ავტობიოგრაფია
არქიმანდრიტი ილია (ერისკაცობაში ომარი გიგას-ძე) კარტოზია, დაიბადა 1987 წლის 1 მაისს ქ.სოხუმში.
1996 წლიდან ქ.ზუგდიდის მაცხოვრის კარის ტაძრის სტიქაროსანი, ხოლო 2000 წელს გადაყვანილ იქნა ზუგდიდის საკათედრო ტაძარში ეპარქიის მღვდელმთავრის პირად სტიქაროსნად.
2004 წელს დაამთავრა ზუგდიდის მე-4 საშუალო სკოლა, იმავე წელს ზუგდიდისა და ცაიშის მიტროპოლიტ გერასიმეს ლოცვა-კურთხევით გაგზავნილ
იქნა ახალციხეში, საფარის წმ.გრიგოლ ხანძთელის სახელობის სასულიერო სემინარიაში სასწავლებლად და ცხოვრობდა მონასტერში.
2005 წლის 4 აგვისტოს სულიერი მოძღვრისა და ეპარქიის მღვდელმთავართან შეთანხმებით მივიდა სვეტიცხოვლის მამათა მონასტერში მორჩილად.
2006 წლის 21 მარტს სულიერი მოძღვრის - არქიმანდრიტ ისააკის /ღადუა/ წარდგინებითა და მისი უწმინდესობის ლოცვა-კურთხევით შეიმოსა მორჩილის კაბით.იმავე წელს დაინიშნა სვეტიცხოვლის საპატრიარქო ტაძრის მთავარ მედავითნედ.
2007 წლის 9 მარტს მისი უწმინდესობის ლოცვა-კურთხევით არქიმანდრიტმა ისააკმა
/ღადუა/ შემოსა სამონაზვნე მანტიით და სახელი ილია უწოდა.
2008 წლის 1 სექტემბერს მისი უწმინდესობის ლოცვა-კურთხევით საგარეჯოსა და ნინოწმინდის ეპისკოპოს ლუკას /ლომიძე/ მიერ ხელდასხმულ იქნა იეროდიაკვნად და დაინიშნა სცეტიცხოვლის საპატრიარქო ტაძრის მთავარ დიაკვნად.იმავე წელს არქიმანდრიტ ისააკის /ღადუა/ წარდგინებით და მონასტრის ძმობასთან შეთანხმებით დაინიშნა მონასტრის კეთილმოწესედ და ეკონომოსად.
2009 წლის 13 მარტს მისი უწმინდესობის ლოცვა-კურთხევით საგარეჯოსა და ნინოწმინდის ეპისკოპოს ლუკას /ლომიძე/ მიერ ხელდასხმულ იქნა მღვდელ -მონაზვნად. იმავე წლის 18 ოქტომბერს სამების საპატრიარქო ლავრაში მისმა უწმინდესობამ დააჯილდოვა ოქროს ჯვრით და აიყვანა იღუმენის ხარისხში.
2010 წლის 19 ნოემბერს მისი უწმინდესობის ლოცვა-კურთხევით დაინიშნა მცხეთის წმინდა გიორგის მამათა მონასტრის წინამძღვრად.
2010 წლის 12 დეკემბერს მისმა უწმინდესობამ, ეკლესიაში ერთგული მსახურებისათვის აიყვანა არქიმანდრიტის ხარისხში.
2014 წლის 28 დეკემბერს მამა ილია კარტოზია პატრიარქის კურთხევით მრევლთან ერთად ბარში, წმინდა ნიკოლოზის სახელობის ტაძრის მოსალოცად მიემგზავრებოდა. ადრიატიკის ზღვაში ბორან "ნორმან ატლანტიკზე" საქართველოს რვა მოქალაქე იყო, მათ შორის ერთი ბავშვი და ფეხმძიმე ქალი. საბერძნეთის სანაპიროსთან ბორანს მოულოდნელად ცეცხლი გაუჩნდა. მამა ილიას გარდა ყველა მათგანი ცოცხალია და უვნებელი გადარჩა. მამა ილიას შეეძლო გადარჩენა, თუმცა მან საკუთარი ადგილი ბავშვიან ქალს დაუთმო, რის გამოც ზღვაში გადავარდა და დაიღუპა.
2015 წლის 18 იანვარს არქიმანდრიტი ილიას ცხედარი ბარიდან თბილისიში ჩამოასვენეს.
2015 წლის 19 იანვარს საქართველოს პრეზიდენტმა არქიმანდრიტი ილია კარტოზია „სამაგალითო სამოქალაქო თავდადებისა და გმირობისათვის, განსაკუთრებული პიროვნული მამაცობის გამოვლენისათვის, სამოქალაქო თავდადებისათვის“, სიკვდილის შემდეგ დააჯილდოვა
2015 წლის 20 იანვარს მამა ილია კარტოზია მცხეთაში, დავით აღმაშენებლის სახელობის მამათა მონასტრის ეზოში დაკრძალეს.
