სურამისა და ხაშურის ეპარქია — საქართველოს მართლმადიდებელი ეკლესიის ეპარქია. შეიქმნა 2013 წლის 11 ოქტომბრის წმინდა სინოდის სხდომის გადაწყვეტილების თანახმად. ამავე გადაწყვეტილების მიხედვით საეპისკოპოსო კანდიდატად გამორჩეულ იქნა ყორანქედის წმინდა ელია წინასწარმეტყველის მონასტრის იღუმენი სვიმეონი. ეპარქიის საზღვრები ემთხვევა ხაშურის მუნიციპალიტეტის ადმინისტრაციულ საზღვრებს.
---------
სურამისა და ხაშურის ეპისკოპოსი მეუფე სვიმეონი (ცაკაშვილი) დაიბადა 1982 წლის 9 აგვისტოს ქალაქ სიღნაღში. 1999 წელს დაამთავრა ქ.თბილისის მე-100 საჯარო სკოლა. იმავე წელს ჩააბარა საქართველოს ტექნიკურ უნივერსიტეტში, მექანიკა-მანქანათმშენებლობის ფაკულტეტზე. პარალელურად გადიოდა თეოლოგიურ სწავლებას. 2000 წლიდან, მშობლიურ რაიონში, დედოფლისწყაროს მუნიციპალიტეტში, სოფელ ზემო მაჩხაანში სათავეში ჩაუდგა წმიდა გიორგის და ღვთისმშობლის მიძინების ტაძრის აღდგენა-რესტავრაციას.
მეუფე სვიმეონი მეათე წელია, რაც ურბნისისა და რუისის ეპარქიაში მსახურობს და ამ დროის განმავლობაში რამდენიმე მონასტერში მოღვაწეობდა. კერძოდ ძამის ხეობაში – ტბეთის მონასტერში, სადაც 21 წლის ასაკიდან ცხოვრობდა. აქვე აღიკვეცა ბერად 2005 წელს 23 წლის ასაკში. 2006 წლის 4 დეკემბერს, 24 წლის ასაკში, ქოზიფის მამათა მონასტერში, ღვთისმშობლის ტაძრად მიყვანების დღესასწაულზე, რუისისა და ურბნისის მიტროპოლიტმა იობმა ხელი დაასხა დიაკვნად. 2006 წლის 1 მარტს ასევე მიტროპოლიტმა იობმა, ბერთუბნის მონასტერში, მარიამ ეგვიპტელის სახელობის ტაძარში ხელი დაასხა მღვდლად. საჭიროებისამებრ დაადგინეს ამ მონასტრის კეთილმოწესედ. გარკვეული პერიოდის შემდეგ მამა სვიმეონი დაბრუნდა ტბეთის მონასტერში მღვდელმსახურის რანგში. მალე მეუფე იობის ლოცვა-კურთხევით დაადგინეს დაბა სურამის წმიდა იობ მრავალვნებულის სახელობის რეზიდენციასთან არსებული მონასტრის წინამძღვრად სადაც ერთი წელი იმსახურა. შემდეგ, აღდგომის ბრწყინვალე შვიდეულში, მეუფე იობის ლოცვა-კურთხევით დაადგინეს ურბნისის საკათედრო ტაძართან არსებული რეზიდენციის მონასტრის წინამძღვრად. აქ მსახურების დროს ხელმძღვანელობდა ძამის ხეობაში, ბერმუხის მამათა მონასტრის აღდგენა-რესტავრაციას.ურბნისში 1 წლისა და 2 თვის მოღვაწეობის შემდეგ გადაყვანილ და დადგენილ იქნა ყინწვისის წმიდა ნიკოლოზის სახელობის მონასტრის წინამძღვრად. აქვე 22 მაისს აღყვანილ იქნა იღუმენის ხარისხში და დაჯილდოებულ იქნა ოქროს ჯვრით. მოგვიანებით ის ხაშურის მუნიციპალიტეტის სოფელ ხცისში, ყურაქედის მამათა მონასტრის წინამძღვარია. უწმიდესისა და უნეტარესის ილია II-ის ლოცვა-კურთხევით და მეუფე იობის დავალებით ხელმძღვანელობდა დავით გარეჯში არსებული დოდო გარეჯელის სახელობის მონასტრის აღდგენას. 2013 წლის 10 ნოემბერს სვეტიცხოვლის ტაძარში მოხდა მისი კურთხევა ახლადშექმნილი ეპარქიის ეპისკოპოსად. მისი უდიდესი დამსახურებაა ყურაქედის წმინდა ელია წინასწარმეტყველის სახელობის მამათა მონასტრის, სამონასტრო ცხოვრების გაჩენა და გაძლიერება. სურამისა და ხაშურის ეპისკოპოსი, მეუფე სვიმეონი ხაშურში უძღვება საპატრიარქოს წმიდა დიმიტრი ყიფიანის სახელობის სკოლა-პანსიონს.
