በእግዚአብሔር ዓላማ ጋብቻ የሚመሰረተው በአንድ ወንድና በአንዲት ሴት ጥምረት ነው (ዘፍ.2፡22)፡፡
መጽሐፍ ቅዱስ፡- “እግዚአብሔርም ሰውን በመልኩ ፈጠረ በእግዚአብሔር መልክ ፈጠረው፤ ወንድና ሴት አድርጎ ፈጠራቸው፡፡” (ዘፍ.1፡27) “ፈጣሪ በመጀመሪያ ወንድና ሴት አደረጋቸው፣ ….ሁለቱም አንድ ስጋ ይሆናሉ፣…አንድ ስጋ ናቸው እንጂ ወደፊት ሁለት አይደሉም፡፡ እግዚአብሔር ያጣመረውን እንግዲህ ሰው አይለየው፡፡” (ማቴ.19፡4-7) ይላል፡፡
ስለዚህ የእግዚአብሔር ዓላማ አንድ ወንድና አንዲት ሴት በጋብቻ ተጣምረው ሳይለያዩ እንዲኖሩ ነው፡፡
በእግዚአብሔር ዓላማ ባል ከእግዚአብሔር የተቀበላትን ሚስት እንደገዛ ራሱ አጥንትና ስጋ
እንዲቆጥራት ነው (ዘፍ.2፡23)፡፡ በምድር ላይ የመጀመሪያው ባል አዳም ነበር፡፡ የመጀመሪያዋም ሚስት ሔዋን ነበረች፡፡ “እግዚአብሔር አምላክም ከአዳም የወሰዳትን አጥንት ሴት አድርጎ ሰራት፣ ወደ አዳምም አመጣት፡፡ አዳምም አለ፡- ይህች አጥንት ከአጥንቴ ናት፣ ስጋም ከስጋዬ ናት፣ እርስዋ ከወንድ ተገኝታለችና ሴት ትባል፡፡” የአዳም አባባል የእግዚአብሔርን ዓላማ መሰረት ያደረገ ነበር፡፡ ባሎች ሁሉ ይህን የእግዚአብሔር ዓላማ አንዲያሟሉ፡- “እንዲሁም ባሎች ደግሞ እንደ ገዛ ስጋቸው አድርገው የገዛ ሚስቶቻቸውን ሊወዱአቸው ይገባቸዋል፡፡ የገዛ ሚስቱን የሚወድ ራሱን ይወዳል፡፡ ማንም የገዛ ስጋውን የሚጠላ ከቶ የለምና”(አፌ.5፡28-29) ተብለው በቃሉ ታዝዘዋል፡፡
የእግዚአብሔር ዓላማ ሰው ሚስት ሲያገባ አባቱንና እናቱን እንዲተውና ከሚስቱ ጋር እንዲጣበቅ ነው (ዘፍ.2፡24)፡፡ ይህም አባትና እናት ለልጆቻቸው ጋብቻ እንቅፋት ሆነው መለያየትን እንዳይፈጥሩ እግዚአብሔር ያቀደው ዓላማ ነው፡፡
