenkan a efiri Ht. Paul nhoma a edikan a ɔkyerɛw komaa Timothy 1:12-17
Anuanom, meda Kristo Yesu, yɛn Awurade a ɔhyɛɛ me den no ase, sɛ wabu me ɔnokwafoɔ de me ahyɛ ɔsom no mu. Ɛwom sɛ na anka kane no, meyɛ mmusubɔfoɔ ne ɔtaafoɔ ne oniɛdenfoɔ, nanso wɔahu me mmɔborɔ, ɛfiri sɛ na mennim na meyɛɛ no gyeɛ a mannye mannie mu. Na yɛn Awurade adom dɔɔso boroo so gyidie ne ɔdɔ a ɛwɔ Kristo Yesu mu.
Ɛyɛ nokwasɛm a ɛsɛ sɛ wɔgye koraa, sɛ Kristo Yesu baa wiase bɛgyee nnebɔneyɛfoɔ a me na medi wɔn mu kan. Nanso yei nti wɔahu me mmɔbɔ, sɛ me a medi kan mu na Yesu Kristo bɛyi abodwokyɛre nyinaa adi de ayɛ wɔn a wɔrebɛgye no adie akɔ daa nkwa mu no nhwɛsoɔ.
Nanso mmerɛ santen hene, Onyankopɔn koro a ɔtease daa a wɔnhu no no, anidie ne animuonyam nka no, mmerɛ santen mfesanten. Amen!
_Nea Nyame se ni._
*AYEYI DWOM (GOSPEL ACCLAMATION)*
_Alleluia! Alleluia! 2 Corinthians 5:19_
Onyankopɔn wɔ Kristo mu a ɔrepata twe wiase fam ne ho, na wɔde nkabom asɛm no ahyɛ yɛn nsa
_Alleluia! Alleluia_
ASƐMPA (GOSPEL)
Asɛmpa no sɛnea Ht. Luka Kyerɛw mae 15:1-32
Na togyefoɔ ne nnebɔneyɛfoɔ no nyinaa twi bɛnee no sɛ wɔrebɛtie no. Na Farisifoɔ ne Atwerɛfoɔ no nwiinwii kaa sɛ: Oyi gye nnebɔneyɛfoɔ, na ɔne wɔn didi. Enti ɔbuu wɔn bɛ yi sɛ: “Mo mu nipa bɛn na sɛ ɔwɔ nnwanten ɔha na wɔn mu baako kɔyera a, ɔrennya aduɔkron nkron no ɛserɛ soɔ, na ɔnni deɛ wayera no akyi nkɔsi sɛ ɔbɛhu no? Na sɛ ɔhu no a, ɔde no bɔ ne kɔn ho, na n’ani gye. Na ɔba fie a, ɔfrɛfrɛ ne nnamfo ne n’afipamfoɔ boa ano ka kyerɛ wɔn sɛ: Mo ne me ani nnye, ɛfiri sɛ mahunu me dwan a ɔyeraeɛ no. Mese mo sɛ: Saa ara na anigyeɛ bɛba soro, ɔdebɔneyɛni baako a ɔsakyera n’adwene ho, sene nnipa tenenee aduɔkron nkron a ɛnhia wɔn adwensakyera.”
“Anaasɛ ɔbaa bɛn na ɔwɔ nnwetɛbena du, na emu baako yera a, ɔrensɔ kanea, na ɔmpra ɛdan no mu, na ɔnhwehwɛ yie nkɔsi sɛ ɔbɛhunu? Na ɔhunu a, ɔfrɛfrɛ ne nnamfo ne n’afipamfoɔ boa ano, na ɔka sɛ: Mo ne me ani nnye, ɛfiri sɛ mahunu me dwetɛbena a ɛyeraeɛ no. Saa ara na mese mo sɛ: Anigyeɛ ba Nyankopɔn abɔfoɔ anim ɔdebɔneyɛni baako a ɔsakyera n’adwene ho.
Na ɔse: ‘Onipa bi wɔ mmammarima baanu. Na wɔn mu akumaa no ka kyerɛɛ n’agya sɛ: ‘Agya, fa ahodeɛ a ɛbɛyɛ me dea no ma me! Na ɔkyɛɛ n’asetenadeɛ mu maa wɔn.’ Na anni da bi na ɔba kumaa no boaboaa ne nyinaa ano, na ɔtuu kwan kɔɔ akyirikyiri asase bi soɔ; ɛhɔ na ɔkɔbɔɔ ahohwie sɛee n’ahodeɛ nyinaa. Na ɔhweree ne nyinaa wieeɛ no, ɛkɔm kɛseɛ bi baa asase no so, na ɛfirii aseɛ hiaa no. Na ɔde ne ho kɔdanee asase no so hɔni bi; na ɔmaa no kɔɔ ne mfuo mu kɔhwɛɛ mprako. Na ne kɔn dɔɔ sɛ ɔde asɛhono a mprako no die no bi hyɛ n’afuru ma; nanso obiara amma no. Na n’ani baa ne ho soɔ no, ɔkaa sɛ: ‘Apaafoɔ ahe na m’agya nnie a wɔnnya aduane ma no mmoro soɔ; na me deɛ, ɛkɔm rekum me yi? Mɛsɔre makɔ m’agya nkyɛn, na mase no sɛ: Agya, mayɛ ɔsoro ne w’anim bɔne, na memfata sɛ wɔfrɛ me wo ba bio, na yɛ me sɛ w’apaafoɔ no mu baako!’
Na ɔsɔre baa n’agya nkyɛn. Na ɔda so wɔ akyirikyiri no, n’agya hunuu no, na ne yam hyehyee no, na ɔtutuu mmirika kɔyɛɛ no atuu, na ɔfee n’ano. Na ɔba no ka kyerɛɛ no sɛ: Agya, mayɛ ɔsoro ne w’anim bɔne, na memfata sɛ wɔfrɛ me wo ba bio. Ɛnna agya no ka kyerɛɛ ne nkoa sɛ: Momfa atadeɛ a ɛyɛ no mmra mmɛhyɛ no, na momfa pɛtea nhyɛ ne nsa ne mpaboa nhyɛ ne nan; na momfa nantwie ba a wadɔre sradeɛ no mmra mmɛkum no, na yɛnni, na yɛn ani nnye, ɛfiri sɛ, me ba yi wui, na wanyane bio; ɔyerae, na wɔahu no. Na wɔfirii aseɛ gyee wɔn ani.
Na ne ba panin no wɔ afuom; na ɔreba na ɔbɛn fie no, ɔtee sankuo ne asa. Na ɔfrɛɛ a*omfoɔ no mu baako bisaa no asɛm ko a asie. Na ɔsee no sɛ: ‘Wo nua aba, na w’agya akum nantwie ba a wadɔre sradeɛ no, ɛfiri sɛ ne nsa aka no nkwahosan mu. a ne bo fui, na wampɛ sɛ ɔkɔ mu. Ɛnna n’agya firii adi bɛkorɔkorɔɔ no.’ Na ɔbua see agya no sɛ: ‘Hwɛ mfirinhyia dodoɔ yi a mede ma*om woɔ, nso mentoo wo mmara da; nanso wommaa me abirekyie ba bi sɛ me ne me nnamfonom mfa nkɔgye yɛn ani da. Na wo ba yi a ɔne nnwamamfoɔ adi w’ahodeɛ no baeɛ ara pɛ deɛ, woakum nantwie ba a wadɔre sradeɛ no ama no.’ Na ɔsee no sɛ: ‘Ɔba, wowɔ me nkyɛn daa, na deɛ mewɔ nyinaa yɛ wo dea. Na ɛsɛ sɛ yɛn ani gyeɛ na yɛn bo tɔ yɛn yam, ɛfiri sɛ wo nua yi wui, na wanyane; ɔyerae, na wɔahu no.’’’
_Nea Awurade se ni._
