25/07/2025
مشكلتك مش إنك غشيت… مشكلتك إنك صدقت الكذبة.
للأسف عرفت ان فيه طلبة كثير نجحت بغش وسماعات وللأسف مفتخرين بنجاحهم المزيف!!!
اللي لبس سماعة وغش… منجحش دا خد درجات مش حقه… ورفع اسمه فوق ناس تعبت واجتهدت وكانت أمينة.
اللي فرحان إنه جاب ٩٠٪ بالغش، هو في الحقيقة خسر ١٠٠٪ من احترامه لنفسه وخسر بركة ربنا في طريقه.
دي مش شطارة… دا كذب.
مش نجاح… دا سقوط أمام نفسك .
الغش مش بيصنع إنسان ناجح…
الغش بيصنع إنسان مزيف …عايش على وهم… وهربان من ضميره… وواخد مكان مش مكانه.
يا ابني… النتيجة دي مش هتسندك طول عمرك.
اللي هيسندك هو ضميرك… هو أمانتك… هو اجتهادك حتى لو وقعت مرة وقومت تاني.
راجع نفسك قبل ما الدنيا تراجعك…
وتوب… قبل ما تفشل في الحياة الحقيقية.
يمكن تكون ضحكت على اللجنة…ضحكت على المدرس…ضحكت على أهلك…لكن أصعب حاجة… إنك ضحكت على نفسك.
صدقت إنك “ناجح”… وإنت من جواك مكسور ومفضوح قدام ربنا.
فرحتك منقوصة لانك بينك وبين نفسك عارف انك غشاش !!
رفعت رأسك قدام الناس؟ بس نكّست قلبك قدام ربنا.
"وَيْلٌ لِلْقَائِلِينَ لِلشَّرِّ خَيْرًا وَلِلْخَيْرِ شَرًّا، الْجَاعِلِينَ الظَّلاَمَ نُورًا وَالنُّورَ ظَلاَمًا، الْجَاعِلِينَ الْمُرَّ حُلْوًا وَالْحُلْوَ مُرًّا… الَّذِينَ يُبَرِّرُونَ الشِّرِّيرَ مِنْ أَجْلِ الرُّشْوَةِ، وَأَمَّا حَقُّ الصِّدِّيقِينَ فَيَنْزِعُونَهُ مِنْهُمْ. "اشعياء ٥
"خُبْزُ الْكَذِبِ لَذِيذٌ لِلإِنْسَانِ، وَمِنْ بَعْدُ يَمْتَلِئُ فَمُهُ حَصًى. "أم ٢٠
