Cemiterio Parroquial de Barallobre

08/11/2017

Nestes días de novembro que lebramos a aqueles que nos precederon no camiño da fe, a Parroquia de Barallobre nos se esqueceu de quen foi o seu pastor durante 63 anos, Don Elías, dende aquí a nosa lembranza.

02/11/2017

Fotos do Cemiterio Parroquial de Barallobre do ano 2016 polas festividades de Santos de Defuntos.

26/05/2017

15/11/2016

Recentemente foi instalado o sepulcro de Don Elías, o noso párroco ate o o seu falecemento o pasado 15 de setembro.

Dende aquí as nosas oracións polo seu eterno descanso.

16/06/2016

Sepultura de Don Juan Cupeiro Balado, nado en Barallobre no ano 1860 e finado nesta mesma parroquia en 1930. Foi mariño mercante e empresario-armador.

A súa lápida foi a primeira que se colocou exteriormente no Cimeterio Parroquial de Barallobre.

16/06/2016

Sepultura de Dona Xoana Porto Ramil, esposa de Don Xosé María Pérez Parallé. Nada en Barallobre no ano 1915 e finada nesta mesma parroquia no ano 2010.

16/06/2016

Sepultura de D. Xosé María Pérez Parallé, que asinaba con frecuencia como Xosemaría Pérez Parallé, nado en Ferrol o 4 de agosto de 1909 e finado en Barallobre o 1 de novembro de 1987, foi un mestre e escritor galego.

A súa actividade cultural comezou en Santiago de Compostela, cidade na que realizou estudos universitarios de Dereito, Filosofía e Letras e Maxisterio, colaborando tamén en diversos xornais e participando dalgunhas iniciativas como a fundación da revista Abrente, xunto con Filgueira Valverde e outros escritores.

Regresou a Ferrol, onde participou na publicación republicana Renovación, así como nas actividades do Centro Obreiro de Cultura. Paralelamente comezou a desenvolver un intenso traballo poético que en gran parte permaneceu inédito até despois do seu pasamento, a pesar de recibir algúns premios puntuais, como un diploma no Certamen del Trabajo de 1935. A chegada da Guerra Civil truncou a meirande parte das súas actividades públicas. O autor limitouse ao seu traballo como mestre no Centro de Enseñanza General de Ferrol. Co tempo estabeleceuse na parroquia de Barallobre, no concello de Fene, próximo a Ferrol, terra na que pasou boa parte da súa vida e coa que estabeleceu unha fonda ligazón persoal, polo que foi denominado popularmente como o poeta do Penedo, lugar desta parroquia onde residiu.

No anos sesenta fíxose cargo dos labores de dinamización cultural do Círculo Mercantil e Industrial Unidad de Fene, mentres seguiu a recibir premios nacionais e internacionais: entre eles o de 1964 da Radio-Televisión Francesa a dous poemas do seu libro Cartafol da saudade, ou a mención nos Xogos Florais de Pamplona de 1975. Faleceu en 1987. Nese mesmo ano, o Círculo Mercantil creou, na súa honra, o Premio Nacional de Poesía Xosemaría Pérez Parallé. Dende entón ten recibido multitude de homenaxes. En Ferrol foi nomeado Fillo predilecto da cidade e déuselle o seu nome a unha rúa do seu barrio natal, Canido. En Fene, ademais de apoiar o premio literario, o concello puxo o seu nome á Biblioteca Municipal, e tamén lle adicou un banco na Praza do Camiñante Descoñecido, dedicas aos máis destacados autores galegos. Frecuentemente organízanse tamén homenaxes á súa persoa por parte das asociacións culturais de Fene, así como unha forte reivindicación para que sexa homenaxeado no Día das Letras Galegas.

16/06/2016

Sepultura de Don Andrés Ares Díaz, nado en Corvelle (Vilalba) en 1891 e finado Barallobre o 3 de outubro de 1936, foi un sacerdote galego.

Cura párroco do Val de Xestoso dende 1931, coa sublevación do 18 de xullo de 1936 foi denunciado por negarse a entregarlle ao sublevados a recadación da colecta para a festa dos Remedios que se ía celebrar o primeiro domingo de setembro. Acusado de entregar cartos para o Socorro Vermello Internacional, foi arrestado por un grupo de falanxistas e gardas civís que o levaron a Pontedeume e despois Barallobre onde confesou co párroco Antonio Casas. Levárono ao cemiterio e executárono ás 11 da mañá do 3 de outubro de 1936, escarmentar ao cura de Barallobre, sospeitoso de colaborar cos republicanos. Na súa partida de defunción indica que foi eliminado pola Garda Civil, ao intentar fugarse cando era conducido a practicar unha dilixencia.

15/06/2016

O escudo da familia do Pazo de Barallobre, os "Xaspe-Moscoso".

15/06/2016

Algunhas lápidas senlleiras do "Cimeterio Parroquial de Barallobre".