01/05/2026
2000- იან წლებამდე ჩვენი უნიკალური ისტორიითა და უდიდესი სასწაულებრივი შემწეობით სახელგანთქმული ტაძარი, რომელსაც ძველი დროის ადგილობრივი მოსახლეობა ,,სასწაულს" უწოდებდა თურმე, ნახევრად დამიწებული გახლდათ, მისი უნიკალური ფრესკები კი გადალესილი.
ტაძრის რესტავრაციისას, როდესაც ნალესი ფენა მოიხსნა, მის ქვეშ პირველი ჩვენი ძვირფასი ,,დირბის ღვთისმშობლის" უძვირფასესი ფრესკა გამოჩენილა. უნიკალური მართლმადიდებლური ხელოვნების ნიმუშის სანახავად მობრძანებულა მროველ - ურბნელი მიტროპოლიტი იობი, რომელსაც დირბის ღვთისმშობლის ნახვისას უბრძანებია- ამ ფრესკასთან ბევრი ადამიანი მოვაო.
მართლაც მეუფის მამობრივი გული არ შემცდარა - ცენტრალურ გზებს მოშორებულ, ოკუპირებული სამაჩაბლოს მოსაზღვრე, ქართლის ამ ულამაზეს სოფელში, დირბის ღვთისმშობლის მოსალოცად მასთან სავედრებელად (განსაკუთრებით კი შვილიერების სათხოვნელად) და შემდგომ კი მიღებული წყალობისათვის ასობით და ათასობით ადამიანი მობრძანდება, როგორც საქართველოდან ისე მრავალი სხვა ქვეყნიდან.
მეუფე იობის ლოცვა - კურთხევით შეიქმნა დირბის ღვთისმშობლის პარაკლისი და დაუჯდომელი, რომლებიც მონასტრის ტიბიკონის განუყოფელი ნაწილი გახდა და ყოველ დღე 3 საათზე აღასერულება. მრავალი მორწმუნე ესწრება ამ ლოცვას უდიდესი რწმენითა და მადლიერებით.
მიტროპოლიტი იობის ლოცვა- კურთხევით დაწესდა დირბის ღვთისმშობლის დღესასწაული - 13 აგვისტო,(ეს თარიღიც მან თავად შეარჩია - ყოვლადწმინდა ღვთისმშობლის მარხვის დაწყების წინა დღე) მართლაც უდიდესი სიხარულის დღე , დღე - სასწაული, რომელსაც უამრავი სიხარული, აღსრულებული ლოცვა და მადლიერება უკავშირდება.
მეუფე იობის ლოცვა - კურთხევით დაიწყო მონასტერმა - იმ ადამიანების მადლიერი ჩანაწერების შეგროვება, რომელთაც დირბის ღვთისმშობელმა ნატვრა აუსრულა, შვილიერებისა და ჯანმრთელობაზე და დღეს მრავალი ასეული ასეთი ჩანაწერი არსებობს.
დიდება და მადლობა უფალს ყველაფრისათვის. მადლობა დედა ღვთისას მოწყალებისათვის და მისი ცოცხალი შემწეობისათვის - ჩვენთვისაც და უამრავი მორწმუნე ადამიანისათვისაც. დაე მუდმივად ჰფარავდეს ჩვენს საქართველოს, საქართველოს ეკლესიას და ყველა მართლმადიდებელ მორწმუნეს.
დირბის ღვთისმშობლის დედათა მონასტერი
#დირბისღვთისმშობელი #ლოცვა #მეუფეიობი