30/08/2026
"(30.8.2026)တရားစခန်း ဒုတိယနေ့
ညနေခင်းဓမ္မသဘင်"...................................................................................
"အင်္ဂလန်နိုင်ငံ၊လန်ဒန်မြို့၊လန်ဒန်ဝိဟာရ၊
မဟာစည်သာသနာ့ရိပ်သာ၌ လစဥ်ကျင်းပ
ပြုလုပ်လျှက်ရှိသော
August-လ မဟာစည်ဝိပဿနာ
(၃)ရက်အထူးတရားစခန်းပွဲ ဒုတိယနေ့ (30.8.2026)3:00-PM ညနေခင်းဓမ္မသဘင်၌
ရိပ်သာသို့ တရားစခန်းဝင်ရောက်၍ သတိပဌာန်ဝိပဿနာတရားများကို ရှုမှတ်ပွားများအားထုတ်
ကြသည့် ယောဂီသူတော်စင်အပေါင်းနှင့်
Zoom-ယောဂီသူတော်စင်အပေါင်းတို့အား
ဓမ္မဒါန,အမတဒါန တရားအလှူကို ပေးလှူပါသည်။"
"မိမိသည်သာ အားကိုရာ"..........................................................
"လောကလူသားတွေဟာ များသောအားဖြင့်
အားငယ်တတ်ကြတဲ့သတ္တဝါများ ဖြစ်ပါတယ်။
ဘေးဒုက္ခတွေနဲ့ကြုံကြိုက်လာပြီဆိုရင် အားငယ်
တတ်သူပီပီ ဘေးဒုက္ခမှလွတ်မြောက်ဖို့အားကိုးရာ
ရှာကြတယ်။အားကိုးရာရှာတဲ့အခါ မိမိရဲ့အဇ္ဈတ္တ
သန္တာန်ဖြစ်တဲ့ အတွင်းမှာမရှာကြပဲ ဗဟိဒ္ဓသန္တာန်
အပြင်မှာချည်း ရှာကြတာများတယ်။ဒါ့ကြောင့်
ဘုရားရှင် မပွင့်ထွန်းခင်ကတည်းကပင် သစ်ပင်၊
တော၊တောင်၊ရေ၊မြေ၊နေ၊လ၊နက္ခတ်တာရာ၊
စေတီ၊နတ်ကွန်း၊ဘိုးတော်,ဘွားတော်၊နတ်ကတော်၊
စတဲ့ အပြင်ဘက်က အားကိုးရာတွေကို လွဲမှားစွာဖြင့်
အားကိုးကြတယ်။ဘုရားရှင်ကိုယ်တော်မြတ်ကတော့
အဲဒီလို အပြင်ဘက်က သစ်ပင်၊တော၊တောင်၊နေ၊
လ၊နက္ခတ်,တာရာ၊စေတီ၊နတ်ကွန်း၊ဘိုးတော်,
ဘွားတော်၊နတ်ကတော်စတဲ့ အားကိုးရာတွေကို
အားကိုးရာအစစ်မှတ်ထင်ပြီး အားကိုးလွဲနေ
ကြခြင်းဟာ ဘယ်တော့မှသံသရာဝဋ်ဒုက္ခအပေါင်း
ကနေ မလွတ်မြောက်နိုင်ဘူးလို့ ပြတ်သားစွာ
မိန့်တော်မူခဲ့ပါတယ်။ "
"မိမိတို့တတွေ အားကိုးရာရှာတဲ့နေရာမှာ မိမိရဲ့
အဇ္ဈတ္တသန္တာန်မှာမရှာပဲ အပြင်ဘက်ကသူတွေထံ
မှာပဲ အားကိုးရှာကြတယ် ။ မိဘကသားသမီးကို
အားကိုး၊သားသမီးကမိဘကိုအားကိုး၊ဆရာက
တပည့်ကိုအားကိုး၊တပည့်ကဆရာကိုအားကိုးကြ
တယ် ။ အဲဒီလိုအားကိုးကြခြင်းဟာ အတိုင်းအတာ
တစ်ခုထိတော့ အားကိုးလို့ရပါတယ် ။ အိုဘေး၊
နာဘေး၊သေဘေးလို့ဆိုတဲ့ တကယ့်အရေး
တကယ့်ဘေးနဲ့ကြုံတွေ့ရပြီဆိုရင် သေရာ
ညောင်စောင်းပေါ်မှာ သေမင်းနဲ့စစ်ခင်းနေရတဲ့
အချိန်ရောက်ပြီဆိုရင် မိဘ,သားသမီး,ဆွေမျိုး
ဥာတိပုဂ္ဂိုလ်အားလုံးဟာ ဘယ်သူ့ဘယ်သူကိုမှ
တကယ်တမ်းအားကိုးလောက်စရာအဖြစ် အားကိုး
လို့မရတော့ပါဘူး ။ မိမိတို့ထံမှာရှိတဲ့ ရာထူး,အာဏာ,
စည်းစိမ်အားလုံးဟာလည်း အိုဘေး,နာဘေး,
သေဘေးတွေနဲ့တွေ့ကြုံရပြီဆိုရင် ဘာမှအားကိုး
လို့မရတော့ပါဘူး ။ "
"ဘုရားရှင်ကတော့ မိမိသည်သာ မိမိရဲ့အားကိုးရာ
အစစ်ပါပဲတဲ့ ။ မိမိကိုယ်ကို အားကိုးရမယ်ဆိုတဲ့နေရာ
မှာ မိမိတို့ရဲ့ရုပ်ခန္ဓာကိုယ်ကြီးကို အားကိုးရမှာမဟုတ်
ပါဘူး။ ဒီရုပ်ခန္ဓာကိုယ်ကြီးကို အမှီပြုပြီးတော့ ကြိုးစား
ပွားများအားထုတ်ထားလို့သိမြင်ရရှိလာတဲ့ တရား
အသိဥာဏ်ကို အားကိုးရမယ်လို့ဆိုလိုတာပါ ။ သေရာ
ညောင်စောင်းပေါ်မှာ သေမင်းနဲ့စစ်ခင်းနေရတဲ့အချိန်
ရောက်ပြီဆိုရင် မအိုခင်၊မနာခင်၊မသေခင်ကတည်း
က မိမိကြိုးစားပွားများအားထုတ်ထားတဲ့ ဝိပဿနာ
ဥာဏ်ပညာဖြင့် မိမိခံစားနေရတဲ့ဝေဒနာရဲ့ဖြစ်ပြီးပျက်
နေတဲ့ရုပ်နာမ်တရားတွေကို အနိစ္စ ဒုက္ခ အနတ္တလို့
ဥာဏ်ထဲမှာမြင်လာအောင် သတိကပ်ပြီး ရှုမှတ်နိုင်ပြီ
ဆိုရင် အားကိုးရာအစစ်တွေ့ပြီ ။ ဒါ့ကြောင့် ဦးဇင်းတို့
ယောဂီသူတော်စင်တို့တတွေဟာ မိမိကိုယ်ကိုမိမိ
အားကိုးရလောက်တဲ့ တရားအသိဥာဏ်များရှိအောင်
ဘုရားရှင်ရဲ့သာသနာနဲ့ကြုံမှသာလျှင် အားထုတ်ခွင့်
ရတဲ့ ဒီဝိပဿနာတရားတွေကို အရွယ်ရှိတုန်း
ကျန်းမာတုန်း သက်ရှိထင်ရှားရှိတုန်းအချိန်မှာ
ကြိုတင်ကြိုးစား ပွာများအားထုတ်ထားကြရမယ် "
"တကယ့်အရေး တကယ့်ဘေး
ဘယ်သွေးဘယ်သား မကယ်ပြီ၊
မိမိသည်သာ အာကိုးရာ
မှန်စွာဖြစ်တော့သည်။"
ဗဟုံ ဝေ သရဏံ ယန္တိ၊ပဗ္ဗတာနိ ဝနာနိစ။
အာရာမရုက္ခစေတျာနိ၊မနုဿာဘယတစ္ဆိတာ ။
နေတံ ခေါ သရဏံ ခေမံ၊နေတံ သရဏမုတ္တမံ။
နေတံ သရဏမာဂမ္မ၊သဗ္ဗဒုက္ခာ ပမုစ္စတိ ။
နသန္တိ ပုတ္တာ တာနာယ၊န ပိတာ နာပိဗန္ဓဝါ။
အန္တကေနာဓိပန္နဿ၊နတ္ထိ ဥာတီသု တာနတာ ။
အတ္တာဟိ အတ္တနော နာထော၊
ကော ဟိ နာထော ပရော သိယာ။
အတ္တနာ ဟိ သုဒန္တေန၊
နာထံ လဘတိ ဒုလ္လဘံ ။
"အားလုံးသတ္တဝါ ဘေးရန်ကွာ ကျန်းမာချမ်းသာကြပါစေ။
သတ္တဝါခပ်သိမ်း တရားကိန်း အေးငြိမ်းသာယာရှိပါစေ။
မဟာစည်လမင်း ကြယ်ခပင်း အလင်းကမ္ဘာပြန့်ပါစေ။
ဗုဒ္ဓမြတ်စွာ သာသနာ ရောင်ဝါနေသို့လင်းပါစေ ။
