11/05/2026
🌿დღეს ისტორიული და ყოვლადსასიხარულო დღეა სრულიად საქართველოს ეკლესიისათვის — წმიდა სინოდის განჩინებით, საქართველოს ახალ კათოლიკოს-პატრიარქად გამორჩეულ იქნა საპატრიარქო ტახტის მოსაყდრე, სენაკისა და ჩხოროწყუს მიტროპოლიტი, მაღალყოვლადუსამღვდელოესი მეუფე შიო.
🌿ეს დღე განსაკუთრებული მადლითა და სასოებით აღავსებს ყოველი მორწმუნის გულს, რადგან უფალმა ჩვენს ეკლესიას კვლავ მოუვლინა ღირსეული მამამთავარი, რომელიც მრავალი წლის განმავლობაში ერთგულად, სიმდაბლითა და სულიერი სიბრძნით ემსახურებოდა საქართველოს სამოციქულო ეკლესიას.
🌿მეუფე შიოს ცხოვრება, მოღვაწეობა და თავდადებული მსახურება ნათელი მაგალითია ქრისტესმიერი სიმშვიდისა, სიმდაბლისა, მოთმინებისა და სიყვარულისა.
🌿სამთავროს დედათა მონასტერი მთელი გულით უერთდება ამ საერთო საეკლესიო სიხარულს. აღვავლენთ მხურვალე ლოცვებს ახლადარჩეული კათოლიკოს-პატრიარქისათვის, რათა ყოვლადწმიდა სამებამ უხვად გარდამოუვლინოს მადლი სულისა წმიდისა და შეაძლებინოს საქართველოს ეკლესიის საჭეთმპყრობლის მძიმე, მაგრამ კურთხეული ჯვრის ღირსეულად ზიდვა.
🌿განსაკუთრებით მნიშვნელოვანია, რომ მეუფე შიო მოსაყდრედ თავად უწმინდესმა და უნეტარესმა, სრულიად საქართველოს კათოლიკოს-პატრიარქმა ილია II-მ გამოირჩია. ამ ნდობასა და არჩევანში უკვე განცხადებულია ღვთის განგებულება, მისი სულიერი ღირსება და ეკლესიისადმი ერთგულება. მართლაც, ეს არის ღვთისგან კურთხეული და ეკლესიის მიერ დამოწმებული არჩევანი. ამასთანავე, ცხადია ისიც, რომ მეუფე შიო ჩვენი უწმინდესი პატრიარქის გზას გააგრძელებს.
🌿ახალი პატრიარქის არჩევა წმიდა ქალაქ მცხეთაში ცისარტყელამაც დაამოწმა — ზეცამ თავისი ნიშანი მოავლინა: მსუბუქი ცვარი გადმოვიდა, მზემ გამოანათა და ორი ცისარტყელა გამოისახა, სამთავროდან სვეტიცხოვლამდე გადაჭიმული. ეს საოცარი სანახაობა მრავალმა აღიქვა, როგორც მშვიდობის, ღვთისკურთხევისა და მადლის სიმბოლო.
🌿ვუსურვებთ საქართველოს აწინდელ პატრიარქს, მცხეთა-თბილისის მთავრეპისკოპოსს, ბიჭვინთისა და ცხუმ-აფხაზეთის მიტროპოლიტს, დიდსა მეუფესა მამასა ჩვენსა შიო III-ს ხანგრძლივ, მშვიდობიან და ნაყოფიერ მოღვაწეობას, სულიერ სიმტკიცეს, ღვთის შეწევნასა და ერის სიყვარულს. დაე, მისი მსახურება იქცეს ჩვენი ეკლესიის განმტკიცების, ერის გამთლიანებისა და სულიერი აღორძინების საფუძვლად.
🌿მრავალსა წელსა მრავალჟამიერ, უწმინდესო თქვენი სიცოცხლე! ამინ!
