Frozen Bites

24/04/2025

لوسمحتوا متقدملي عريس مواصفاته كلها حلوه شغل و شخصيه و عيله و شكل كله حلو جدا
بس في حاجه خايفه منها
انه بيشتغل برا مصر و هيخطبني و يسافر و هينزل اجازات
سؤالي هنا للي مر بالتجربه دي هل السفر دا بيبقي عائق خلال فتره الخطوبه من حيث التفاهم و التعارف ولا عادي
خايفه معرفش أفهمه و ادرسه كويس بسبب اننا مش هنتقابل كتير ياريت تنصحوني

06/07/2024

16/05/2024

إتعرفت على بنت من محافظة سوهاج تحديدآ من قرية نزلة خاطر بعد فترة تعارف طلبت منها اتقدملها و بالفعل كلمنا اهلها انا و البيت عندى و اول كلمه بابا قالها لأبوها بيتنا بيت متواضع و بسيط فى القاهرة فى منطقة السواح ٩٠ متر و عرفته كمان إنى عندى شقة ٩٠ متر ف حدائق العاصمة الإدارية و كان رد باباها إحنا اصلآ ما بنحبش غير البساطة و التواضع سواء تجهيزات او دهب او غيره اهم حاجة راحت بنتى و كان شرطى الوحيد قبل اى خطوة رسمى إنه يجى السواح عندنا يشوف كل حاجة على الطبيعة عشان نبدأ صح و عشان يكون ليه حرية الإختيار فى القبول و الرفض من اولها المهم إتبسطنا جدآ بكلامه و تمادينا انا و البنت ف مشاعرنا و للأسف حبينا بعض المهم سافرت لوحدى اول مره و اخدت منه معاد يجى البيت عندنا لحد ما والدها جه القاهرة يشوف الشقة إعترض على المنطقة رغم إن انا ساكن ف شارع رئيسى جمب الكنيسة اللى فى السواح إعترض على الشقة قولتله مافيش مشكلة اخد حاجة إيجار بالمساحة اللى حضرتك شايفها مناسبه ليها رغم إنى عندى شقتين ملك برضو رفض ف الدهب جينا نتناقش كنا بنتكلم ف ٣٥ الف هوا قال إن الفقير فى نزلة خاطر عندنا بيجيب ب ٦٠ الف و ٧٠ الف جنيه دهب و اللى بيجيب بأقل من كدا بنته بتتعاير بدا باباها للأسف راح شهر بيا و بأهلى إننا فقرا حتى قدام قرايبنا لإنهم جيرانه هناك اتصل بعيلته شخص شخص يقولهم شوفوا مجايب بنتى جايبالنا ناس فقرا إزاى و شهر بيا إن انا مش مناسب شكلآ و بيقول بنتى اجمل منه و كمان بيقول عليا إنى رفيع عليها مش فاهم يعنى إيه اصلآ التعبير دا مع إن دى مكنتش اول مره يشوفنى فيها ... و هوا ف بيتنا قالى كلمة غريبة اوى بيقولى إزاى شاب عندك عنده ٢٩ سنه مش معاه ف البنك رصيد ب ٤٠٠ او ٥٠٠ الف جنيه ما هو دا يعتبر فشل ... فضلت فترة بعدها بتعالج من الموضوع دا و بسأل نفسى هوا انا فعلآ فاشل ؟ بس انا بشتغل و بشقى و براعى ربنا ف لقمة عيشى اجيب منين الرصيد ف البنك اللى هوا بيتكلم عليه دا المهم قفل الموضوع كله معايا و رفض كل المفاوضات و هى مغلوبه على امرها لإن للأسف ف الصعيد مافيش حاجة إسمها مشاعر بنتى و الكلام دا اللى شايفه من وجهة نظره هوا هيقنعها بيه بأى طريقة .... تمر سنة و اتنين و تلاته و قابلت حد من المنطقة إتعرفنا على بعض وقفت جمبى ف مواقف كتير كانت بتحاول تفرحنى بأى طريقة جاتلى شغلى فاجأتنى قدام زمايلى و عملتلى عيد ميلادى و كانت اول مره حد يعملى مفاجأة ف شغلى و قدرت تعالج جزء من الموضوع القديم كانت هى و اهلها افضل من البنت الأولى و اهلها ف كل حاجة تعليميآ ثقافيآ إجتماعيآ ماديآ مافيش مقارنه بين العيلتين إتقدمت و وافقوا عليا و انا ف اسوأ فترات حياتى نفسيآ و الغريب إنهم ورغم إنهم عائلة غنية جدآ ما علقوش على اى تفاصيل يعنى الدهب طلبوا ب ٣٥ الف عادى و الشقة تمام و بصراحة حمايا لحد دلوقت عمل معايا حاجات و وقف معايا وقفات كإنه اب ليا و هدية الخطوبة كتب شقة بإسم بنته اللى هى خطيبتى فى الزيتون مساحتها ١٣٠ متر و قال دى هدية الخطوبة ليكم جهزوها براحتكم تأجروها تبيعوها اللى إنتوا عاوزينه ماحسيتهوش ابو خطيبتى حسيت كإنه ابويا فعلآ و حماتى كمان بتعمل المستحيل معايا و يوم دخولى بيتهم كإنه يوم عيد و البنت كمان واقفة جمبى و متحملة كل ظروفى المهم إحنا كملنا سنة و نص خطوبة حاليآ و كل فترة بكتشف إنى مش قادر اكمل مش قادر اديلها كل اللى جوايا و لسه جوايا بقايا الموضوع القديم اللى هى اصلآ إتجوزت و معاها طفل حاليآ من بعد ما سيبنا بعض و خطيبتى واخده بالها و مكمله و هى جواها مليون سؤال بحاول اهرب من عينيها و من اسئلتها مش قادر اكمل معاها و ابقى بضحك عليها و انا مش هقدر اديها كل حاجة جوايا لحد ما اموت و مش قادر اسيبها ف نص الطريق عشان ما اكسرهاش بعد كل اللى عملته معايا هى و اهلها ... ف الحالتين هى ملهاش ذنب و المسئولية انا اللى بتحملها كاملة ... بس مش عارف اتصرف إزاى و انا كل شوية بأجل المعاد بدون اسباب واضحه او مقنعه ... ارجوكم حد يرشدنى اعمل إيه او اتصرف إزاى بدون ما يكون فى اى تعب ليها

06/03/2024

ممكن تنزل من غير الاسم ...
انا عندي 18 سنه ومن سنه ونص كنت ف رحله تبع الكنيسه ف في خادم جه وقف معايا وقعد يسالني عندك كام سنه وبتدرسي اي وقدامك كام سنه الكلام ده يعني انا رديت عليه ومشيت علشان مش هينفع اقف معاه ...للعلم هو دلوقتي 25 سنه
هو من وقتها متكلمش معايا تاني بس من وقتها لاحظت اني يشوفه كتير ف الكنيسه أو ف الشارع....
ومن فتره حصل موقف من مامته ..هي خادمه ف الكنيسه كان اجتماع خدام وبيوزعوا هدايا عيد الميلاد المجيد هي مكانتش قاعده جمبي ولا هي اللي بتوزع ..أنا كنت سرحانه وفجأة لقيتها بتنادم عليا انا من وسط صحابي وبتسالني اخدتي ولا لا للعلم هي مسالتش اي حد من صحابي ..
المهم هو قال إنه مسافر بره مصر ف أنا حسيت وقتها اني اتدايقت مش عارفه هو دا اعجاب ولا حب ولا اي
ومش عارفه هو برضو كان بيسال عادي ولا اي ممكن حد يفيدني🙂

16/02/2024

ياريت بلاش تعليقات جارحة
دلوقتى عاوزة رأى المتزوجات بس من فضلكم
انا موظفة ومتعلمة تعليم عالى وزوجى زيى وكويس الحمد لله بس احنا لسه مانجبناش
وهو بيكسل فى زيارة الأطباء وانا حاسة بالعجز فى قصة الانجاب دى لكن بحاول ارضى بإرادة الله واضغط على نفسى واخد انا علاج لكن من غير نتيجة
كل ما ينشغل عنى باتعب نفسيا جدا واحس بالأهمال وباعود اعيط بالساعات مش بيفرق معاه بيسيبنى وينام أو يعود يتكلم بالتليفون بالساعات
باحس بالغيظ ساعات كتير واحاول اطلع غلبى فى الاكل وساعات اتعصب فى شغلى زيادة عن اللزوم
هل فيه حد مر بنفس ظروفى وحس بنفس احساسى وكنتوا بتعملوا ايه ؟
انا تعبانة جدا ومش بابطل عياط ايه فائدة انك تتزوجى شخص كويس وبتاع ربنا بس مش سعيدة ولا مرتاحة
محدش يجيب لى سيرة انفصال لانه مش وارد
شكرا ليكم

06/09/2022

مساء الخير ممكن تنزلي من غير اسم
انا متجوزه من 4 سنين ومعايا بنوته ومن سنه تقريبا اكتشفت علي تليفون جوزي انه بيتفرج علي حاجات مش كويسه وبيكلم بنات مش كويسه ولما واجهته راح قالي خليكي معايا ووعدني انه مش هيعمل كده تاني ومن يومين بقلب في التليفون عادي لقيت شات مش محترم خالص عن الجنس وكده واجهته راح قالي خليكي معايا وركزي معايا اكتر من كده وقعد يصالحني وياخدني في حضنه وانا مش قادره ابص في وشه بصراحه وبقيت اسيبه واقعد في الاوضه وحدي وبقيت احطله ياكل وحده وانا اكل وحدي ومجاش اتكلم معايا تاني من بعد اما صالحني وانا مش عارفه اعمل ايه انا بحبه اوي بس زعلانه منه تنصحوني اعمل ايه وهتابع في الكومنتات

05/06/2022

لو سمحت انا متجوزه من خمس سنين ومعايا طفلين وبعد المده ديه كلها اكتشفت أن جوزي عامل اكونت فيك علي الفيس و بيكلم بنات كتير اوي وبينما معاهم علاقه سواء بقي فديوهات أو صور وكده وبيبعت فلوس كتيره للبنات ديه مقابل كده انا بجد مخنوقه اوي ومش عارفه اعمل ايه ومش عارفه حتي اواجهه لاني مش طايقه ومش عاوزة ادخل حد من عائلتي ولا عائلته علشان مش عاوزة صورته تتهز قدامهم ساعدوني وقولي اعمل ايه انا بموت من الخنقه بجد

تعديل ١
تعديل المشكله أنه فاهم في الدين اوي وكل كلامه بالانجيل وبيتكلم في الطقس والعقيدة مع كل الناس

11/05/2022

معلش هي مشكله طويله شويه بس ضروري نعرف حلها
واحد قريبي متجوز ومراته سايبه البيت بقالها 3 سنين ونص او 4 بسبب انه كان بيشرب برشام وهو عرف غلطه وبطل فعلا وكمان كتبلها البيت بأسمها عشان هما لسه ماعندهمش عيال وهي طلبت كده عشان ترجع وبعدها رفضت انها ترجع حاول يعمل كل حاجه عشان يرضيها بس مش نافع نهائي وهي سمعة عيلتها مش كويسه ف الناس بتعايره بيهم
وسأل عن تغيير المله لقي ان الموضوع هايطول قوي وهايصرف فلوس كتير فيعمل ايه عشان يتطلقوا عشان هو جاب اخره فعلا وهل ينفع يتجوز بعقد لان فعلا الاباء الكهنه وسيدنا وناس كبار ف البلد ماعرفوش يحلوا الموضوع
وياريت من غير انحيازيه لمراته لان ربنا يعلم ان عمل كل حاجه عشان يراضيها وترجع

مع العلم ان اهلها هما اللي علموه شرب البرشام هو ماكنش كده خالص

ادمن الصفحة: شكرا علي رسالتك
هو ماجربش يروح مركز علاج الادمان؟

راح واتعالج من فتره
بس هي حبت القعده عند مامتها بقي ومش حابه ترجع تاني
وهي كمان والدتها منفصله عن باباها بقالهم اكتر من 20 سنه ومش متطلقين

19/04/2022

ممكن تنزلوا مشكلتي دي ارجووووكم

خطيبي كان حلو اوي معايا ومعاملته معايا كانت كويسة اوي وفرحان بوجودي اوي فالاول هو بيشتغل في محافظة تانية وبينزل كل خميس وجمعة يوم ونص ونتقابل فيهم وكان بيجبلي شيكولاتة وكده هو مادياً مش احسن حاجة بيقبض ١٠ الف جنيه فالشهر ومعاه عربية بيروح ويجي بيها بس وانا حساه باصص لفلوسي وفلوس اهلي بدليل بياخد مني فلوس احيانا بيقولي هو نص وانا النص ونصرف سوا عالبيت وكلام من ده وعاوز نجوز في ايجار جديد ٣ سنين مثلا وبعدين نشوف دنيتنا هتبقي ماشية ازاي وممكن اكتر من ٣ سنين
انا اسرتي مرتاحة مادياً اكتر منه بكتير واهله مش بيساعدوه
حتي ف عيد ميلادي مجبليش هدية
احنا فالاول كنا بنخرج وكان بيعزمني عالاكل وكده
ونتفسح بس بعد كده بقت خروجاتي معاه اننا نروح مستشفي مشكلة ف ضهره معنديش اعتراض اني اقف جمبه وبهتم بيه وبقوله نروح المستشفي نطمن و عمره ما راح المستشفي الا وانا معاه ورجلي ع رجله بس حاجات كتير اتغيرت اسلوبه اتغير
مبقاش بيجيب شيكولاتة ولا هدايا وبقه بيقولي احنا هنشارك بعض في الفلوس والحياة الي داخلين عليها دي هنبقي فيها سوا يعني ايدينا ف ايد بعض هو يقصد مادياً في البيت ان حتي لما نجوز وبعد ٣ سنين اجيب معاه شقة التمليك اساعده في شراءها وغالبا في حسبتي للموضوع انا الي هدفع اكتر منه لانه ماديا غير مقتدر وشغله مش مضمون اوي
انا احسن منه كشغل وثقافة
وبعدين لما بنزل معاه بقه يقولي انا جبت اكل ( خشي انتي بقه هاتي حاجة نشربهاا )
والكلام ده قدام الكاشير وقداام الراجل حتي محافظش ع شكله قدام الناس
بقه يقولي معاكي كام ف جيبك انا مش معايا ولا جنيه في جيبي اقوله معايا كذا يقولي نجيب بيهم اكل وممكن اقف فالمطعم فالزحمة وهو يقولي انا تعبان مش قادر انا هستناكي فالعربية عقبال ما تخلصي وسبني لوحدي واقفة ف وسط الزحمة فالمطعم
وكذا مرة يقولي معاكي ٥٠ جنيه .. معاكي ١٠٠ ج .. معاكي ٢٠ ج ؟ وانا بديله كل مرة وف كذا مرة خد مني فلوس وقالي هرجعهالك ومرجعهاش و عمل
هو حادثة قبل كده العربية اتخبطت خالص وصرف ١٠,٠٠٠ ج تصليحها وبيخاف من ابوه لانه ابوه عارف هو معاه كام فالفيزا ف لو قاله عالحدثة هيهزأه ف كان بيقولي معاكي ١٠,٠٠٠ ج سلف وارجعهالك بعد الجواز ؟ قولتله لا. وكذا مرة يفتحلي الموضوع ده وانا مش هديله لانه بياخد فلوسي ومبيرجعهاش
وعاوزني مقولش اي حاجة لاهلي مهمة تخص مستقبلي زي مثلا ان ممكن مامته تعيش معانا في البيت ومرة حس ان بابا عرف ان مامته هتقعد معانا اختانق معايا
هو عصبي اوي و بيشتم فالناس فالشارع وهو سايق وبيسوق بطريقة ترعبني وتخوفني
غير ان عصبيته بتخوفني اوووي ببقي قاعدة جمبه خايفة يضربني لانه كذا مرة عملها وفي مرة كان جايب ازاة ماية انا مشوفتهاش وكنت عطشانة ف قولتله انا عطشانة قام اتعصب كده وقالي امال ازازة الماية دي ايه قام داس بيا علي زوري كده جامد من ناحية غطاها وانا عيطت وغير كده انا بجد بخاف منه اوي احسن اقول حاجة تضايقه لانه عصبي اوي وبيزعل عالتفاهات وممكن يكبر مواصيع ملهاش وجود اصلا
ويوم خطوبتنا كان بيقولي هعملك مفاجاة حلوة ،، بعد ما خلصنا الخطوبة فاليوم ده قالي عازمك علي مركبة عالنيل وفعلا انبسطت واتصورنا وكده بعد ما طلعنا من المركب قالي معاكي ٢٥٠ جنيه؟ قولتله لا ليه قالي عشان تشاركيني احنا المفروض نشارك بعض قولتله هي دي كده المفاجاة؟!! وانا كنت لسه هعيط قام قالي هدخل الحمام وهرب
انا اتضايقت ان ازاي راجل ياخد من وحده فلوس كده وكذا مرة وهل كده بيحس انه راجل لما يعمل كده؟ وانا شفته وحش اوي ان هو بيستغلني
انا بقيت بعمل الف حساب قبل ما اقول كلام احسن اتعامل بطبيعتي واغلط واضايقه لان بيتعصب و يوجعني اووووي بكلامه كلامه عامل زي وجع فالبطن مش عارف تخلص منه ده اللي بيحصل في مود خناق وانا مش بيبقي قصدي اصلا بس هو ظالم اوووي
انا عندي سوال هو طبيعي اللي بيحصل؟من غير ما تتريقوا عليا ارجوكم انا مخنوقة
هل طبيعي ان الست تجيب مع الراجل الشقة؟ هل الاصول اللي متعودين عليها اتغيرت ؟ ولا انا ظلماه
انا عاوزه اسيبه وخايفة يأذيني لانه انسان مؤذي وعصبي
بيقولي انتي ليا انا بس ومحدش هيتجوزك ولو متجوزتكيش هخليكي تبوري
حد يقولي حل ارجوكم اسيبه ازاي انا كمان مش بسهوله بقدر اسيب حد ف عاوزة اتجرأ
حد يقولي اعمل اي

27/09/2021

هل فرق ١٢ سنة في جواز فرق كبير جدا وياريت الاجابة تكون واقعية وعن تجربة