15/09/2023
. 💠ዝዓበየ መቕጻዕቲ💠
💠𝐓𝐡𝐞 𝐆𝐫𝐞𝐚𝐭 𝐏𝐮𝐧𝐢𝐬𝐡𝐦𝐞𝐧𝐭💠
ኣብ ህይወት ብዙሕ ዓይነት መቕጻዕቲ ኣሎ። ነፍስ ወከፍ ሰብ ውን ነቲ 'ዝዓበየ እዩ' ኢሉ ዝኣመነሉ መቕጻዕቲ እዩ ዝኽተል። ይኹን ደኣ እምበር ካብ ኩሉ ዓይነት መቕጻዕቲ ግና እቲ ዝዓበየ መቕጻዕቲ ፍቕሪ እዩ።
'ፍቕሪ ደኣ ካብ መኣስ እዩ መቕጻዕቲ ዝኾነ፧' ዝብል ሰብ ኣይሰኣንን እዩ። ዕላማ ናይ መቕጻዕቲ፦ እቲ ዝተቐጽዐ ኣካል ጌጋኡ ኣሚኑ ናብ ቅንዕና ንምምላስ እዩ። እምበኣር ፍቕሪ መቕጻዕቲ ዝኾነሉ ነቲ ኣብ ጌጋ መገዲ ዘሎ ንምምላስ ካብኡ ዝሕይል ብዘይምህላዉ እዩ።
ኣብ ብሉይ ኪዳን ሰብ ብቕንዕና መታን ክመላለስ ተባሂሉ ዝተፈላለየ መቕጻዕቲ ንርኢ ኢና። ንኣብነት፦ ብዳርባ እምኒ ሙሟት - Stoning [1]፡ ኣብ ዕንጸይቲ ምስቃል - Hanging [2]፡ ምቅጻል - Burning [3]፡ ምስያፍ - Spear [4] ……… ወዘተ። እዚኣቶምን ነዚኣቶም ዝኣምሰሉን መቕጻዕቲ ግና መሃርቲ ዝኾኑ ነቲ ነዚ ዝርኢ ዘሎ ሳልሳይ ኣካል እዮም እምበር፣ ነቲ ዝቕጻዕ ዘሎ ኣካል መሃርቲ ክኾኑ ኣይክእሉን እዮም። ነቲ ዝቕጻዕ ዓቢይ መምህር ክኾኖ ዝኽእል መቕጻዕቲ ግና ፍቕሪ እዩ።
"ጸላእትኹም ኣፍቅሩ፣ ንዚጸልኡኹም ድማ ጽቡቕ ግበሩ። ንዚረግሙኹም መርቑ፣ ምእንቲ እቶም ዚጸርፉኹም ጸልዩ።" [5] ዝብል ትእዛዝ ኢየሱስ ክርስቶስ እቲ ጥቕሙ ኣባና ጥራይ ተሓጺሩ ዝተርፍ ኣይኮነን። ከመይሲ እንተ ደኣ ኣፍቂርናዮም፡ እንተ ደኣ መሪቕናዮም፡ ስለኦም ድም እንተ ጸለና፣ ኣብ ሰብነቶም በሰላ ዘይክረኣየና ይኽእል እዩ፤ ነገር ግና ንልቦም ከም ጒሁር ሓዊ ከንድዶ እዩ። [6] ሰብ ነቲ ብደገ ዘሎ ቊስሊ ብዝተፈላለየ መድኃኒት ክፍውሶ ይኽእል እዩ፣ ነቲ ብፍቕሪ ዝቖሰለ ልቡ ግና ብይቕሬታ ጥራይ እዩ ክፍውሶ ዝኽእል።
ስለዚ ሓይሊ ፍቕሪ ተረዲእና ንዝመጸና ጸላኢ ብፍቕሪ ቀጺዕና ንስዓሮ! ንሱ ከኣ ጸላኢና ዝነበረ ፈታዊና ክኸውን እዩ።
━━━━━━━━━━━━━
[1] ዘጸ 19፥13/ ዘሌ 20፥27
[2] ዘሁ 25፥4/ ዘዳ 21፥22
[3] ዘፍ 38፥24/ ዘሌ 21፥9
[4] ዘጸ 32፥27/ ዘሁ 25፥8
[5] ሉቃ 6፥27-28
[6] ሮሜ 12፥20/ ምሳ 25፥21
━━━━━━━━━━━━━
ነታ ቃል ኣምላክ ጽምኣት ዘለዋ ነፍሲ መታን ከተርውዩ መሃሪ ምዃኑ ኣስተውዒልኩም SHARE, JOIN, FOLLOW ምባል ናትኹም መንፈሳዊ ዕዮ እዩ።
ናሁ ሠናይ መልአከ ብርሃን
ዘደ/ሰ/ቅ/ሚ/ዓዲ-ቀይሕ
23/ 11/ 2021 ዓ.እ
14/ 03/ 2014 ዓ.ም
Addis Ababa / Ethiopia
