25/08/2026
አገልጋይ የሚያገለግለው እግዚአብሔርንና ቤተክርስቲያንን እንደመሆኑ መጠን ወደ ላይ እግዚአብሔርን ወደ ጎን ሰዎችን እንዳያሳዝን፤ ለእግዚአብሔር ክብር፣ ለቤተክርስቲያን መታነጽ የሚበቃ አገልግሎት እንዲኖረን የእግዚአብሔር ቃል ምክር የሚከተሉትን ይመስላል
1. የጸሎት ሰው ሁን፦
ጸሎት የምንወጣው የሆነ ግዴታ ሳይሆን ግንኙነት ነው። የፀሎት ሰው ስትሆን ከእግዚአብሔር ጋር ያለህ ግንኙነት ጤናማ ይሆናል። ኃይል ትቀበላለህ። ሞገስን ታገኛለህ። ጥበቃው ይበዛልሀል። ለበረከት ትሆናለህ። ስለዚህ ሁሌም ጸልይ። (ፊልጵ.4:6-7/1ጢሞ.2:1-4)
2. መጽሐፍ ቅዱሳዊ ሁን፦
ቃሉን ስበክ፤ ቃሉን አጥና፤ ቃሉን አስጠና፤ ቃሉን በአግባቡ አቅርብ፤ ቃሉን አሰላስል። (2ጢሞ.2:15/2ጢሞ.4:2)
3. በፍጹም ነፍስህ እግዚአብሔርን ውደድ፦
አገልግሎት መተዳደሪያ ሳይሆን ለእግዚአብሔር የምናቀርበው የፍቅር ስጦታ ነው። የአገልጋይ የመጀመሪያ ሥራው እግዚአብሔርን ከሁሉም በላይ መውደድ ነው። ከአገልግሎታችንም በላይ የምናገለግለውን እግዚአብሔርን መውደድ ዋናው ተልእኮ ነው። (ማቴ.22:35-38)
4. ተቀደስ፦
በንግግርህ፣ በአካሄድህ፣ በአዋዋልህ፣ በአገልግሎትህ፣ በኑሮህ ቅድስናን ተለማመለድ። (ዘሌዋ.19:2/1ጢሞ.4:7-8)
5. ከሌሎች አገልጋዮች ተማር፦
ከአሰባበካቸው፣ ከስኬታቸው፣ ከውድቀታቸው፣ ከአመራራቸው፣ ሰው አያያዛቸውን ተማር።
6. ራስህን ዝቅ አድርግ፦
ስለ ራስህ የወረደ ግምት አይኑርህ። ነገር ግን ራስህን ዝቅ አድርግ። የምትሰጠው የተቀበልከውን ነው። ካንተ የሆነ ምንም ነገር የለም። የጠራህን ለማስከበር እንጂ ክብር ለማግኘት አታገልግል (1ጴጥ.5:5-6/ፊልጵ.2:2:5-11)
7. ውደድ፦
ቸርችህን፣ የምታገለግላቸውን፣ አገልግሎትህን፣ የሚጠሉህን፣ የሚተቹህን፣ የሚደግፉህን ወዘተ ውደድ። ከፍቅር አትጉደል። (1ጴጥ.4:8)
8. ትጋትን አሳይ፦
አገልግሎት ለሰነፎችና የሰነፎች አይደለም። ለማንበብ፣ ለመምከር፣ ለመገሰጽ፣ ለማስተማር፣ ለመጸለይ፣ ደቀመዝሙር ለማፍራት ትጋትን አሳይ። (2ጢሞ.4:2/ 2ጴጥ.1:10)
9. ታጋሽ ሁን፦
ሁሉም ነገር ሥርዐትና ሂደት አለው። ቶሎ ለውጥ ካላየሁ አትበል። በፈተና ጽና። የዘራነው ሁሉ ቶሎ አይበቅልም። የኛ ድርሻ ለዘሩ መጠንቀቅና ታምኖ መዝራት ብቻ ነው። መቼ ይበቅላል? አናውቅም። እንታገስ። (2ጢሞ.4:2)
10. ራስህን ሁን፦
በተሰጠህ ጸጋ አገልግል እንጂ ገበያ ተኮር አትሁን። መጋቢ ሆነህ ተጠርተህ ነቢይ ልሁን አትበል። ትንቢት ለማምጣት፣ የታመመ ለመፈወስ አትጋጋጥ። ባልተጠራህበት አትድከም። ጥሪህንና ራስህን አክብር። እንደ እገሌ አትስበክ፤ ባንተ ሁኔታ፣ ባንተ ድምፅ ስበክ።(1ቆሮ.12:4-11)
11. ለቤተሰብህ ቅድሚያ ስጥ፦
ለሚስትህ፣ ለልጆችህ ቅድሚያ ስጥ። ተገኝላቸው። የሰው ቤት እያገለገልክ ቤትህን አትርሳ። (1ጢሞ.3:1-7)
12. የሚሰሙህን አክብር፦
ትምህርትና ስብከትህን በአግባቡ አደራጅ፤ በአግባቡ ዝግጅት አድርግ። ተቀመጡና ተነሡ፣ አሜን በሉ እያልክ ሕዝቡን አታድክም። እንድትሰብክ ተጠርተህ፤ ስለ ራስህ አውርተህ፤ ጉራህን ነዝተህ አትምጣ። የዝግጅት እጥረትህን መንፈስ ርእስ አስቀየረኝ፣ ጸልይ አለኝ እያልክ ሰበብ አታብዛ። ከሚሰሙህ ጉባኤ ውስጥ የሚበልጡህ አሉ። ክብርን አሳይ። ቅዱሳንን አክብር።(1ጢሞ.4:16)
Demissie Daniel ✍️
