ማዕደ ተዋህዶ

ማዕደ ተዋህዶ Contact information, map and directions, contact form, opening hours, services, ratings, photos, videos and announcements from ማዕደ ተዋህዶ, addis abeba, Addis Ababa.

channel is on progress with your support we are coming with new mezmurs and more spritual programs keep supporting us ፡




እንቋዕ ናብ ዘመነ ሉቃስ ኣብጽሓና 2019 ዓ.ም.ሣህሉ ለእግዚአብሔር በጊዜሁ፡ ምሕረት እግዚአብሔር ኣብ ጊዜኡ እዩ። (መዝ. ፷፰፥፲፫/68፥13) እቲ ንለይትን መዓልትን ጸልማትን ብርሃንን ኣ...
10/09/2026

እንቋዕ ናብ ዘመነ ሉቃስ ኣብጽሓና 2019 ዓ.ም.
ሣህሉ ለእግዚአብሔር በጊዜሁ፡ ምሕረት እግዚአብሔር ኣብ ጊዜኡ እዩ። (መዝ. ፷፰፥፲፫/68፥13)


እቲ ንለይትን መዓልትን ጸልማትን ብርሃንን ኣፈራሪቁ ካብ ሰዓት ናብ ዕለት ካብ ዕለት ናብ ሰሙን ካብ ሰሙን ናብ ወርኂ ካብ ወርኂ ናብ ዓመት ዘሰጋግር ንዘመን ብዘመን ዝክትእ ብዘመን ዘይውሰን ፈጣሪ ኣዝማናት እግዚአብሔር እንቋዕ ካብ ዘመነ ማርቆስ ናብ ዘመነ ሉቃስ (፳፻፲ወ፱ ዓ.ም.) ብሰላም ኣብጽሓና።

ብመሠረት ኣቈጻጽራ ቅድስት ቤተ ክርስቲያን ካብ ሓደ ዓመት ናብ ካልእ ዓመት መስጋገሪ ናይ መጀመርታ ዕለት ሓደ መስከረም እዩ። እዚ ዕለት ንኽብርን መዘከርታን መጥምቀ መለኮት ቅዱስ ዮሓንስ፡ ርእሰ ዓውደ ዓመት ቅዱስ ዮሓንስ ይበሃል። እዚ ኸኣ ቅዱስ ዮሓንስ ዛዛሚ ዘመነ ብሉይ፡ ጀማሪ ዘመነ ሓዲስ ካብ ቅዱሳን ነቢያት ናብ ቅዱሳን ሓዋርያት መሰጋገሪ ድልድል ስለዝኾነ እዩ።
ጊዜ ማለት ምስ ሥነ ፍጥረት ዝመጽአ ውህበት እግዚአብሔር እዩ። እግዚአብሔር ንፍጥረታቱ ኣብ ውሽጢ ጊዜ የመላልስን ይምግብን ይሕሉን፡፡ ነቲ ሥራሕ ብኣምላኽነቱ ኣብ ዝደለዮን ዝመደቦን ዝወስኖን ጊዜ ደኣ ይፍጽሞ እምበር ንንግሆ ዝሓሰቦ ንምሸት፥ ንሓጋይ ዝሓሰቦ ከኣ ንኽረምቲ ኣይገብሮን እዩ። “ሣህሉ ለእግዚአብሔር በጊዜሁ/ ምሕረት እግዚአብሔር ኣብ ጊዜኡ እዩ፤(መዝ. ፷፰፥፲፫/ 68:13) ከም ዝብል ኣዳም ብምክረ ከይሲ ተታሊሉ ትእዛዝ ምስ ኣፍረሰ እግዚአብሔር ኣብታ ዝመደባ ጊዜ ቀጽዖ። በዲሉ ኣሚኑ ንስሓ ምስ ኣተወ ኸኣ ባዕሉ እግዚአብሔር ኣብቲ ዝወሰኖ ጊዜ ኣድኃኖ። ነዚ ንኸረድእ ንዋየ ኅሩይ ዝተባሃለ ቅዱስ ጳውሎስ “ወአመ በጽሐ ዕድሜሁ ፈነወ እግዚአብሔር ወልዶ ወተወልደ እምብእሲት/ ጊዜኡ ምስ በጽሐ ድማ እግዚአብሔር ንወዱ ለኣኾ፤ ካብ ድንግል ማርያም ተወልደ” ይብል።(ገላ.፬፥፬/4:4)

ንደቂ ሰባት ድማ እግዚኣብሔር ኣብ ምግባርን ትሩፋትን ንኽጽመዱ ዝሃቦም ናይ ሥራሕ መድረኽ፡ ፈቓድ፡ ዕድል፡ ባይታ እዩ። ወዲ ሰብ ሰማያውን ዘለዓለማውን ርስቱ መንግሥተ ሰማያት ዘውርሶ ናይ ጽድቂ ሥራሕ ከም ጾም፡ ጸሎት፡ ምጽዋት፡ ስግደት፡ ሠናይ ግብርታት ወዘይመስሎ ክሠርሕ ዘመን የድልዮ። ከምቲ ጥበበኛ ሰሎሞን" ንዅሉ ዘዘመኑ ኣለዎ ኣብ ትሕቲ ሰማይ ንዘሎ ኵሉ ነገር ጊዜ ኣለዎ ንምውላድ ጊዜ ኣለዎ፡ ንሙማት ጊዜ ኣለዎ" (መክ. ፫፥፩/3፥1-8) ብምባል ዝገልጾ ንኹሉ መንፈሳውን ሥጋውን ዕዮ እንፍጽመሉ ብውጥንን ትግሃትን እንጥቀመሉ ጊዜ ተዋሂቡና ኣሎ። ነዚ ተዋሂቡና ዘሎ ጊዜ ድማ ምስ ኃጢኣትና ዘይኮነስ ብንስሓ ጸሪና ንዝተበኣስናዮ ተዓሪቅና፡ ንዝበደልናዮ ክሒስና፡ ንዝተጋገናዮ ኣሪምና፡ ክንከይድ ከምዘሎና "ዑቁ እንከ ዘከመ ተሐውሩ ከመ ጠቢባን በንጽሕ ወኣኮ ዘከመ ዐብዳን … እስመ እኩይ መዋዕሊሁ/ እምበኣር ተጠንቐቁ እቲ ቅንያቱ ክፉእ እዩ እሞ ነቲ ዝተዋህበኩም ጊዜ ኣብ ረብሓ እናኣውዓልኩም ከም ዓያሹ ዘይኮነስ ከም ለባማት ተመላለሱ" ከም ዝተባህለ ዝኃለፈ ዕድሜና ብኃጢኣት ብሸለልትነት ዘኅለፍናዮ ዘመን ከይከውን ጉድለትና ገምጊምና ምእራም ይግባእ። ምኽንያቱ ሓድሽ ዓመት እቶም ብጥንተ ተፈጥሮ ዝተረኽቡ ዕለት ተደሚሮም ዝህብዎ ለውጢ እምበር ካልእ ዝተወሰኸ ነገር የልቦን፡፡ ነቲ ቀመር ሓልዩ ዝመላለስ ዘይልወጥ ጊዜ ሓድሽ ዘብሎ ናትና ሥራሕ ብምዃኑ ንዝተዋህበና ጊዜ ኣብ በረኸት ሥጋን በረኸት ነፍስን ዘውህብ ዝተፈላለየ መንፈሳውን ሥጋውን ዕዮ ክነውዕሎ ይግባእ። ንኣብነት፦
ሀ. ኣብ ትምህርቲ፦ ምሥጢር ሃይማኖት ምፍላጥን ምጽናዕን ይግባእ “ወዘእንበለ ተአምኖሰ ኢይትከሃል ያሥምርዎ ለእግዚእብሔር/ ብዘይ ሃይማኖት ንእግዚኣብሔር ከተሥምሮ ኣይከኣልን እዩ።(ዕብ. ፲፩፡፮/11፡6) ከም ዝብል ንእግዚአብሔር ንምሥማር ሃይማኖት መሠረት እዩ፥ ሃይማኖት ንምፍላጥ ድማ ትምህርቲ መሠረት እዩ።(ሮሜ ፲፡፲፯/10፡17) ስለ’ዚ ካብ ጊዜና መደብ ሠሪዕና ንትምህርትን ምንባብ ቅዱሳት መጻሕፍትን ከነውዕል ይግባእ። በዚ መንገዲ እንተኸድና ከኣ እምነትና ክጸንዕ እዩ። እምነትና እንተጸኒዑ ምግባርና ይቐንዕ ምግባርና እንተቐኒዑ ድማ ንኣምላኽና ከነሥምሮ ንኽእል፡፡ ከምኡ’ውን ምስትውዓል ንዘጥርያ ሰብ ሕይወት ትህቦ እያ” ከምዝብል።(ምሳ፡፲፮፡፳፪/16፡22) ምስትውዓል ንኽንረኽብ ኵሉ ጊዜና ኣብ ምንባብን ጸሎትን ከነውዕሎ ይግባእ።
ነቢይ ሆሴዕ’ውን "ሕዝበይ ሰኣን ፍልጠት ይጠፍእ ኣሎ" ከም ዝበለ።(ሆሴ፡፬፡፮/4፡6) መንገዲ ጽድቅን ኵነኔን ንኽንፈልጥ ከነንብብን ክንመሃርን ክንክእል ኣሎና። ምኽንያቱ ኣብዛ ላዕልን ታሕትን ኃጢኣትን መናፍቅነትን ምፍኽኻርን ምልውዋጥን ዝዓብለላ ዓለም፡ ካብ ርቱዕ ሃይማኖትናን ሠናይ ምግባርናን ምእንቲ ከይንወፅእ ንጊዜና ኣብ ፍልጠት ነውዕሎ።

ለ. ኣብ ሥራሕ፦ እግዚኣብሔር ንሰብ ብሥራሕን ዕዮን ክነብር ኣዚዙ እዩ። ንኣብነት እግዚአብሔር "ንሰብ ወሲዱ ኽዓያን ክሕልዋን ኣብ ገነት ኣቐመጦ" ይብል (ዘፍ.፪፥፲፭/2፥15) ደኃር’ውን ኣዳም ብኃጢኣቱ ናብ ምድሪ ኣብ ዝተሰደደሉ እዋን ብረሃጽ ገጹ ክበልዕ ኣዚዝዎ እዩ።(ዘፍ.፫፥፲፯/3፥17)
ስለዚ ዝተዋህበና ጊዜ ካብ ፍቃደ እግዚእብሔር ከይወፃእና ብውጥን ክንሠርሓሉ ይግባእ። ንጊዜና ብውጥን ኣብ ሥራሕ ምውዓል ብዓቢኡ ፆር ሥጋ ኣውኂዱ ካብ ኃጢኣት ንኽንሕሎ ዝሕግዝ እዩ። ቅዱሳን ኣቦታትና ሥራሕ ኣልቦ ኮይኖም ጊዜኦም ብኸንቱ ንኸየሕልፉ እሞ ፆር ሥጋ ንኸይብርትዖም፡ ኣብ ሥራሕ ተጸሚዶም ንርእሶም ኮይኖም ንኻልኦት ይምጽውቱ ከም ዝነበሩ ገድለ ቅዱሳን ይነግረና። ልዑል እግዚኣብሔር እትሠርሓሉ ጊዜን ዝሓስብ ኣዕምሮን ምሉእ ኣካል ምስ ጥዕናን ሂብካ ከሎ ብትህኪት ተታኂዝካ ንጊዜኻ ብዋዛን ፈዛዛን ምኅላፍ፡ ከምኡ’ውን ተጊህካ ብቅንዕና ኣብ ተግባረ ነፍስን ተግባረ ሥጋን ዘይምውዓል ንመከራ ሥጋን ነፍስን ዘቃልዕ እዩ። ቅዱስ ጳውሎስ “ክሠርሕ ዘይደሊ ኣይብላዕ ኢሉ ኣሎ። (፪ይ ተሰ. ፫፡፲/3፡10) ጥበበኛ ሰሎሞን’ውን "ብልዕን ድቃስን ጥራይ እንተኾንካ ጨርቃም ክትከውን ኢኻ" ይብል። (ምሳ. ፳፫፥፳፩/23፥21) ስለዚ በረኸት ሥጋን በረኸት ነፍስን ንምርካብ ነቲ እግዚኣብሔር ዝሃበና ጊዜ ብውጥንን ትግሃትን ኣብ ሥራሕ ከነውዕሎ ይግባእ።
ሐ. ብምሕዳስ ኣዕምሮ፦ ሓድሽ ዓመት መጽአ ኢልካ ዓመታት ምቑጻር ትርጉም ዘለዎ ኣይኮነን፤ እንታይ ደኣ ንሕና ዘይሥነ ምግባራዊ ሕይወትና ኣመሓይሽና ጉዕዞና ጉዕዞ ቅዱሳን ክኾነልና ክንነቅሕ ከምዘሎና፡ ዝጸልመተ ሕይወትና ብቓል ኣምላኽና ክነብርሆ፡ ዝኣረገ ኣተሓሳስባና ታሪኽ ቅዱሳንና ብምንባብ ከነሐድሶ፡ ዝኃጥአ ሰብነትና ብማየ ንስሓ ሓጺብና ሓድሽ ልብን ብስለት ዘለዎ ኣእምሮ ክህልወና ይግባእ።(ኤፌ. ፬፡፳፫/4፡23)
መ. ፍረ መንፈስ ቅዱስ ክህልወና፦ ምስ መንፈሳዊ በዓላትናን ሥርዓትናን ሥጋዊ ጉዳያት ከም ጓይላን ደርፍን ብዝኂ መግብን መስተን ስስዐን ካብ ዝኣመሰሉ ርኂቅና ብዝከኣለና ንነዳያን እንተኣማቒልና ሽዑ ፍረ መንፈስ ቅዱስ ክንፈሪ ኢና። (ገላ. ፭፥፳፪-፳፫/5፥22-23)
ሠ. ተሳተፍቲ በረኸት ምዃን፦ ቅድስቲ ቤተርስቲያና ምስ ፈጣሪናን ቅዱሳንን እተራኽብ ኣብ ምድሪ ዘላ ናይ እግዚአብሔር ቤተ መንግሥቲ እያ፡ ስለዚ ኣብቲ ምስ ፈጣሪና ዘራኽበና ዝሰርዐቶ መዓዲ ጸሎት፡ ማኅሌት፡ ቅዳሴ ክንርከብ ይግባእ። ንኣብነት እዚ ሎሚ ነስብዕሎ ዘሎና ክብረ በዓል ቅዱስ ዮሓንስ ቅድስት ቤተ ክርስቲያና ኣብ ዓመት ናይ እግዚአብሔር ዘደንቕ ግብርን ዘይውዳእ ምሕረቱን ንርእየለንን ንዝክረለንን በዓላትን ንዕኡ ነሥምረሉ ኣጽዋማት ዝእወጀሉ ፍሉይ መዓልቲ እዩ። በዚ ዕለት ዝተኣወጁ ኣጽዋማትን በዓላትን ድማ ኵሉ ሰብ መንፈሳዊ ኮነ ማሕበራዊ ጉዳያቱ ይሠርዕ። ኣብ ዝኃለፈ ዓመት ዘጉደሎ ንኽምልእ ኸኣ ብሩህ ባይታ ይፈጥር።
ስለ’ዚ ካብ ብዙኅ ብውኅዱ በዚ ዝተዘርዘረ መንገድታት ጊዜና መዲብና ኣኣብ ጊዜኡ ዝግብ ኣና ግብርታት እንተገበርና እቲ ኣብ ጊዜኡ ምሕረቱ ዝልእኽ ፈጣሪ ድማ ንሱ ብዘመደቦ መንገዲ ኣኣብ ጊዜኡ ምሕረቱ ከም ዝህብ ዝተኣመነ እዩ።

#ለበዋ
እምበኣር ኣብ ዝኃለፈ ዓመት ነቲ ዝተዋህበና ጊዜ ብምሉኡ ኣብ ረብሓ ብዘይምውዓልና ሕልናና ዝኸሰሰናን ዝፈረደልናን እንተኾይኑ ከምዚ ኢለ ክሳዕ መዓስ᎒' ንበል! ነዚ ሓድሽ ዓመት እግዚአብሔር ብምሕረቱ ሓዳሽ ጊዜ ከምዝሃበና ፈሊጥና ድማ ብሩህ ናይ ዓወት ጊዜ ንምግባር ምስ ገዛእ ርእስና ቃል ኪዳን ንእቶ።
ለቡ፦ በዓልና ዓርቢ ውዒሉ ስለዘሎ ብጾምን ጸሎትን ተወሲንና ክሳዕ ጊዜ ቅዳሴ ክንውዕል ደኣ እምበር ብምኽንያት መንፈሳዊ በዓል ሥጋዊ ነገር ክንገብርን ኣብ ንሥጋ ጥራይ ዘዕግብን ካብ ሰዓታት ጾም ወፃኢ ብዝኾነ ጊዜን መግቢ እናበላዕና እናሰተናን ኣይኮነን ከነሕልፎ ዝግባእ። ምኽንያቱ ሕጊ ሓሊና ተሳተፍቲ በረኸት እምበር ሕጊ ቅድስት ቤተ ክርስቲያን ኣፍሪስና ተሳተፍቲ መርገም ክንኸውን ኣይግባእን። “ኣቐዲምኩም መንግሥቱን ጽድቑን ድለዩ ብድኅሪኡ ኵሉ ክውሰኸልኹም እዩ።”(ማቴ.፯፥፴፫) ከምዝብለና መንፈሳዊ ነገር ነቐድም። እቲ ሥጋዊ ግና ተወሳኺ እዩ።

ነቲ ዝተወህበና ጊዜና ብምሉእ ኣብ ረብሓ እናኣውዓልና በረኸት ሥጋን በረኸት ነፍስን ክንረክብ ናይ እግዚአብሔር ቅዱስ ፍቃድ ይኹነልና። ጸሎት ናይ ኣዴና ቅድስት ድንግል ማርያምን ናይ ኩሎም ቅዱሳንን ኣይፈለየና።
ኣጽዋማትን በዓላትን ዘመነ ሉቃስ ወንጌላዊ ፳፻፲ወ፱ ዓ.ም.

ቅዱስ ዮሐንስ ፩ መስከረም፤ ጥንተ ዖን ፫፤ መንበር ፲፫፤ አበቅቴ ፳፫፤ መጥቅዕ ፯፤ ጾመ ነነዌ፤ ፲፭ የካቲት፤ ዓቢይ ጾም ፳፱ የካቲት፤ ደብረዘይት ፳፮ መጋቢት፤ ሆሣዕና ፲፯ ሚያዝያ፤ ስቅለት ፳፪ ሚያዝያ፤ ትንሣኤ ፳፬ ሚያዝያ፤ ርክበ ካህናት ፲፰ ግንቦት፤ ዕርገት ፫ ሰኔ፤ ጰራቅሊጦስ ፲፫ ሰኔ፤ ጾመ ሓዋርያት ፲፬ ሰኔ፤ ጾመ ገሃድ ፲፮ ሰኔ።

፩ መስከረም ፳፻፲ወ፱ ዓ.ም.(11/09/2026ፈ.)

ስብሐት ለእግዚኣብሔር ልዑል
ወለወላዲቱ ማርያም ድንግል
ወለመስቀሉ ክቡር
አሜን።

Lisan Tewahdo Menbere Patriarik

ቃለ ቡራኬ ብጹዕ ወቅዱስ ኣቡነ ባስልዮስ 6ይ ፓትርያርክ ተዋህዶ ቤተ-ክርስቲያን ኤርትራ ፡ ብምኽንያት በዓል ቅዱስ ዮውሃንስቃለ ቡራኬ ርእሰ ኣውደ ዓመት ቅዱስ ዮሓንስ ፳፻፲ወ፱ (2026)በስ...
10/09/2026

ቃለ ቡራኬ ብጹዕ ወቅዱስ ኣቡነ ባስልዮስ 6ይ ፓትርያርክ ተዋህዶ ቤተ-ክርስቲያን ኤርትራ ፡ ብምኽንያት በዓል ቅዱስ ዮውሃንስ

ቃለ ቡራኬ ርእሰ ኣውደ ዓመት ቅዱስ ዮሓንስ ፳፻፲ወ፱ (2026)
በስመ አብ ወወልድ ወመንፈስ ቅዱስ አሐዱ ኣምላክ!!!

“ሣህሉ ለእግዚአብሔር በጊዜሁ፡ ምሕረት እግዚአብሔር ኣብ ጊዜኡ እዩ።” (መዝ. 68፡13)

ክቡራንን ክቡራትን፡ ኣብ ውሽጥን ወጻእን ሃገር እትነብሩ ሕዝበ ክርስቲያን፡ ብሓፈሻ ኵልኹም ሕዝቢ ኤርትራ እንቋዕ ካብ ዘመን ማርቆስ ወንጌላዊ ፳፻፲ወ፰/2018 ዓመተ ምሕረት ናብ ዘመነ ሉቃስ ዜናዊ ፳፻፲ወ፱/2019 ዓመተ ምሕረት ብደሓነ ሰላም ኣብጸሓናን ኣብጸሓኩምን። ሎሚ ዓመት ፳፻፲ወ፱/2019 “ማርቆስ ተሳዕረ ሉቃስ ነገሠ” ዝበሃለሉ ዓመተ ምሕረት እዩ`ሞ፡ ኣምላከ ምሕረት ዘመነ ሰላም፡ ዘመነ ራሕዋ፡ ዘመነ ፍቕሪ ክገብረልና ቡራኬናን ሠናይ ትምኒትናን ንገልጸልኩም።

ዘመን ኃሊፉ ዘመን ክትካእ ዝገብር ጐይታ ዘመናት ልዑል እግዚአብሔር ትውልዲ እናኅለፈን ትውልዲ እናተክአን ነፋሳት የንፍስ፡ ማያት የፍስስ፡ ብርሃናት የመላልስ ሓጋይን ክረምትን መዓልትን ለይትን የፈራርቕ። (ዳን. 2፡20-22)
ኣምጻዔ ዓለማት ፈጣሬ ፍጥረታት እግዚአብሔር፡ ንሰብ ምስ ፈጠረ ብመንፈስ ቅዱስ ኣኽቢሩ ሾብዓተ ሃብታት ኣሕዲሩ ብርሃን ኣልቢሱ ብርሃን ኣጐናጺፉ ኣብ ገነት ኣቐመጦ። ደሓር ግና ብምኽሪ ዲያብሎስ ተታሊሉ ዕፀ በለስ በሊዑ ብመርገመ ሥጋ ወሪደ መቃብር፡ ብመርገመ ነፍስ ወሪደ ገሃነም ተፈሪድዎ ካብ ገነት ወጽአ። ነቲ ዝተዋህቦ ናይ ጸጋ ብርሃን ኣጸልመቶ። ብድሕር`ዚ ፈጣሪኡ ክዕረቖ ንስሓ ምስ ኣተወ ብፍጥረቱ ዘይጭክን ጐይታ ንስሕኡ ርእዩ “ብሓሙሽተ መዓልትን ፈረቓ መዓልትን”፡ ካብ ጓል ጓልካ ተወሊደ ኣብ መስቀል ተሰቒለ ደመይ ኣፍሲሰ፡ ሥጋይ ቆሪሰ ከድሕነካ እየ ኢሉ ቃል ኪዳን ኣተወሉ። “ብሓሙሽተ መዓልትን ፈረቓ መዓልትን” ዝተባህለ 5500 ዓመት ኮይኑ ካብዚ ተበጊሶም ደቂ ኣዳም ገሊኦም ብወርሒ፡ ገሊኦም ብኸዋኽብትን ብጸሓይን እናቖጸሩ ሓደ ክውለድ ሓደ ክቕበር ትንቢት ክንገር ሱባኤ ክቑጸር ክሳዕ ዘመነ ሥጋዌ (ልደት ጎይታ) በጽሐ።

ቅዱስ ዳዊት “ሣህሉ ለእግዚአብሔር በጊዜሁ፡ ምሕረት እግዚአብሔር ኣብ ጊዜኡ እዩ።” (መዝ. 68፡13) ዝበለ ነዚ ዝሃቦ ትንቢት ዝፍጸመሉ ዘመን ምስ ኣኸለ ከኣ ካብቲ ዝኣተወሉ ቃል ኪዳን ከየጕደለን ከይወሰኸን ብ5500 ዓመት ግብረ ምድኃን ፈጸመሉ።

እምበኣር ሎሚ ዓመት 7519 ዓመተ ዓለም እዩ። ካብዚ 5500 ዓመት ዘመነ ኵነኔ ይበሃል፣ 2019 ድማ ዓመተ ምሕረት ይበሃል።

ነዚ መሠረት ብምግባር መደምደምታ ብሉይ ኪዳን መጀመርታ ሓዲስ ኪዳን ዝኾነ፡ መጥምቀ መለኮት ቅዱስ ዮሓንስ፡ ናይ ዘመን መሰጋገሪ ብምዃኑ፡ ቅድስት ቤተ ክርስቲያን ካብ ጸልማት ናብ ብርሃን፡ ካብ ብሉይ ናብ ሓዲስ፡ ካብ ዘመነ ኵነኔ ናብ ዘመነ ምሕረት፡ ንዝተሰጋገርናሉ ዓቢይ ውዕለት ብምስትውዓል ፡ ካብ ክፉእ ርሒቕና፡ ብቕንዕናን ብሓቅን በዓልና ክንዝክሮን ከነኽብሮን ሠሪዓትልና ኣላ።

ኣብ ቅዱሳት መጻሕፍትና “ዘለዎ ንዘይብሉ የማቕል” (ሉቃ 3፡10) ተባሂሉ ከም ዝተኣዘዘ፡ ምትሕግጋዝ ንቡርን ክቡርን ባህልና`ውን ስለዝኾነ ንጽጉማት ክንዝክር፡ ኣብ`ዚ ሓድሽ ዓመት ብፍቕርን ምትሕልላይን ነሓድሕድና ንክበጻጻሕ፡ ቂምን ጽልእን፡ ቅርሕንትን ጸለመን ኣወጊድና ብሓባር ተኸባቢርና ሠናይ ግብሪ ክንዓይይ፡ ንዘይተሠርሐ ክንሠርሕ፡ ንዝተጀመረ ክንፍጽምን ብቕንዕና መንፈስ ክንትንሥእ ይግባእ።

ብረድኤት እግዚአብሔር ኣምላኽ ቅድስት ቤተ ክርስቲያንና ከጽንዓልና፡ ሃገርና`ውን ክልልት በግርማ ሕጽርቲ ብመንፈስ ቅዱስ ገይሩ ከንብረልና። እዚ ዓመት እዚ ዓመተ ሰላምን ቅሳነትን ክገብረልና፡ ንዝሓመሙ ፈውሰ ምሕረቱ፡ ንዝተጸገሙ ድማ ራሕዋ ሂቡ፡ ሓድነትና ኣጽኒዕና ብፍቕርን ሕወነትን ክንነብር ደጊምና ሓደራ ንብል።

ኣብ መወዳእታ “ወትባርክ ኣክሊለ ዓመተ ምሕረትከ ወይጸግቡ ጠላተ ገዳም፡ ወይረውዩ ኣድባረ በድው።”/ ኣክሊል ዓመተ ምሕረትካ ትባርኽ፡ ናይ ምድሪ በረኻታት ጠሊ ይጸግቡ፡ ኣብ ምድረ በዳ ገቦታት ይረውዩ።” (መዝ 64፡11) ከም ዝብል ናይ ሎሚ ዓመት ዘመን ክረምቲ ውሕድ ዝበለ እኳ እንተኾነ “ኣልቦ ዘይሰኣኖ” እግዚአብሔር ንሱ መጋብን ሰራዕን እዩ`ሞ፡ ንወርሓ ክረምቲ ባሪኹ፡ ንዝሃበና ልምላሜ ናብ ፍረን ቆፎን፡ ከምኡ`ውን ናብ ብርሃነ መስቀሉ ብሰላም ከብጽሓና ቅዱስ ፍቓዱ ይኹነልና።

ቅድስት ቤተ ክርስቲያና “ወእንዘ ሀሎነ በዘመን ሉቃስ ወንጌላዊ ያብጽሓነ እስከ ዘመነ ዮሓንስ ዜናዊ በሰላመ እግዚአብሔር፡ ማለት ብሓቂ ካብ`ዚ ኣቲናዮ ዘሎና ዘመነ ሉቃስ፡ ናብ ዝመጽእ ዓመት ዘመነ ዮሓንስ፡ ብሰላም እግዚአብሔር የብጽሓና” ትብል።

እግዚአብሔር ሃገርናን ምሉእ ዓለምን ይባርኽ!!!
ብፁዕ ወቅዱስ ኣቡነ ባስልዮስ ቀዳማዊ ፮ይ ፓትርያርክ ወርእሰ ሊቃነ ጳጳሳት
ዘኦርቶዶክስ ተዋሕዶ ቤተ ክርስቲያን ኤርትራ
መስከረም ፳፻፲ወ፱/ መስከረም 2026

በስመኣብ ወወልድ ወመንፈስ ቅዱስ ኣኅዱ ኣምላክ ኣሜን! ጳጒሜን 3/፫ በዓሉ ለቅዱስ ሩፋኤል ሊቀ መላእክትቅዱስ ሩፋኤል ካብ ሊቀነ መላእክት ብሳልሳይ ደረጃ ተሰሪዑ ይርከብ “አንሰ ስምየ ሩፋኤ...
07/09/2026

በስመኣብ ወወልድ ወመንፈስ ቅዱስ ኣኅዱ ኣምላክ ኣሜን!
ጳጒሜን 3/፫ በዓሉ ለቅዱስ ሩፋኤል ሊቀ መላእክት

ቅዱስ ሩፋኤል ካብ ሊቀነ መላእክት ብሳልሳይ ደረጃ ተሰሪዑ ይርከብ “አንሰ ስምየ ሩፋኤል ሣልሳይ እምሊቃነ መላእክት ወሚካኤል ሊቀ መላእክት ቀዳማይ ርእሰ ኩሎሙ መላእክት ወስሙ መስተሣህል ፡ወገብርኤልኒ ካዕበ ውእቱ ሊቀ መላእክት ዳግማይ ወትርጓሜ ስሙ ኣምላክ ወሰብእ፡ዘተፈነወ ኃበ እግዚእተ ኩሉ ፍጥረት ቅድስት ድንግል ማርያም ወላዲት ኣምላክ ከመ ይዜንዋ ልደቶ ለእግዚእነ ኢየሱስ ክርስቶስ ሎቱ ስብሐት እምኔሃ።” ከም ዝበለ ።(ስንክሳር ጳጒሜን ፫)

ኣብ ቅድስት ቤተ ክርስቲያና በዚ ዕለት እዚ ተስካረ በዓሉ ናይ ቅዱስ ሩፍኤል ዝኽበረሉ ስለ ብዙሕ ነገራት እዩ።ንሱ ከኣ“ኣነ ውእቱ ሩፋኤል ዘሤመኒ እግዚኣብሔር ላዕለ ፳ወ፬(24) ሠራዊተ መላእክት ከመ ንሰብሖ ለእግዚኣብሔር ኣብ ወወልድ መስተሣህል ወለመንፈስ ቅዱስ ናዛዚ”ከምዝብል።(ስንክሳር ጳጒሜን ፫) ዝተሸመሉ ዕለት ፡ንጦቢት ካብ ዑረት ዓይኒ ንሳራ ፈዊሱ ናብ ወዱ ጦብያ ከም ትምርዖ ዝገበረሉ ክኸውን ከሎ ከምኡ ከኣ ቅዳሴ ቤቱ ዝተፈጸመሉ ዕለት እዩ።

ስሜቱ

ቅዱስ ሩፋኤል ሊቀመላእክት ናይ ቤተ ክርስቲያን ቅዱሳን መጻሕፍትን ድርሳናትን ከም ዝገልጽዎ በዚ ዕለት’ዚ ቅዱስ እግዚኣብሔር ኣብ ልዕሊ ብዙሓት ቅዱስን መላእክ ሓለቐ ገይሩ ዝሸሞ ዕለት እዩ።ከምቲ ኣብ ላዕሊ ተገሊጹ ዘሎ ብናይ ሊቃነ መላእክት ማዕርግ ንቅዱስ ሚካኤልን ገብርኤልን ተኸቲሉ ኣብ ሳልሳይ ደረጃ ይስራዕ።

ቅዳሴ ቤቱ

ናይ እስክንድርያ ሊቀ ጳጳሳት ኣባ ቴዎፍሎስ ኣብ ዝነበርሉ ዘመን ብዙሕ ቤተ ክርስቲያን ሃነጹ።ካብተን ኣብ ዘመኖም ዝተሓንጻ ቤተ ክርስቲያን ሓንቲ ብስም ቅዱስ ሩፋኤል ሊቀ መላእክት ኣብ ልዕሊ ዓሳ ነባሪ ዝተሓንጸት ነበረት።በዚ ዕለት እዚ ከኣ ቅዳሴ ተገብረ።እንተኾነ እቲ ናይ ጥንቲ ገበል ማለት ዲያብሎስ ንክርስቲያን ካብ ምስዳድ ስለ ዘይ ዓርፍ ነታ ኣብ ልዕሊ ዓቢ ዓሳ ተሰሪሓ ዝነበረት ቤተ ክርስቲያን ኣናወጻ ካብ ብዝሒ ምንዋጽ ናይቲ ዓሳ ዝተላዕለ ካኣ እታ ቤተ ክርስቲያን ክትፈርስ ደለየት። እንተኾነ እቲ ሓያል፡ሰማያዊ መልኣኽ ቅዱስ ሩፋኤል ብቕጽበት መጺኡ “ብቓል እግዚኣብሔር ኣብ ዘለኻዮ ቁም ካብኡ ከይትንቀሳቕስ” ኢሉ ብኲናት ገይሩ ወግኦ።
እቲ ኣብቲ ዓሳ ሓዲሩ ዘናውጻ ዝጸንሐ ስይጣን ከኣ በቲ ሓያል መልኣኽ ቅዱስ ሩፋኤል ተገሲጹ ወጸ እታ ቤተ ክርስቲያን ከኣ ሃድኤት።ክብርን ምስጋናን ንኣምላኽና ንእግዚኣብሔር ይኹን።ኣሜን።

ኣብ ልዕሊ ጦቢትን ጦብያን ዝፈጸሞ ተረዳእነት

እንሆ ጦቢት ዝበሃል ካብ ንእስነቱ ጀሚሩ ብመገዲ እግዚኣብሔር ዝምራሕ ምጽዋትን ዕሽርን ዘፍቅር ንድኻታትን ንጽጉማትን ዝሕግዝ ሰብ ነበረ።ንሱ ኣብ ዘመን ንእስነቱ ብሰላምን ብቕድስናን ኣብ ሃገሩ እና ነበረ ከሎ ሓደ ግዜ ብዘመን መንግስቲ ሻልማንኤሰር ተማሪኹ ናብ ኣሶር/ነነዌ ከደ።እነተኾነ ኣብ ዓዲ ስደት’ውን ንሱስ ከምቲ ኣብ ሃገሩ ዝፍጽሞ ዝነበረ ስርዓት ኣምላኾ ካብ ምፍጻም ድሕር ኣይበለን።ኩሎም ዓሌቱን ወገናቱን ከምቲ ሰብ ነነዌ ዝነብርዎ ዝነበሩ ኣነባብራ፡ ዝበልዕዎ ዝነበሩ ብልዒ ክነብሩን ክበልዑን ከለዉ ንሱ ግና ሰለስተ መንእስያት ኣናንያ ፡ኣዛርያ፡ሚሳኤል ከምኡ ከኣ ብጥበቡ ፍሉጥ ዝነበረ ዳንኤል ዝገበርዎ ካብ መግቦም ምብላዕ ኣበየ።እግዚኣብሔር ድማ ኣብ ቅድሚ እቲ ንጉስ ሞጎስ ከም ዝረክብን ኣዝዩ ልዕል ከም ዝብልን ገበሮ።በዚ ከኣ እቲ ንጉስ ንኹሉ ዘድልዮ ዘበለ ንኽገዝኣሉን ክልኣኾን ኣብ ልዕሊ እዚ ኩሉ ሸሞ።

ከምዚ ኢሉ እና ነበረ ሓደ ግዜ ኣብ መደቀሲኡ ደቂሱ ከሎ ውዑይ ሓርኢ ናይ ለዃዂቶ ኣብ ኣዒንቱ ኣተዎ ኣብ ብዙሕ ሕክምና ከይዱ ከኣ ክሓዊ ኣይከኣለን።በዚ ድማ ክልቲኤን ኣዒንቱ ብፍጹም ዓወራ ምርኣይ’ውን ሰኣነ።ብገዛእ ጉልበቱ ሰሪሑ ንስድራቤቱ ዝኣሊ ብምጽዋትን ብዕሽርን ንቤተ መቕደስ ዘገልግል ፡ንጥሙያትን ንሱኡናትን ዘብልዕን ዘስትን ዝነበረ ጦቢት ምውፋር ምእታው ሰኢኑ ኣብ ገዛ ኮፍ ኢሉ ምስ ዑረት ዓይኑን ምስቲ መሪር ቃንዛ ዓይንን ክቕመጥ ግዲ ኮኖ።ከምዚ ኢሉ ካኣ ንዓሰርተ ኣርባዕተ ዓመት ቀጸለ፡ ምስናይ እዚ ግና ናብ ልዕሊ እግዚኣብሔር ጸሎት ምብጻሕን ምልማንን ኣየቋረጸን።

ከምዚ ኢሉ እንከሎ ሳራ እትብሃል ጓል ራጉኤል ንሳ ሸውዓተ ሰብኣይ ተመርዕያ ነበረት። እንተኾነ ኣስሞድዮስ ዝበሃል እኩይ ግና እቶም ዝተመርዓውዋ ሰብኡት ጌና ብስጋ ከይተራኸብዋ ከለዉ ይቐትሎም ነበረ።
እዚ ከይኣክል ግና ንዝነበራ ሽግር ዝረኣየት ኣገልጋሊታ ኩሉ ግዜ ተባጭወላን ትጸርፋን ነበረት። እዚ ኩሉ ሽግርን መከራን ዝወርዳ ዝነበረ ሳራ ግና ኩሉ ጸገማን ውርደታን ናብቲ ልዕል ኣምላኽ ብጸሎት ተብጽሕ ነበረት፡

ጦቢት ናብ ኣምላኽ ዝልምነሉ ዝነበረ ግዜን/ሰዓትን ሳራ ናብ ኣምላኽ ዝጸለየትሉ ግዜ ኣብ ሓደ ሰዓትን ግዜን ነበረ።

ጦቢት እንሆ ዓይኑ ብጥዕዩ ከሎ ጋባኤል ዝበሃል ሰብኣይ ገንዘብ ኣቐሚጡ ነበረ እሞ ሓደ እዋን ንወዱ ንጦብያ ጸዊዑ እንሆ ናብቲ ቦታ ከይዱ ነቲ ገንዘብ ከምጽኦ ሓበሮ።እንተኾነ ጦቢት ገና ንእሽተይ ስለ ዝነበረ ምስኡ ዘካይዶ ሰብ ደልዩ ክወስድ ምስ ተመልሱ ካኣ ዓስቢ ድኻሙ ክህቦን ምዃን ሓበሮ ።ከም ቃል ኣቡኡ ካኣ ኣብ ደጌ ወጺኡ ምስኡ ዘካይዶ ሰብ ደለየ እንሆ ካኣ እቲ ሓያል መልኣኽ ቅዱስ ሩፋኤል መንእሰይ ሰብኣይ መሲሉ ተጓነፎ ።ተተሓሒዞም ከኣ ከዱ።ኣብ መንገዲ እና ኸዱ ኣብ ገምገም ፈለግ ጤርጌስ በጽሑ እሞ ኣብኡ ኣዕረፉ እንሆ ካኣ ሓደ ዓቢ ዓሳ ንጦብያ ክበልዖ ኢሉ መጸ።ነቲ ዓሳ ካኣ ሓዞ እንሆ መልኣከ እግዚኣብሔር ሩፋኤል ነቲ ዓሳ ኣብ ክልተ ከፊሉ ሓሞቱን ከብዱን ልቡን ወሲዱ ካኣ ነቲ ካልእ ጓሓፎ። ጦብያ ክሳዕ ጉዕዝኦም ዝውዳእ ነቲ ዓሳ እና በልዔ ከደ።

ጸኒሑ እቲ ቅዱስ መልኣኽ ናብ ቤት ራጉኤል ክኸዱ ከም ዘለዎምን ንሳራ ክምርዓዋ ዝግብኦ ንሱ ምዃኑን ሓቢሩ ናብ ቤት ራጉኤል ኣተዉ።እንሆ መንነቶም ገሊጾም ካኣ ንሳራ ናብ ጦብያ ኣመርዓውዋ።እዚ ክኸውን ከሎ እንሆ ከምቲ ዝሞቱ ሸውዓተ ሰብኡት ንሱ’ውን ክመውት እዩ ኢሎም ስድራቤታ ኣዝዮም ተሻቐሉ።እንተኾነ እቲ ሓያል መልኣኽ ነቲ ካብ ገምገም ፈለግ ዝሓዝዎ ዓሳ ክትዕጠኖ ከም ዘለዋ ሓበራ ጸሎት ገይሮም ካኣ ደቀሱ፡እቲ ንብዙሕ ግዜ ዘሽግራ ዝነበረ ጋኔን ብቕጽበት ወጺኡ ካብቲ ከባቢ ርሓቐ።በዚ ዝኾነ ኩላቶም ኣዝዩ ደስ በሎም።

ቅዱስ ሩፋኤል ናብቲ ኣቐዲሙ ዘበገሶም ጉዳይ ማለት ምምጻእ ገንዘብ ካብ ጋባኤል ምስ ክልተ ገላዉ ከደ።ኣብቲ ቤት ኣትዩ ኩሉ እቲ ጦቢት ዝበሎምን ጦብያ ወዲ ጦቢት ከም ዝተመርዓወን ነጊሩ እቲ ዘሎ ገንዘብ ሒዙ ናብ ጦብያ ተመልሰ።እንሆ ካኣ ንሳራ ጓል ራጉኤል ሰብይቱ ሒዙ ናብ ኣብኡ ጦቢት ተመልሰ፡እቲ ዝኾነ ነገር ዝሰምዔ ጦቢት ኣዝዩ ንኣምላኽ ኣመስገነ።በቲ ኣቐዲሞም ኣብ ገምገም ፈለግ ዝረኸብዎ ሓሞት ናይቲ ዓሳ ገይሩ ካኣ ኣዒንቱ ደረዘሉ እሞ ካብ ዓይኑ ቅራፍ ዝመስል ወጸ ብኡብኡ ከኣ ኣዒንቱ ተኸፍተሉ ረኣየ ከኣ።

እዚ ኩሉ ምስ ተፈጸመ ኢዩ እምበር እቲ ሓያል መልኣኽ መንነቱ ክገልጸሎም ዝጀመረ።
በለ ከኣ “ንእግዚኣብሔር ወድስዎ በቲ ዝገበረልኩም ኩሉ ካኣ ኣመስግንዎ።
ንእግዚኣብሔር በቲ ዝገበረልኩም ኩሉ ሰናይ ኣብ ቅድሚ ኩሎም ፍጥረታት እና ኣመስገንኩምን ብመዝሙር እና ዘመርኩምን ሞሳ ምለስሉ።
እወ ንምምስጋኑ ኣይትተሃከዩ።ንእግዚኣብሔር ኣምላኽ በቲ ዝገበረልኩም ኣብ ቅድሚ ኩሉ ሰብ ኣኽብርዎ ተግባራቱ’ውን ኣዘንትዉ። ንንጉስ ምስጢር ክትሕልወሉ ጽቡቕ ኢዩ።
እግዚኣብሔር ዝገበሮ ግን ኩሎም መታን ከኽብርዎን ከመስግንዎን ኣብ ኩሉ ክእወጅን ብኹሉ ክፍለጥን ኢዩ ዝግባእ።ጽቡቕ ግበሩ እሞ ክፉእ ኣይክበጽሃኩምን ኢዩ።,,,,,,,,,,,,,,,,,,,,ከምቲ ኣቐዲመ ዝበልክኹም ንንጉስ ምስጢሩ ክትሕልወሉ ጽቡቕ ኢዩ።እግዚኣብሔር ዝገብሮ ግና ንኹሉ ክንገር እዩ ዝግባእ።ሕጂ ከኣ ሓንቲ ከይሓባእኩ ነቲ ሓቂ ብምልኡ ክነግረኩም ኢየ።
ጦቢት ንስኻን ሳራን ምስ ጸለኹም ንጸሎትኩም ናብ ቅድሚ ልዑል እግዚኣብሔር ዘቕረብክዎ ኣነ እየ ነይረ።
ምዉታት ኣብ እትቐብረሉ ግዚ ’ውን ኩሉ ግዜ ከምኡ ይገብር ነብርኩ።በታ ምሳሕ ከይበላዕካ ምዉት ክትቀብር ካብ መኣዲ ዝተንሳእካላ መዓልቲ ካኣ እግዚኣብሔር ክፍትነካ ለኣኸኒ ።
ከምኡ’ውን ንዓኻ ከሕውየካ፡ንሳራ ሰበይቲ ወድኻ ድማ ካብ ዝነበራ ማእሰርቲ ክፈትሓ ለኣኸኒ ።ኣነ ካብቲ ጸሎት ቅዱሳን ዘዕርጉን ኣብ ቅድሚ ግርማ እግዚኣብሔር ከገልግሉ ደው ዝብሉን ሸውዓተ ቅዱሳን መላእኽቲ ሓደ ዝኾንኩ ሩፋኤል መልኣኽ ኢየ።
,,,,,,,,,ኣብ ምድሪ ክሳዕ ዘለኹም ንኣምላኽ ወድስዎ ከምኡ’ውን ኣመስግንዎ ።እንሆ ኣነ ናብቲ ዝለኣኸኒ ክዓርግ እየ።ነቲ ዝተገብረልኩም ኩሉ ኣብ መጽሓፍ ጸሓፍዎ”ኢልዎም ናብ ሰማይ ዓረገ።

እወ እዚ ሓያል መልኣኽ ቅዱስ ሩፋኤል ኣብ ልዕሊ ጦቢትን ሳራን ዝገበሮ ድንቂ ተኣምር ብዓይኒ ልቦና ነስተውዕሎ።ትማሊ ንቕዱሳን መላእኽቱ እና ለኣኸ ንብዙሓት ኣቦታትናን ኣዴታትን ኣብ ህይወቶም ዓቢይን ዘድንቕን ስራሕ ዝሰርሐ ቅዱስ ኣምላኽና እግዚኣብሔር ሎሚ’ውን ብቕንዕና ልብን ብንጽህናን ከምቲ ንሱ ዝደልዮ እንተተጓዒዝና ንጦቢት ስጋዊ ዓይኑ ከፊቱ ብብርሃን ከም ዝርኢ ዝገበሮ ንዓና እውን ዓይነ ልቦናን ተኺፊቱ ናብቲ ብርሃናዊ ኣምላኽ ብብርሃን ተመላሊስና ንዕኡ ከነስምር፡ከምቲ ንሳራ ንዘመናት ዘሳቐያ ርኹስ መንፈስ ገሲጹ ዘውጽኣላ ሎሚ’ውን ሽሕ እኳ ናብ ዝተፈላለየ ርኽሰት ዝመርሑና ሰናይን ጽቡቕን ስራሕ ንኸይንሰርሕ ዓይነ ልቦናና ዓጽዮም ብዘይፍረ ጽድቂ ቀንፈዘው ከም እንብል ዝገብሩና ርኹሳት መናፍስቲ እንተሃለዉ እንተኾነ ልብናን ሕልናናን ናብ ጸሎትን ረድኤትን ቅዱሳን መላእክቲ እንተድኣ ኣቕኒዕናዮ ፡ንረድኤትናን ንሓገዝናን ወትሩ ድሉዋት ዝኾኑ ቅዱሳን መላእኽቲ ብእሳታዊ መስቀል ነቲ ዝጻብኣና ሰይጣን ክግስጹልናን ካብ ዙርያና ከርሕቑልናን ኢዮም።

ሰላም ለሩፋኤል መስተፍሥሔ ኣልባብ ዘተበህለ
ከመ ይፈውስ ሕሙመ ወያጥዒ ቊስለ
ከመ ኣስምዖ ፍጡነ ለጦቢት ቃለ
ጽድቀ ዘይዴግኑ ይረክቡ ሣህለ
ወእለ ይኤብሱ ያመጽኡ በነፍሶሙ ኅጒለ።

ብሰላም ናብዚ ቅዱስ ዕለት ዘብጽሓና ቅዱስ እግዚኣብሔር ኣምላኽናቭክብርን ምስጋናን ይኹኖ።

ናይ እግዚኣብሔር ምሕረት; ናይ ቅድስት ድንግል ማርያም ኣማላድነት; ናይ ቅዱስ ሩፋኤል ጸሎትን በረኸትን; ምስ ኩላትና ህዝበ ክርስቲያን ይኹን ኣሜን።

ወስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር
ኣሜን።
Henok ZeGebriel ቤተ ገብርኤል ንዋየ ቅድሳት ወመጻሕፍት

በስመ አብ ወወልድ ወመንፈስ ቅዱስ አሐዱ አምላክ አሜን!24 ነሓሰ ዕረፍቱ ለኣቡነ ተክለሃይማኖት ጻድቕ ኣቡነ ተክለሃይማኖት ካብ ኣብኦም ካህን ጸጋዘኣብ ካብ ኣዲኦም ቅድስት እግዚእሃረያ ብ ...
29/08/2026



በስመ አብ ወወልድ ወመንፈስ ቅዱስ አሐዱ አምላክ አሜን!

24 ነሓሰ ዕረፍቱ ለኣቡነ ተክለሃይማኖት ጻድቕ ኣቡነ ተክለሃይማኖት ካብ ኣብኦም ካህን ጸጋዘኣብ ካብ ኣዲኦም ቅድስት እግዚእሃረያ ብ 24 መጋቢት ተጸኒሶም ብ24 ታሕሳስ 1197 ዓ.ም ኣብ ሰሜን ሽዋ ቡልጋ ጽላልሽ (ዞረሬ ) ኣብ ዝተባህለ ቦታ ተወልዱ፡ ምስ ተወልዱ ኣብ ሳልሳይ መዓልቶም ካብ ሕቑፊ ኣዲኦም ወሪዶም “አሐዱ ኣብ ቅዱስ፡ አሐዱ ወልድ ቅዱስ፡ አሐዱ ውእቱ መንፈስ ቅዱስ” ኢሎም ንስላሴ ኣመስገኑ፡ ድሕሪ 40 ማዓልቲ ድማ ውልድነት ሥላሴ ብምቅባል ስርዓት ጥምቀት ተፈጸመሎም በዚ ቅዱስ ውላድ ደስ ዝበሎም ስድርኦም ውን ፍሰሓጽዮን ኢሎም ሰመይዎም ትርጉሙ ድማ ናይ ጽዮን ሓጎስ ደስታ ተድላ ማለት እዩ፡ ምስ ጎበዙ ኣቦኦም ትምህርቲ ሃይማኖት መሃርዎም።

ኣብ ንኡስ ዕድሚኦም ድማ ብግብጻዊ ጳጳስ ኣቡነ ቄርሎስ መዓርገ ዲቁና ተቐበሉ፡ ብድሕሪ እዚ እግዚኣብሔር ንክህነት መረጾም እሞ ካህንን ሊቀ ካህናትን ኮይኖም ተሸሙ፡ ኣቡነ ተክለ ሃይማኖት ንልዕሊ ሓምሳ ዓመት ወንጌል ዝሰበኹ ብዙሕ ታኣምራት ዝሰርሑን ቅዱስ ኣቦ እዮም፡ ስለዚ ከኣ ቤተክርስቲያን ሓድሽ ሃዋርያ ጸሓየ ጽድቅ ኢላ ትጽውዖም።

ሓደ ካብ መዓልታት ሓደ ግዜ ምስ ብጾቶም ኣብ ሃድን እንከለዉ ቅዱስ ሚካኤል ተገሊጹ ካብ ድኅር ሕጂ ኣራዊት ዘይኮነ ሰባት ክትሃድን ኢኻ ድዉይ ናይ ምፍዋስ ኣጋንንቲ ናይ ምውፃእን ምዉት ናይ ምትንሣእን ሥልጣን ካብ እግዚአብሔር ተዋሂብካ ኣሎ፡ ስምካ ድማ ፍስሐጽዮን ዘይኮነ ተክለ ሃይማኖት ተባሂልካ ክትጽዋዕ ኢኻ፡ ተክለ ሃይማኖት ማለት ድማ፡ ተክለ አብ፡ ተክለ ወልድ፡ ተክለ መንፈስ ቅዱስ፡ ማለት እዩ፡ ጐይታናን መድኃኒናን ኢየሱስ ክርስቶስውን ተገሊጹ ሓዋርያት ናብ ዘይበጽሕዎ ምድሪ ንኽልእኸካ ብቕዱስ ሚካኤል ጌረ ሓድሽ ስም ብምሃብ ሓድሽ ሓዋርያ ጌረካ ኣለኹ።

22 ዓመት ምስ መልኡ ናብ ኣባ ቄርሎስ ብምኻድ ቅስና ተቐቢሎም ኣቡኦም ብዘገልገሉሉ መዓርግ ኣቡኦም ኣብ ዘገልግልሉ ደብሪ ከገልግሉ ጀመሩ፡ ብመጀመርታ ኣዲኦም ቀጺሎም ድማ ኣቡኦም ምስ ዓረፉ ዘለዎም ኵሉ ሸይጦም ንድኻታት ብመሃብ ገዝኦም ብኽፍቱ ገዲፎሞ ወፁ፡ ብዙኃት ሕዝቢ ድማ ነቲ ብስም እግዚአብሔር ዝገብርዎ ብዙኅ ተኣምራት ርእዮም ብስም ጐይታና ኢየሱስ ክርስቶስ ኣሚኖም እናተጠመቑ ተኸተልዎም።

ኣብቲ ጊዜ እቲ ኣብ ከባቢ ቡልጋ ኣብ ዕንጨት ዝኣምኑ ኣብ ባሕሪ ዘምልኹ መድኃኒት ዝቓምሙ ጠንቆልትን መሰርይን መምለኽቲ ጣዖትን መሊኦም ስለ ዝነበሩ፡ ኣቦና ነዚ ምስ ሰምዑ ሩባ ተሳጊሮም ብምኻድ ነቲ ሕዝቢ ካብቲ ኂዝዎ ዝነበረ እንስሳዊ ባህሪን ዘምልኾ ዝነበረ ገረብን ገዲፉ ናብ ኣምልኾ ጐይታናን መድኃኒናን ኢየሱስ ክርስቶስ ክምለሱ እናገሠፁ ወንጌል ክምህርዎም ጀመሩ፡እቲ ሕዝቢ ግና ክሰምዖም ኣይከኣለን ብኣንጻሩ ትምህርቲ ወንጌል ከቋርጽዎ ኣዘዝዎም፡ ኣቦና ግና ብፍጹም እምነት ናብቲ እቶም ሕዝቢ ዘምልኽዎ ገረብ ከዱ፡ ኣብቲ ገረብ ዝኃደረ ሰይጣን ኣነ ፈጣሪኹም እየ ዝብል ድምፂ የውፅእ ነበረ፡ ኵሎም ሕዝቢ ድማ ነቲ ገረብ ይሰግድሉን ዝደለዮ ይሥውዕሉን ነበሩ።

ኣቦና ምስቶም ሕዝቢ ናብቲ ገረብ ምስ ቀረቡ ኣብቲ ገረብ ኃዲሩ ዝምለኽ ዝነበረ ሰይጣን “ነዚ ሰብ’ዚ ኣይተቕርቡለይ” እናበለ ከጉርዕ ጀመረ፡ እቶም ደቂ ዓዲ ድማ ነቦና ገዲፎም ናብቲ ገረብ ከዱ፡ ኣቦና ግና ገጾም ናብ ምብራቕ ኣቢሎም ኢዶም ዘርጊሖም ናብ ፈጣሪኦም ምእንቲ ወገናቶም “ ኦ ጐይታ ነዚ ኣብ ልዕሊ ፍጥረትካ ዚሠልጠነ ሰይጣን ኣብ ትሕቲ እግርና ኣርግጸልና፡ ነዚ ሰይጣን እዚ ኣዋርዶ፡ ዘወትር ክረድኣካ እዩ ዝበልካኒ መልኣኽ ቅዱስ ሚካኤል ልኣኸለይ፡ ናይዚ ሰይጣን ኃፍረቱ ግለጽ፡ ጐይታ እግዚአብሔር ምግባር ካባኻ እዩ፡ ኣብዞም ዝተኣከቡ ሰባት ስምካ ይገለጽ፡ ሥራሕካ ይፈለጥ ንስኻ ዓቢ ምዃንካ ይፍለጡ” እናበሉ ክጽልዩ ጀመሩ።

ናብቲ ሕዝቢ ዘምልኾ ገረብ ተመሊሶም “ ኣንቲ ሰይጣን ኣባኺ እናኃደረ ሕዝቢ ዘስሕተልኪ ገረብ፡ እዚ ሕዝቢ ኃይሊ እግዚአብሔር ምእንቲ ክርኢ በቲ ኣነ ዝኣምኖን ዝሰግደሉን ብስም ኢየሱስ ክርስቶስ ካብቲ ዘለኽዮ ተላዒልኪ ናባይ ክትመጽኢ እእዝዘኪ ኣለኹ” ኢሎም ኣዘዝዋ፡ ሕዝቢ ናብታ ገረብ እናሰገደ እታ ገረብ ግና እግሪ ከም ዘለዋ እና ተጓዕዘት ኣቦና ጻድቕ ተኽለሃይማኖት ናብ ዘለውዎ ቦታ ኸይዳ ቆመት፡ እቲ ኣብታ ገረብ ዚኃደረ ሰይጣን ድማ “ኣታ ክፉእ ሰብ እቲ ዝገደፍኩልካ መላእ ኣውራጃ ከይ ኣኽለካስ ነዞም ኣብዚ ዘለዉ ባሮተይ ኪትምንጥለኒ መጺኻ” እናበለ ጨርሐ፡ ብድኅሪ እዚ ቕዱስ ሚካኤል ካብ ሰማይ ከም መብረቕ ብምውራድ ንሰይጣን ሓኒቑ ኃዞ፡ በዚ ጊዜ ሰይጣን “ሚካኤል ጊዜይ ከይበጽሐ ኣይተጥፍኣኒ ድኅሪ ሕጂ እዚ ሰብዚ ኣብ ዘለዎ ቦታ ኣይቀርብን እየ” እናበለ ጨደረ፡ ብድኅሪ እዚ እቶም ደቂ ዓዲ ናብ ኣቦና ጻድቕ ተክለሃይማኖት ቀሪቦም “ኦ ናይ ሕይወት ብርሃን ኣቦና ናብቲ ዝፍቶ ናይ ወንጌል ጐደና ምርሓና” እናበሉ ኣብ እግሩ ወደቑ፡ ቦታ ክሳዕ ዝጸቦም ንኣሽቱን ዓበይትን ኣወዳትን ኣዋልድን ተኣኪቦም “ንሕና ውን በቲ ትኣምኖ ኣምላኽ ኣሚንና ኣለና” በልዎም።

ኣቦና ድማ “መጽኣት” ናብ ዝተባህለት ሩባ ወሪዶም ነቲ ማይ ብምብራኽ ብስም ኣብን ወልድን መንፈስ ቅዱስን ኣጠመቕዎም።

ኣዲኦም ንኣቡነ ተክለ ሃይማኖት ከይ ወለደት ነዊሕ ገይራ ነበረት፡ ከምዚ ኢላ ውላድ ዘይብላ እናነበርት ከላ ውን ኣብ ኢድ ባዕዳውያን ሰራዊት ወዲቓ ተማሪኻ ብዙሕ ፈተና በጺሕዋ ነበረ፡ እንተኾነ እግዚኣብሔር ንሊቀ መላእክት ቅዱስ ሚካኤል ሰዲዱ ካብ ኩሉ መከራኣ ኣናገፋ ናብ ዞራሬ ዘላ ቤተክርስቲያን ውን ኣብቲ ካህን ጸገዛኣብ ዝነበሮ ብተኣምር ኣብጽሓ ሓደ ዓቢይ ውላድ ከም ዝህቦም’ውን ኣበሰሮም።

ኣቡነ ተክለሃይማኖት ኣቦኦምን ኣዲኦምን ምስ ዓረፉ ኩሉ ንብረቶም ሸይጦም ገዝኦም ገዲፎም ከዱ፡ መዓርገ ክህነት ተዋሂቦም ከኣ ናብ ስብከት ወንጌል ተዋፈሩ እሞ ብዝገበርዎ ተኣምርን ብሓይሊ ኣምላኮም ንብዙሓት ነፍሳት ኣጥመቑ፡ ድሕሪ 3 ዓመት እግዚኣብሔር ንዓዶም ከይዶም ክምህሩ ጸውዖም ኣብኡ ከኣ ንቡዙሕ ዓመታት ተጋደሉ፡ ንቡዙሕ እዋን ውን ብተራዳእነት ኣገልገሉ፡ ብተኣምራት ውን ብዙሓት ሕሙማት ፈወሱ ምውታን’ውን ኣተንስኡ፡ ብድሕሪ እዚ ጎይታናን መድሓኒናን ኢየሱስ ክርስቶስ ተገሊጹ ናብ ቅዱስ ኢየሱስሞኣ ኪድ እሞ ንሱ ኣስኬማ ክህበካ እዩ በሎም ናብኡ ከይዶም ኣስኬማ ምንኩስና ተቐበሉ ኣብኡ ከኣ ዓሰርተ ዓመት ተቐመጡ፡ ኣቡነ ተክለሃይማኖት ኣብ መዓልቲ ብዙሕ ስግደት ይሰግዱ ጸሎት ዳዊትን ምስጋና ነብያትን ድማ ይጽልዩ ነበሩ ብፍቓድ እግዚኣብሔር ከኣ ናብ ትግራይን ከባቢኣን መጹ፡ ኣብ ደብረ ዳሞ ከኣ ብፍቃድ ኣምላክ ንዓሰርተ ክልተ ዓመት ተቐመጡ፡ ናብ ኩለን ገዳማት ውን ብእግሮም ይበጽሕወን ነበሩ።

ካብ መዓልታት ሓደ ግዜ ካብ ደብረ ዳሞ ክወርዱ ክብሉ ገመድ ተበትኮም እሞ እግዚኣብሔር ከኣ ህሩያኑ ክጽገሙ ስቕ ኢሉ ስለዘይርኢ ከም ናይ መላእኽቲ ሽድሽተ ክንፊ ሃቦም፡ ብክንፎም ከኣ ወረዱ፡ ብድሕሪ እዚ ግዜ'ዚ ብመሪሕነት መልኣከ እግዚኣብሔር ናብ ኢየሩሳሌም በጺሖም ተመልሱ፡ ካብ ኢየሩሳሌም ምስ ተመልሱ ከኣ ናብ ኣባ ዮሓኒ ከዱ፡ ኣብ እንዳ መስቀል ጉና ጉና ከኣ ንመድሃኒነ እግዚእ ረከብዎ፡ ምንኩስና ሂቦም ድማ ኣቦ መነኮሳት ከም ዝኸውን ተነበይሉ፡ መድሃኒነ እግዚእ ዓዶም ቢሓት ኮይኑ ከምቲ ቅዱስ ጳውሎስ ንጢሞቲዎስ ዝወለደ፡ ንኣባ ስሙኤል ዘዋልድባ ሞኖኮስ ሓያልን ንካልኦት ብርክት ዝበሉ መማህራን ኣቦታት ዝወለዱ እዮም፡ ኣቡነ ተክለሃይማኖት እዚ ኢልካ ዘይጽብጸብ ብዙሕ ተኣምራትን፡ ሃዋርያዊ ተልእኾን እናገበሩ ንሶም ዝምገብዎ ቆጽለ መጽሊ፡ ጥራይ ነበረ።

ብዘይካዚ እዞም ቅዱስ ኣቦ እዚኦም ብህይወተ ስጋ እንከለዉ ምስ ሱራፋኤልን ኩሩቤኤአልን ኮይኖም መንበረ ጸባኦት ዓጢኖም እዮም፡ ብዘይካ እዚ ኣዝዮም ምእንቲ ክጋደሉ ብየማኖም ጸጋሞምን ኲናት ተኺሎም 22 ዓመት ደው ኢሎም ከም ዝጸለዩ ሓንቲ እግሮም ድሕሪ ምቁራጻ ድማ ንሸውዓተ ዓመት ዝኣኽል ብዘይ ዕረፍትን ድቃስን ንኣርባዕተ ዓመት ዝኣክልውን ዝኾነ ይኹን ከይጥዓሙ ከም ዝጸለዩ ታሪኽ ይነግረና።

ኣብ መወዳእታ ጎይታናን መድሓኒናን ኢየሱስ ክርስቶስ ተገሊጹ “ኦ ፍትወይ ስለይ ክትብል ኩሉ መከራን ሽግርን ስለ ዝተቐበልካ ኣነ ከኣ ምስቶም ሕሩያነይ ከእትወካ እየ፡ ከምቲ ናቶም ክብሪ ውን ክህበካ እየ” በሎም፡ ስሞም ዝጸውዐ ብስሞም ንዝጠመየ ዘብልዐ፡ ንዝጸምአ ዘስተየ፡ ንዝዓረቐ ዝኸደነ፡ ተዝካሮም ዝገበረ፡ ገድሎም ዝጸሓፈን ዘንበበን ክምሕረሎም ምዃኑ’ውን ቃል ኣተወሎም፡ ብድሕሪ እዚ ኣብ መበል 99 ዓመትን 10 ወርሕን ዕድሚኦም ብ24 ነሓሰ 1290 ዓ.ም ዓረፉ።

ካብ ዝዓርፉ ድሕሪ 54 ዓመት ንኣባ ህዝቅያስ ተገሊጾም ዓጽሞም ካብ ደብረ ኣስቦ ናብ ደብረ ሊባኖስ ከም ዝገዓዙ፡ ስለዚ ቅድስቲ ቤተክርስቲያ፡ 24 ታሕሳስ ልደቶም 24 ጥሪ ስባረ እግሮም፡ 24 ሕዳር መንበር ጸባኦት ዝዓጠንሉ፥ 12 ግንቦት ፍልሰተ ዓጽሞም ናብ ገዳም ኣቡነ ሊባኖስ፡ 24 ነሓሰ ባዓለ ዕረፍቶም ብምባል ትዝክር፡ ካብ ነዊሕ ብሓጺር ነዚ ይመስል ዝጎደለ ዝነጠበ ብትጉሃን መላእክት ይተኣረመለይ በረኸትን ኣምላድነትን ናይ ጻድቅ ኣቡነ ተክለሃይማኖት ጸሓይ ምስ ኩላትና ህዝበ ክርስቲያን ይኩን ኣሜን።

በእንተ ክቡር ኣቡነ ተክለሃይማኖት
እምኢትዪጵያ ሰደዴ ጽልመት
እግዚአ መናፍስት፡ ህብአነ እምገጸ ሞት
በእንተ ጸጋ ዘአብ አቡከ ወእግዚእ ኃረያ እምከ
ተማህጸነ ውሉድከ ምህላነ ስማዕ በዕዝንከ

ቀጻሊ ንዝወርድ መንፈሳዊ ትምህርቲ ንምክትታል Follow,Like,Share ግበሩ!

Telegram👇🏽
https://t.me/+ITyke03_bSY3MGZkቅ

ስብኃት ለእግዚአብሔር ልዑል
ወለወላዲቱ ድንግል
ወለመስቀሉ ክቡር
አሜን!

በስመ አብ ወወልድ ወመንፈስ ቅዱስ አሐዱ አምላክ አሜን!

24 ነሓሰ ዕረፍቱ ለኣቡነ ተክለሃይማኖት ጻድቕ ኣቡነ ተክለሃይማኖት ካብ ኣብኦም ካህን ጸጋዘኣብ ካብ ኣዲኦም ቅድስት እግዚእሃረያ ብ 24 መጋቢት ተጸኒሶም ብ24 ታሕሳስ 1197 ዓ.ም ኣብ ሰሜን ሽዋ ቡልጋ ጽላልሽ (ዞረሬ ) ኣብ ዝተባህለ ቦታ ተወልዱ፡ ምስ ተወልዱ ኣብ ሳልሳይ መዓልቶም ካብ ሕቑፊ ኣዲኦም ወሪዶም “አሐዱ ኣብ ቅዱስ፡ አሐዱ ወልድ ቅዱስ፡ አሐዱ ውእቱ መንፈስ ቅዱስ” ኢሎም ንስላሴ ኣመስገኑ፡ ድሕሪ 40 ማዓልቲ ድማ ውልድነት ሥላሴ ብምቅባል ስርዓት ጥምቀት ተፈጸመሎም በዚ ቅዱስ ውላድ ደስ ዝበሎም ስድርኦም ውን ፍሰሓጽዮን ኢሎም ሰመይዎም ትርጉሙ ድማ ናይ ጽዮን ሓጎስ ደስታ ተድላ ማለት እዩ፡ ምስ ጎበዙ ኣቦኦም ትምህርቲ ሃይማኖት መሃርዎም።

ኣብ ንኡስ ዕድሚኦም ድማ ብግብጻዊ ጳጳስ ኣቡነ ቄርሎስ መዓርገ ዲቁና ተቐበሉ፡ ብድሕሪ እዚ እግዚኣብሔር ንክህነት መረጾም እሞ ካህንን ሊቀ ካህናትን ኮይኖም ተሸሙ፡ ኣቡነ ተክለ ሃይማኖት ንልዕሊ ሓምሳ ዓመት ወንጌል ዝሰበኹ ብዙሕ ታኣምራት ዝሰርሑን ቅዱስ ኣቦ እዮም፡ ስለዚ ከኣ ቤተክርስቲያን ሓድሽ ሃዋርያ ጸሓየ ጽድቅ ኢላ ትጽውዖም።

ሓደ ካብ መዓልታት ሓደ ግዜ ምስ ብጾቶም ኣብ ሃድን እንከለዉ ቅዱስ ሚካኤል ተገሊጹ ካብ ድኅር ሕጂ ኣራዊት ዘይኮነ ሰባት ክትሃድን ኢኻ ድዉይ ናይ ምፍዋስ ኣጋንንቲ ናይ ምውፃእን ምዉት ናይ ምትንሣእን ሥልጣን ካብ እግዚአብሔር ተዋሂብካ ኣሎ፡ ስምካ ድማ ፍስሐጽዮን ዘይኮነ ተክለ ሃይማኖት ተባሂልካ ክትጽዋዕ ኢኻ፡ ተክለ ሃይማኖት ማለት ድማ፡ ተክለ አብ፡ ተክለ ወልድ፡ ተክለ መንፈስ ቅዱስ፡ ማለት እዩ፡ ጐይታናን መድኃኒናን ኢየሱስ ክርስቶስውን ተገሊጹ ሓዋርያት ናብ ዘይበጽሕዎ ምድሪ ንኽልእኸካ ብቕዱስ ሚካኤል ጌረ ሓድሽ ስም ብምሃብ ሓድሽ ሓዋርያ ጌረካ ኣለኹ።

22 ዓመት ምስ መልኡ ናብ ኣባ ቄርሎስ ብምኻድ ቅስና ተቐቢሎም ኣቡኦም ብዘገልገሉሉ መዓርግ ኣቡኦም ኣብ ዘገልግልሉ ደብሪ ከገልግሉ ጀመሩ፡ ብመጀመርታ ኣዲኦም ቀጺሎም ድማ ኣቡኦም ምስ ዓረፉ ዘለዎም ኵሉ ሸይጦም ንድኻታት ብመሃብ ገዝኦም ብኽፍቱ ገዲፎሞ ወፁ፡ ብዙኃት ሕዝቢ ድማ ነቲ ብስም እግዚአብሔር ዝገብርዎ ብዙኅ ተኣምራት ርእዮም ብስም ጐይታና ኢየሱስ ክርስቶስ ኣሚኖም እናተጠመቑ ተኸተልዎም።

ኣብቲ ጊዜ እቲ ኣብ ከባቢ ቡልጋ ኣብ ዕንጨት ዝኣምኑ ኣብ ባሕሪ ዘምልኹ መድኃኒት ዝቓምሙ ጠንቆልትን መሰርይን መምለኽቲ ጣዖትን መሊኦም ስለ ዝነበሩ፡ ኣቦና ነዚ ምስ ሰምዑ ሩባ ተሳጊሮም ብምኻድ ነቲ ሕዝቢ ካብቲ ኂዝዎ ዝነበረ እንስሳዊ ባህሪን ዘምልኾ ዝነበረ ገረብን ገዲፉ ናብ ኣምልኾ ጐይታናን መድኃኒናን ኢየሱስ ክርስቶስ ክምለሱ እናገሠፁ ወንጌል ክምህርዎም ጀመሩ፡እቲ ሕዝቢ ግና ክሰምዖም ኣይከኣለን ብኣንጻሩ ትምህርቲ ወንጌል ከቋርጽዎ ኣዘዝዎም፡ ኣቦና ግና ብፍጹም እምነት ናብቲ እቶም ሕዝቢ ዘምልኽዎ ገረብ ከዱ፡ ኣብቲ ገረብ ዝኃደረ ሰይጣን ኣነ ፈጣሪኹም እየ ዝብል ድምፂ የውፅእ ነበረ፡ ኵሎም ሕዝቢ ድማ ነቲ ገረብ ይሰግድሉን ዝደለዮ ይሥውዕሉን ነበሩ።

ኣቦና ምስቶም ሕዝቢ ናብቲ ገረብ ምስ ቀረቡ ኣብቲ ገረብ ኃዲሩ ዝምለኽ ዝነበረ ሰይጣን “ነዚ ሰብ’ዚ ኣይተቕርቡለይ” እናበለ ከጉርዕ ጀመረ፡ እቶም ደቂ ዓዲ ድማ ነቦና ገዲፎም ናብቲ ገረብ ከዱ፡ ኣቦና ግና ገጾም ናብ ምብራቕ ኣቢሎም ኢዶም ዘርጊሖም ናብ ፈጣሪኦም ምእንቲ ወገናቶም “ ኦ ጐይታ ነዚ ኣብ ልዕሊ ፍጥረትካ ዚሠልጠነ ሰይጣን ኣብ ትሕቲ እግርና ኣርግጸልና፡ ነዚ ሰይጣን እዚ ኣዋርዶ፡ ዘወትር ክረድኣካ እዩ ዝበልካኒ መልኣኽ ቅዱስ ሚካኤል ልኣኸለይ፡ ናይዚ ሰይጣን ኃፍረቱ ግለጽ፡ ጐይታ እግዚአብሔር ምግባር ካባኻ እዩ፡ ኣብዞም ዝተኣከቡ ሰባት ስምካ ይገለጽ፡ ሥራሕካ ይፈለጥ ንስኻ ዓቢ ምዃንካ ይፍለጡ” እናበሉ ክጽልዩ ጀመሩ።

ናብቲ ሕዝቢ ዘምልኾ ገረብ ተመሊሶም “ ኣንቲ ሰይጣን ኣባኺ እናኃደረ ሕዝቢ ዘስሕተልኪ ገረብ፡ እዚ ሕዝቢ ኃይሊ እግዚአብሔር ምእንቲ ክርኢ በቲ ኣነ ዝኣምኖን ዝሰግደሉን ብስም ኢየሱስ ክርስቶስ ካብቲ ዘለኽዮ ተላዒልኪ ናባይ ክትመጽኢ እእዝዘኪ ኣለኹ” ኢሎም ኣዘዝዋ፡ ሕዝቢ ናብታ ገረብ እናሰገደ እታ ገረብ ግና እግሪ ከም ዘለዋ እና ተጓዕዘት ኣቦና ጻድቕ ተኽለሃይማኖት ናብ ዘለውዎ ቦታ ኸይዳ ቆመት፡ እቲ ኣብታ ገረብ ዚኃደረ ሰይጣን ድማ “ኣታ ክፉእ ሰብ እቲ ዝገደፍኩልካ መላእ ኣውራጃ ከይ ኣኽለካስ ነዞም ኣብዚ ዘለዉ ባሮተይ ኪትምንጥለኒ መጺኻ” እናበለ ጨርሐ፡ ብድኅሪ እዚ ቕዱስ ሚካኤል ካብ ሰማይ ከም መብረቕ ብምውራድ ንሰይጣን ሓኒቑ ኃዞ፡ በዚ ጊዜ ሰይጣን “ሚካኤል ጊዜይ ከይበጽሐ ኣይተጥፍኣኒ ድኅሪ ሕጂ እዚ ሰብዚ ኣብ ዘለዎ ቦታ ኣይቀርብን እየ” እናበለ ጨደረ፡ ብድኅሪ እዚ እቶም ደቂ ዓዲ ናብ ኣቦና ጻድቕ ተክለሃይማኖት ቀሪቦም “ኦ ናይ ሕይወት ብርሃን ኣቦና ናብቲ ዝፍቶ ናይ ወንጌል ጐደና ምርሓና” እናበሉ ኣብ እግሩ ወደቑ፡ ቦታ ክሳዕ ዝጸቦም ንኣሽቱን ዓበይትን ኣወዳትን ኣዋልድን ተኣኪቦም “ንሕና ውን በቲ ትኣምኖ ኣምላኽ ኣሚንና ኣለና” በልዎም።

ኣቦና ድማ “መጽኣት” ናብ ዝተባህለት ሩባ ወሪዶም ነቲ ማይ ብምብራኽ ብስም ኣብን ወልድን መንፈስ ቅዱስን ኣጠመቕዎም።

ኣዲኦም ንኣቡነ ተክለ ሃይማኖት ከይ ወለደት ነዊሕ ገይራ ነበረት፡ ከምዚ ኢላ ውላድ ዘይብላ እናነበርት ከላ ውን ኣብ ኢድ ባዕዳውያን ሰራዊት ወዲቓ ተማሪኻ ብዙሕ ፈተና በጺሕዋ ነበረ፡ እንተኾነ እግዚኣብሔር ንሊቀ መላእክት ቅዱስ ሚካኤል ሰዲዱ ካብ ኩሉ መከራኣ ኣናገፋ ናብ ዞራሬ ዘላ ቤተክርስቲያን ውን ኣብቲ ካህን ጸገዛኣብ ዝነበሮ ብተኣምር ኣብጽሓ ሓደ ዓቢይ ውላድ ከም ዝህቦም’ውን ኣበሰሮም።

ኣቡነ ተክለሃይማኖት ኣቦኦምን ኣዲኦምን ምስ ዓረፉ ኩሉ ንብረቶም ሸይጦም ገዝኦም ገዲፎም ከዱ፡ መዓርገ ክህነት ተዋሂቦም ከኣ ናብ ስብከት ወንጌል ተዋፈሩ እሞ ብዝገበርዎ ተኣምርን ብሓይሊ ኣምላኮም ንብዙሓት ነፍሳት ኣጥመቑ፡ ድሕሪ 3 ዓመት እግዚኣብሔር ንዓዶም ከይዶም ክምህሩ ጸውዖም ኣብኡ ከኣ ንቡዙሕ ዓመታት ተጋደሉ፡ ንቡዙሕ እዋን ውን ብተራዳእነት ኣገልገሉ፡ ብተኣምራት ውን ብዙሓት ሕሙማት ፈወሱ ምውታን’ውን ኣተንስኡ፡ ብድሕሪ እዚ ጎይታናን መድሓኒናን ኢየሱስ ክርስቶስ ተገሊጹ ናብ ቅዱስ ኢየሱስሞኣ ኪድ እሞ ንሱ ኣስኬማ ክህበካ እዩ በሎም ናብኡ ከይዶም ኣስኬማ ምንኩስና ተቐበሉ ኣብኡ ከኣ ዓሰርተ ዓመት ተቐመጡ፡ ኣቡነ ተክለሃይማኖት ኣብ መዓልቲ ብዙሕ ስግደት ይሰግዱ ጸሎት ዳዊትን ምስጋና ነብያትን ድማ ይጽልዩ ነበሩ ብፍቓድ እግዚኣብሔር ከኣ ናብ ትግራይን ከባቢኣን መጹ፡ ኣብ ደብረ ዳሞ ከኣ ብፍቃድ ኣምላክ ንዓሰርተ ክልተ ዓመት ተቐመጡ፡ ናብ ኩለን ገዳማት ውን ብእግሮም ይበጽሕወን ነበሩ።

ካብ መዓልታት ሓደ ግዜ ካብ ደብረ ዳሞ ክወርዱ ክብሉ ገመድ ተበትኮም እሞ እግዚኣብሔር ከኣ ህሩያኑ ክጽገሙ ስቕ ኢሉ ስለዘይርኢ ከም ናይ መላእኽቲ ሽድሽተ ክንፊ ሃቦም፡ ብክንፎም ከኣ ወረዱ፡ ብድሕሪ እዚ ግዜ'ዚ ብመሪሕነት መልኣከ እግዚኣብሔር ናብ ኢየሩሳሌም በጺሖም ተመልሱ፡ ካብ ኢየሩሳሌም ምስ ተመልሱ ከኣ ናብ ኣባ ዮሓኒ ከዱ፡ ኣብ እንዳ መስቀል ጉና ጉና ከኣ ንመድሃኒነ እግዚእ ረከብዎ፡ ምንኩስና ሂቦም ድማ ኣቦ መነኮሳት ከም ዝኸውን ተነበይሉ፡ መድሃኒነ እግዚእ ዓዶም ቢሓት ኮይኑ ከምቲ ቅዱስ ጳውሎስ ንጢሞቲዎስ ዝወለደ፡ ንኣባ ስሙኤል ዘዋልድባ ሞኖኮስ ሓያልን ንካልኦት ብርክት ዝበሉ መማህራን ኣቦታት ዝወለዱ እዮም፡ ኣቡነ ተክለሃይማኖት እዚ ኢልካ ዘይጽብጸብ ብዙሕ ተኣምራትን፡ ሃዋርያዊ ተልእኾን እናገበሩ ንሶም ዝምገብዎ ቆጽለ መጽሊ፡ ጥራይ ነበረ።

ብዘይካዚ እዞም ቅዱስ ኣቦ እዚኦም ብህይወተ ስጋ እንከለዉ ምስ ሱራፋኤልን ኩሩቤኤአልን ኮይኖም መንበረ ጸባኦት ዓጢኖም እዮም፡ ብዘይካ እዚ ኣዝዮም ምእንቲ ክጋደሉ ብየማኖም ጸጋሞምን ኲናት ተኺሎም 22 ዓመት ደው ኢሎም ከም ዝጸለዩ ሓንቲ እግሮም ድሕሪ ምቁራጻ ድማ ንሸውዓተ ዓመት ዝኣኽል ብዘይ ዕረፍትን ድቃስን ንኣርባዕተ ዓመት ዝኣክልውን ዝኾነ ይኹን ከይጥዓሙ ከም ዝጸለዩ ታሪኽ ይነግረና።

ኣብ መወዳእታ ጎይታናን መድሓኒናን ኢየሱስ ክርስቶስ ተገሊጹ “ኦ ፍትወይ ስለይ ክትብል ኩሉ መከራን ሽግርን ስለ ዝተቐበልካ ኣነ ከኣ ምስቶም ሕሩያነይ ከእትወካ እየ፡ ከምቲ ናቶም ክብሪ ውን ክህበካ እየ” በሎም፡ ስሞም ዝጸውዐ ብስሞም ንዝጠመየ ዘብልዐ፡ ንዝጸምአ ዘስተየ፡ ንዝዓረቐ ዝኸደነ፡ ተዝካሮም ዝገበረ፡ ገድሎም ዝጸሓፈን ዘንበበን ክምሕረሎም ምዃኑ’ውን ቃል ኣተወሎም፡ ብድሕሪ እዚ ኣብ መበል 99 ዓመትን 10 ወርሕን ዕድሚኦም ብ24 ነሓሰ 1290 ዓ.ም ዓረፉ።

ካብ ዝዓርፉ ድሕሪ 54 ዓመት ንኣባ ህዝቅያስ ተገሊጾም ዓጽሞም ካብ ደብረ ኣስቦ ናብ ደብረ ሊባኖስ ከም ዝገዓዙ፡ ስለዚ ቅድስቲ ቤተክርስቲያ፡ 24 ታሕሳስ ልደቶም 24 ጥሪ ስባረ እግሮም፡ 24 ሕዳር መንበር ጸባኦት ዝዓጠንሉ፥ 12 ግንቦት ፍልሰተ ዓጽሞም ናብ ገዳም ኣቡነ ሊባኖስ፡ 24 ነሓሰ ባዓለ ዕረፍቶም ብምባል ትዝክር፡ ካብ ነዊሕ ብሓጺር ነዚ ይመስል ዝጎደለ ዝነጠበ ብትጉሃን መላእክት ይተኣረመለይ በረኸትን ኣምላድነትን ናይ ጻድቅ ኣቡነ ተክለሃይማኖት ጸሓይ ምስ ኩላትና ህዝበ ክርስቲያን ይኩን ኣሜን።

በእንተ ክቡር ኣቡነ ተክለሃይማኖት
እምኢትዪጵያ ሰደዴ ጽልመት
እግዚአ መናፍስት፡ ህብአነ እምገጸ ሞት
በእንተ ጸጋ ዘአብ አቡከ ወእግዚእ ኃረያ እምከ
ተማህጸነ ውሉድከ ምህላነ ስማዕ በዕዝንከ

ስብሐት ለእግዚአብሔር ልዑል
ወለወላዲቱ ድንግል
ወለመስቀሉ ክቡር
አሜን!

በስመ አብ ወወልድ ወመንፈስ ቅዱስ አሐዱ ኣምላክ!!21 ነሓሰ ዕረፍቱ ለአቡነ አብራንዮስ (ኣቦና) ታሪኽ አቡነ ኣብራንዮስ አብራንዮስ ማለት ‘አብራን’ ማ...
27/08/2026

በስመ አብ ወወልድ ወመንፈስ ቅዱስ አሐዱ ኣምላክ!!

21 ነሓሰ ዕረፍቱ ለአቡነ አብራንዮስ (ኣቦና)

ታሪኽ አቡነ ኣብራንዮስ

አብራንዮስ ማለት ‘አብራን’ ማለት አብርሃ(ብርሃን) ማለት ክኸውን ከሎ፡ ‘ዮስ’ ማለት ከኣ ፀሓይ ማለት እዩ። ስለዚ ትርጉም ስሞም ብርሃን ፀሓይ – ብርሃን ዓለም ማለት እዩ። አቡነ አብራንዮስ ካብ ፈሪሃ እግዚአብሔር ዝነበሮም፡ ብሃይማኖቶም ጽኑዓት ካብ ዝነበሩን ስድራ እዮም ተወሊዶም። ኣቦኦም ወልደ ክርስቶስ ኣዴኦም ከኣ ወለተ ትንሣኤ ይበሃሉ። እዞም ስድራ ገለ ካብቲ ሰናይ ግብርታቶም ከኣ ንዝጠመዩ ምብላዕ፡ ንዝዓረቑ ምኽዳን ንድኻታት ምምጽዋት ምንባሩ ብፍሉይ ይግለጽ። ትውልዶም ኣብ ሃገረ ኢትዮጵያ ምብራቕ ጎጃም ከባቢ እነብሴ (ካናት) ኣብ ዝተባህለ ዓዲ እዩ። “ወሀሎ አሐዱ ብእሲ ውስተ ሃገረ ጐጃም እምአድያመ ‘እነብሴ’ እንተ ይብልዎ ካናት ዘስሙ ወልደ ክርስቶስ፡ ወስሙ ብእሲቱ ወለተ ትንሳኤ” ከምዝብል እቲ ገድሎም።

ወለዲ ኣቡነ ኣብራንዮስ ዋላ እኳ ብፍቕርን ብሃብትን ዝተጸገዉን፡ እግዚአብሔር ክልተ ኣዋልድ ባሪኹ ዝሃቦምን እኳ እንተነበረ፡ ምስቲ ኵሉ ሃብቶም’ውን ካብኡ ንላዕሊ ክወልዱ ይብህጉ እንተነበሩ ውላድ ግና ክረኽቡ ኣይከኣሉን። ስለዚ ኸኣ ነተን ክልተ ኣዋልድ ደቆም ኃው ዝኾነን ፈቓድ እግዚአብሔር ዝፍጽም ውላድ ክህቦም ናብ ፈቖዶ ገዳማት ብምኻድ ናብ እግዚአብሔር ይጽልዩን ንነዳያን ከኣ ይምጽውቱን ነበሩ።

ብዝያዳ ኸኣ ኣዲኦም ወለተ ትንሳኤ ናብ ገዳማትን ኣረጋውያን መነኮሳትን እናኸዳ ጸሎቶም ይምኅጸና ነበራ እሞ፡ ብቝዓት ባሕታውያን ወዲ ከምዝወልዳ ይነግርወን ነበሩ። እቲ ዝለመንካዮ ዘይከልእ ቅዱስ እግዚኣብሔር ኣምላኽ ከኣ ንቅዱስ ሚካኤል ልኢኹ ንእግዚኣብሔር ዘስምር ወዲ ከም ዝወልዳ ኣበሰረን። ወላዲት ኣቦና ዝኾና ወለተትንሣኤ’ውን ከምቲ ዝተበሰረኦ ንኣቦና ጸኒሰን። ይኹን ደኣ እምበር ተሰሚዑ ዘይፈልጥ ንሰማዒኡ ይኹን ንነጋሪኡ ዕፁብ ዝኾነ ሓደ ፍሉይ ተኣምራት ክፍጸም ጀመረ። እዚ ኸኣ እቲ ልሙድ ወርሓት ጥንሲ እኳ እንተሓለፈ ኣቦና ካብ ማኅፀን ኣዲኦም ክወጹ(ክውለዱ) ፈቓዶም ስለዘይነበረ ካብቲ ንቡር ጊዜ ኣዝዮም ኣብ ማኅፀን ኣዴኦም ከለዉ ደንጒዮም።

ሓደ ክልተ ሠለስተ … ዓመት እናበለ ኸኣ እቲ መዋዕል ጥንሶም ዓመታት ክፍቐድ ጀመረ። ኣብቲ ዘመን እቲ ሓጸይ ሱስንዮስ ዝተባህለ ንጉስ ኣብ ዘመን ወራር መሓመድ ግራኝ ንኣቦኡ ክሕግዙ ንዝመጹ ወተሃደራት ፓርቱጋል ተጸጊዖም ምስ ዝኣተዉ ‘ሰበኽቲ’ ካቶሊካውያን ተመሓዝዩ ስለ ብዙኅ ‘ረብሓታት’ ሃይማኖቱ ናብ ካቶሊኽ ዝቐየረሉን ንሕዝብ’ውን እምነቱን ስርዓቱን ክቕይር የግድድ ዝነበረሉ ዘመን ኸኣ ነበረ። ነዚ ከተግብር ኸኣ ግዱድ ኣዋጃት ኣወጀ። ብዙኃን በብወገኖም ብፍላይ ከኣ ብካህናትን መነኮሳትን ዝተመርሑ ገባራት ሓረስቶስ ወልድ ዋሕድ እትብል ጥንታዊ ሃይማኖት ኣቦታትና ኣይንልውጥን ብምባል ትእዛዙ ስለዝነጸግዎ መከራ ኣጽኒዑሎም። ምኽሪ ዓበይቲ ምስማዕ ኣብዩ ኸኣ ብዙኃን ስለ ሃይማኖቶም ዝተሰዱሉን ሰማእትነት ዝተቐበሉሉን እዩ ነይሩ።

እዚ ንስጥሮስ ዝዘርኦ፡ ሊዮን ዘብቖሎ ብናይ ቅዱስ ዲዮስቆሮስ ናይ ውግዘት ሰይፊ ዶብ ዝተገብረሉ ፍልልይ ኣብ ዘይቦትኡ ኣብ ሱስንዮስ ክፍሪ እኳ ጀሚሩ እንተነበረ ብመርገም አበው፡ ብናይ እግዚአብሔር መቓጻዕቲ ቅድሚ ምምላሱ ብዙኅ ዕንወት እዩ ኣኸቲሉ ነይሩ። ኣብቲ እዋን እቲ እዩ እምበኣር “ኣብ ዘመን እዚ ከሓዲ ንጉስ ኣይውለድን” ብምባል እቶም ካብ ማሕጸን ኣዲኦም ጀሚሮም ዝተኃርዩ ኣቦና፡ ክሳብ ስሱንዮስ ዝመውት፡ ዘመን ክሕደት ኣየርእየኒ ብምባል ን 7 ዓመትን 6 ወርሕን ዝኣልክል ኣብ ማህጸን ወላዲቶም ጸንሑ።

ኣቦኦም ወልደ ክርስቶስ ግና እዚ ጒዳይ ስለዘተሓሳሰቦም፡ ንበዓልቲ ቃል ኪዳኖም ወለተ ትንሳኤ “እዚ ነገር’ዚ እንታይ እዩ ነገሩ” በልወን። ንሰን ግና “እግዚአብሔር ዝፈቐዶ ይግበር፡ ኵሉ ዝከኣሎ ንሱ እዩ ግና ባዕሉ ዝገብሮ ጥበብ ክሳዕ እንርኢ ብእምነት ልብና ነጽንዕ” በለኦም። ንሶም’ውን “እቲ ኣሚንክዮ ዘሎኺ ንሱ ኣየሕፍርኪ ዋጋኺውን ኣየጥፍኣልኪ” ድኅሪ ምባል ነቲ ዝገብርኦ ዝነበራ ምጽዋት ከይጕድላ ተላበውወን።

እዚ ተኣምር’ዚ መዛረቢ ጐረባብትን ዓድን ምዃኑ ኸኣ ኣይተረፈን። ክሳብ መዓስ እዩ እዚ ሕጻን ዘይውለድ ብምባል ኸኣ ንኵሉ ኣስተንኪርዎ ነበረ። ጽንሲ ድዩ ሕማም ዝብል ዘረባ’ውን ኣብ ኵሉ ይስማዕ ነበረ። በዚ ነገር ዝተገረማ ሓዊ ክልምና ዝመጻ ጐረቤት “እግዝእትየ ዐቢይ ወግሩም ወልድ ሀሎ ውስተ ከርስኪ” (እምበይተይ ግሩምን ዓቢይን ወዲ ኣብ ከርስኺ ኣሎ) ክብላ ተዛረባ። ኣቡነ ኣብራንዮስ ኸኣ ኣብ ከርሲ ኣዲኦም ከለዉ ዘረባ እታ ጐረቤት ምስ ሰምዑባህ ኣየበሎምን፤ ኣፍ ኣውጺኦም ከኣ “ምንት ብየ ምስሌኪ ኦ ብእሲቶ መፍትው ለኪ ትንስኢ እሳተኪ ወትሑሪ ኀበ ግብርኪ” (ኣቲ ሰበይቲ ምሳይ እንታይ ኣሎኺ፧ ሓውኺ ለሚንኪ ናብ ስራሕኪ ዘይትኸዲ) ብምባል ነታ ሰበይቲ ዘምጽኣ ጌራ ክትኸይድ እምበር ነቲ እግዚአብሔር ዝገበሮ መንክራት ከይትምርምር ገሰጽዋ።

እታ ሰበይቲ በቲ ዝኾነ ነገር እናተገረመት “ኣብ ከብዲ ኣዲኡ ከሎስ ክንድ’ዚ ይዛረብ፡ እዝስ ኣብኡ ከሎ ኣሪጉ እዩ” ብምባል እዚኦምሲ “አቦና” እዮም በለቶም። እዚ ስም ኸኣ ካልኣይ መጸውዒ ገዳም አብራንዮስ ኮይኑ የገልግል ኣሎ። ዝበዘኀ ሕዝቢ’ውን ብዝያዳ ‘እንዳቦና’ ብዝብል ስም እዩ ነቲ ገዳም ዝፈልጦ። ብድሕሪ’ዚ ማለት እቲ ከሓዲ ንጉስ ድኅሪ ናይ 7 ዓመትን 6 ወርሕን ጽንሰቶም ምስ ሞተ ኣቦና ተወልዱ። ወለዶምን ኣዝማዶምን ከኣ ኣዝዮም ተሓጐሱ። ድኅሪ 40 መዓልቲ ናብ ቤተ ክርስቲያን ቅዱስ ጊዮርጊስ ወሲዶም ኣጠመቕዎም። አብራንዮስ ዝብል ስም ከኣ ሃብዎ።

ምንኵስናን መንፈሳዊ ተጋድሎን

ንወለዶም ብትሕትናን ብስነ ስርዓትን እናተኣዘዙ ኸኣ ዓበዩ። ኣቦኦም ከኣ መጽሓፍ ክመሃሩሎም ወዲ 7 ዓመት ምስ ኮኑ ናብ መምህር ወሰድዎም። ኵሉ ጥበብን ተግሳጽን ንባብ ቅዱሳት መጻሕፍትን ትርጓሜኦምን ኸኣ ተምሃሩ። ገና ተምሃራይ እንከለዉ ድማ ነቲ መግቦም ንካልኦት ተምሃሮ እናሃቡ ብሕቡእ ይጾሙ ነበሩ። ወዲ 12 ዓመት ምስ ኮኑ ድማ ንስድራኦም ገዲፎም ቦታ ጽድቂ ዝኾነ ገዳም ጥንታዊ ገዳም መርጡለ ማርያም(ጐጃም)ብምኻድ ድማ ብርድእና ብትግሃት ኣገልገሉ። ነቲ ትግሃቶም ዝረኣዩ አበምኔት ደብረ ሳን ዝነበሩ አባ ገብረኢየሱስ ድማኣብ መበል ፲፪ ዓመቶም ኣስኬማ ምንኩስና ኣልበስዎም።

ካብቲ ዝመንኮሱሉ ሰዓት ኣትሒዞም ገጽ ኣዝማዶም ከይረኣዩ ካብ ናብ ገዳም እናኸዱ ወንጌል ይሰብኩ ነበሩ። ንስጋኦም ኸኣ ብጾምን ብጸሎትን ኣድከምዎ። ብፍጹም ትሕትናን ፍቕርን ምስ ዓበይቲ ኣረጋውያንን ንኣሽቱ ሕጻናትን ይነብሩ ኸኣ ነበሩ።

ኣባ ገብረኢየሱስ ንኵሉ እቲ መንፈሳዊ ግብሮም ምስ ረኣዩ ዲቁና ክቕበሉ ነገርዎም። ንሶም ግና ኣይግባእንን በሉ። ኵሎም ማሕበር ከኣ ግድን በልዎም፤ ጸሎት ድማ ገበሩሎምን መረቕዎምን። መዓርገ ዲቁና ኸኣ ካብ ኣቡነ ሚካኤል ዝተባህሉ ጳጳስ ተቐበሉ። ቅድስናኦም ልዑል ስለዝነበረ ክቕድሱ ከለዉ ነቲ ሕብስቲ ብ‘ከዊነ ሕጻን’ ክሳብ ምርኣይ በጺሖም ነበሩ። ትሩፋቶምን ቅድስንኦምን ርእዮም እቶም ኣበውን ካልኦት መነኮሳትን የኽብርዎንም የፍቕርዎምን ነበሩ። ብትሕትናኦምን ርድእንኦምን ኣዝዮም ይሕጐሱሎም ነበሩ።

እቶም ኣቦ’ውን ንዘለዎም ጸጋ ርእዮም ንስኻ ቤተ ክርስቲያን ጥራይ ኣገልግል ናብ ካልእ ስራሕ ከም ምውራድ ማይ፡ ዕንጨይቲ … ኣይትኺድ ከኣ በልዎም። ሽዑ እቶም ኣብኡ ዝነበሩ ኣሕዋት ብቅንኣት “ንምንታይ ከማና ማይን ዕንጨይትን ዘየምጽእ” ኢሎም ኣዕዘምዘሙ። ንሶም ኸኣ ደሓን ኣቦይ ከምኣታቶም እናተለኣኽኩ ቤተ ክርስቲያን ከገልግል እየ ኢሎም ንክልቲኡ ተልእኾ ይፍጽሙ ነበረ። ዕንጨይቲ ተሰኪሞም ክኸዱ ከለዉ እቲ ዕንጨይቲ ሽዱሽተ እመትን ስድርን (ዳርጋ 3 ሜትሮ ዝኣክል) ልዕሊ ርእሶም ክብ ኢሉ ማዕሪኦም ይኸይድ ነበረ። ንሶም’ውን ክልተ እመት ካብ መሬት ይለዓሉ ነበሩ። ማይ’ውን እንተኾነ ንብዙሕ መዓልትታት ከም ሰለል እናበለ ካብ ምድሪ ተላዒሉ ይኸይድ ነበረ፤ ማለት መሬት ከይተንከፈ ይኸይድ ነበረ።

ንሶም ኸኣ እቲ ጾር ፈጺሙ ከይተሰምዖም ብኢዶም እናጣቕዑ ብእግሮም’ውን እናስረገጹ ብኣፎም መዝመረ ዳዊት እናዘመሩ ይኸዱ ነበሩ። ብድኅሪኡ እቶም ብማኅበር ሓድነት ዝናበሩ አባ ተጠምቀ መድኅን ዜና ኣቦና ምስ ሰምዑ፡ ረኸብዎምን ተሓጒሶም ኣብ ገዳም ቱፋላ ብፍቕርን ብሰላምን ክነብሩ ኸኣ ተረዳድኡ። ድኅሪ ነዊሕ ጊዜ ኵሎም እቶም ኣሕዋት ንኣባ ተጠምቀ መድሕን እዚ ዘሎናዮ ቦታ ጥቃ ዓድታት ስለ ዝኾነ ከምቲ ሕጊ ምንኵስና ካብ ኣዝማድና ርሒቕና ገጽ ኣንስቲ ኣብ ዘይብሉ ቦታ ከይድና ገዳም ንገድም በሉዎም፤ ከምኡ ድማ ገበሩ። ኣቦና አቡነ አብራንዮስ ኸኣ ኣብታ ገዳም ብርድእናን ብመጋቢነትን ብትግሃት የገልግሉ ነበሩ። ከም ኣብነት ዝስተ ማይ ዘመጽኡሉ ቦታ ግና ኣዝዩ ርሑቕን ዓቐበን ስለዝነበረ እቶም ካልኦት ኣኅዋት ክልተ ጊዜ ጥራይ ከምጽኡ ከለዉ ኣቡነ ኣብራንዮስ ግን ሸውዓተ ጊዜ የምጽኡ ነበሩ።

ድኅሪ ነዊሕ ተጋድሎ ድማ ብፍቓድ ኣምላኽ ክህነት ካብ ኣቡነ ክርስቶዶሉ ተቐበሉ። ንኣገልግሎት ኣብ ቤተ ክርስቲያን ኣብ ዝኣተዉሉ ኣዴና ቅድስት ድንግል ልብሰ ተክህኖ ዘአሮን ተልብሶም እሞ ናብ ከዊነ እሳት ይልወጡ ነበሩ። ኣብ ሞንጎ ቅዳሴኦም’ውን ሰማይ ተኸፊቱ መንበረ ስላሴ ይረኣዮም ነበረ። ሕብስት ናብ ፍጹም ስጋ መለኮት ወይኒ’ውን ናብ ፍጹም ደም ወልደ እግዚአብሔር ክልወጥ ይርእዩ ነበረ። ሓደ ሓደ ጊዜ’ውን ብኣምሳለ በጊዕ ብኣምሳለ ሕጻን ይረኣዮም ነበረ። ብጀካ እተን ክልተ መዓልትታት (ሰናብቲ) ኵሉ ጊዜ ይጾሙ ነበሩ።

ኣብተን ክልተ መዓልትታት እንተኾነውን ብኢዶ ዓቂኖም ንእሽቶይ ብመጠን ይበልዑ ነበሩ። ማይ’ውን ብመጠን ዘየርውይ ገይሮም ይሰትዩ ነበሩ። ከም ዓንዲ ተተኺሎም ይጽልዩ፡ ስግደት ከም መላእኽቲ ክቑጸር ብዘይከኣል ይሰግዱ፡ ረሃጽ ከም ፈልፋሊ ማይ ይውሕዝ ነበረ፤ ኣብ ትሕቲ ክዳኖም’ውን ብሓጺን ዝተሰርሐ ዝባላዕ ጨጓር ማቕ ይኽደኑ እሞ ኣይድቅሱን ነበሩ። ብደበና ተጻዒኖም ክሳብ 7ይ ሰማይ ይበጽሑ (ጽርሐ አርያም) እሞ ኣብ ቅድሚ አብን ወልድን መንፈስ ቅዱስን ከኣ ይሰግዱ፡ ምስቶም 24 ካህናተ ሰማይ ኮይኖም ሓቢሮም ማዕጠንት ሒዞም ክሳብ ምዕጣን በቒዖም ነይሮም።

ኣቡነ ኣብራንዮስ ዘሕለፍዎ ተጋድሎ ምስቲ ኵሉ ብቕዓቶም ኸኣ ምንኵስናኦም ብዝያዳ እናጽንዑን እናበርትዑን ብገድልን ብትሩፋትን ኸኣ እናዓበዩን መጹ። ኣብ ልዕሊ ገድሊ ገድሊ፡ ኣብ ልዕሊ ትግሃት ትግሃት እናወሰኹ ንሸውዓተ ዓመት ብጀካ ኣባ ኤዎስጣቴዎስ ዝተባህለ ረድኢ ካልእ ከይረኣዮም ብጾምን ብጸሎትን ተወሲኖም ጸሓይን ወርኅን ከይረኣዩ ድኅሪ ምጽናሕ ካብ መዓልትታት ሓደ መዓልቲ ግና ቅዱስ ገብርኤል ካብ እግዚአብሔር ተላኢኹ ብምምጻእ ናብ ትግራይ ክኸዱ ስለዝነገሮም ብሰረገላ ተጻዒኖም ኣብ ትግራይ ናብ ዝርከብ መደባይ ወይውን በአተ ሐሞ እግዚእ መጽኡ። ምስቶም ኣረጋውያን መነኮሳት ኸኣ ብፍቕርን ብርድእናን ክቕመጡ ጀመሩ። እንደገና እግዚአብሔር ባዕሉ “እዚኣ ሃገር ክፍልኻ ኣይኮነትን” ብምባል ተንሲኦም ናብ ኤርትራ ማለት ምድረ ሰራየን ሓማሴንን ክሰግሩ ነገሮም። ኣብኡ ኸኣ ምስ ዓበይቲ ሽማግሌታት ምስ ዝኾኑ መነኮሳት ንቝሩብ ጊዜ ድኅሪ ምጽናሕ ናብ ኤርትራ ነቐሉ።

እቶም መነኮሳት ኣኅዋት ከም ሰብ ዘይኮነ ከም መልኣኽ ገይሮም የፍቕርዎም ስለዝነበሩ ብብኽያት ተፋነዉዎም። ካብ ትግራይ ኸኣ ናብ ኤርትራ ሰገሩ። ብመጀመርታ ኸኣ ኣብ ጥቓ መረብ ኣብዓይላ ጕንደት ኣብ ዘሎ ገዳም በጽሑ።ቅዱስ ገብርኤል ተገሊጹ ድማ እዚ እውን ቦታኻ ኣይኮነን በሎም። ካብኡ ኸኣ ምድረ በዳ (ምናልባሽውን ጋሽ ገጾም) ኣቢሎም ምስ ከዱ ብዙኃት ሓራምዝ ረኸቡ። ገድልን መከራን ምስ በዝኆም ኣብቲ ሓርማዝ ዝሓልፋሉ ሩባ ምእንቲ ክርገጹ እሞ ክሞቱን ከዕርፉን ኣብ መገዶም ስጥሕ ኢሎም ወደቑ። እቲ መልኣኽ ግና ክትንሥኡ ገንሖምን ካብቶም ሓራምዝ ከኣ ኣናገፎምን። ቅዱስ ሚካኤል ድማ ዕረፍቶም ገና ምዃኑን ብጸሎቶም ዝድኅኑ ከምዘለዉ ሓበሮም። ንሶም ግና ካብቲ ዘለኽዎ መከራሲ ዕረፍቲ ይሕሸኒ ኢሎም ብምምላሶም እቲ መልኣኽ “ተንሥእ መሬታዊ” ብምባል ኣብ የማናይ እግሮም ተንከፎም እሞ ቖሰለት። በታ ኣብ እግሮም ንዝነበረት ቍስሊ ሕጻብ፡ ዝሕጸባን ዝሰትያን መካናት ከኣ ይወልዳ ነበራ።

ኣቦና ኸኣ ፈቓዱ ይኹን ኢሎም ድማ ተንሥኡ። ኣብ ኵሉ እናተዘዋወሩ ኸኣ ትምህርቲ እናሃቡ ተኣምራት ይፍጽሙ ነበሩ። ካብኡ ኸኣ ተላዒሎም ናብ ገዳም ኣቡነ ብፁዕ አምላክ ጽልማ ከዱ። ብኽብሪ ድማ ተቐበልዎም። ኣብኡ ኸኣ ቍሩብ ድኅሪ ምጽናሕ ኸኣ ናብ ደብረ ቢዘን ክነቕሉ ተኣዘዙ። ብዙኅ ተኣምራት እናገበሩን ወንጌል እናመሃሩን ደብረ ኮዳዱ እንዳ ኣቡነ ብፁዕ ኣምላኽ ገዲፎም ኣብ ደመና ተጻዒኖም ደብረ ቢዘን ኣተዉ። ኣብዚ ገዳም ከለዉ ድማ ብጾምን ብጸሎትን ብተጋድሎ ጸንሑ። ኣብኡ ከለዉ ካብ ዝፈጸምዎ ኸኣ ሓደ መዓልቲ ኣብ ጸሎት ከለዉ፡ ሰማንያ ኣግማል ኣብ ነፍስ ወከፈን ሰማንያ ኣጋንንቲ ዝጸዓና ንቅዱሳን ክጻብኣ ክመጻ ከለዋ ርእዮም ገጾም ብትእምርተ መስቀል ብምምዕታብ “ይትነሣእ እግዚአብሔር ወይዘረዉ ፆሩ ይጒየዩ ጸላእቱ እም ቅድመ ገጹ” ኢሎም ምስ ጸለዩ ካብ ቅድሚ ዓይኖም ተሰዊረን ነፊጸን ናብ ሓደ ጸድፊ ኣተዋ። ከምቲ ጐይታ ነቶም ኣጋንንትን ሓሳማታትን ጌርጌሴኖን ዝገበሮም ማለት እዩ።

ንሸውዓተ ወርሒ ዝኣክል ብዓቢይ ተጋድሎ ከኣ ኣብኡ ተቐመጡ። ብድኅሪኡ’ውን እግዚአብሔር ንሃገርና ክዞርዋን ወንጌል እናመሃሩ ኸኣ ክባርኽዋን ስለ ዝኣዘዞም ናብ ጽልማ ሰልዳይት (ሰለ ዳዊት) ብምኻድ ገዳም መሥሪቶም ሥርዓት ሠሪዖም ማኅበር ኣቚሞም መንፈሳዊ ገድሊ ክጋደሉ ጀመሩ። ብዙኃንን ብዙኃትን ሰዓብትን ኣርድእትን ኸኣ ክገብሩ ጀመሩ። በቲ ኣብ ኣቡነ ብፁዕ አምላክ ዝረኣይዎ ሰብ ዝጀመረ ምትእኽኻብ ብዙኃን ናብኦም ክመጹን ማኅበር ክኣትዉን ጀመሩ። ኣቦና ኸኣ ሥርዓተ ምንኵስና እናመሃሩ ብሃይማኖትን ሰናይ ግብረ ምናኔን ጸኒዖም ክጓዓዙ ነቶም ኣርድእቶም ይላበዉዎም ነበሩ። ብዙኅ መንፈሳዊ ምኽሪ ብቀጻሊ ይመኽርዎም ነበሩ።

ከምዚ እናገበሩ ካብ ዝተቐመጡለንን ብዙሕ ተኣምራት ካብ ዝፈጸሙለንን ዓድታት ኸኣ እታ ሓንቲ ዓዲ ሰልዳይት እያ። ኣብኡ ካብቲ ዝገበርዎ ተኣምራት ኸኣ ንሓደ ካብ ኣባርዳእ ዝመጽእ ሰብኣይ ገና ከይተቐለቀለ ከምዚ ዓይነት ሰብ ይመጽእ ኣሎ ብምባል ድኅሪ ምዝራቦም ልክዕ ከምቲ ዝበልዎ እቲ ሰብኣይ መጺኡ ኣብኦም መንኰሰ። ሓንቲ ንእሽቶይ ጓል’ውን ካብ ማዕዶ መረብ መጺኣ ብኢዶም መንኲሳ። ይኹን እምበር ስድርኣ መጺኦም ብኃይሊ ወሰድዋ። ኣቦና በዚ ነገር ጸሎት ምስ ገበሩ ሩባታት ዓዲ ነጸፉ፤ እቶምስድራ’ውን ብሕማም ብድብድን ተላገብን ተጠቕዑ። ሽዑ እቶም ስድራ ከይፈተዉ በቲ ግብሮም ተጣዒሶም ነታ መነኮሳይት መለስዋ። ብጸሎቶም ድማ ነቲ ዝተኣዘዘ ቍጥዐ ኣህድእዎ። ኵሉ ድማ ከም ቀደሙ ኮነ። ኣቡነ ኣብራንዮስ ዝተወልዱሉን ዝዓበዩሉን ከባቢታት ኣብ ጐጃም ይኹን ደኣ እምበር ብፍቓድን ትእዛዝን ኣምላኽ ናብ ኤርትራ ክመጹን ሓዋርያዊ ስራሕ ከበርክቱን ክኢሎም እዮም። ኣብኤርትራ ድማ ብፍላይ ኣብ ደቡባዊን ማእከላዊን ዞባታት እናተንቀሳቐሱ ስብከተወንጌል ኣካይዶምን ኣስፊሖምን እዮም።

ድኅሪ ነዊሕ ጊዜ ማለት ኣብ ዝተፈላለየ ገዳማት ምብጻሕን ዝተፈላለየ ተኣምራት ምፍጻምን ብትእዛዝ ኣምላኽ ናብ ዓዲ ሰልዳይት መጺኦም ተቐሚጦም ነይሮም። ኣብኡ እንከለዉ ኸኣ “ቦታይ ኣርእየኒ” ኢሎም ናብ ኣምላኽ ምስ ጸለዩ ኣዴና ቅድስት ድንግል ማርያም ምስ ሊቀ መላእክት ቅዱስ ሚካኤል ተገልጸትሎም እሞ ኣብ ደብረ ጥሉል ዓምደብርሃን ካብ ምድሪ ናብ ሰማይ ተተኺሉ ረኣዩ። ኣዴና ኸኣ በል እዛ እትርእያ ዘለኻ እያ ቦታኻ በለቶም።ከም ገዳመ አስቄጥስ ከም ገዳመቆሮንቶስ ከምገዳም ዋሊ ገይረ ባሪኸያ ቀዲሰያ ኣሎኹ በለቶም። ሽዑ ዘርአብሩክ ዝተባህለ መኰንን ብስም ቅድስት ድንግል ማርያም ቤተክርስቲያን ሰሪሑ ምስ ፈጸመ አቡነአብራንዮስ ነቶም ደቆም መነኮሳትን መነኮሳይያትን በቦትኦም ፈላልዮም ስርዓት ገበሩሎም።

ክሳብ ሕጂ’ውን ንጸሎትን ቅዳሴን ኣብ ቤተክርስቲያን እንተዘይኮይኑ ናይ መነኮሳትን መነኮሳይያትን ሰፈር በበይኑ እዩ። ናብዚ ገዳም ድማ ብዙኃን እናመጹ ከም ከዋክብቲ ሰማይ ከሰርግዉዎ ጀመሩ። ወረ ኣቦና ኸኣ ኣብ ኵሉ ይስማዕ ስለ ዝነበረ ናብኦም እናመጹ ዝምንኵሱ በዚኆም። እቲ ገዳም’ውን ደልደለ። እቲ ገዳም፡ ገዳም ደብረጥሉል አቡነ አብራንዮስ ተባህለ።መብዛሕትኡ እዋን ግን በቲ ኣቡነ ኣብራንዮስ ኣብ ከርሲ ኣዲኦም ከለዉ ዝፈጸምዎ ተኣምር “እንዳቦና” ተባሂሉ እዩ ይጽዋዕ። ኣብ ስብከተ ወንጌልን ገድሊ ምንኵስናን ከለዉ ኣቦና ብዙኅ ፈተናን ተጻብኦን ይገጥሞም ነበረ። ይኹን ደኣ እምበር ንኵሉ በቲ ስሙር ጸሎቶምን መንፈሳዊ ተጋድሎኦምን ብዝገብርዎ ተኣምራታዊ ስርሖምን ይሰግርዎ ነበሩ።

ኣቦና ስለታ ርትዕቲ ተዋሕዶ ሃይማኖቶም ካብ ዝተፈተንዎ፡ ክሳብ ማእሰርቲ ዘብጽሖም እዋን ከምዝነበረ ገድሎምን ታሪኻዊ ጽሑፋትን ዝገልጽዎ እዩ። እዚ ኸኣ ሓደ እዋን ንጉስ ተክለሃይማኖት ዝተባህለ ንጉሰ ኢትዮጵያ፡ በቲ ጊዜ እቲ ሩባ ሰጊሩ ንገዛኢ ሰራየ ንዝነበረ ዮሓንስ (አቤቶ ማሞ) ንኣቦናን ንመምህራነ ሕጊ መነኮሳት ደብረ መርቆሬዎስን (ደብረ ድማኅ) ዝኾኑ አባ ላእከ ወልድን አባ መሥዋዕተ ጽዮንን አባ መፍቀሬ ክርስቶስን ከምኡውን ኃረየ ሰባኪን ኣሲሩ ክሰደሉ ኣዘዞ። በዚ ትእዛዝ እዚ ኸኣ ኣብ ቤት ማእሰርቲ ተሞቕሑ። ኣብኡ ኮይኖም ድማ ብትግሃት ናብ ኣምላኾም ይጽልዩ ነበሩ። ቅዱስ መልኣኽ እናተገልጸ ድማ የጸናንዖም ነበረ። ክፉእ’ውን ከምዘይቀርቦምን ከምቲ ጸላእቶም ዝሓሰብዎ ዘይኮነሲ መረብ’ውን ከም ዘይሰግሩን ገለጸሎም። እቲ ማእሰርቲውን ንጽቡቖም (ንደቆም ምስክር ክኸውን) ምዃኑ ነገሮም። ኮይኑ ድማ ኣቦና በቲ ከባቢ ሕዝቢ ፍቱው ስለዝነበሩ እቶም ሕዝቢ ብፍላይ ሕዝቢ መራጒዝ ኣቦና ኣኅሊፍና ኣይንህብን፡ መረብ’ውን ኣይነስግሮምን ብምባል ተቓውሞ ኣለዓዓሉ።

ኣቦና ስለ ተዋሕዶ ሃይማኖት በቶም ዓለውቲ ሃይማኖትን ፈተውቲ ስልጣኖምን መከራ ይበጽሖም ከምዘሎ ብዝተረድኡ ስሌኦም ክሳብ ሞት ክብጸሑ ነሕድሕዶም ማሕላ ገበሩ፡ ዝናገፉሉ ሜላ ድማ ሓሰቡን፡ ምኽሪ ድማ ገበሩን። ነቲ ምኽሪ ድማ ነቲ ገዛኢ ኣካፊሎሞ እኳ እንተነበሩን ነቲ ምኽሪ’ውን ሰሚርዎ እንተነበረ፡ ጸኒሑ ምኽሪ ጸላእቶም ሰሚዑን ንንጉሰ ፈሪሁን ሓሳቡ ስለዝቐየረሎም ዓቢ ባእስን ውግን ኣንጻር ገዛኢ ገበሩ። 30 ዝኾኑ ካብኣቶም ከኣ ኣብቲ ባእሲ ተቐትሉ። ኣቦና እዚ ነገር ብዝሰምዑ ሓዚኖም ትሕርምቲ ብምግባር ምብላዕን ምስታይን ኣበዩ። ኣርባዕተ ሱባኤ ምስ ወድኡ ኸኣ እቲ ክእሰሩ ዝኣዘዘ ንጉስ ተክለሃይማኖት ተቐዝፈ። ብኽብሪ ድማ ካብ ቤት ማእሰርቲ ወጹ። ቅድሚ ናብ ገዳሞም ምምላሶም ድማ ብዙኃን ቦታታት እናባረኹ ምስ ቅዱሳን እናተራኸቡ እግረ መገዶም ዑደት ኣካየዱ።ንዕረፍቶም ክልተ ዓመት ክተርፎ ከሎ ነቲ ቅድም ኣብ ጊዜ ህጻንነቱ ካብ ምድሪ ደምቢያ ኣትሒዙ ዝተኸተሎም አካለ ክርስቶስ ንዝተባህለ ተመሃራዮም “ቀዳማይ ወደይ መስቀለይን መንበረይን ሂበካ ኣሎኹ” በልዎ።

አባ አካለ ክርስቶስ ኣሽንኳይዶ ብሕይወትኩም እንከሎኹም ብድሕሬኹም እንተኾነ’ውን ኣብ መንበርኩም ክቕመጥ ኣይደፍርን እየ በሎም። ትሕትና እዞም ኣቦታት ክንደይ ደስ ዘብል እዩ። ንሶም ግና “እዚ ብናተይ ፍቓድ ዘይኮነስ ብናይ ጐይታ ቃል እዩ ዝብለካ ዘሎኹ” ምስ በልዎ ሕራይ በለ። ሽዑ ኣቡነ አብራንዮስ ንምሉኣት ማሕበር ኣኪቦም ብድሕሪኦም ንኣባ አካለ ክርስቶስ ከም ዝሾሙሎም ገለጹሎም። ደጊም እቲ እግዚአብሔር ዝሃቦም ዕድመ ከም ዝኣኸለ ኣፍለጥዎም።

ኣብ መወዳእታ ጐይታ ምስ ቅድስት ኣዲኡን ምስ ቅዱሳን መላእኽቲን ተዓጂቡ ብምምጻእ ከምቲ ንዅሎም ቅዱሳን ዝሃቦም ቃል ኪዳን ንኣቡነ አብራንዮስ’ውን ቃል ኪዳን ሃቦም።

“ኦ ፍቁረይ አብራንዮስ ዝኽርካ ዝገበረ፡ ቤተ ክርስቲያንካ ዝሃነጸ፡ ኣብ ገዳምካ ዝመንኮሰን፡ መጽሓፈ ገድልኻ ዝጸሓፈን ዘንበበን ኃጢኣቱ ክስረየሉ ኣብቲ ዘይሓልፍ መንግሥተይ’ውን ንዘለዓለም ከንብሮ እየ።” ዝብል ቃል ኪዳን ተዋህቦም። ጐይታ ባዕሉ’ውን ስለቲ ሓዋርያዊ ትግሃቶምን ሰማእትነቶምን ድንግልንኦምን ብቃሉ ሰለስተ ኽብሪ ሃቦም። ንእሽቶ ሕማም ኸኣ ሓሚሞም ብ 21 ነሓሰ ነፍሶም ካብ ስግኦም ተፈልየት። ነፍሶም ከኣ ብኢድ መላእኽቲ ብኽብሪ ናብቲ ናይ ዘለዓለም መሕደሪኣ ከደት። መቓብሮም ኸኣ ኣብ ጥቓ እቲ ዓቢይ ቤተ ክርስቲያን (እንዳ ኣቦና) ንበይኑ ቤተ ክርስቲያን (ቅድስት ማርያም) ተሰሪሑሉ ብኽብሪ ተዓቂቡ ይርከብ፤ ጥቓ እቲ መቓብሮም ዘለዎ ቤተ ክርስቲያን ድማ ኣቦና ደው ኢሎም ዝጽልዩሉ ከምዝነበሩ ዝፍለጥ፤ ክልተ ኣእማን ኣለዋ። ነዘን ኣእማን ድማ ግብጻውያን ጳጳሳት ስለ ክብሪ ኣቦና ክብሉ ይሳለምወን ከምዝነበሩ ይፍለጥ። እዚ ኸኣ ዜና ገድሊ ኣቦና ካብ ሃገርናን ካብ ኢትዮጵያን ሓሊፉ ግብጺ በጺሑ ከምዝነበረ ዘረጋግጽ እዩ።

ሰላም ለከ አብራንዮስ ፍጹም፡
ዘደብረ ልምላሜ ሥዩም፡
በረከተ ሰማይ ወምድር እስመ ተውኅበከ ዮም፡
ባርከነ ለደቂቅከ በቡራኬ ብዙኅ ሰላም፡
ከመ ባረክኮሙ ኖኅ ለያፌት ወሴም።

ትርጉም፡ ሰላም ንዓካ አብራንዮስ ፍጹም፣
ናይ ደብረ ልምላሜ ስዩም፣
በረከት ሰማይን ምድርን ሎሚ ተዋሂብካ እዩ'ሞ፥
ንደቅካ ብብዙሕ ባርኮት ሰላም ባርከና፣
ከምቲ ኖኅ ንያፌትን ሴምን ዝባረክካዮም።

በረኸትን ኣማላድነትን ናይ ቅዱስ ኣቦና አቡነ አብራንዮስ ምስኩልና ህዝበ ክርስቲያን ይኹን !!! ኣሜን!!!

ስብሐት ለእግዚአብሔር
ወለወላዲቱ ድንግል
ወለመስቀሉ ክቡር ወኃያል
ኣሜን!!


Henok ZeGebriel ቤተ ገብርኤል ንዋየ ቅድሳት ወመጻሕፍት ማዕደ ተዋህዶ

Address

Addis Abeba
Addis Ababa

Telephone

+251973937511

Website

Alerts

Be the first to know and let us send you an email when ማዕደ ተዋህዶ posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to ማዕደ ተዋህዶ:

Shortcuts

Share