Paroisse Buhonga

01/06/2026

*_Ijambo ry’Umukama, indwi y’9 yo mu gihe gisanzwe co mu mwaka, ku wa kabiri, années paires_*

*IGISOMWA CA MBERE*

_Ivyo dusoma mw’Ikete rya kabiri ry’Umutumwa Petero (3, 12-15a.17-18)_

Ncuti zanje, Murarindira muhahamiye amaza y’Umusi w’Imana uzotuma ikirere gishongeshwa kigasha, ibisate vyaco bikayagishwa n’umuriro. Nkako, ivyo turindiriye nk’uko Umukama yabituraganiye, ni rya juru rishasha na ya si nshasha bivyagiyemwo ubutungane. Ni uko rero, bakunzi banje, umwanya mukibirindiriye, nimushishikare rwose kugira ngo abasange muri mu mahoro, mutagira agahonzi n’amahinyu. Nimwame mumenya yuko ubwiyumanganyi bw’Umukama budufasha gushikira urukiza. Mweho, bakunzi banje, nk’uko musanzwe mubizi, nimwirinde, mwoye kuzimirana n’intabarirwa, ntimuhebe ubwirinzi mwamanye, nimukurire mu buntu no mu bumenyi bw’Umukama n’Umukiza wacu Yezu Kristu. Ni we akwiye ubuninahazwa uyu musi no gushika kuri urya musi uzokwamaho. Amen!

```Iryo ni Ijambo ry’Umukama.```

*IZABURI 89 (90) 2, 3-4, 9b-10bd, 14.16b*

_Icit. Mukama, wamye uri amahungiro yacu, kuva kera na rindi._

Imisozi itarabaho, utararema isi n’ibihugu, Weho wamye uri Imana kuva kera na rindi.

Abantu, urabasubiza mw’ibumba, ukababarira uti: «Bana b’abantu, nimusubireyo.» Mu maso yawe, imyaka igihumbi imeze nk’umusi w’ejo wahise, canke nk’igishingo kimwe c’ijoro.

Imyaka yacu irayonga nk’ubwaku. Imisi y’imyaka yacu ni imyaka mirongo indwi, canke naho, ku bakomeye, yoshika ku mirongo umunani. Imara umwanya urume rumara, natwe tukaba turiko turagenda.

N’udukwize urukundo rwawe mu gitondo ca kare, niho twoheza tukamara umusi wose mu karirimbo no mu kanyamuneza. Igikorwa cawe niciserure ku basavyi bawe, be n’agahimbare kawe ku bana babo.

*INKURU NZIZA*

*_Aleluya, Aleluya_*

_«Jewe ndi Inzira, Ukuri n’Ubuzima, ntawuja kwa Data, atanciyeko.»_

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (12, 13-17)_

*Hanyuma barungikira Yezu bamwe mu Bafarizayo no mu bayoboke ba Herodi ngo bamutegere mu majambo. Bano rero baraza bamubwira bati: «Mwigisha, turazi yuko uri imvugakuri, utagira nkunzi; nkako nturaba akaranga k’abantu, wigisha riho ukuri kwamye inzira y’Imana. None, birakunda canke ntibikunda ko dutorera ikori Sezari? Turitange canke turireke?» Ariko we yari azi ububi bwabo, ababwira ati: «Ni kuki mushaka kunta mu rudubi? Nimunzanire idenariyo, ndabe.» Barayimuzanira. Hanyuma ababaza. Ati: «lyi shusho n’urwo rwandiko ni ivya nde?» Bati: «Ni ivya Sezari.» Yezu na we ati: «Subiza Sezari ivya Sezari, Imana na yo ivyayo.» Bano baraheza baramutangarira.*

```Iryo ni Ijambo ry’Umukama.```

30/05/2026

*_IJAMBO RY'UMUKAMA_*

🗓️ *_umusi mukuru w’Ubutatu Bweranda rwose (A)_*

```Umusi w’Umukama ukurikira Pentekoti.```

📖 *IGISOMWA CA MBERE*

📜 _Ivyo dusoma mu gitabu c’Ihunguka 34, 4-6. 8-9_

📑 *_(Ndi Umukama, ndi Umukama Imana nyenimpuhwe n’imbabazi)_*

Muri irya misi, 4 Musa yabâjije ibisate vy’amabuye bisa n’ivya mbere, araheza avyuka kare mu gitondo nk’uko Umukama yari yabimutegetse, aduga ku musozi Sinayi afise mu minwe vya bisate bibiri vy’amabuye. 5 Umukama amanuka mu gicu, ahagarara ngaho iruhande yiwe, asamiriza izina Umukama. 6 Umukama aca imbere yiwe avuga ati: «Ndi Umukama, Ndi Umukama Imana nyenimpuhwe n’imbabazi itihutira gushavura, yuzuye ubuntu n’ukuri». 8 Ubwo nyene Musa aca arunama, akubita inkoro hasi. 9 Hanyuma avuga ati: «Ninaba naratewe iteka mu maso yawe ga Mukama, Umukama wanje nagendere hagati yacu, n’aho ari abantu badadaza igikanu, kandi uratubabarira ku caha cacu no ku gicumuro cacu, wongere utugire icibare cawe».

```Iryo ni Ijambo ry’Umukama.```

📖 *IZABURI (Daniyeli) 3 52, 53-54, 55-56*

📜 _Icit. Nushimagizwe wongere uhayagizwe imyaka yose._

52 Nuhezagirwe Mukama Mana ya ba sokuru, n’ushimagizwe wongere uhayagizwe imyaka yose. Nihahezagirwe izina ryawe ryeranda kandi rininahaye, nirishimagizwe, rihayagizwe imyaka yose! *_Icit._*

53 Nuhezagirwe mu ngoro y’ubuninahazwa bwawe bweranda, shimagizwa wongere uhayagizwe kuruta vyose imyaka yose! 54 Nuhezagirwe ku ntebe y’ubwami bwawe, n’ushimagizwe wongere uhayagizwe kuruta vyose imyaka yose! *_Icit._*

55 Nuhezagirwe wewe usuzuma inyenga uri ku ntebe y’ubwami hejuru y’abakerubini, nushimagizwe wongere uhayagizwe kuruta vyose imyaka yose! 56 Nuhezagirwe mu kirere c’ijuru, nushimagizwe wongere uhayagizwe kuruta vyose imyaka yose! *_Icit._*

📖 *IGISOMWA CA KABIRI*

📜 _Ivyo dusoma mw’ikete rya kabiri umutumwa Pawulo yandikiye Abanyakorenti 13, 11-13_

📑 *_(Inema ya Yezu Kristu, urukundo rw’Imana n’ubunywanyi bwa Mutima Mweranda)_*

11 Benewacu, nimunezerwe, murondere ubweranda, muremeshanye, muhuze ivyiyumviro, mwamane amahoro, niho Imana y’urukundo n’amahoro izobana namwe. 12 Nimuramukanye namwe mu guhoberana nk’aberanda. Aberanda bose barabaganutsa. 13 Muragahorane mwese inema y’Umukama Yezu Kristu, urukundo rw’Imana n’ubunywanyi bwa Mutima Mweranda.

```Iryo ni Ijambo ry’Umukama.```

📖 *INKURU NZIZA*

🎼 *_Aleluya. Aleluya_*

📖 _Haninahazwe Data, Mwana na Mutima Mweranda; Imana iriho, iyamyeho n’iyigira ngo ize! (Ivyahishuwe 1, 8)_

🎼 *_Aleluya_*

📖 _Ivyo dusoma mu Nkuru Nziza ya Yezu Kristu nk’uko yashikirijwe na Yohani 3, 16-18_

📑 *_(Imana yarungitse Umwana wayo kw’isi kugira ngo ikire ku bwiwe)_*

*16 Imana yarakunze isi gushika n’aho itanga Umwana wayo w’ikinege, ngo uwumwemeye wese ntapfe, aronke riho ubuzima budahera. 17 Erega, Imana ntiyarungitse Umwana wayo kw’isi ngo acire isi urubanza, ahubwo yamurungitse ngo isi ikire ku bwiwe. 18 Uwumwemera ntiyāgîrwa n’urubanza, ariko uwutemera yarâgiriwe n’urubanza, kuko yanse kwemera izina ry’Umwana w’ikinege w’Imana.*

```Iryo ni Ijambo ry’Umukama.```

30/05/2026

30/05/2026

30/05/2026

Nemera Imana imwe rudende, bumwe n'ubunywanyi bw'urukundo rufatanya Data na Mwana na Mutima Mweranda. Ni Imana yaturemy, yaducunguye mw'irema rishasha kandi igumana natwe. Yatugize umuryango w'abana bayo..Bayonne...
Umusi mukuru mwiza w’Ubutatu Bweranda rwose

29/05/2026

*_Ijambo ry’Umukama, indwi y’8 yo mu gihe gisanzwe co mu mwaka, ku wa gatandatu, années paires_*

*IGISOMWA CA MBERE*

_Ivyo dusoma mw’Ikete ry’Umutumwa Yuda-Tadeyo (17, 20-25)_

Bakunzi banje, nimwibuke ivyabuwe n’abatumwa b’Umukama wacu Yezu Kristu. Nimwishimikize ukwemera kwanyu kweranda cane. Nimusabe muri Mutima Mweranda, nimwizigame mu rukundo rw’Imana, nimwame muhahamira ikigongwe c’Umukama wacu Yezu Kristu azobashikiriza ubuzima bwamaho. Abatararimbuka mubahanure, mubakize mubokore mu muriro ; abandi na bo mubagirire imbabazi kandi mutinye, muhunge n’impuzu nyene yandujwe n’umubiri wabo. Na we, Uwushobora kubazigama ngo ntimutsitare no kubarengukisha imbere y’ubuninahazwa bwiwe mutagira amahinyu kandi muri mu kanyamuneza, Imana imwe rudende ari yo Mukiza wacu ku bwa Yezu Kristu Umukama wacu, ni we akwiye ubuninahazwa, inganji, ubukomezi n’ububasha kuva kera na rindi, ubu no mu myaka yose. Amen.

```Iryo ni Ijambo ry’Umukama.```

*IZABURI 62 (63) 2, 3-4, 5-6*

_Icit. Umutima wanje urakunyotewe, Mukama, Mana mfise._

Mana, ni Wewe Mana yanje mpora ndondera kuva mu gitondo ca kare; umutima wanje urakunyotewe. Nanje ndakwipfuza. Muri iyi si yase imigaga ibuze ikinyotera.

Ni ko, narakubonye mu ngoro yawe, ndihweza ububasha n’ubuninahazwa bwawe; niho urukundo rwawe rwandutira amagara, ngashobora kugushimagiza.

Ni ko nzoguma nguhezagira umwanya nkiriho, nzokwayira iminwe izina ryawe; niho nzohimba nk’uwagaburiwe imisoso n’ibinure, nzoguhaya mpimbarwe n’ukuguhoza mu kanwa.

*INKURU NZIZA*

*_Aleluya, Aleluya_*

_Yeruzalemu, igine Umukama, ni we arungikira isi ijambo ryiwe._

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (11,27-33)_

*Yezu n’abigishwa biwe basubira kugaruka i Yeruzalemu. Igihe Yezu yari mu Ngoro y’Imana agendagenda, abaherezankuka bakuru, abanditsi n’abakurambere baramwegera bati: «Ubukuru bw’uko ukora ivyo ni ubuhe? Mbere nako uwaguhaye ubwo bukuru bw’ugukora utyo ni nde?» Yezu arabishura ati: «Ndababajije nanje ijambo rimwe. Nyishure, nanje ndababwira iyo nkura ubukuru bw’ugukora ntyo. Mbega, ibatisimu ya Yohani yaturuka mw’ijuru canke mu bantu? Nyishure.» Na bo bibwira mu mutima bati: «Nitwishura tuti: Mw’ijuru, atubwira ati: None se, ko mutamwemeye? Naho twishure tuti: Mu bantu?» Batinya ishengero, kuko bose bemera ko Yohani yari umuhanuzi w’ukuri. Bishura rero Yezu bati: «Ntitubizi.» Yezu na we abishura ati: «Nanje rero simbabwira ubukuru butuma nkora ivyo.»*

```Iryo ni Ijambo ry’Umukama.```

27/05/2026

*_Ijambo ry’Umukama, indwi y’8 yo mu gihe gisanzwe co mu mwaka, ku wa kane, années paires_*

*IGISOMWA CA MBERE*

_Ivyo dusoma mw’Ikete rya mbere ry’Umutumwa Petero (2, 2-5. 9-12)_

Ncuti zanje, nk’uko abana b’inzoya baheruka kuvuka bahora babigira, nimuronderane igishika amata nyakuri y’umusarara ahembura umutima, kugira ngo abazanire igikuriro, usangwa mumaze kwinovora ko Umukama ari mwiza. Nimwiyegereze Kristu, we buye rizima ryashibuwe n’abantu, ariko rigashimwa kandi rigatera igomwe Imana. Namwe rero, nimumere nk’amabuye mazima, maze mwubake ingoro y’umutima, mushigikire ubweranda, mushobore guhereza imbagwa zishimisha Imana ku bwa Yezu Kristu. Mweho muri indanga zitorewe n’Imana, musangiye ubuherezankuka na Kristu Umwami, muri igihugu gihunzeko ubweranda, muri icibare Imana yiciriye ngo cerekane ubukomezi bw’Uwabakuye mu mwijima akabashira mu muco w’akatabonetse. Kera nta ntara mwarimwo, ariko noneho muri intara y’Imana; kera ntimwari bwagirirwe ikigongwe, ariko noneho mwarakigiriwe. Bakunzi banje ndabahanuye: ko muri inyambukira n’imvamahanga, nimwirinde ivyipfuzo vy’umubiri birwanya umutima, nimwigenze neza hagati y’abanyamahanga, kugira ngo no ku vyo babavuga nabi nk’inkozi z’ikibi, ibikorwa vyanyu vyiza babona bitume bazoninahaza Imana umusi izobagendera.

```Iryo ni Ijambo ry’Umukama.```

*IZABURI 99 (100) 1-2.3.4, 5*

_Icit. Nimuze ku Mukama, mumusanganize akavyino k’urweze._

Wa si iyo uva ukagera, himbaza Umukama, korera Umukama mu gahimbare, musanganize akavyino k’urweze.

Menya ko Umukama ari We Mana, ni We yaturemye, turi abiwe, turi intara yiwe, n’intama z’uruhongore rwiwe.

Genda ku kirimba iwe, mukure ubwatsi, mwinjire mu ngoro yiwe muvyina, mumushimire, mushemeze izina ryiwe.

Eka bane, Umukama ni mwiza, urukundo rwiwe rwama ari rwa rundi, arakwiye kwemerwa mu myaka n’imyaka.

*INKURU NZIZA*

*_Aleluya, aleluya_*

_«Jewe ndi umuco w’isi, uwunkurikira azoronka umuco w’ubuzima.»_

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (10, 46-52)_

*Yezu yariko ara va mu gisagara ca Yeriko, we n’abigishwa biwe n’isinzi ry’abantu. Ahwana n’umuntu w’impumyi, mwene Timayo, yari yicaye ku nzira ashera. Yumvise ko ari Yezu w’i Nazareti ahaciye, arasemerera ati: «Yezu, Mwana wa Dawudi, ngirira ikigongwe!» Benshi baramukankamira ngo acereze; na we arushirizaho gusemerera, ati: «Mwana wa Dawudi, ngirira ikigongwe!» Yezu rero arahagarara, ati: «Mwakure.» Bākura ya mpumyi bati: «Subiza umutima mu nda! Va hasi: araguhamagaye.» Aterera hasi igikwemu ciwe, asimba rimwe aba ashikiriye Yezu. Yezu aramubaza ati: «Ushaka ko nkugirira iki?» Impumyi iramwishura ati: «Mwigisha, ntabara mbone! Yezu aramwishura ati: «Genda, ukwemera kwawe kuragukijije.» Buno nyene, arakanura, agendanira Yezu.*

```Iryo ni Ijambo ry’Umukama.```

26/05/2026

*_Ijambo ry’Umukama, indwi y’8 yo mu gihe gisanzwe co mu mwaka, ku wa gatatu, années paires_*

*IGISOMWA CA MBERE*

_Ivyo dusoma mw’Ikete rya mbere ry’Umutumwa Petero (1, 18-25)_

Ncuti zanje, murazi neza ko mutacunguwe n’itunga rishira nk’ifaranga canke inzahabu ngo muve mu migenzo y’imburakimazi mwarazwe na ba sokuru; mwacunguwe nyabuna n’amaraso y’igiciro ntangere ya Kristu, wa Mwagazi utagira agahonzi n’inenge, wagenywe isi itararemwa, none werekanywe mu misi y’imperuka kubera mwebwe. Kubera we, muremera Imana yamuzuye mu bapfuye ikongera ikamuha ubuninahazwa; mbere ukwemera kwanyu gushimikiye ku Mana, ni yo mizero yanyu. Mu kugamburukira ukuri, mwaratyoroye imitima yanyu ngo mushobore gukundana ata gahemo urw’abavandimwe; nimukundane rero n’umutima wanyu wose mudatezura, kuko mwavutse ubwa kabiri, mutavyawe n’imbuto itituka, ariko mukavyarwa n’imbuto idatituka kubera ijambo ry’Imana nzima kandi yamaho. Ni co gituma «umuntu wese ameze nk’icatsi, ubuninahazwa bwiwe bwose bumeze nk’ishurwe ry’icatsi; icatsi kiruma, ishurwe rigahunguruka; Ijambo ry’Umukama ryo ryamaho imyaka yose.» Iryo ni rya jambo ry’Inkuru nziza mwabwiwe.

```Iryo ni Ijambo ry’Umukama.```

*IZABURI 147 (148 B) 12-13, 14-15, 19-20*

_Icit. Yeruzalemu, igine Umukama_

Yeruzalemu, igine Umukama, nawe Siyoni, shemeza Imana yawe! Ni we yashimangiye ibikingi vy’ibirimba vyawe, akaguhezagirira abana bawe.

Ni we atekanya imbibe zawe, akaguhimbisha akanovera k’ingano. Ni we arungika ijambo ryiwe kw’isi, rigaheza rikagenda riranyaruka.

Ni we yamenyesheje Yakobo ijambo ryiwe, agashikiriza Israyeli amabwirizwa yiwe n’ingingo ziwe. Nta kindi gihugu na kimwe yagiriye ben’uko. Nta kindi gihugu na kimwe camenye ingingo ziwe.

*INKURU NZIZA*

*_Aleluya, Aleluya_*

_Umukama yavuze ati: «Kuva ubu, nzobita abakunzi banje; ivyo nahawe na Data vyose narabibamenyesheje.»_

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (10, 32-45)_

*Abigishwa bagasangwa bari mu nzira baduga i Yeruzalemu, na we Yezu agendera imbere yabo; hanyuma, ubwoba burabatekera n’ababakurikira bagira ubwoba. Asubiriye kandi kwiyegereza bamwe Cumi na babiri, Yezu ababwira ayo ari mu kubona, ati: «Ubu, tuduze i Yeruzalemu, Umwana w’umuntu rero aza kugwa mu minwe y’abaherezankuka bakuru n’abigisha, bamucire urwo gupfa, bamuhereze abanyamahanga; bazomutwenga, bamucireko, bamukubite, bagireko bamwice; ariko amaze gatatu azozuka.» Yakobo na Yohani bene Zebede baregera Yezu, bamubwira bati: «Mwigisha, dushaka ko uturonsa ico tugira tugusabe.» Na we ati: «Ico mugomba ko ndabaronsa ni iki?» Baramwishura bati: «Uradutera iteka twicare umwe iburyo, uwundi ibubamfu bwawe, mu buninahazwa bwawe.» Yezu arabishura ati: «Ntimuzi ico musaba. Murashobora kunywa igikombe nza kunywa n’uguhabwa ibatisimu nza guhabwa?» Na bo bati: «Turabishobora.» Yezu na we ati: «Igikombe nza kunywa muzokinywa kandi muzohabwa ibatisimu nza guhabwa; ariko ukwicara iburyo bwanje canke ibubamfu, si je ndabigaba, ni ivy’ababiteguriwe.» Bamwe cumi bandi bavyumvise, baja mu gushavurira Yakobo na Yohani. Yezu arabahamagara, ababarira ati: «Ni ivyo muzi, abatwara ibihugu barazi kwerekana ko bategeka, abakuru barumvisha ububasha bwabo. Muri mwebwe, si ko vyogenda; uwuzogomba kuba mukuru muri mwebwe arabanza riho abe umusuku wanyu, na we uwuzogomba kuba uwa mbere muri mwebwe arabanza abe umuja wa mwese. Kanatsinda, Umwana w’umuntu ntiyaje ngo akorerwe, yazanywe n’ugukorera abandi, n’ukwitangako incungu irokora isinzi ry’abantu.»*

```Iryo ni Ijambo ry’Umukama.```

24/05/2026

*_Ijambo ry'Umukama, ku wa mbere Ukurikira Pentekoti, Bikira Mariya Umugabekazi w'Ekleziya._*

*IGISOMWA CA MBERE*

_Ivyo dusoma mu gitabu c’Amamuko (3, 9-15. 20)_

*_Nzobankanisha, wewe n’umugore, abawe n’abiwe bazozirana_*

Umugabo amaze kurya kuri ca giti, Umukama Mana yaciye amuhamagara ati : « Mbega, uri hehe ? » Umugabo na we aramwishura ati : « Numvise ishwashwa ryawe mu ndimo, nca ngira ubwoba kuko ndi gusa, ni ko kwinyegeza. » Na We asubizayo ati : « Ni nde yakubwiye ko uri gusa ? Woba wariye ivyamwa vy’igiti nari nakubujije kurya ? » Wa mugabo yishura ati : « Ni wa mugore wampa yanzaniye ivyamwa vyaco, nanje ndarya. » Umukama abwira umugore ati : « Wagize ibiki ? » Umugore na we aramwishura ati : « Ni inzoka yampenze ndarya. » Umukama abwira rero inzoka ati : « Ko warikoze, uragacibwa mu bindi bikoko vyose, ibitobito n’ibiba mw’ishamba. Uzogenda urikwega hasi, kandi indya yawe ni ivu gushika gupfa kwawe. Nzobankanisha, wewe n’umugore, abawe n’abiwe bazozirana. Azoguhonyora ku mutwe, nawe umukomore ku gitsintsiri. » Umugabo yita umugore Heva, kuko yabaye nyina w’abantu bose.

````Iryo ni Ijambo ry'Umukama.```

*IZABURI 86 (87) 1 -2.3.5-7*

_Icit. Ntara zose, ni muninahaze Umukama._

Ese ingene Umukama agukunda, wewe wubatswe ku mirambi myeranda ! Ewe Siyoni, urakundwakazwa kuruta izindi nyubakwa zose za Yakobo. Bakuvuga baguhaya, wewe gisagara c’Imana

«Jewe mparura Imisiri na Babiloni mu ntara zimaze kumenya.» Umuntu wese avuga ati : «Navukiye i Tiri canke mu Bufilisti canke muri Etiyopiya». Ariko, Siyoni yo umuntu wese ayibwira ati : «Uri Mawe, kuko umwe wese ari ho yavukiye».

Uwo mw’ijuru arayigumizako ubwo bukuru ; ariko akandika mu gitabu intara zose, ati : «Kanaka ni ho yavukiye.» Abaririmba n’abavyina bazovuga bati : «Amasôko yanje yose ari muri wewe.»

*INKURU NZIZA*

*_Aleluya, aleluya_*

_Muranezerwe muhimbarwe, kuko impera yanyu izoba nini mw’Ijuru (Matayo 5, 12)._

*_Aleluya_*

_Ivyo dusoma mu Nkuru Nziza ya Yezu Kristu nk’uko yashikirijwe na Yohani (19, 25-34)_

*Iruhande y'umusaraba wa Yezu, hari hahagaze nyina wiwe na nyinabo Mariya muka Klopasi, na Mariya Madalena. Yezu rero abone nyina wiwe ahagararanye na wa mwigishwa yakunda, abwira nyina wiwe ati: «Wa mukenyezi we, ng'uwo umwana wawe.» Hanyuma abwira wa mwigishwa na we ati: «Ng'uwo nyoko wawe.» Kuva ubwo, nya mwigishwa aca ajana Mariya iwe. Ivyo biheze, kubera ko Yezu yari azi ko vyose birangutse, kandi kugira ngo Ivyanditse biranguke, aca avuga ati: «Ndanyotewe.» Hariho agakono kuzuye is**i. Bashira rero ipampa ku nkoni, barikoza muri iyo s**i, bararimuha ngo anunuze. Yezu amaze kunywa nya s**i avuga ati: «Vyose birarangutse.» Araheza ajondamika umutwe, aracikana. Kubera ko wari umusi w'ukwitegura, nkako iyo sabato wari umusi mukuru uhambaye, Abayuda rero basaba Pilato ngo bavune amaguru y'abari babambwe, baheze babakureko boye kurekera imivyimba ku musaraba ku musi w'Isabato. Abasirikare rero baraza bavuna amaguru y'uwa mbere n'ay'uwa kabiri muri bamwe babambwe hamwe na Yezu. Bashikiriye Yezu, basanga yamaze gucikana; ntibamuvuna amaguru. Ariko umwe wo muri nya basirikare amusogota icumu mu rubavu, haca hisuka amaraso n'amazi.*

```Iryo ni Ijambo ry'Umukama.```