17/04/2026
Христос воскресна! Навистина воскресна!
**Соопштение**
Браќа и сестри во Христа Воскреснатиот, Македонци и Македонки, како и сите наши пријатели ширум светот,
Најнапред, дозволете да ви ги честитаме Велигденските празници и да дадеме одговор на прашањето што навистина се случи оваа година во Обединетото Кралство, по бројните објави и дискусии на социјалните мрежи.
Историски, за првпат во Обединетото Кралство се служеше Велигденска Литургија во четири градови и црковни општини: Лондон, Литлхамптон, Рединг и Оксфорд. Ова претставува наш заеднички, како емиграција, најголем успех досега!
Во Лондон, поради градежни активности во нашиот храм и неизвесноста околу обезбедувањето простор, благодарение на заложбите на Црковниот одбор при „Св. Архангел Михаил“ и големата поддршка од народот, ни беше овозможено да служиме Литургија во храмот „St. Luke“ во South Kensington. Ова е еден прекрасен христијански храм и досега најголем каде што сме служеле на овие простори. Се собра рекорден број верници, а на Воскресната литургија во раните утрински часови се причести најголем број причасници досега.
Во Литлхамптон се одржаа две богослужби, што е навистина значајно за младата популација од регионот и за Црковната општина „Св. Ѓорѓи Победоносец“.
Во Рединг, во МПЦО „Св. Нектариј Егински“, со Божји благослов се одржа историски првата богослужба, токму на самиот ден Велигден. Повторно имаше голема посетеност, а по Литургијата се одржа една од најдобро организираните трпези на љубовта.
Во Оксфорд, во Црковната општина при „Св. Ѓорѓи Кратовски“, се служеше првата Воскресна Литургија на полноќ за Велигден, со масовна посетеност од градот и поширокиот регион. Следниот ден таму се одржа прекрасна македонска културно-уметничка забава.
Ова е вистината.
На крај, но најважно, изразуваме благодарност до нашиот парохиски свештеник, протојереј Виктор Стојчев, на кого оваа година на помош му притекнаа отец Благој и отец Дарко од Скопската епархија за богослужбите, како и до сите одборници и волонтери од сите општини, кои неуморно работеа и планираа месеци однапред за сето ова да се реализира.
Христос помеѓу нас! ☦️
Црковен Одбор Св. Архангел Михаил и сите свети Ангели - Лондон
