17/05/2023
Allahın adı ilə.
Neçə gündür ard-arda İŞİD terror qruplaşması üzvlərinin Gürcüstan ərazisində həbs edilmə xəbərləri sevindirici və eyni zamanda üzücü oldu. Əgər prosesləri dəyərləndirib, şərh verməli olsaq, deyərdik ki, bu həm dövlətimiz və həmdə xalqımız üçün həyacan siqnalıdır. Vəhhabi terror cərəyanının ölkəmizdə sürətlə yayılmasını gənclərimiz, ailələrimiz və gələcək nəslimiz üçün böyük təhlükə hesab edirik. Ümid edirik ki, Gürcüstan hakimiyyəti bu məsələni nəhayət ciddiyə almağa başlayıb, daxildən və xaricdən olan təsirlərin qarşısını almağa çalışacaq. Əks təqdirdə sözü gedən cərəyandan zərbələr almaq gələcəkdə qaçınılmaz olacaq deyə düşünürük.
Xatırlatmaq yerinə düşərdi ki, bu batil təriqətin ardıcılları Gürcüstan və Azərbaycanımızda saf və pak gənclərin arxasındadırlar. Dövlətimizin ərazisini buna misal vurmaq istəsək, Borçalı ətrafında yerləşən kəndləri göstərə bilərik. Xarici qüvvələrin maddi və mənəvi dəstəyi nəticəsində gəncləri öz batil və radikal inanclarına tərəf çəkməyə müvəffəq olmaqdadırlar. Əgər millətimiz ayıq olmasa, gənclərimiz bu təriqətin zahiri görkəminə aldanıb öz saf imanlarını bunlara qurban versələr, sabah çox böyük təhlükə ilə üz-üzə qalacağımız qaçınılmaz olacaq. Yarandığı tarixdən bu yana Müsəlmanları kafir və müşrik gözündə görən sələfi təriqətini təhlükə hesab edirik, onlar üçün ciddi addımlar atılmasını tələb edirik!
Hörmətlə: Gürcüstan Müsəlmanları Gənclər Birliyi.(GMGB)
