19/08/2024
متأخر بس في وقته .. د.مجدى اسحق
"الذي يعطي المطر .. المتأخر في وقته"( ارميا ٥: ٢٤)
رائعة من روائع كلمة الله ..
مطر أو استجابة أو خير متأخر وفي نفس الوقت "في وقته" ..
حل مشكلتهم بتتأخر و تتأخر قوي : رزق أو شغل أو جواز أو نسل ، أو هجرة..
و السر هنا في كلمة "يعطي" ..
"العاطي" الأعظم عارف بيدي "ايه" و "لمين" و "امتي" ..
التأخير مش معناه انه نسيك ، معناه انه "عارف" كويس قوي هو بيعمل ايه ..
فيه مرات يديك "قبل ما تطلب" او "وقت ما تطلب" و ده "المطر المبكر" .. لانه عارف ان ده مناسب جدا لخيرك و للخطة المُحكمة لحياتك ..
و فيه مرات "اكتر بكتير" ربنا بيأخر المطر .. اصل فيه ناس "البدري" ليهم مضر جدا ، و الحاجة لو جتلهم تلهيهم عن الاهم : ابديتهم ، توبتهم ، عبادتهم، خدمتهم ، عيلتهم ..
في التأخير فيه بركات بتحصلك و انت "منتظر " ..
موسي ربنا اتأخر عليه سنين لغاية لما أعده للخدمة و الارسالية ، و علمه يتكل عليه مش علي علمه ، و في صحراء سينا الجميلة دربه علي الصبر و رعاية الغنم ليصبح قادر علي رعاية الشعب ، و في الاخر اداله "المطر المتأخر " ..
داود برضه اخره سنين عن الوصول للعرش، و أثناء كده علمه الصبر و الشكر و التسبيح و غير من صفاته ليكون قائد حكيم ، و بعد كده اداله "المطر المتأخر" ..
المطر المتأخر بيتأخر بس في نظرنا ، لكن في نظر الله محسوب بدقة، وبيجي في وقته بفرح كبير و بوفرة ، و بعوضلك سنين الانتظار و الجفاف ، و بيجيب معاه اللي طلبته و اللي ما طلبتوش أصلا من خير و صلاح و فضيلة و توبة و اعداد للسماء ..
لو ميعاد مطرك لسه ما جاش ، انتظره ، و ح ربنا ح يديك معاه "فوق ما تطلب أو تفتكر " (افسس ٣ : ٢٠) ..
