و جادلهم, Nasr City, Cairo (2026)

17/08/2020

الحلقة العاشرة من سلسلة :
الأدلة العقلية على العقيدة الإسلامية
10- دقة الصنع الإلهي للكون ، و صفة العلم

الحلقات اللي فاتت كانت غنية بالتفاصيل ، اتكلمنا عن ضرورة وجود إله خالق لهذا الكون ، و اتكلمنا عن أدلة العقل اللى بتخلينا نعرف صفات الإله ، من ضرورة وجود الإله ، و صفاته أنه قديم أزلي قبل الزمان و المكان ، إله مريد ، إله قادر ، رب السموات و الأرض ، رب العالمين .

كل حاجة في الكون بتدلنا على الإله ، بتدلنا على صفاته
عرفنا من تنوع المخلوقات إنه قادر على كل شيء
عرفنا من تنوع المخلوقات إنه إله مريد

و النهاردة هنشوف التفاصيل و معانيها ، هنشوف دقة الكون ، كل حاجة ليها مقدار محدد ( وَكُلُّ شَيْءٍ عِندَهُ بِمِقْدَارٍ ) ، كان ممكن إن الأرض تدور حول الشمس بطريقة مختلفة تخلي الشمس ظاهرة على الكرة الأرضية طول السنة و نص الأرض مظلم على طول ، زي ما احنا بنشوف وجه واحد للقمر على طول و مكنش هيحصل أي تغيير في حركة الكون ( قُلْ أَرَأَيْتُمْ إِن جَعَلَ اللَّهُ عَلَيْكُمُ اللَّيْلَ سَرْمَدًا إِلَىٰ يَوْمِ الْقِيَامَةِ مَنْ إِلَٰهٌ غَيْرُ اللَّهِ يَأْتِيكُم بِضِيَاءٍ ) ، دقة التفاصيل في كل شيء ، لو اختلفت بعض القوانين مكنش الوجود ده ظهر ، مكنش بقى فيه أرض و لا شمس و لا قمر .
المقادير في الكون محسوبة و مضبوطة ، لدرجة إن المجتمع العلمي بدأ يبقى فيه نقاشات عن مسمى الضبط الدقيق للكون .
الضبط ده و دقة الصنع دي اللى بتعرفنا إن من صفات الإله العلم
إله عليم ، علمه كامل ، مش بيفوت تفصيله ( وَمَا تَسْقُطُ مِن وَرَقَةٍ إِلَّا يَعْلَمُهَا وَلَا حَبَّةٍ فِي ظُلُمَاتِ الْأَرْضِ وَلَا رَطْبٍ وَلَا يَابِسٍ إِلَّا فِي كِتَابٍ مُّبِينٍ ) .
هذا الإتقان الغريب في خلق الكون لا يصدر إلا من إله عليم
( صُنْعَ اللَّهِ الَّذِي أَتْقَنَ كُلَّ شَيْءٍ )

الصفات دي كلها زي القدرة ، الإرادة ، العلم ، عشان تكون صفات صحيحة و سليمة ، لازم يكون المتصف بيها حيّ ، فهو إله حي ، ( اللَّهُ لَا إِلَهَ إِلَّا هُوَ الْحَيُّ الْقَيُّومُ ) .

الله ، إله حي ، مش مجرد مفهوم ، إله له وجود حقيقي
الله ، إله أول قديم أزلي ، عليم ، مريد ، قادر
الله ، كما يقول الأزهريون
( علم على الذات الواجب الوجود المستحق لجميع المحامد )
واجب الوجود ، يعني مينفعش ميبقاش موجود ، لو هو مش موجود، الكون ده ميتخلقش ، خلق الكون دليل على وجوب وجود الإله ، إله يستحق أن يحمده الناس على مجرد إيجادهم و خلقهم ، فهو الإله الخالق
( اقْرَأْ بِاسْمِ رَبِّكَ الَّذِي خَلَقَ )

الله الذي نعبده ، ليس في مكان ، فهو خالق المكان
الله الذي نعبده ليس له زمـــــــان ، فهو خالق الزمان
الله الذي نعبده ، ليس بجسم ، له حدود في الوجود
الله الذي نعبده ( لَيْسَ كَمِثْلِهِ شَيْءٌ ۖ وَهُوَ السَّمِيعُ الْبَصِيرُ )
الله فوق كل تصور ، و كل ما تصورته في حقه سبحانه فهو وهم
الله لا يتجسد ، لأنه ترفع عن المكان و الزمان
الله سبحانه و تعالى ، لا تدركه الابصار

#وجادلهم

01- رابط الحلقة الأولى :
https://www.facebook.com/Mannered.Debate/posts/295846668426383
02- رابط الحلقة الثانية :
https://www.facebook.com/Mannered.Debate/posts/295880818422968
03- رابط الحلقة الثالثة :
https://www.facebook.com/Mannered.Debate/posts/295929768418073
04- رابط الحلقة الرابعة :
https://www.facebook.com/Mannered.Debate/posts/296291901715193
05- رابط الحلقة الخامسة :
https://www.facebook.com/Mannered.Debate/posts/296858894991827
06- رابط الحلقة السادسة :
https://www.facebook.com/Mannered.Debate/posts/297183954959321
07- رابط الحلقة السابعة :
https://www.facebook.com/Mannered.Debate/posts/301921237818926
08- رابط الحلقة الثامنة :
https://www.facebook.com/Mannered.Debate/posts/303696650974718
09- رابط الحلقة التاسعة :
https://www.facebook.com/Mannered.Debate/posts/307184603959256

09/08/2020

الحلقة التاسعة من سلسلة :
الأدلة العقلية للعقيدة الإسلامية
09- القدرة الكاملة و التامة للإله الخالق

في الحلقات السابقة وصلنا إلى نقطة إثبات ضرورة وجود ذات علوية إلهية خارجة عن المادة ، وصلنا إلى ضرورة إثبات وجود إله هو اللى خلق هذا الكون .

و إذا كان هذا الإله خارج عن الوجود المادي ، لأن الوجود المادي زي ما قلنا وجود ناقص يفتقر إلى مؤثر خارجي يحدد خواص المادة و اللوازم بتاعتها من توقيت الوجود و مكان الوجود و الحجم و المقدار و خلافه ، يبقى ايه هي الكيفية اللى أعرف بيها صفات الإله ، إذا كان هذا الإله هو إله لا نستطيع إدراكه بالحواس .
هنا هنلاقي إن في ظل هذا المفهوم ، فاحنا هنقدر نوصل إلى الصفات الأساسية للإله الخالق عن طريق النظر في مخلوقاته نفسها ، عن طريق النظر في هذا الكون .
{إِنَّ فِي خَلْقِ السَّمَاوَاتِ وَالأَرْضِ وَاخْتِلافِ اللَّيْلِ وَالنَّهَارِ لَآيَاتٍ لِّأُولِي الأَلْبَابِ}
و لما نيجي ننظر في هذا الكون هنلاقي حاجة غريبة جداً ...
هنمسك مثلا حاجة واحدة من الكون ده ، زي الشمس
هنلاقي إن في شموس كتير جداً بصفات مختلفة جداً
مثلاً في شمس كبيرة و شمس صغيرة
يبقى الإله قادر إنه يخلق الشمس و يخلي حجمها كبير
و قادر برضــه إنه يخلق الشمس و يخلي حجمها صغير
يبقى قدرة الإله قــــدرة تامة ، يقدر يخلق بيها أي حاجة
طيب ليه ربنا خلق الشمس دي كبيرة و خلق الشمس دي صغيرة !!!!
فيظهر عندنا صفة جديدة للإله ، و هو صفة الإرادة .
إن ربنا أراد أنه بقدرته يخلي دي كدة و يخلي دي كدة

يبقى بالعقل و المنطق تاني ، عشان احنا شايفين إن في تنوع في الصفات بتاعة المخلوقات ، يبقى الإله يقدر يخلق أي حاجة عايزها بدليل اللى احنا شايفينه قدامنا فعلاً في الكون ، يبقى فعلاً الإله هو إله مريد .
و هنا يبقى بالعقل قدرنا نستنتج أن الإله
هو إله أزلي لا يوجد له سبب أوجده لأنه هو الأول
إله قادر له قدرة تامة ، إله مريد يفعل ما يشاء بإرادته

يبقى لما نقرأ الآيات في القرآن الكريم ندرك منطقية النص القرآني
و ندرك أن الله لم يأت بما يخالف العقل في الاستدلال
و لكن هي آيات شديدة الانضباط من جهة العقل و المنطق

زي مثلاً ( وَهُوَ عَلَىٰ كُلِّ شَيْءٍ قَدِيرٌ )
و مثلاً ( فَعَّالٌ لِّمَا يُرِيدُ )

و مازلنا حتى الآن ننظر في أدلة إثبات وجود الله ،
و نتفكر بالعقل في الصفات الواجبة للإله الخالق لهذا الكون
فنلاقي إن احنا معندناش غير إن احنا نتفكر في الكون ده كله
السماء و الأرض و المخلوقات كلها ، عشان نوصل لصفات الإله
فنلاقي الله سبحانه و تعالى في القرآن الكريم يقولنا
( اللَّهُ الَّذِي خَلَقَ سَبْعَ سَمَاوَاتٍ وَمِنَ الْأَرْضِ مِثْلَهُنَّ
يَتَنَزَّلُ الْأَمْرُ بَيْنَهُنَّ لِتَعْلَمُوا ... )
فالغرض الحقيقى من الخلق هو المعرفة
و لا توجد معرفة أسمى من معرفة الإله الخالق

#وجادلهم

01- رابط الحلقة الأولى :
https://www.facebook.com/Mannered.Debate/posts/295846668426383
02- رابط الحلقة الثانية :
https://www.facebook.com/Mannered.Debate/posts/295880818422968
03- رابط الحلقة الثالثة :
https://www.facebook.com/Mannered.Debate/posts/295929768418073
04- رابط الحلقة الرابعة :
https://www.facebook.com/Mannered.Debate/posts/296291901715193
05- رابط الحلقة الخامسة :
https://www.facebook.com/Mannered.Debate/posts/296858894991827
06- رابط الحلقة السادسة :
https://www.facebook.com/Mannered.Debate/posts/297183954959321
07- رابط الحلقة السابعة :
https://www.facebook.com/Mannered.Debate/posts/301921237818926
08- رابط الحلقة الثامنة :
https://www.facebook.com/Mannered.Debate/posts/303696650974718

05/08/2020

الحلقة الثامنة من سلسلة :
الأدلة العقلية للعقيدة الإسلامية
08- المادة الأولية أم أولية الله سبحانه و تعالى

الحلقة السابقة تكلمنا عن أن المادة الأولية مفتقرة إلى الله سبحانه و تعالى ، و أن المادة لا يمكن أن يتكون منها الكون بدون تدخل إله خالق

و لكن قد يحتاج الأمر إلى أكثر من مجرد مثال واحد ...
ففي ظل العقل المادي اللي غلب على فكر كتير من الشباب دلوقتي ، أصبح رفض فكرة وجود الإله أسهل من الاقتناع باحتياج المادة إلى إله يخلقها
و هنا أعتقد من المناسب إن احنا نتعمق أكتر في مفهوم المادة و ايه حقيقة سبب احتياجها في وجودها إلى إله خالق .

كان في زمان اسكتش كوميدي لثلاثي أضواء المسرح بيغنوا فيه أغنية ( لو كانوا سألونا قبل ما يولدونا عارفين كنا نقول ايه ) 😊 الأغنية دي بتبسط الموضوع جداً.

أنت ملكش يد في انك اتولدت في الزمن ده ، ده أمر خارج عن إرادتك ، ممكن كنت تتولد سنة قبلها ، او سنة بعدها ، ممكن كمان كنت تتولد في مصر أو في السعودية ، ممكن كمان كنت تتولد و وزنك 2 كيلو أو أكتر أو أقل ، الحاجات دي انت ملكش يد فيها ، حاجات سببها خارج عنك سببها حد تاني .

لو احنا بصينا للمادة هتلاقي نفس الكلام ، ناخد مثال مثلاً حجر أو طوبة ، الطوبة دي ممكن تكون أكبر من الحجم بتاعها أو أصغر ، ممكن تتكون في المكان ده أو في مكان تاني ، ممكن يبقى وزنها تقيل أو وزنها خفيف.

المادة ما دام تقبل انها تبقى كبيرة أو صغيرة ، يبقى في سبب برة المادة دي أدى إلى تكوينها بالشكل ده ، يبقى في حاجة براها أثرت عليها في تكوينها فتبقي هي مش موجودة من الأزل ، لأ دي مخلوقة نتيجة افتقارها في تكوينها إلى مؤثر سابق عليها في الوجود .

و ده علماء المسلمين يسموها الممكنات ، يعني ممكن تبقى كدة و ممكن تبقى كدة ، و دول زي الوجود و العدم و الصفات ، و المكان و الزمان و الجهات و المقادير .

ففي قصة سيدنا إبراهيم عليه السلام لما نظر إلى السماء و تفكر في حجة لإقناع قومه و توضيح فساد تفكيرهم نظر في السماء و قعد ينظر للكون ، فشاف كوكب فقال خلاص نعتبره إله ، و له فوائد ممكن نعرف بيه الاتجاهات مثلاً ، فلما أفل ، يعني اختفى كأنه أصبح عدم بعد ما كان ظاهر و تغير مكانه و زمانه ، قال لا أحب الآفلين ، و بعدين شاف القمر ، فطبق عليه نفس الفكرة ، فلقاه برضه أفل و غاب عن النظر مع أن القمر أشد إضاءة من الكواكب بالنسبة لينا ، و ليه فوائد أكتر بالنسبة للناس، أقل حاجة انه بيزيل عنهم الظلمة بتاعة الليل ، فلما الشمس طلعت ، قال هذا ربي ، هذا أكبر ، فبدأ ينظر للمقادير ، الحجم و الكتلة ، فلقاها برضه غابت ، فلما وجد أن الكل بيغيب يعني ظهوره و غيابه و فوائده للناس محدودة بزمان بيتغير عليه ، و مكان بيظهر فيه ، عرف إن الكل خاضع لمؤثرات تانية ، فقال إني وجهت وجهي للذي فطر السموات و الأرض ، فنظر إلى الخالق اللي خلق المواد دي و جعل فيها الفوائد دي للناس ، و أظهرها ليهم في وقت و أخفاها عنهم في وقت ، عرف سيدنا إبراهيم إن المواد دي مفتقرة في وجودها إلى مؤثر خارجي ، فوجه نظره إلى فاطر السموات و الأرض ، أي الذي بدأ خلقها و خصصها بصفات وجودها .

و عشان كدة لو نظرنا إلى المادة اللى هنعتبرها أول مادة في الكون ، هنلاقي برضه إنها زي أي مادة ، مفتقرة في خصائص وجودها إلى إله خالق يحدد صفاتها و زمان اللى هيبتدي فيه وجودها و المكان اللى هتظهر فيه .

إله خارج نطاق المادة و الأجسام ، إله هو الأول ، إله هو الخالق
إله ليس كمثله شيء

#وجادلهم

01- رابط الحلقة الأولى :
https://www.facebook.com/Mannered.Debate/posts/295846668426383
02- رابط الحلقة الثانية :
https://www.facebook.com/Mannered.Debate/posts/295880818422968
03- رابط الحلقة الثالثة :
https://www.facebook.com/Mannered.Debate/posts/295929768418073
04- رابط الحلقة الرابعة :
https://www.facebook.com/Mannered.Debate/posts/296291901715193
05- رابط الحلقة الخامسة :
https://www.facebook.com/Mannered.Debate/posts/296858894991827
06- رابط الحلقة السادسة :
https://www.facebook.com/Mannered.Debate/posts/297183954959321
07- رابط الحلقة السابعة :
https://www.facebook.com/Mannered.Debate/posts/301921237818926

02/08/2020

الحلقة السابعة من سلسلة :
الأدلة العقلية للعقيدة الإسلامية
07- لماذا نقول أن السبب الأول للخلق هو الله ، و ليست مادة أولية

اتكلمنا في الحلقات السابقة في إثبات نقطة محددة
و هي ضرورة وجود بداية لهذا الكون
و لكن هنا نجد البعض يتساءل ، ليه بتقولوا أن الله هو المبديء لهذا الكون ، و ليه بتقولوا أن الله هو الخالق ، لماذا لا يكون بداية الكون هي مادة أولية تكون منها هذا الكون الواسع .

هل لو قلنا أن وجود كيان علوي مفكر هو اللي خلق الكون يبقى تعقيد للمسألة ، ما الموضوع بسيط ، مادة أولية اتكون منها الكون الواسع ده كله ، ليه بتعقدوا الدنيا !!!

الحقيقة إن ده مش تعقيد ، الحقيقة إن ديه الحقيقة :)
و ده بيفكرنا بواحد شاف عربية متفيمة مش شايفين حاجة جواها
ماشية في الشارع و بعدين لقيناها حودت يمين
فاحنا بنقوله في واحد بيسوق العربية و حود يمين عشان عايز يروح يزور حد يعرفه مثلاً ، يقولك ليه بتعقد الدنيا ، العجل بتاع العربية ماشي لأن موتور العربية شغال و و الفتيس موصل حركة الموتور للعجل ، و العربية حودت يمين لأن العجل مرتبط بدريكسيون العربية ، و في قوة دافعة دفعت الدريكسيون للاستدارة حولين المحور بتاعه فأثر على دوران العجل فالعربية حودت :)
انت بتضحك ، لأ ده الغريب إنه هيفضل يجيب في أبحاث علمية عن ارتباط عجل العربية بالدريكسيون و إن في استدار الدريسكيون هي السبب في إن العربية تحود ، و لما تقوله ايه سبب ظهور القوة دي ، هيقولك مازلنا بنبحث ، و مش معنى إن احنا موصلناش لسبب القوة الخارجية دي إن في كيان عاقل ذكي مفكر وراء هذ الحدث و هو إن العربية حودت يمين .

الموضوع مش تعقيد ، الموضوع بسيط جداً
هل لو قلنا إن في مادة أولية اتكون منها الكون
هل ده كافي في تفسير وجود الكون ده و لا لأ ؟!!!
الحقيقة إن المادة ليها طبيعة خاصة نقدر ندرسها و نشوف الخصائص بتاعتها ، عن طريق الخصائص دي اكتشفنا حاجة مهمة جداً .
اكتشفنا إن أي مادة تشغل حيز في الفراغ لا تكون على حاجة من اتنين
إما أنها مبتتحركش ، أو إنها بتتحرك
نركز شوية .... شكلها بتوسع مننا مش كدة :)
حاجة بسيطة أهو ، هنتكلم عن حركة المادة
هل المادة الأولية دي اللي احنا بنقول اتخلق منها الكون كله
و اللى هي المفروض السبب الأول لبداية خلق الكون
هل هل كانت ثابتة في مكانها ، و لا كانت بتتحرك ؟!!!
ايه يا عم ، احنا بنتوه منك كدة .....
طيب نبسط الدنيا شوية ، الحركة دي يعني انتقال من مكان لمكان
لو مفيش انتقال من مكان لمكان و مستقرة في مكان واحد
يبقى ده اسمه سكون ...
يبقى طبيعي إن الحركة لازم يكون ليها بداية كانت في مكان و انتقلت لمكان تاني ، و ليه بنقول لازم ليها بداية ، آه إنت كدة لازم تراجع الحلقات اللى فاتت و إننا أثبتنا إن مفيش حاجة اسمها لانهائية
طيب لو المادة دي أصلها إنها كانت ثابتة ، يبقى ايه اللى حركها ؟!!!!
لازم حاجة هي اللى حركتها ،
يبقى مش هي السبب الأول في الوجود :) لأنها هي كمان محتاجة مؤثر
و لو كانت متحركة مينفعش تكون متحركة على طول ، لازم تكون بدأت ساكنة برضه و حاجة حركتها ، يبقى في كل الأحوال ، مينفعش نقول إن المادة الأولية نتج عنها شيء لوحدها كدة ، لازم يكون معاها مؤثر خارجي

و من هنا الفلاسفة القدماء ، كانوا بيقولوا إن الإله هو المحرك الأول
و اتكلم عن هذا المبدأ علماء الفلسفة الإسلامية ، في إثبات إن المادة دايماً في افتقار للإله عشان الوجود ده يتكون و يظهر

ييجي حد يقول ، يا عم سيبك من الكلام ده ،
هي المادة دي اتحركت من نفسها ، ايه رأيك ؟!!!

و هنا هنقوله لو اتحركت من نفسها ، يعني هي اللي حبت إنها تتحرك
يبقى انت بدأت تتكلم عن الإرادة و المشيئة ،
يبقى مينفعش نتكلم على مادة أصلاً
يبقى لازم تنقل الكلام على وجود إله مريد ، هو الخالق لهذا الكون
إله هو المبديء ، إله هو الخالق ، إله هو الأول

#وجالدهم

رابط الحلقة الأولى :
https://www.facebook.com/Mannered.Debate/posts/295846668426383
رابط الحلقة الثانية :
https://www.facebook.com/Mannered.Debate/posts/295880818422968
رابط الحلقة الثالثة :
https://www.facebook.com/Mannered.Debate/posts/295929768418073
رابط الحلقة الرابعة :
https://www.facebook.com/Mannered.Debate/posts/296291901715193
رابط الحلقة الخامسة :
https://www.facebook.com/Mannered.Debate/posts/296858894991827
رابط الحلقة السادسة :
https://www.facebook.com/Mannered.Debate/posts/297183954959321

30/07/2020

تتقدم صفحة وجادلهم بأطيب التهاني
لكافة متابعين الصفحة و للأمة الإسلامية كلها
بمناسبة حلول عيد الأضحى المبارك 🐑
و تتمنى لكم عاماً سعيداً و عقيدة صحيحة
#وجادلهم

26/07/2020

الحلقة السادسة من سلسلة :
الأدلة العقلية على العقيدة الإسلامية
06- مفاهيم الزمن و تطورها عبر القرون

الحلقة دي عايزة انك تكون مركز شويتين :)
اتكلمنا الحلقة اللى فاتت شوية عن الاستدلال العقلي
و بعض النصوص المرتبطة بيه من القرآن الكريم
هنتكلم النهاردة في بعض المفاهيم العلمية و العقلية تاني ،
و تحديداً عن مفهوم الزمن

الزمن كان دايماً العلماء بتوع الفيزياء بيبصوا ليه على أنه ماشي في اتجاه واحد بوتيرة واحدة ،
يعني الثواني قد بعضها ، الثانية دي قد الثانية اللى بعدها و و دايماً ماشي لقدام يعني متعرفش ترجع بالزمن لوراء
و ده غير بقية مفاهيم الفيزياء ، زي مثلا الطول و العرض و الارتفاع تقدر تروح لقدام و ترجع لوراء ، تمشي يمين و تمشي شمال و تطلع فوق و تنزل تحت :) تقدر تخلي المياه تسخن بالحرارة و بعدين تخليها تتجمد و تسحب منها الحرارة ،
لكن الزمن عكس كل ده على طول ماشيء لقدام ،
الثانية اللى بتعدي متعرفش تعيدها تاني ....
و ده كان المفهوم أيام نيوتن للزمن ،
و هنتكلم على نيوتن باعتباره اكتشف و شرح مفهوم الجاذبية زمان ،
و اللى مشهور عنه قصة التفاحة اللى وقعت من الشجرة فاكتشف الجاذبية :)
نيوتن كان عنده تصور للجاذبية إن الأرض بتشد التفاحة لتحت ،
فالأرض شدت التفاحة عشان تقع ، أو تحديداً أن الأرض و التفاحة انجذبوا لبعض ، ده مفهوم الفيزياء القديم ، لحد ما جه أينشتاين

حد هيقوللي ايه يا عم الكلام ده كله ،
مالنا احنا و مال الفيزياء و الجاذبية و نيوتن و أينشتاين
احنا بنتكلم على الاعتقاد ، بنتكلم على وجود ربنا سبحانه و تعالى
مالنا و مال الكلام ده !!!
و بعدين هو احنا يعني هنفهم فيزياء ، دي فيزياء يا عم ، ليها ناسها
لأ مهو مش شرط انك تفهم معادلات و رموز ، لكن الكلام اللى هنقوله هنا
هيخليك مصحصح للكلام اللى بيترمي ليك من معتنقي الإلحاد باسم العلم الحديث
كلام هم نفسهم يمكن مش فاهمينه أوي ،
بس ممكن يلخبطك لو معندكش الأسس السليمة

نرجع تاني نتكلم ، زي ما قلنا نيوتن كان فاكر إن الأرض هي اللى بتشد التفاحة لتحت ، لكن أينشتاين لما بدأ يفكر في مفهوم الجاذبية ،
اكتشف حاجة تانية خالص
اكتشف إن الكون ده مفيهوش فراغات و إن الفضاء الأسود ده عبارة عن مكان حقيقي بيتكون من جسيمات
الجسيمات دي بتتشابك مع بعضها عشان تعمل حاجة زي النسيج ،
كأنها قماشة سوداء
و القماشة دي لما بيبقى فيها كتلة كبيرة زي الشمس بتضغط على الحاجات اللى جواها ، فالجاذبية مش نتيجة إن الأرض بتشدك لتحت ،
لأ اتضح النسيج الكوني ده هو اللي بيضغط عليك من فوق :)
أو عشان نكون ادق و مننجرفش وراء التبسيط الشديد للعلوم
أن الانحناءات دي في النسيج الزمكاني بتعمل دوران كدة بيخليك تتزحلق جواه :)
ايه الكلام ده الغريب ده ، و لكن ده مش موضوعنا ممكن تبقى تدور عليه بعدين على جوجل ، الللى يهمنا هنا إن اينشتاين اتكلم على النسيج ده إنه عبارة عن تداخل بين الزمان و المكان .
حاجة جديدة سماها نسيج الزمكان Spacetime Fabric
و ان زي ما الانحناءات دي بتبقي في المكان كمان بتبقي في الزمان ،
فالزمان نسبي مش ماشي بوتيرة واحدة
ساعات تبقى الثانية أسرع من الثانية اللى قبلها و ساعات العكس
و على حسب الاتجاه اللى انت ماشي فيه و السرعة اللى انت ماشي بيها الزمن بيتغير
و الدنيا اتقلبت و مقعدتش ،
بقى في حاجة اسمها الفيزياء الحديثة
غير الفيزياء بتاعة نيوتن

طيب ايه علاقة ده بالعقيدة الإسلامية
العلاقة إن العلماء بيبحثوا دلوقت عن بداية الكون
و ايه اللى حصل عشان الكون ده يتكون
و قدروا يوصلوا لحوالي 3 ثواني بعد الانفجار الكبير ،
و بعدين بدأوا يحطوا نطريات عن اللى قبل كدة
لحد ما جه عالم من كام سنة و قال انه اكتشف حاجة جديدة
اكتشف إن في مرحلة قبل الانفجار الكبير
مرحلة كل الكون ده كان نقطة ، مرحلة الـ Singularity
مرحلة مفيهاش زمن ، مرحلة بدون بداية !!!

و هنا بيجي الملحدين يقولوا اهو شفتوا
العلماء بيقولول مفيش بداية للكون .

و هنا لازم احنا نفهم العلماء دول بيفكروا ازاي ...
مرحلة الsingularity اللى بيبحثوا عنها دي
بتعني أنها قبل تكون النسيج الكوني اللى اتكون مع الانفجار الكبير،
و معنى كدة إن فيه مرحلة النسيج المتداخل بين الزمان و المكان مكنش فيها موجود لسة ، يعني مفيش زمان في الكون و لا مكان ، مرحلة مفيهاش زمن !!!
و مادام مفيهاش زمان يبقى الكون ملوش بداية ،
لأن البداية دي أساسها الزمان !!!

و هنا نقولهم لأ اقف عندك شوية ...
انتوا كدة بتقولوا أن مفيش زمن بمفهوم أينشتاين
مش معني كدة إن مفيش زمن على الإطلاق
المعنى إن الزمان الفيزيائي بتعريفه في الفيزياء الحديثة مش موجود
لكن ده مش معناه إن التصور ايام نويتن عن الزمن مش موجود
لكن هم ميقدروش يقولوا كدة ،
لأنك لو رجعت لمفهوم نيوتن عن الزمن هتبقي فيزيائي رجعي :)

و ده اللى بيروج ليه أهل الإلحاد في مناظراتهم دلوقت ،
إن كان في مرحلة الsingularity
أو مرحلة النقطة دي ، مفيش زمن ، يبقى الكون ملوش بداية ،
و بالتالي مفيش إله خالق للكون ،
مفيش إله مبديء للكون ، مفيش إله هو الأول

و هنا هنقول لأ ، المفروض مفيش زمان بالتعريف الفيزيائي الحديث
شفت بقى كل اللى فات ده عشان ايه .... عشان الجملة دي :)
مفيش زمن بالتعريف الحديث بتاع أينشتاين
لكن انت متعرفش إذا كان في زمن بتعريف فيزيائي تاني ممكن توصله بعدين ، لأنك لسة بتبحث ، لسة موصلتش لمعلومة أكيدة
ممكن يكون في زمن بس بقوانين مختلفة لسة متعرفهاش ،
أو على الأقل الزمن هيفضل موجود بمفهوم نيوتن للفيزياء
و مادام انت متعرفش ، يبقى متنكرش
عقائد المسلمين متوافقة مع العقل و المنطق
و هيفضل رد كل مسلم لما يتقاله مفيش بداية
هيقولك الله سبحانه و تعالى هو الأول الخالق المبديء

يا رب نكون كدة وضحنا التلاعب في النقطة دي
و منكونش لخبطناكم زيادة و لكن حاولنا نبسط المعلومة على قد ما نقدر

و إلى لقاء في الحلقة القادمة إن شاء الله

#وجادلهم

رابط الحلقة الأولى :
https://www.facebook.com/Mannered.Debate/posts/295846668426383
رابط الحلقة الثانية :
https://www.facebook.com/Mannered.Debate/posts/295880818422968
رابط الحلقة الثالثة :
https://www.facebook.com/Mannered.Debate/posts/295929768418073
رابط الحلقة الرابعة :
https://www.facebook.com/Mannered.Debate/posts/296291901715193
رابط الحلقة الخامسة :
https://www.facebook.com/Mannered.Debate/posts/296858894991827

26/07/2020

الحلقة الخامسة من سلسلة :
الأدلة العقلية على العقيدة الإسلامية
05- تطبيق الاستدلال العقلي على النص القرآني

اتكلمنا كتير في الحلقات اللى فاتت عن العقل و الاستدلال
و حسيت إن الموضوع اتحول لفلسفة أكتر منها بحث في العقيدة الإسلامية
طيب ممكن نريح شوية من سيل الأفكار العقلية دي و نربطها بالعقيدة الإسلامية من القرآن ، عشان نخلي مخنا يهدى شوية و بعدين نكمل تاني المناوشات العقلية دي ..... ماشي

طيب صلوا على النبي
اللهم صلى و سلّم و بارك على سيدنا محمد و على آل سيدنا محمد

ربنا سبحانه و تعالى أول ما أنزل من القرآن كان قوله تعالى
﴿ اقْرَأْ بِاسْمِ رَبِّكَ الَّذِي خَلَق ) الآية 1 سورة العَلَق
يعني ربنا سبحانه و تعالى قال لينا من البداية أنه هو الخالق لهذا الكون ، فده معناه إن أول إثبات عقلي مفتاحه التأمل في الخلق ده ، و إننا نعرف إن الكون ده فعلاً اتخلق ، يعني إن الكون كان ليه بداية ، و ده اللى اتكلمنا فيه الحلقات اللى فاتت .
طيب إحنا عرفنا منين إن الكون ليه بداية ، أول حاجة لقينا إن فيه أسباب لوجود اي شيء في الكون ، يعني ناخد مثلاً طوبة ، الطوبة دي عبارة عن ترسبات من المعادن عملت في الآخر شكل الطوبة دي ، و المعادن تكون نتيجة تفاعل ذرات و الذرات تكونت تفاعلات تانية و هكذا ، و دي اسمها السببية

ربنا سبحانه و تعالى بيقولنا في القرآن في آية جميلة جداً
( أَمْ خُلِقُوا مِنْ غَيْرِ شَيْءٍ ) الآية 35 سورة الطور
يعني هل انتم اتخلقتم بدون منظومة الأسباب دي ، هل البني آدمين بيظهروا فجأة من الفراغ كدة ، و لا بيبقي ليهم أب و أم ولدوهم و جدود و هكذا ، يبقى لازم في أسباب بتسلم بعضها
و بعدين ربنا سبحانه و تعالى يقول إن الأسباب دي مش أسباب لانهائية ولا حاجة ، دي بيتم إحصائها و عدها و ده بينه ربنا سبحانه و تعالى في قوله
( وَكُلَّ شَيْءٍ أحْصَيْنَاهُ فِي إِمَامٍ مُبِينٍ ) الآية 12 سورة يس
و حتى لو قلت إن أي شيء في الكون بيحصل نتيجة منظومة متكاملة من الأسباب مش سبب واحد ، و ان معرفة السبب الحقيقي صعب انه تحصره فتلاقي ربنا سبحانه و تعالى بيقول
( وَمَا تَسْقُطُ مِن وَرَقَةٍ إِلَّا يَعْلَمُهَا وَلَا حَبَّةٍ فِي ظُلُمَاتِ الْأَرْضِ وَلَا رَطْبٍ وَلَا يَابِسٍ إِلَّا فِي كِتَابٍ مُّبِينٍ ) الآية 59 سورة الأنعام

يبقى الكلام إن في سببية ، و إن سلسلة السببية دي ليها آخر ،
مش ممتدة إلى مالانهاية .

فنيجي نقرأ القرآن نلاقي ربنا سبحانه و تعالى بيقول
( قُلْ سِيرُوا فِي الْأَرْضِ فَانظُرُوا كَيْفَ بَدَأَ الْخَلْقَ ) الآية 20 سورة العنكبوت
يعني إشارة صريحة و واضحة إن في بداية للخلق
ده مش بس كدة ، ده ربنا سبحانه و تعالى علمنا أسماءه الحسنى
و الأسماء الحسني دي حكاية تانية لو فكرت فيها هتلاقي علوم غريبة جداً
و من أسماء الله الحسنى : الأول :)
و من أسماء الله الحسنى : المبديء :)
و من أسماء الله الحسنى : الخالق :)
لما تبص للأسماء دي و تفكر فيها هتلاقي إنها كدة لا تتضمن أي إشارة مخالفة للعقل على الإطلاق ، هتلاقي الأسماء دي منضبطة جداً مع المنطق و الاستدلال العقلي ، هتلاقي منطق القرآن بدأ يظهر ليك
لو انت قلت أنا مؤمن ان الكون ده عمره لانهائي ، يبقى انت مش باصص لاسم الله الأول ، لو قلت إن الكون ده أزلي ، يبقى انت مش باصص لاسم الله المبديء ، لو قلت إن الكون ده أنتجته الطبيعة بدون حتى تدخل إلهي ، يبقى انت مش باصص لاسم الله الخالق .

سيدنا محمد صلى الله عليه و سلّم في حديث شريف بيقول ( لاَ يَزَالُ النَّاسُ يَتَسَاءَلُونَ حَتَّى يُقَالَ: هذَا، خَلَقَ الله الْخَلْقَ، فَمَنْ خَلَقَ اللّهِ؟ فَمَنْ وَجَدَ مِنْ ذلِكَ شَيْئا فَلْيَقُلْ: آمَنْتُ بِاللّهِ ) و في رواية تانية ( يَأْتِي الشَّيْطَانُ أَحَدَكُمْ فَيَقُولُ: مَنْ خَلَقَ كَذَا وَكَذَا؟ حَتَّى يَقُولَ لَهُ: مَنْ خَلَقَ رَبَّكَ؟ فَإِذَا بَلَغَ ذلِكَ فَلْيَسْتَعِذْ بِالله وَلِيَنْتَهِ )
كون سيدنا محمد ﷺ وجهنا و قال فليستعذ بالله و لينته ، ده مش معناه إن احنا عندنا نهي من الكلام عن مين اللى خلق ربنا ، و إن الكلام في كدة منطقة محرمة في الدين ، لأ خالص ، ده معناه أن سيدنا محمد ﷺ بيقول لينا حدود الاستدلال المنطقي ، إذا وصلت إلى الله سبحانه و تعالى فلتنته لأن الله هو الأول ، مفيش أصلا شيء قبله ، لو انت حاولت يبقى انت بتلخبط نفسك و تدور على وهم ، و الشيطان بيلعب بيك ، و استدرجك بره منظومة العقل و المنطق ، لأن ربنا هو الأول ، هو البداية .
و من أدعية سيدنا محمد صلى الله عليه و سلّم
( اللهمَّ أنتَ الأولُ فليسَ قبلكَ شيءٌ )

اللهم أنت الأول ، اللهم أنت الخالق ، اللهم أنت المبديء
لا إله إلا أنت

#وجادلهم

رابط الحلقة الأولى :
https://www.facebook.com/108271570517228/posts/295846668426383/
رابط الحلقة الثانية :
https://www.facebook.com/Mannered.Debate/posts/295880818422968
رابط الحلقة الثالثة :
https://www.facebook.com/Mannered.Debate/posts/295929768418073
رابط الحلقة الرابعة :
https://www.facebook.com/Mannered.Debate/posts/296291901715193

25/07/2020

الحلقة الرابعة من سلسة :
الأدلة العقلية على العقيدة الإسلامية
04- تابع مفهوم اللانهائية

الحلقة اللى فاتت تعمقنا شوية في مفهوم اللانهائية ، و متهيألي الأمور وضحت شوية ، طيب هل كدة مفيش حد معترض على الكلام ده ؟!!

الحقيقة إن كان في اعتراضات ، و برضه الاعتراضات دي قبل ما العلم يتطور و يثبت صحة الاستدلال العقلي الإسلامي و منطقيته عند علماء المسلمين الأوائل ، و لكن زي ما قلنا ان احنا بنأسس للطريقة السليمة للتفكير و الاستدلال عشان متتخضش من اي سؤال أو شبهة ممكن تتقال لك عن العقيدة الإسلامية فمش هنكتفي و نقولك الكلام ده تم إثبات صحته ، احنا هنغوص في بحر العلوم العقلية دي ، الكل يصحح ، و يجهز النسكافيه :)

هنا هنتكلم عن نظرية فلسفية لواحد فيلسوف الصراحة مش عارف اسمه لكن كلامه كان غريب ، الراجل ده كان بيحاول يثبت وجود اللانهائية فعلاً مش انها مفهوم رياضي بس و ملوش وجود حقيقي ، لأ ده قعد يتفلسف عشان يثبت وجود اللانهائية ، و هنا جت في دماعه فكرة غريبة جداً ...

الراجل ده قال إحنا بنمشي أهو صح .... آه صح بنمشي و بعدين
فقال طيب خطوتك دي نفترض انها طولها متر ، ماشي ، قلنا طيب و بعدين
قال احنا هنبدأ نقسم المتر ده على 2 إلى مالانهاية ، ايه رأيكم
اذا كانت الخطوة بتاعتنا عملناها و خطينا الخطوة فعلاً اهو و احنا عارفين نقسمها إلى ما لانهاية ، يبقى الخطوة بتاعتنا دي قطعت أعداد لانهائية من الوحدات الصغننة ، و على حسب كلامكم بقى مادام احنا طول الخطوة بتاعتنا قسمناه لعدد لانهائي اهو ، يبقى إحنا المفروض نكون منقدرش نمشي و لا خطوة واحدة لأننا مش هنعرف نخلص اللانهائية زي ما انتوا بتقولوا .... ها ايه رأيكم بقى !!!!

الحقيقة إن الاعتراض ده فيه شيء منطقى ، احنا فعلاً ممكن رياضياً نفضل نقسم طول الخطوة لعدد لانهائي من عمليات القسمة الحسابية ، طيب نعمل ايه
و كان هنا رد عبقري من علماء المسلمين .... رد غريب
رد عمل جدل شديد في العقل الإنساني ،
لحد ما العلم في القرن العشرين أثبت صحة كلام المسلمين فعلاً
ردهم كان ، يبقى احنا مينفعش نعمل قسمة لانهائية على أرض الواقع ،
لأننا هنوصل لجزء لا يقبل القسمة ، الجزء الذي لا ينقسم
ايه الكلام العجيب ده !!! جزء لا ينقسم ، هو في حاجة كدة
قالوا احنا بالاستدلال العقلي نقدر نقول أن الكون ده يتكون من جسيمات صغننة لا تقبل القسمة ، و بالتالي لما انت تخطي خطوة برجلك ، يبقى انت معدتش عدد لا نهائي و لا حاجة ، انت عديت عدد كبير جداً من الجسيمات اللى لا تقبل القسمة ، الجسيمات اللي بيتكون منها هذا الكون .

و الغريب إن ده أصبح أساس في نظرية فيزياء الكم الحديثة ، أن الكون بيتكون من كميات محددة من الجسيمات اللى متقبلش القسمة و جسيمات محددة ( سموها كواركات و بوزونات و أسماء كتير للجسيمات اللى بيتكون منها الكون ) علوم معرفناهاش بالتجربة إلا في القرن الحديث ، لكن علماء المسلمين بالاستدلال العقلي اثبتوا هذا الكلام من أكتر من 1000 سنة و اتكلموا على حاجة اسمها نظرية الجوهر الفرد ، اللى هو الجزء الذي لا ينقسم

و ده يوريكم قد ايه عظمة الاستدلال العقلي و المنطقي الإسلامي ، اللى خلى حتى الكنيسة في أروربا و أمريكا يأخدوا منهج الاستدلال الإسلامي لوجود الله سبحانه و تعالى .

نكمل و لا كفاية كدة ، أصل احنا لسة مخلصناش
مخك قرب يقف شوية .....
طيب نكمل في الحلقة الجاية

#وجادلهم

رابط الحلقة الأولى :
https://www.facebook.com/108271570517228/posts/295846668426383/
رابط الحلقة الثانية :
https://www.facebook.com/Mannered.Debate/posts/295880818422968
رابط الحلقة الثالثة :
https://www.facebook.com/Mannered.Debate/posts/295929768418073

24/07/2020

الحلقة الثالثة من سلسلة :
الأدلية العقلية على العقيدة الإسلامية
03- مفهوم اللانهائية

اتكلمنا في الحلقة اللى فاتت عن مفهوم اللانهائية ...
قريته .. و اتلخبطت ... مش كدة
طيب عايزين نفهم إيه حوار اللانهائية ده ؟!!! ممكن نبسطه شوية ؟؟

لما تيجي تتكلم مع واحد ملحد ، و تقوله مين اللى خلق الأرض ، هيقولك الأرض اتكونت نتيجة السبب الفلاني ، هتقوله ربنا اللى خلق السبب ده ، هيقولك لأ السبب ده كان نتيجة سبب تاني ، هتقوله ربنا اللى خلق السبب التاني ، هيقولك لأ ده كان نتيجة سبب ثالث ، و هكذا إلى ما لا نهاية ، أسباب لانهائية ....
عشان توصل معاه إن ربنا هو الخالق فعلا ، لازم تبين خطأ فكرة اللانهائية و إن مفيش وجود لمسمى اللانهائية ، و إن الكون ده ليه بداية فعلاً مش كون لانهائي

طيب ناخد مثال تاني عشان نوضح شوية ....
هنفترض إن عمر الأرض لانهائي ( و ده ثبت خطأه علمياً في العصر الحديث ، لكن احنا بنأسس ليك طريقة للتفكير المنضبط للاستدلال العقلي )
طيب هنقول ان عمر الأرض لانهائي ، طيب الكلام ده النهاردة ، طيب و بكرة ، هيبقى عمر الأرض اللانهائي زاد يوم ، طيب هو ده برضه عمر لانهائي ؟!!!
طيب ايه الفرق بين عمر الأرض اللانهائي بتاع امبارح و بتاع النهاردة ، مين أكبر ؟!
شوفت بقى .... وصلنا للمهم
مادام بدأت تتكلم عن عمر أكبر من عمر ، يبقى لازم إنه يبقى تقدر تعده و تحسبه ، يعني مينفعش يكون لانهائي
و ده اللى بتقوله العقيدة الإسلامية ، إن الكون له بداية و إن الخلق له بداية ،
و ده الثابت علمياً فعلاً ،
و ده بعد جدل كبير حول المفهوم ده اللى طرحته العقيدة الإسلامية و ثبت فعلاً أن الكون له بداية ، سماها العلماء الانفجار الكبير و في علماء تانيين بيبحثوا دلوقت عن بداية للكون قبل الانفجار الكبير كمان ، لكن الكل بقى بيبحث عن بداية للكون فعلاً
لأن الكل توصل إلى ما قررته العقيدة الإسلامية من زمان
إن مفيش حاجة اسمها أسباب لانهائية
و إن لازم الكون ده يكون ليه بداية ، يعني ليه سبب أول

يبقى عرفنا إن مفهوم اللانهائية ده مفهوم خاطيء ، و إن الكون له بداية
و بالتالي لما نقول إن الله سبحانه و تعالى ، الإله ، هو اللى خلق هذا الكون و هو اللي بدأ هذا الخلق ، يبقى مفيش مجال لحد أنه يقول هذا الكلام كلام مخالف للعقل ، ليه لأن فعلاً إحنا أثبتنا وجود بداية لهذا الكون .

طيب هو مادام العلم فعلاً أثبت أن الكون له بداية ، إيه لازمة أن احنا نتكلم بقى عن اللانهائية و الكلام ده ، مش الموضوع خلص خلاص .
ما هو احنا لازم نعرف إزاي الاستدلالات العقلية للعقيدة الإسلامية كانت ثابتة و صحيحة ، من قبل حتى ما يكون في إثبات علمي على وجود بداية للكون ، لأن احنا مينفعش نبقى منتظرين إثبات علمي تجريبي عشان نثبت بيه العقيدة ، الإثبات في الأصل إثبات عقلي منطقي حتى لو العلم مازال متأخر عن إثبات شيء ما لسه موصلوش ، يبقى ساعتها لو هيقولك مفهوم الإله هو مفهوم لسد الفجوات العلمية و نتيجة للجهل ، هيبقى الرد إن الاستدلال العقلي هو الأساس إذا أنت اتبعت التفكير السليم و الاستدلال الصحيح .
بس انت اللى محتاج تشغل عقلك

في الحلقة اللي جاية هنكمل في تفاصيل أكتر و نتكلم عن الاعتراضات اللى بيحاول الملحدين أنهم يتكلموا بيها و ايه الرد عليها .

#وجادلهم

رابط الحلقة الأولى :
https://www.facebook.com/108271570517228/posts/295846668426383/
رابط الحلقة الثانية :
https://www.facebook.com/Mannered.Debate/posts/295880818422968

24/07/2020

الحلقة الثانية من سلسلة :
الأدلة العقلية للعقيدة الإسلامية
02- أدلة وجود الله

اتكلمنا في الحلقة اللى فاتت عن المفهوم اللى بيطرحه الإلحاد عن الإله و أنه مجرد مفهوم اختلقه المؤمنين لسد فجوات الجهل أو الفجوات بمعنى الحاجات اللي العلم مقدرش يوصل لأسبابها لحد دلوقت .

و هنا هنبدأ نتكلم عن مفهوم الأسباب ؟!!!!

العلم يبحث دائماً عن سبب الأشياء ، ايه السبب في حدوث كذا أو كذا ، و احنا عارفين أن في حاجات هي أسباب لحدوث حاجات تانية ، يعني مثلاً أن الأكسجين يساعد على الاشتعال و أنك لو حجبت الأكسجين عن النار تنطفيْ ، يعني سبب و نتيجة ، عادي جداً ، مفيش مشكلة ، طيب إيه علاقة ده بإثبات وجود ربنا سبحانه و تعالى .

نعمل تجربة فكرية صغيرة ....
هنجيب واحد هيشوط كورة في الجون ، و لما الكورة تدخل الجون هنعتبر ده ظهور أو وجود حاجة في الكون اللى احنا فيه ده ، مثلا يعني أن دخول الكورة الجون هيبقى معناه ظهور الأرض في الوجود ، بس هنعمل حاجة صغيرة ، هنعد بدل 1،2،3 و نشوط الكورة ، هنعد عدد لا نهائي ، و بعدين نشوط الكورة فتدخل الجون فنعتبر ان كدة الأرض مثلاً ظهرت للوجود .
نجرب ، ياللا بينا .......
هتيجي تعد هتلاقي نفسك مش بتخلّص خالص ، ليه ؟؟؟
لأن كل ما هتوصل لعدد ، هتلاقي انك ممكن تزود عليه واحد تاني ،
و هكذا إلى ما لا نهاية !!!!

يبقى كدة معنى الكلام أن عمر ما في حاجة هتظهر في الوجود نتيجة أسباب لا نهائية ،
و ده اللى قاله علماء الإسلام من أكتر من 1000 سنة و نصوا عليه في كتب العقيدة أن مفهوم لانهائية الأسباب " يؤدي إلى فراغ الكون من الموجودات "

يعني ممكن تكون مليار سبب أو مليار مليار سبب ، لكن في الآخر هتظل محصورة في العدد ، يعني ممكن تعدها ، عشان السبب ده وجد بالفعل
و بالتالي هتوصل إن في حاجة تسببت في بداية وجود الكون ده كله .

و الحاجة دي لا تخضع للأسباب ، لأنها لم توجد نتيجة سبب لأنها أول الحلقة من الأسباب ، و كل الأشياء التانية وجدت نتيجة أسباب ، و معنى أن الأشياء وجدت نتيجة أسباب أن لو السبب محصلش فهي لن توجد و لو حصل هتوجد يعني أنها ممكن تتوجد و ممكن لأ و دي سماها علماء الإسلام ( الممكنات ) ، لكن السبب الأول في إيجاد هذا الكون لا يخضع لسبب ، فبالتالي وجوده من ذاته يعني لازم أو واجب الوجود ، و بكدة نبدأ نفهم تعريف الأزهر الشريف في علوم العقيدة لاسم الله سبحانه و تعالى أنه :
( علم على الذات الواجب الوجود المستحق لجميع المحامد )

هنشوف في الحلقة القادمة اعتراضات الإلحاد على مفهوم السببية و بعض المناوشات و الماتشات الفكرية عن هذا المفهوم

#وجادلهم

رابط الحلقة الأولى :
https://www.facebook.com/108271570517228/posts/295846668426383/

و جادلهم

17/08/2020

09/08/2020

05/08/2020

02/08/2020

30/07/2020

26/07/2020

26/07/2020

25/07/2020

24/07/2020

24/07/2020

Address

Website

Alerts

Shortcuts

Share

Category