03/02/2025
Ijambo ry'Imana, indwi ya 4 yo mu gihe gisanzwe co mu mwaka, ku wa mbere, années impaires
IGISOMWA CA MBERE
Ivyo dusoma mw’Ikete ryandikiwe Abahebereyi (11, 32-40)
Ncuti zanje : ikindi novuga ni iki ? Nta mwanya mfise wo kudondora ivyerekeye Gedewo, Baraki, Samusoni, Yefute, Dawudi, Samuweli n’abahanuzi : ku bw’ukwemera kwabo baratsindiye intara z’abami, bakoresha ubutungane, bahangurirwa imihango, bazibira iminwa y’intambwe, bazimya ubukari bw’umurirο, bakira ubugi bw’inkota, barakomantara bahora bagoyagoya, barerekana ubutwari mu rugamba, barirukana ingabo z’abanyamahanga ; abagore bamwe na bo basubira kubona ababo bari bapfuye, kuko bano bazutse. Bamwe bararinze barîcwa nabi, kuko banse gucungurwa, ngo baronke izuka risumbirije. Abandi barabagerageje mu kubashinyaguriza no mu kubakubita, mu kubaboha no mu kubata mu munyororo ; barabicishije amabuye, barabaciyemwo kubiri, barabagerageje, barabicishije inkota ; bagiye kuyerera bambaye udushato tw’intama n’utw’impene, bari baburaniwe, bakabatukagura, bakabagirira nabi ; iyi si ntiyari ibabereye, baguma bayerera mu gahinga, ku misozi, mu masenga no mu manga z’isi. Ariko, abo bose n’aho Imana yabashingiye intahe kubera ukwemera kwabo, ntibashikirijwe ivyo bari bemerewe, kuko ari twebwe Imana yarorereje ivyiza bisumbirije, kugira ngo ntibashikire ubutungane tutari kumwe.
IZABURI 30 (31) 20, 21, 22 ,23, 24
Icit. Mwese abizigiye Umukama, humure, subize umutima mu nda.
Erega, Mukama, ubuntu bwawe ni bwinshi cane, ubwo wereka abakwubaha ; ubwo ugirira abaguhungirako mu maso y’abana b’abantu.
Abo ukiza ubahozako ijisho, ukabashira kure y’akagunge k’abantu, ukabahisha mw’ihema, kure y’uruvugo rw’abantu.
Umukama n’ahezagirwe, kuko yangiriye ibitangaza, akankunda akanshira aho umwansi adashika. Jeho naravyuye akoba ngira nti : “Simba nkiri mu maso yiwe”. Ariko uko nagutabaza, ni ko wanyumvira.
Nimukunde Umukama, mwa bakunzi biwe mwese : Umukama arabungabunga abatamuhemukira, ariko akagerera ku rushi abishima.
INKURU NZIZA
Aleluya, Aleluya.
Nyigisha gutegera ico ushaka, Mukama, nzoheza nzirikane ibitangaza wakoze.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Mariko (5, 1-20)
Yezu na ba bandi Cumi na babiri bash*tse ku nkombe yo hakurya y’ikiyaga mu ntara y’Abageraseni, Yezu ngo abe akiva mu bwato, hazukuruka mu mva umuntu yiziziwe n’umutima uhumanye aja kumusanganira. Yibera mu ruhafu, kandi ntawari agishobora kumuboha, n’aho bokoresheje igitsibo c’icuma. Bari baragejeje kumuboha aboshwe n’iminyororo y’ivyuma, biba ivy’ubusa : vyose yaracagagura akagira ubunywenywe, kandi ntawashobora kumutsinda . Ntabwo yahengeshanya, ijoro n’umutaga yama avugiriza induru mu mva no ku misozi, yongera yitabaguza amabuye. Abonye Yezu akiri kure, yiruka aja iyo ari, akubita inkoro hasi imbere yiwe, arasemerera ngo : “Unshakako iki, ga Yezu Mwana w’Imana Rudasumbwa ? Ndakuzamvye kubw’Imana, ntunyice nabi”. Kuko Yezu yari yamubariye ati : “Wa mutima uhumanye, va muri uyo muntu”. Araheza aramubaza ati : “Witwa nde ?” Wa mutima na wo uti : “Izina ryanje ni Gitero, kuko turi benshi”. Uramusaba kandi ushimitse ngo ntawukure muri ico gihugu. Hakaba hano, ku musozi, hari ubusho bw’ingurube ziharisha. Nya mitima ihumanye isaba Yezu iti : ‘’Turungike mu ngurube, tuzinjiremwo. Arayirekura. Nya mitima ihumanye irasokoroka yiroha muri nya ngurube, nya ngurube nazo ziragundura zirashunguruka, zisuka mu kiyaga, zisoma nturi : zashika ku bihumbi bibiri. Abari baziragiye bafashako barahunga, baja kuranga inkuru mu gisagara no mu mihana ; abantu rero baza kuraba ivyabaye. Ngo baze kurenguka aho Yezu ari, babona umwe yasazwa n’amashetani, umwe-Gitero yari yariziziye ubwiwe, ari àho yicaye, yikwije, aganira neza, agash*tsi gaca kabakura no mw’ino. Noneho abari bavyiboneye babiganira ukugene ivy’uyo yasazwa na shetani n’ivy’ingurube vyagenze. Abo bantu baja mu vyo gutakambira Yezu ngo abavire mu gihugu. Wa muntu yahora asazwa na shetani ngo abone Yezu mu bwato, aramusaba ngo amugendanire. We yamara ntiyakunda, amubwira ati : “Subira iwanyu mu ncuti zawe, ubabwire ivyo Umukama yakugiriye vyose, ku kigongwe afise”. Ni uko aragenda aherako aranda muri Dekapoli ivyo Yezu yamukoreye vyose ; bose rero bagwa mu gahundwe.
