12/01/2024
༅། །ཁེ་ན་ཌ་རྒྱལ་ཡོངས་དགའ་ལྡན་ལྔ་མཆོད་ཐེངས་ ༡༡ པ་སྲུང་བརྩི་གསལ་བསྒྲགས།
༄༅། །ཕྱི་ལོ་ ༢༠༢༤ ཕྱི་ཟླ་ ༡༢ པའི་ཚེས་ ༢༥ བོད་ཟླ་ ༡༠ པའི་ཚེས་ཡང་ ༢༥ ཡེ་ཤུའི་འཁྲུངས་སྐར་མཉམ་འཁེལ་རེས་གཟའ་ལྷག་པ། ཕྱི་དྲོ་ཕྱག་ཚོད་ ༣ པ་ནས་ ༦ པའི་བར། ཁེ་ན་ཌ་ལྷ་ལྡན་སྨོན་ལམ་ཆེན་མོའི་མཐུན་ཚོགས་ནས་ཁེ་ན་ཌ་གངས་ལྗོངས་ཆོས་ལྡན་གླིང་བོད་ཀྱི་རིག་གཞུང་བསྟི་གནས་ཁང་གི་གཙུག་ལག་ཁང་དུ།
འཇམ་དབྱངས་མིའི་རྣམ་རོལ་ཤར་རྒྱལ་བ་རྗེ་ཙོང་ཁ་པ་བློ་བཟང་གྲགས་པ་དཔལ་བཟང་པོ་མཆོག་གི་དགོངས་རྫོགས་རྗེས་དྲན་དགའ་ལྡན་ལྔ་མཆོད་ཆེན་མོ་སྲུང་བརྩི་དང་མཉམ་དུ། བོད་བསྟན་སྲིད་བདེ་ཐབས་དང་། ༧སྤྱི་ནོར་གོང་ས་ ༧སྐྱབས་མགོན་ཆེན་པོ་མཆོག་གི་དབུས་བསྟན་འཛིན་གྱི་སྐྱེས་ཆེན་དམ་པ་རྣམས་སྐུ་ཚེ་བརྟན་ཅིང་མཛད་འཕྲིན་རྒྱས་པ། སྐུ་གཤེགས་བོད་ཀྱི་དཔའ་བོ་དཔའ་མོ་གཙོས་སེམས་ཅན་འདས་གསོན་ཡོངས་ཀྱི་ཆེད་དུ། ཆོས་བརྒྱུད་རིས་མེད་ཀྱི་ ༧སྐྱབས་གནས་འདུས་པ་སེར་སྐྱ་མི་མང་ཡོངས་ནས། ཟབ་ལམ་བླ་མ་མཆོད་པའི་སྒོ་ནས་ཚོགས་འཁོར་མཆོད་འབུལ་སྨོན་ལམ་ཆེན་མོ། བསྙེན་བཀུར་གསོལ་ཇ་དང་བཞེས་ཐུག་གཟབ་རྒྱས་ཐོག་འཚོགས་གཏན་འཁེལ་བ་ལགས་ན། དེ་དོན་དགོངས་ཆུབ་ཡོང་བ་དང་གང་མང་མཉམ་ཞུགས་ཡོང་བའི་དགེ་བསྐུལ་དང་བཅས་ཏེ།
ཁེ་ན་ཌ་སྐབས་དྲུག་པའི་ལྷ་ལྡན་སྨོན་ལམ་ཆེན་མོའི་མཐུན་ཚོགས་ནས།
བསྙེན་བཀུར་ཚོགས་འཁོར་དང་གསོལ་སྟོན་ཆེད་མཐུན་འགྱུར་སྦྱིན་བདག་གནང་འདོད་མཆིས་ཚེ་ཐུགས་རྗེ་ཡི་རང་ཞུ་བ་དང་སྦྲགས་གཤམ་གསལ་ཁ་པར་ཐོག་འབྲེལ་བ་གནང་སྐྱོང་ཡོང་བ་བཅས།
དགེ་བཤེས་ཡེ་སྐལ་ (437) 662 7111 དབང་ཕྱུག་ (647) 881 2345
