Muri iyo gahunda twise "MFITE INYOTA" turasingiza, tugashimira kdi tugasabirana. KUBERA IKUZO RY'IMANA N'UMUKIRO W'ISI! Twiyemeje kuba INTUMWA za Yezu Kristu: Tuzirikana amasomo ya Misa, ubuzima bw'abatagatifu n'inyigisho za Kiliziya. DUFITE GAHUNDA YO GUSHENGERERA YEZU KRISTU MW'UKARISTIYA, MURI GAHUNDA TWISE "MFITE INYOTA". Ni gahunda yo kunga ubumwe mu isengesho, ni umwanya wo gusingiza Imana, kuyishima no kuyisaba. Duhura "online" buri wa gatanu (tukaba twahindura umunsi bitewe n'impamvu zikomeye). Iyi gahunda ikayoborwa na Padiri OSCAR UWITONZE. Abayitabira bitoza kurangamira Yezu Kristu muzima mw' Isakaramentu Ritagatifu ry'Ukaristiya.
-Bitoza gukunda Misa, bakarushaho kugira inyota yo guhazwa kenshi kandi neza.
-Bitoza gukunda GUSHENGERERA Ukaristiya Ntagatifu. Bityo bakagira inyota yo gusura kenshi kiliziya cyangwa se chapelles zibarizwamo tabernacle, ubushyinguro bw'Umubiri wa Kristu.
-Bitoza gukunda gusaba imbabazi biyemeza guhabwa Isakaramentu ry'imbabazi.
-Bitoza gukunda isengesho ryo gusingiza(louange) ribabera isoko yo guhinduka koko bakarushaho kubona ubuhangange, ubwiza, ububasha, impuhwe, icyubahiro, ikuzo, n'ubutabera bw'Uhoraho, Imana, Butagatifu. Aho ni ho bahera bitoza kumushimira, bakanitoza kumusaba: buri wese arisabira, akanasabira abe n'abandi. Buhoro buhoro bagenda bavumbura ko iri sengesho ryo gusingiza(louange) ari isengesho rinakiza ibibabaza umubiri rikanabohora roho zacu/imitima yacu. "Nyagasani, ni wowe Mana yanjye, mpora ngushaka uko bukeye! Umutima wanjye ugufitiye inyota, n’umubiri wanjye ukakugirira urukumbuzi,
meze nk’ubutaka bw’agasi, bwabuze amazi bukumirana." ( Zab 63, 2)
- Bitoza gukunda no gusabira abasaserdoti no gusaba Imana ngo ikomeze yongere umubare wabo kandi ibatagatifuze. Muri iyi gahunda, twitoza gukundana(nubwo tutabarizwa hamwe):
- Iyi gahunda ihuriyemo abanyarwanda n' abarundi babarizwa mu bihugu binyuranye; ihuriyemo abakiri bato n'abakuze. Ikagaragaramo ubwisanzure buzira ubwishishanye; ikagaragaramo ubwubahane. Duharanira:
- Kubabarana n' ubabaye: dusabira abarwaye n'abari mu ngorane zinyuranye z'ubuzima(nta na kimwe twirengagiza muri ibyo byose bibuza mugenzi wacu ibyishimo).
- Kwishimana n'uwishimye: tuzirikana abagize ibirori nk' abahimbaza umunsi mukuru wa Bazina Mutagatifu, abahimbaza isabukuru iyo ari yo yose(Ivuka, Batisimu, Ugushyingirwa, Ubusaserdoti, ukwiha Imana, ugusoza amashuri, n'ibindi...) Abayitabirira bitoza gukunda Kiliziya: gukunda no kwitangira ubutumwa muri paruwasi zacu, mu makoraniro anyuranye tubarizwamo, kandi ibyo byose bigaherekezwa n'ibikorwa by'urukundo (buri wese ku giti cye). IMANA YATANGIYE UYU MURIMO IWUKOMEZE KANDI IZAWUSOHOZE.
2 Tm. 4, 2: "Amamaza ijambo, uryigishe igihe n’imburagihe, wumvishe ingingo, utote, ushishikaze, mu bwihangane butarambirwa, uharanira kujijura." "Proclaim the word; be persistent whether it is convenient or inconvenient; convince, reprimand, encourage through all patience and teaching." "Proclame la Parole, interviens à temps et à contretemps, dénonce le mal, fais des reproches, encourage, toujours avec patience et souci d’instruire." "Proclama la Palabra de Dios, insiste con ocasión o sin ella, arguye, reprende, exhorta, con paciencia incansable y con afán de enseñar." URAKAZA NEZA URISANGA! Nawe rero usangize incuti zawe!
