ქ. ბათუმში (სოფელ ფერიაში) , სასაფლაოთა შორის შემაღლებულ მთიან ადგილას, დგას ყოვლადწმიდა სამების სახელობის დიდებული ტაძარი. იგი თავის ისტორიას XIX საუკუნის II ნახევრიდან მოითვლის. თავდაპირველად აგებული იყო ხის პატარა ტაძარი „ სოუქსოს სასაფლაოს ეკლესია“, როგორც მას ადგილობრივი მოსახლეობა უწოდებდა, მეორე მოქმედი მართლმადიდებლური ტაძარი იყო ქ.ბათუმში, წმიდა ნიკოლოზის სახელობის ეკლესიასთან ერთად. XX
საუკუნის 30_იან წლებში ტაძრის წინამძღვარი, მღვდელი პროკოფი ჩიგოგიძე გასახლებული იქნა საქართველოდან, რასაც თან მოჰყვა ტაძრის დახურვა. შეწყდა წირვა-ლოცვა, წლების განმავლობაში ტაძარი საწყობად გამოიყენებოდა, მასში ინახებოდა სამეურნეო ინვენტარი. მეორე მსოფლიო ომის დასრულების შემდეგ, მრავალენოვანი მრევლის წარმომადგენლებმა, გრიგოლ პუხნოსა და ლუკა შევჩუკის ხელმძღვანელობით, შეაგროვეს ხელმოწერები და თხოვნით მიმართეს საქართველოს კათოლიკოს-პატრიარქს კალისტრატე (ცინცაძეს) ნებართვისათვის - ეკლესიის კვლავ ამოქმედების შესახებ. 1947 წელს ტაძარი გაიხსნა. წინამძღვრად დადგენილ იქნა დეკანოზი ლუკა შევჩუკი (დაკრძალულია ეკლესიის გვერდით). 1947-50 წლებში ტაძარში მსახურობდა იღუმენი ზინობი მაჟუგა (შემდგომში სქემიტროპოლიტი სერაფიმე 1957 წლის 16 აპრილს მან შეასრულა სასულიერო აკადემიის II კურსის სტუდენტის, შემდგომში საქართველოს კატოლიკოს-პატრიარქის, ილია II_ს , ბერად აღკვეცის საიდუმლო). 1976 წლის ზაფხულში ტაძარს ცეცხლი გაუჩნდა და მთლიანად განადგურდა. ბათუმ-შემოქმედის იმჟამინდელ ეპისკოპოსს დავითს (ჭკადუა) წმიდა სინოდმა დაავალა ახალი ტაძრის აგება ძველის ფუძეზე. საყურადღებოა, რომ ყოფილი საბჭოთა კავშირის ისტორიაში, ეს იყო ერთადერთი შემთხვევა ახალი ტაძრის მშენებლობისა, რომლის განხორციელებას ვერავინ შეუშალა ხელი. დიდება უფალს!
1979 წელს ახალაშენებულმა ტაძარმა კვლავ განაახლა ღვთის მსახურება. ამ პერიოდიდან ტაძარში მოღვაწეობდნენ: დეკანოზი დავით შიოლაშვილი (ამჟამინდელი ბათუმისა და ლაზეთის ჩრდილოეთ ამერიკისა და კანადის მიტროპოლიტი დიმიტრი), დეკანოზები, ნიკოლოზ გიგატაძე, გიორგი ძნელაძე, ტარიელ ჟღენტი, პეტრე ყრუაშვილი, ამირან ამირანაშვილი, პავლე ჯანგავაძე და სხვანი. ტაძარში ექვს ათეულზე მეტს ხანს მედავითნეობდა მარია(მაშა) ტრიფონოვა ( გარდაიცვალა 2010 წელს. დაკრძალულია ტაძრის გვერდით).
