05/08/2025
AUGUST THE MONTH OF '' PRAISING OF GOD ''
“እዚ ምእንታኹም ብክርስቶስ የሱስ ፍቓድ ኣምላኽ እዩ እሞ፡ ብዅሉ ኣመስግኑ።” 1ተሰ5፥18
ኣብ ህይወት ከም ኣመስጋኒ ሰብ ሓያልን ነዊሕ ዝጓዓዝን የለን። ምስጋና ንኣምላኽ: ምስጋና ንሰብ: ምስጋና ንርእሱን ዝለመደ ሰብ ኣዝዮ ብርቱዕ እዩ። እዚ ሰብ ንኣምላኽ ዘመስግን እምበር ዘየማርር፡ ንርእሱ ብሓሳብ ኣምላኽ ዘጽንዕን ዘትብዕን፡ ንሰብ ብምስጋናን ናእዳን ዘተባብዕ እምበር ዘይወቅስን ዘይንዕቅን እዩ።
ድሕሪ ቁሩብ መዓልቲ ''ጥቅሚ ንሰብ ምንኣድ" ዝብል ጽሑፍ ሒዘልኩም ክመጽእ እየ። ሕጂ ግን ናብቲ ቀንዲ ኣርእስቲ ምስጋና ንኣምላኽ ክንኣቱ።
ምስጋና ኩነታትካ ክትስዕር ዝገብር እዩ። ኣብ ልዕሊ ኩነታትካ ጸብለል ኣቢሉ ዝበለጸ ሓሳብ ክትሓስብ ዝገብር ምስጋና እዩ። ዘመስግን ሰብ ኣብ ሽግር ንነዊሕ ክጸንሕ ኣይክእልን እዩ። ብምስጋና ዝተረጋግእ ኣእምሮ ስለዘለዎ፡ መፍቲሒ ህይወቱ ኣብ ጥቅኡ ከም ዘሎ ናይ ምርኣይ ዓቅሚ ኣለዎ። ኣመስጋኒ፡ ኩነታቱ ዘይኮነ ንኣምላኽ ዝነግር ንኩነታቱ እዩ ብዛዕባ ኣምላኽ ዝዛረብን ዘእውጅን።
እምበኣር ተመስግን እንተኮንካ ኣብ ኩነታትካ ከኣልነት ኣምላኽ ኢካ ክትርዳእ ትጅምር። ኩነታትካ ዘይኮነ ከኣልነት ኣምላኽ ብምርዳእ ኩነታትካ ክትርስዕን ክኣልነት ኣምላኽ ከተድንቅን እዩ ዝገብረካ። ኣብ ምስጋና ኩሉ ግዜ መፍትሒ ኣሎ። እቲ መፍትሒ ከከም ዓይነት ኩነታትካ ዝፈላለ እካ እንተኮነ፡ ምስጋና ግን ንኩሉ መልሲ ኣለዎ።
ገለ ካብቶም ብምስጋና እንስዕሮም ነገራት እስኪ ንርአ፦
- ምናልባት ኩነታትና ዘይምቹእ ክመስል ይክእል እዩ፡ ሓደ ነገር ንሕሰብ 'እዚ ሕጂ ዘለካዮ ንመጻኢካ ኣይገልጾን እዩ' እሞ ኣብ ናይ ተስፋ ኣምላኽ ተስፋ ገይርካ ኣመስግን።
- ጎዳይካ ዝደንጎየ እንተ መሰለና፡ ነገራት ደንጊዮ እንብሎ፡ ኣበይ ደኣ ኣሎ፧ እንብሎ ነገራት ኣምላኽ ግን ህያው ሙካኑ ኣብ ግዜኡ ጹቡቅ ክገብሮ ከም ዝክእል፡ ብምሕሳብ ምምስጋን።
- እዚ ነገር ሕቶ ኣሎና ወይ ዘይተመለሰ ነገር ኣሎኒ እንተኢልና፡ ኣብቲ ቁጻር ዝመስል ነገርና እካ ወዳጂ መዓሙቅ ብሙካኑ ብዘገርም መገዲ ንሕቶካ ክምልሶ ከምዝክእል ኣሚንና ነመስግኖ።
- ዘይተረደኣና ዘጋጠመና ነገር እንተሎ እካ: ጳውሎስ እካ ''እንገብሮ ይጠፍኣና ግን ተስፋ ኣይንቀብጽን'' ኢሉ ኣሎ። ኣብ ከምዚ ኣጋጣሚ እካ ኣምላኽ ጻድቅ ሙካኑ ንረዳእ። ትማሊ ዝከበዱና ሎሚ ከም ዝቀለሉና ሎሚ ዝከብዱናውን ወይ ድሕሪ ዝተወሰነ ደቃይ ወየ ከኣ ጽባሕ ከም ዝበርሁልና ተረዲእና ንጻድቅ ኣምላኽ ምምስጋን ኣይነቃርጽ።
ምምስጋን እዞም ነገራት ኣየድልዮንን ዘይኮነ ''ካብኦም ኣምላኽ ይዓቢ ብግዚኡ ከኣ ክረክቦም እየ፡ ሕጂ ግን ንኣምላኸይ ከመስግን እየ'' ምባል እዩ። ምስጋና ካብቲ ጎዲሉኒ ዝብል ምርዳእ የውጽኣካ እዩ። ካብቲ ኣምላክ ሂቡና ዘሎ ዝዓቢ ወልሓደ ነገር የለን። ስለጥዕናካ ተመስግንዶ፧ ስለ ዘሎካ ሰላም ተመስግ'ዶ፧ ስለዘሎካ ትሕስቶ'ከ፧ ስለዘይብልካ ዘይኮነስ ስለዘሎካ ኣመስግን።
ሰብ ነቲ ዘለዎ ቡሉይጽ ነገር ስለዘይርድኦ ካብኡ ዝጎድል ወይ ዝንእስ ነገር ክረክብ ናብ ዝገደደ ዘይምርግጋን ጌጋ ውሳኔን ይኣቱ። ኤሳው ንዘክሮ መግቢ ክበልዕ ቡክርናኡ ከሲሩዎ። ንምድራዊ ነገር ክብል ዝበለጸ መንፈሳውነቱ ዝንዕቀ ሰብ ኣሎ። ከምዚ ክንከውን ኣይግባእን፡ መንፈሳውነትና ካብ ኩሉ ይበልጽ። ስለ ምድራዊ ነገር ክንብል ኣብ ዘይቦታናን ኣብ ዘይንኣምነሉን ኣይንረከብ።
እንታይ ዘመስግኖ ነገር ኣሎኒ፧ ንዝብል: እስኪ ገለ ከዘክረካ/ኪ
- ስለ ዘሎካ ጥዕና፦
እቲ ዘሎካ ጥዕናካ ከም ቀሊል ኣይትርኣዮ ብእኡ ደስ ይበልካን ኣመስግንን። ምክንያቱ ገንዘብ ዘለዎም ዝፈላለየ ትሕስቶ ዘለዎም ግን ብጥዕና ምስኣን ዝሽገሩ ከም ዘለው ኣይትረስዕ። ወላ እካ ኣብ ጥዕናካ ዝኮነ ጸገም እንተለካውን ካባካ ዝገድድ ከም ዘሎ ኣይትስሓቶ። እዛ ዘላትካውን ዓቅምካ ስለዝኮነ እዩ። ንፈውስካውን ከቀላጥፎ እዩ እሞ ኣሚንካ ኣመስግኖ።
- ብሰላም ምውጻእ ምእታዎው፦
ብሰላም ወጺጽካ ብሰላም ምምላስካ ከም ቀሊል ኣይትርኣዮ ምሕረት ኣምላኽ በዚሑልካ እዩ። ምስ ወጹ ኣባይ ከም ዝከድን እንታይ ከምዘጋጠሞም ከይፈለጡ ናብ ሰማይ ዝከዱ ከም ዘለው ኣስተውዕል። ስለዝከኣልካዮን ርእስካ ስለዝሓለካ ዘይኮነስ እቲ ዝክእለሉ ኣምላኽ መፈንጠራካ እንዳ በተከ ስለዝሓለወካ እዩ። ስለዚ.......(ኣመስግኖ)
- ብስራሕካ፦
ሰሪሕካ ስለ እትረክቦ ዘሎካ ኣታዊ ኣመስግን። ክሰርሑ እንዳ ደለዮን ክሰርሑ እንዳ ከኣሉን ነዚ ድላዮም ዘይረከቡ ኣለው። ንስካ ግን ትሰርሕ ምህላውካ ንኣምላኽ ኣመስግኖ። ከተመስግን ከሎካ ከኣ ዝበለጸ ደገ ስራሕ ክኽፈተልካ እዩ።
- ብሰላም ምድቃስካን ምትሳእካን፦
ብሰላም ደቂስካ ምትንሳእካ ኣመስግን ኣምላክ ብሂወት ንበር ስለዝበለካ ጹቡቃት መዓልትታት ስለዝወሰኸልካ እዩ። ብገዛእ ርእሱ ብዓቅሙ ዝነብር ሰብ የለን። ኣምላኽ ንእስትንፉሱ ኡፍ ዝበለሉን ዝከናከነሉን እዩ ዝነብርን ምንባሩ ዝቅጽልን።
- ኣብ መወዳእታ ብሕጂ ኣምላኽ ዝህበካ ካብቲ ዘሎካ ኣይዓብን እዪ(ሴላ)። ዝበለጸ ኣሎኒ ኢልካ ሕሰብ።''ነቲ ዘለዎ ይውሰኮ'' ድዩ ዝብል ክውሰኸካ እዩ።
ኣምላኽ ካብ ሕቶናን ጎደሎናን ይዓቢ ስለዚ ክምስገን ይግብኦ እዩ። አመስግን ነገራትካ ክፍታሕ እዩ፡ ኣመስግን ሕቶካ ክምለስ እዩ፡ ኣመስግን ጎደሎካ ክምላእ እዩ: ኣመስግን ዝደንጎየ ክቅልጥፍ እዩ። እዛ ወርሒ ናይ ምስጋና ወርሒ ትኩነልኩም። ምስጋናውን ይገለጸልኩም። ውጽኢት ከኣ ክትረክቡ ኡኩም ኣብ ምስክርነት የራክበና።
ክብሎ ዝደሊ ቡዙሕ እካ ዘሎ ክነሱ ብጽሑፍ ዝውዳእ ስለዘይኮነ ንምስጋና ዝከውን ጥበብ ዝህበኩም መንፈስ ኣብ ውሽጡኩም ስለዘሎ ብእኡ እንዳ ተመራሕኩም ቀጽልዎ።
መጻኢኩም ብሩህ እዩ፦
ኣስተውዕል ድንቂ!
