26/07/2026
በሰርጌ ዕለት ነጭ ሱሪዬ ላይ ወጥ ተደፋብኝ... እሷ ደግሞ በሰርግ ምሽት «አባቴ ናፈቀኝ እቤት መልሱኝ!» ብላ ስቅስቅ ብላ አለቀሰች!
በሺዎች የሚቆጠሩ ሰዎችን ትኩረት የሳበው የነብይ እዩ ጭፋ እና የባለቤቱ እናት ነሽ (ፀጋ ነሽ) ያልተሰማ፣ በሳቅና በእንባ የተሞላ የ15 ዓመት የትዳር ጉዞ ምስጢር በመሴ ሾው (Mese Show) ላይ ይፋ ሆኖ ትልቅ መነጋገሪያ ሆኗል።
የዚህ ድንቅ የፍቅር ታሪክ መነሻ የወላይታ ቦዲቲ ከተማ ነው። እናት ነሽ ገና የ16 ዓመት ልጅ እያለች ከሐዋሳ ለክረምት ዕረፍት ወዳመራችበት ስፍራ ነብይ እዩ ጭፋ የሚያገለግልበት ቤተክርስቲያን ተገኘች። በመድረክ ላይ ሆኖ ሲያስተምር በሺዎች ከሚቆጠሩ ታዳሚዎች መካከል ዓይኑ እናት ነሽ ላይ አረፈ። ወዲያውኑ «የእኔ ናት» የሚል የመንፈስ እርግጠኝነት እንደመጣለት የሚናገረው ነብይ እዩ፣ ፕሮግራሙ እንደተጠናቀቀ በአስተናጋጅ አማካኝነት አስጠራት።
በወቅቱ ረጅም የፍቅር ጓደኝነት ወይም "እንተያይ" የሚባል ነገር አልነበረም። «እግዚአብሔር ለትዳር አሳይቶኛል፤ ማግባት ነው እንጂ መጫወት የለም» በማለት ቀጥተኛ የትዳር ጥያቄ አቀረበላት። በወቅቱ በያዘችው ጥቁር ኖኪያ 1600 ስልኳ ደጋግሞ ቢደውልም ስልኳ መብራት ጠፍቶ ተዘጋግቶ ስለነበር፣ በማግስቱ ጠዋት በዝናብ ውስጥ ትልቁን ጃኬቱን ደርቦ እሷ ያለችበት አጎቷ ቤት ድረስ በአካል መጣ!
ጥያቄው በቀረበ በአንድ ወር ጊዜ ውስጥ ሽማግሌዎች ተላኩ። በወቅቱ እናት ነሽ ገና በልጅነት ዕድሜዋ ላይ ስለነበረች፣ ሽማግሌዎች እሷን ለመጠየቅ ከቤት ሲገቡ እሷ ምንም ሳታስብ ውጭ ገመድ እየዘለለች ትጫወት እንደነበር በሳቅ ታስታውሳለች።
የሰርጋቸው ዕለት ደግሞ ፈጽሞ የማይረሱ ሁለት ትልልቅና አስቂኝ አጋጣሚዎችን አስተናግዷል፡
• በነጭ ሱሪ ላይ የተደፋው ወጥ: በሰርጉ ዕለት ነብይ እዩ ሰርገኞችንና አስተናጋጆችን ለማገዝ ሲሯሯጥ ያልታሰበ አደጋ አጋጠመው—በለበሰው ነጭ ሱሪ ላይ ወጥ ተደፋበት! ሌላ የሚቀይረው ሱሪ ስላልነበረው፣ ወጡን በጨርቅ ጠራረገው ቀጥታ ወደ መድረክ በመውጣት የቃል ኪዳን ስነ-ስርዓቱን ፈጸመ።
• የሰርግ ምሽት ለቅሶ: ስነ-ስርዓቱ አልቆ፣ እንግዶች ወደየቤታቸው ሲበታተኑ እናት ነሽ ገና ልጅ በመሆኗ የነገሩ አሳሳቢነት ገና የገባት ያኔ ነበር። «አባቴና ቤተሰቦቼ ናፈቁኝ! እኔስ አብሬያቸው እቤት እመለሳለሁ» በማለት በሰርግ ቪሎዋ ስቅስቅ ብላ ማልቀስ ጀመረች!
ዛሬ ላይ ያ ሁሉ አልፎ 15 ዓመታትን አብረው ዘልቀዋል። የ5 ልጆች (ሬዲኤት፣ ሃያል፣ ኬዝያ፣ ግሎሪ እና አንቶኒዮ) ወላጆች ሲሆኑ፣ ነብይ እዩ ጭፋ ለስኬቱና ለትልቅ የአገልግሎት ማዕረጉ ከእግዚአብሔር ቀጥሎ ትልቋን ድርሻ የምትወስደው ባለቤቱ እናት ነሽ መሆኗን በፍቅር ይገልጻል። ቤቱን፣ አምስቱን ልጆችና የቤተክርስቲያኑን አስተዳደራዊ ስራዎች በአስተዋይነት የምትመራ ጠንካራ ሚስት መሆኗንም አድናቆቱን አጎናፅፏታል።
ትዳር እንደ ቀልድ በሚታይበትና በፍጥነት በሚፈርስበት በዚህ ዘመን፣ የእግዚአብሔርን ቃልና ፍቅር መሰረት ያደረገ ትዳር ምን ያህል ፍሬያማና በረከት እንደሆነ ይህ የፍቅር ታሪክ ትልቅ አስተምህሮ ይሰጠናል።
ትዳር በፍቅር፣ በትግስትና በእግዚአብሔር ፍርሃት ሲገነባ በረከቱ ለትውልድ ይተርፋል!
