16/07/2026
رعب زرعوه فينا إن اللي بيغلط مع بنات الناس لازم يشوف ده في بنته أو أخته أو مراته
وكأنها قاعدة إلهية حتمية!
إزاي بجد مقتنعين بكده؟
يعني بالعقل كده
واحد عمل علاقة محرمة وغلط مع واحدة
يقوم ربنا العدل يعاقبه بإن حد تاني يغلط مع بنته أو أخته البريئة العفيفة اللي ملهاش أي ذنب في طيشه عشان بس يحرق قلبه عليها؟
فين العدل هنا؟
فين القاعدة القرآنية القاطعة (ولا تزر وازرة وزر أخرى) ؟
الشرف مش رصيد عائلي الأب أو الأخ يسحب منه براحته والبنت هي اللي تسدد الفاتورة.
ربنا أعدل وأكرم من إنه يخلي إنسانة تدفع تمن ذنب معملتهوش
دي عقلية ثأر وقبائل مش عقلية دين خالص!
عقاب العاصي بيكون في نفسه هو
في صحته في ماله في سلب راحة باله
أو الأسوأ من كل ده إن ربنا يستدرجه وميعاقبوش في الدنيا أصلاً ويسيب رصيده يتقل ليوم القيامة عشان الحساب يكون تقيل ومفيش منه مهرب.
الكارثة إن الفهم الشعبي المريض ده دمر نفسية ناس كتير تابوا ورجعوا لربنا
وتلاقيه عايش في رعب ووسواس وبيقهر في بناته ومضيق عليهم لمجرد إنه خايف ومستني العقاب الإلهي ينزل فيهم!
مع إن ربنا بيقبل بالتوبة وقالها صريحة في القرآن {إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَّحِيمًا }
احنا محتاجين نفهم إن اللي بيغلط بيشيل شيلته لوحده.
