06/09/2026
الصور دي من بيت الأستاذه راندا بخيت في مصر الجديدة ..
أنا هكتب المعجزة زي ما هى بالكلمة زى ما اخذتها مطبوعة من دافيد ( واحد من اقرباء الأستاذة راندا ) ..
"المعجزة حصلت مع الأستاذة / راندا بخيت
هى انسانة عادية بس تعبانة وعندها تجارب كتيرة .. جوزها مات من حوالي 10 سنين وابنها مات من 2007 وبعدها حصلها المرض اللي هحكيهولكوا .. فربنا حب يظهر مجده معاها على صبرها وايمانها اللي ماقلش بمرور الوقت ..
هي امرأة طيبة القلب أصيبت بجلطة في المخ وذهبت الى المستشفى وتعب الأطباء ولم يعرفوا السبب ثم خرجت من المستشفى الى دكتور مخ وأعصاب وقال لها روحي لدكتور نفسانى وذهبت الى دكتور نقساني واحتار الأطباء ولم يعرفوا السبب ..
وفى يوم وهى كانت تعبانة زي ما هي .. دخلت تريح لوحدها فى الاوضه .. فحصل ان فجأة سمعوا صوتها فدخل اهلها عليها فوجدوها بتقول مارجرجس جالي ... وقالي انتي عارفه انا مين ... قالتلوا لأ .. قالها انا مارجرجس .. ومينا بيسلم عليكي ( ابنها المتوفي من 2007 ) .. وظهر نور وزيت علي المرايا كتير ومكملتش كلامها .. لقوا زيت ريحته حنوط .. و طبعا كلهم فرحانين ومش مصدقين ان كل ده بيحصل .. وشوية وقامت ولقوها زى الفل خفت !!! .. وشوية ودخلت الأوضة و أهلها معاها وبيتكلموا وفجأة غابت عن الوعى فاتخضوا كلهم عليها بس سابوها عشان حسوا انها شايفة حاجة ... ولما فاقت قالت ان مارجرجس ظهر تانى ومعاه العدرا ومينا (ابنها) لابس تونية و القديس ابانوب .. ولما سألت انت مين قالها أنا ابانوب صاحب ابنك مينا .. والعدرا قالت لها انا زعلانة منك عشان قلتى اول مرة يحصلي معجزة ! لكن انا شلتلك الغدة قبل كده وأنا دايما معالكي.. ومارجرجس قالها ده مش مرض نفسي دول كانوا 6 جلطات فى المخ بس انا شلتهم خلاص .. وقالها تيجي انتي وكل اللى شافوا المعجزة دير الخطاطبة وتتناولوا وتحكوا اللي حصل لأبونا أرميا وأبونا بيشوى وايديها قعدت ساعتين تنزل زيت وفي ازازة اتملت لوحدها زيت ..
وبعدين صورة العدرا وصورة مارجرجس وصورة تماف ايريني ابتدوا ينزلوا زيت بشكل متواصل وبدون توقف ..
ودلوقتي كل الصور اللي في الأوضة بتنزل زيت وكل ما حد من الناس اللي بتزور يجيب صورة من صور القديسين تنزل زيت اول ما تدخل الأوضة ..
والظهور ده استمر 4 ساعات بس هي حاستهم كأنهم دقيقتين ..
وفي ناس غير مسيحية راحت واخذت بركة واتأكدوا من المعجزة بنفسهم ..
وفى راهب راح وصلي واتأكد انها معجزة وعمل تمجيد والزيت زاد جدا اثناء التمجيد ..
والعمارة دلوقتي بقت مشهورة جدا وعدد الناس اللي بتزور كتير جدا ..
ربنا يدينا نعمة اننا نصدق ونؤمن بالقديسين ومعجزاتهم ..
واللي فعلا حسيته ان ربنا عايز يوصله لنا من ورا المعجزة دى ان القديسين بيشتغلوا حلو أوي وبيسمعونا وبيعملوا معجزات للي يؤمن بجد .. بس في الوقت المناسب وبالطريقة السليمة .. سيبوا ربنا يتصرف وامنوا انكم في ايد أمينة
