24/08/2024
Ayyaannii fi araarri Waaqayyoo, nagaan Kiristoosis isiniif haa baay'atu. Akkam jirtu jaallatamtoonni maatii Waaqayyoo hundi keessan?
✍️Itti aansuudhaan, yeroo dhihoo asitti wantan miidiyaa hawaasaafi chaaneloota hafuuraa gurguddoo irraa dhaga'ee gaaffii natti ta'uu irraa kan ka'e kanan itti amanuu hin dandeenye, yaada hamma yowwanaatti akkan itti walii hin galle na godhe tokkotu jira. Yaadichas haala armaan gadii kanatti isiniifan dhi'eessa. Maaliif akkan itti walii hin galle immoo gaaffilee itti aananii jiran kaaseen jira. Namni ragaa Macaafa Qulqulluutiin wal bira qabee gaaffilee kana naaf deebise na amansiisuu danda'a. Haa ta'u malee, anis waanan hin fudhanne sababa muraasa ofiif kenneera. Yaada ani itti kenne ykn yaada kan isin itti kennitantu na amansiisa osoo hin taane, 'DHUGAA WANGEELAA'tu na amansiisa.
"Yeruma kadhattanitti [dhuunfaattis ta'e waldaa Kristaanaa keessatti] afaan hin beekamneen (afaan haaraa isa jennuun) kadhadhaa. Kunis akka Seexanni kadhata keessan dhaga'ee lola karaa biraatiin isinitti hin kaafneef, kadhanni keessanis akka milkaa'uuf isin gargaara. Afaan haaraadhaan kadhadhaa. Yeroo isin afaan haaraadhaan kadhattan Seexanni isin hin danda'u."
🙏Akka dhuunfaa kootti, bu'uura 1Qor.12 fi 1Qor.14 tiin afaan haaraadhaan kadhachuun dhugumaan bu'aa akka qabu nan beeka, ittis nan amana. Garuu, yeroon nuti ittiin kadhachuu qabnu murtaa'aa akka ta'ettin hubadha.
1, Afaan hin beekamneen dubbachuun kennaa hafuurri qulqulluun nama barbaadeef kennuudha moo Hafuura Qulqulluu isa sababii amanneef guyyaa fayyinaatiif warri lammaffaa dhalatan hundinuu ittiin mallatteeffamaniidhaa?
2, Hafuura Qulqulluu fudhachuufi Kennaa Afaan hin beekamneen dubbachuu argachuun hiika tokko qabaa?
3, Hafuuraan geggeeffamanii kadhachuu jechuun Afaan hin beekamneen kadhachuudhaa?
4, "Hafuurichi aaduu isaatiin isiniif in kadhata" (Rom.8:26) jechuun, Afaan hin beekamneen yeroo dubbannu nuuf kadhata jechuudhaa?
5, Afaan beeknuun yeroo kadhannu Seexanni kadhata keenya dhaga'ee, yeroo Afaan hin beekamneen kadhannu immoo dhuguma Seexanni nun dhaga'uu?
6, Yoo yeroo Afaan beeknuun kadhannu Seexanni nu dhaga'a ta'e, warri kennaa Afaan hin beekamneen dubbachuu hin qabne akkamitti kadhatanii milkaa'uu danda'uree?
“Haa ta'u iyyuu malee, waldaa kristiyaanaa keessatti afaan hin beekamneen sagalee kuma kudhan dubbachuu irra, warra kaan barsiisuudhaaf qalbii kootiin sagalee hiikaa qabu shan duwwaa dubbachuu nan jaalladha.”
— 1Qor. 14:19
Waan irratti hirmaattaniif galatoomaa!
Ayyaanni Waaqayyoo isiniif haa baay'atu!!
Brother Bikila Workina Tulem
