17/12/2024
Raha mbola mihevitra ianao fa mahavita hamonjy ny tenanao!
Indray andro, nahita lehilahy iray anaty rano nilentika ny mpamonjy voina. Niditra tsikelikely tao anaty rano izy fa tsy nanao izay hahatongavana haingana hanavotra ilay lehilahy. Nivory teo amoron-dranomasina ny olona ka nanomboka niantsoantso sy nihorakoraka tamin'ilay mpamonjy voina mba handeha hamonjy ilay lehilahy.
Niditra tao anaty rano ilay mpamonjy, sady nijery ilay lehilahy hatrany, nefa tsy nampihontsona azy ny antsoantson’ny olona.
Tamin’izay fotoana izay ihany rehefa hitany fa toa ho lasa tanteraka ilay lehilahy, dia nilomano mafy izy ka nisambotra ilay lehilahy ary nitondra azy niverina teny amoron-drano.
Rehefa avy nandrora rano sy kofona ilay lehilahy, dia tonga tsikelikely ny fahatsiarovany tena.
Saingy efa tsy noraisina toy ny mahery fo ilay mpamonjy, dia tezitra tamin’izany ny vahoaka. Hoy izy ireo taminy:
• "Oadray ianao ve matahotra! Fantatrao fa ho faty izy, nahoana ianao no tsy nandeha haingana kokoa?"
Hoy ilay mpamonjy ary nanazava tamin’izy ireo hoe:
"Hitanareo tsara fa lehibe sy mavesatra noho izaho izy. Raha nandeha haingana kokoa aho, dia ho niady mafy izy, ka ho rendrika izahay roa. Raha mbola niezaka nanavotra ny tenany izy, dia tsy azoko novonjena. Fa rehefa tsy nanana hery intsony izy ary nitsahatra tsy niady intsony, vao afaka namonjy azy aho."
Tahaka izany no miseho rehefa misy fitsapana tonga amintsika. Matetika loatra isika no miady amin’ny herintsika manokana, mandra-pa ho reraka tanteraka, mitomany mandra-pahataperan’ny ranomaso, fa tsy mametraka ny zava-drehetra eo am-pelatanan’i Jesosy, hatoky Azy sy hanome ny fiainantsika Azy. Rehefa reraka isika dia amin’izay fotoana izay, vao miditra an-tsehatra Izy!
• 1 Petera 5:7 : "Ary apetraho aminy ny fanahianareo rehetra; fa Izy no miahy anareo."
• Salamo 37:5 : "Ankino amin'i Jehovah ny lalanao, ary matokia Azy, fa hataony tanteraka."
• Matio 6:25 : "Ary noho izany dia lazaiko aminareo hoe: Aza manahy ny amin'ny ainareo, dia izay hohaninareo na izay hosotroinareo, na ny amin'ny tenanareo, dia izay hotafinareo. Tsy mihoatra noho ny hanina va ny aina, ary ny tena noho ny fitafiana?
Matokia an’ny Tompo, atolory Azy ny fiainanao, ary tsy ho diso fanantenana ianao, fa ny mifanohitra amin’izany, ho voatahy ianao ary ho ao anatin’ny fitsaharana. Hitahy anareo anie ny Tompo!
