14/02/2026
Bütün Gürcüstan Müsəlmanlar İdarəsinin Şeyxi Hacı Faiq Nəbiyevin Mübarək Ramazan ayının gəlişi münasibətilə müraciəti:
Bağışlayan və Mehriban Allahın adı ilə…
Əziz mömin bacı və qardaşlar!
Sizi müqəddəs və mübarək Ramazan ayının gəlişi münasibətilə ürəkdən təbrik edir, Allahdan tutacağınız orucların, qılacağınız namazların, edəcəyiniz duaların və bütün xeyirli əməllərinizin dərgahında qəbul olunmasını diləyirəm.
Ramazan ayı Qurani-Kərimin nazil olduğu, rəhmət qapılarının geniş açıldığı, bağışlanma və mənəvi saflaşma ayıdır. Bu ay insanın öz nəfsi ilə hesaba çəkildiyi, qəlbini kin-küdurətdən, paxıllıqdan və p*s niyyətlərdən təmizlədiyi, səbir, mərhəmət və paylaşma duyğularını gücləndirdiyi mübarək bir zamandır. Ramazan bizə Allahla bağlarımızı möhkəmləndirməyi, ailə və cəmiyyət daxilində birlik və həmrəyliyi artırmağı öyrədir.
Əziz mömin qardaş və bacılar!
Oruc, obaşdandan ilk axşam saatlarınadək qidalanmadan çəkinməyə deyilir. Bu əməl insan orqanizminə, eləcə də onun psixoloji durumuna olduqca müsbət təsirlər göstərir.
Quranda bu əməl haqqında bir neçə mərhələdə söhbət açılmışdır.
Bu ayədə ““Ey iman gətirənlər! Oruc tutmaq sizdən əvvəlki ümmətlərə vacib edildiyi kimi, sizə də vacib edildi ki, (bunun vasitəsilə) siz p*s əməllərdən çəkinəsiniz! “ – oruc tutmağın bizə vacib olması göstərilmişdir.
Həmçinin Quranda deyilir: “İnsanlara doğru yolu göstərən, bu yolu açıq dəlilləri ilə aydınlaşdıran və (haqqı batildən) ayıran Quran Ramazan ayında nazil edilmişdir. Bu aya yetişən şəxslər oruc tutmalıdırlar”...
Əziz mömin bacı və qardaşlar!
Bəs bu mübarək ayda nə etməliyik?
Bu müqəddəs ayın fəziləti barədə möminlərin əmiri İmam Əli (ə) belə nəql edir:
“Bir gün Məhəmməd (s) bizə xütbə söyləyən zaman buyurdu: “Ey insanlar! Həqiqətən bərəkət, rəhmət və bağışlanmaq ayı sizə doğru gəlməkdədir. Bu ay Allahın yanında ən üstün ay, günləri ən yaxşı günlər, saatları isə ən yaxşı saatlardır. Bu ayda siz, Allahın qonaqlığına dəvət olunmusunuz və Allahın kəramətindən bəhrələnənlərin cərgəsində dayanmısınız. Bu ayda sizin nəfəsləriniz Allaha təsbih, yuxunuz ibadətdir, əməlləriniz qəbul, dualarınız müstəcəbdır…”»
Mən qalxıb ərz etdim: “Bu ayda ən yaxşı əməl nədir?” Allahın Peyğəmbəri (s) buyurdu: “Ey Əbəl-Həsən! Bu ayda ən yaxşı əməl, özünü Allahın haram etdiklərindən çəkindirməkdir.”...
Bəli, oruc tutarkən yalnız yemək və içməkdən deyil, bütün haramlardan çəkinməliyik. Dilimiz qeybətdən, böhtandan və kobud sözlərdən uzaq olmalıdır. Gözümüz harama baxmamalı, qulağımız batil və faydasız sözlərə meyl etməməlidir. Qəlbimiz kin, nifrət və paxıllıqdan təmizlənməlidir. Çünki əgər insan günahdan çəkinməzsə, oruc yalnız fiziki aclıq olar; amma günahdan uzaq durduqda oruc nur, mərhəmət və bağışlanma mənbəyinə çevrilər.
Ramazan bizdən təkcə ac qalmağı deyil, dəyişməyi, saflaşmağı və kamilləşməyi tələb edir. Oruc bir vasitədir; məqsəd isə təqvaya çatmaqdır. Orucun həqiqi dəyəri günahdan uzaq durmaqda, nəfsi cilovlamaqda və Allahın razılığını qazanmaqdadır.
Ramazan ayı əxlaqımızı gözəlləşdirmək üçün ən münasib zamandır. Səbirli olmaq, təvazökar davranmaq, insanlara qarşı mehriban və anlayışlı olmaq bu ayın ən gözəl xüsusiyyətlərindəndir. Hər birimiz ailəmizdə, iş yerimizdə və cəmiyyət içində gözəl əxlaq nümunəsi olmağa çalışmalıyıq. Çünki gözəl əxlaq – İslamın ən böyük təbliğidir.
Bu ay bizə başqalarının halını anlamağı öyrədir. Aclıq və susuzluq bizə ehtiyac içində olan insanların vəziyyətini hiss etdirir. Ona görə də imkan daxilində sədəqə vermək, ehtiyaclı ailələrə yardım göstərmək, kasıbların süfrəsinə pay aparmaq Ramazanın ruhuna uyğundur. Bir ehtiyac sahibinin qəlbini sevindirmək bəzən uzun ibadətdən daha fəzilətli ola bilər.
Ramazan ailə bağlarını möhkəmləndirmə ayıdır. Valideynlərə hörmət və xidmət göstərmək, onların duasını almaq ən böyük savablardandır. Ailə üzvlərinə qarşı diqqətli olmaq, inciklikləri aradan qaldırmaq, qohumluq əlaqələrini bərpa etmək bu ayın bərəkətini artırır.
İftar süfrəsi Ramazanın rəmzlərindəndir. İmkanımız varsa, oruclu bir insana iftar vermək böyük savabdır. Bu, həm qardaşlıq və birlik duyğusunu gücləndirir, həm də cəmiyyət daxilində mərhəmət və paylaşma ruhunu artırır. Süfrələrimiz sadə, lakin bərəkətli olsun; israfdan uzaq duraq.
Ramazan ayında məscidlər daha da canlanır. Camaat namazında iştirak etmək, dua və zikrlə məşğul olmaq qəlbimizi saflaşdırır. Məscid – birlik, dua və mənəvi dirçəliş məkanıdır.
Bu ay Qurani-Kərimin nazil olduğu aydır. Ona görə də Quran oxumağa, onun mənası üzərində düşünməyə, ayələri həyatımıza tətbiq etməyə xüsusi diqqət yetirməliyik. Hər gün müəyyən qədər Quran tilavət etmək, ailə üzvləri ilə birlikdə oxumaq və müzakirə etmək Ramazanın nurunu evlərimizə gətirər. Bu ayda Quran oxumağın çox böyük savabı vardır.
Əziz təbliğatçılar, ruhanilər və müəllimlərimiz!
Sizin boynunuza bu mübarək ayda böyük məsuliyyət düşür. Çünki Ramazan ayı yalnız fərdi ibadət ayı deyil, həm də maarifləndirmə, birlik və mənəvi dirçəliş ayıdır. Bu ayda İslamın gözəlliklərini, Ramazanın hikmət və bərəkətini insanlara düzgün və hikmətlə çatdırmaq lazımdır.
Təbliğatçılarımız cəmiyyətə Ramazanın aclıq və susuzluqdan ibarət olmadığını, onun əxlaq, səbir, mərhəmət və təqva məktəbi olduğunu anlatmalıdırlar. Xütbələrdə, dərslərdə və söhbətlərdə insanlar arasında birlik, qardaşlıq və qarşılıqlı hörmət ruhu aşılanmalıdır. Gənclərə dinimizin gözəllikləri sevdirilməli, suallarına səbir və elm ilə cavab verilməlidir.
Ramazan Qurani-Kərim ayıdır. Quran müəllimlərimiz bu ayda daha çox oxumaq və öyrənmək istəyənlərə vaxt ayırmalı, tilavət və təcvid dərslərini artırmalıdırlar. Uşaqların və gənclərin Quranla ünsiyyətini gücləndirmək, evlərdə Quran sədasının ucalmasına şərait yaratmaq böyük savabdır. Hər bir oxunan ayə insanın qəlbinə nur, cəmiyyətə isə mənəvi dirilik gətirir.
Yaxşı olar ki, ruhanilərimiz məscidlərdə daha çox camaat namazı təşkil etsin, insanları bir araya toplasın, dua və zikr məclisləri təşkil etsinlər. Ramazan fərdi ibadət ayı olmaqla yanaşı, ictimai birlik ayıdır. Camaat namazı qardaşlıq bağlarını möhkəmləndirir, insanların qəlblərini bir-birinə yaxınlaşdırır.
Bu ayda İmam Həsən (ə)-ın mövludu qeyd olunur. Bu mübarək gün bizə səxavət, səbir və gözəl əxlaq nümunəsini xatırladır. Daha sonra Qədr gecələrində məscidlərə toplaşır, dua və ibadətlə gecələri ihya edirik. Lakin çalışaq ki, yalnız həmin gecələrdə deyil, Ramazanın bütün günlərində məscidlərimizi canlı və dolu saxlayaq.
İnsanlara məscidi sevdirmək ən böyük xidmətlərdəndir.
Məscid – Allahın Evidir. Orada insan günahdan uzaqlaşır, ruhu təmizlənir, qəlbi sakitlik tapır. Məscidə gələn insan ilahi rəhmət mühitinə daxil olur, mənəvi güc və ümid qazanır. Ona görə də məscidlərimiz açıq, mehriban və elm mərkəzi olmalıdır; ora gələn hər kəs özünü doğma bir məkanda hiss etməlidir.
Əziz möminlər!
Ramazan fürsətdir – bağışlanmaq, dəyişmək və Allaha daha da yaxınlaşmaq fürsəti. Gəlin bu ayı dəyərləndirək, hər günümüzü son günümüz kimi yaşayaq, hər ibadətimizi ixlasla yerinə yetirək. İnşallah bu mübarək ay bizim üçün mənəvi yenilənmə və qurtuluş ayı olar.
Allah-Təala oruclarımızı qəbul etsin, bizi günahlardan uzaq, xeyirli və saleh bəndələrindən qərar versin.
Ramazanımız mübarək olsun!
