Официальная страница Евангелическо-Лютеранской Церкви в Грузии.
Богослужение проводится каждое воскресенье, в 11:00.
საქართველოს ევანგელურ-ლუთერული ეკლესიის ოფიციალური გვერდი.
ღვთისმსახურება ყოველ კვირას, 11:00 საათზე. საქართველოს ევანგელიურ-ლუთერული ეკლესია (სელე) 1818 წლიდან იღებს სათავეს. მისი დაარსება ვიურტემბერგიდან ათასობით გერმანელის ჩამოსვლას უკავშირდება, რომლებმაც თბილისის მიდამოებსა დ
ა დასავლეთ აზერბაიჯანში რამდენიმე სოფელი დააფუძნეს. მათი სარწმუნოება ლუთერული ქრისტიანობა იყო; გერმანელებს საკუთარი საეკლესიო სამრევლოები და ნაგებობები ჰქონდათ და მქადაგებლები ჰყავდათ. სამხრეთ კავკასიის დიდ ქალაქებში, თბილისსა და ბაქოში გერმანელი ვაჭრები, ხელოსნები, მეწარმეები და ხელოვანები მანამდეც ცხოვრობდნენ და მოღვაწეობდნენ – მათი უმრავლესობა ასევე ლუთერანი ქრისტიანი გახლდათ. ორივე ქალაქში მათ დიდი ეკლესიები ააშენეს. თბილისის ლუთერული ეკლესია 1947 წელს დაანგრიეს. რელიგიისადმი მტრულად განწყობილი კომუნისტური მმართველობა და მეორე მსოფლიო ომის დაწყებასთან ერთად კავკასიის გერმანელების ცენტრალურ აზიასა და ციმბირში დეპორტაცია საქართველოში ლუთერული სამრევლოების დასასრულს ნიშნავდა. 1997 წელს, საქართველოს დამოუკიდებლობის აღდგენასთან ერთად, ლუთერული ეკლესია ახალი ფორმით აღორძინდა, რაც, უპირველეს ყოვლისა, მისი პირველი ეპისკოპოსის, პროფესორ დოქ. გერტ ჰუმელის დამსახურებაა. 2011 წლის 5 ივლისს კანონში შესული ცვლილების წყალობით სელეს შესაძლებლობა მიეცა, სამართლებრივი აღიარება მოიპოვოს როგორც ეკლესიამ.
სოხუმიდან ბაქოდე განლაგებულ სამრევლეობში სელეს 800-მდე მრევლის წევრი ჰყავს. ამათგან 350 თბილისის შერიგების სამრევლოს წევრია. მათგან მხოლოდ ნახევარს აქვს გერმანული ფესვები. სამრევლოებში გერმანულზე ხშირად რუსულს და ქართულს გაიგონებთ. ინტენსიური რჩება კავშირები გერმანიასთან, გერმანიის პარტნიორ სამრევლოებთან და დონორებთან. ვიურტემბერგის, 200 წლის წინ საქართველოში ჩამოსული გერმანელი კოლონისტების სამშობლოს სამხარეო ევანგელიური ეკლესია სელეს პარტნიორია.
სამრევლოებში ღვთისმსახურებები ყოველ კვირა დღეს და დღესასწაულებზე იმართება. გარდა ამისა, ტარდება საკვირაო სკოლა 6-14 წლის ასაკის ბავშვებისათვის, ფუნქციონირებს ახალგაზრდული, ქალთა და მამაკაცთა კლუბები და წრეები. სელეს საკანონმდებლო ორგანო სინოდია, რომლის შემადგენლობაშიც სამრევლოების წარმომადგენლები შედიან. მას ეპისკოპოსი და სინოდის პრეზიდიუმი მართავს. სელეში ეპისკოპოსის ჩათვლით ოთხი პასტორია (მათ შორის ორი ქალბატონი) და სამი ლექტორი, რომლებიც სამრევლოებში აგრეთვე ღვთისმსახურებას უძღვებიან.
სელე ღარიბი ეკლესიაა მრავალი ხანშიშესული და უპოვარი წევრით. იგი დამოკიდებულია შემოწირულობებზე, რომელთაგან უმრავლესობა გერმანიიდან მოდის. სწორედ ამიტომ 90-იან წლებში, ეკლესიის ხელახალ აღორძინებასთან ერთად საფუძველი ჩაეყარა დიაკონურ საზოგადოებას, რომელიც მრევლის გაჭირვებულ წევრებს (ზოგ შემთხვევაში, სხვებსაც) უფასოდ ან სიმბოლური ღირებულების სანაცვლოდ საკვებითა და სამედიცინო დახმარებით უზრუნველყოფს. აქვე ფუნქიონირებს მოხუცებულთა თავშესაფარიც.
სელე, წარსულისგან განსხვავებით, აღარსოდეს იქნება საქართველოში და სამხრეთ კავკასიაში მცხოვრები მრავალრიცხოვანი გერმანელის ეკლესია. ის ქართული ევანგელიურ-ლუთერული ეკლესია უნდა გახდეს და საქართველოში არსებული ქრისტიანული ეკლესიების მრავალფეროვნებაში ქრისტიანული რწმენისა და ქრისტიანული კულტურის ერთ-ერთ გზად იქცეს. ის საეკლესიო მოძღვრის მარტინ ლუთერის, ევროპაში ქრისტიანული ეკლესიის რეფორმაციის, ანუ განახლების 500 წლიან ტრადიციას აგრძელებს, რომელიც იესო ქრისტეს სახარების რწმენით ადამიანის განახლებას უფრო მნიშვნელოვნად და თვალნათლივ წარმოაჩენს. მსოლფიოში ასი მილიონი ლუთერანი ქრისტიანია. ლუთერული ეკლესიები მსოფლიოს ლუთერულ კავშირში არიან გაერთიანებული, რომლის სათაო ოფისი ჟენევაშია.
